شيخ على ( الزول ده جن اربطوه ) اا
شيخ على ( الزول ده جن اربطوه )
نجم الدين جميل الله
[email protected]
تفاجأ الجميع بتصريحات شيخ الحركة الاسلامية , الذى دعا فيها إلى الرد الحاسم لكل من تسول له نفسه ان يتعرض لشخص الرئيس ! و قال ان السيف فى إنتظار رقبة من يسئى إلى فرعون السودان .. و الله الجن سمح كعب الاندراوة
هو يا شيخ على زولك ده وينو ذاتو … و فيهو شنو لحد ما الناس يشتموه ؟ هو اصلا خلقوه سيئ السمعة و الاخلاق و التصرفات و الكلام … طبعا سيئ الحكم
شيخ على كما يحلو لمريديه تسميته , و على عثمان ابن خفير حديقة الحيوان كما يحلو للمعارضين تسميته كنا ظنناه العاقل فى حوش المجانيين فاذا بحضرته يطلع لينا شيخ المجانين ذاتو . كنا ظنناه العاقل و الراعى فى وادى السقيع فاذا به يثبت انه واحدا من السقيع ليس إلا !
معروف من هم مجانين الانقاذ … الذين قالوا ان التغيير ابعد من لحس الكوع … الذين قالوا ان من خرج إلى الشارع سيقابل بوابل من الرصاص والراجل يجرب … الذين قالوا ان الثورات العربية تدعم موقف السودان … الذين قالوا ان حكومتهم قتل ثلاثمائة الف فرد( فقط) فى دارفور
الذين قالوا ان الشعب يجب ان يعود إلى العواسة و الكسره .. الذين وقعوا إتفاق سلام مع موظف منظمات دولية ( طيب ما يوقعوا سلام مع المهدى ) و القائمة تطول … فمجانين الانقاذ كثر
و لكن ما كنا نجهله هو شيخهم … فشيخ المجانين ظهر اخيرا …
الغريب ان الرجل يهددنا من التطاول على رئيسه الذى لم يترك شيئا لكى يحترمه الشعب السودانى … فالسودان الذى ورثه موحدا واحدا قسمه إلى دويلات . و مجتمعه الذى رباه باسمى الاخلاق خاطبه بلغته الشماسية ( تحت جزمتى … و يبلوه و يشربوا ميتو )
فمن اين لنا ان ناتى بالاحترام لهذا الرجل ؟ رجل تطاول على الحاكم المنتخب و خان الدستور و شرف العسكرية لياتى بالابالسه حكاما على ظهر دبابة ؟؟؟ كيف نحترمه ؟
رجل باع ارض السودان .شرقا حلايب والفشقه و غربا ام دافوق و الردوم .. كيف نحترم بياع الوطن يا شيخ على ؟
رجل ورث البلاد حرة مستقلة و أعاده إلى براثن الاستعمار … قوات دولية فى كل شبر من ارض السودان !! عشرون الف فى دارفور تحت البند السابع و اربعة الاف فى ابيى .. و غدا عشرة الاف فى كردفان و النيل الازرق … كيف نحترم مثل هذا الرجل يا شيخنا
رجل إستولى على السلطة بالبندقية و النار .. و حرق كل ارجاء الوطن من كجبار إلى امرى و بورتسودان إلى الجبال و دارفور … كيف نحترم حارق الاوطان !!
رجل أضاع كل ثروتنا القومية فى تجييش المليشيات الموالية له و سخر كل جهده فى إبادة الانسان السودانى … فقط لانه لم يرزق بابناء فى هذه الدنيا … و ما ذنب الشعب إن هو غير قادر على الانجاب ؟؟
طبعا شيخ على لا يمكن ان يوصينا على احترام رجل بهذه الصفات … إن كان بكامل قواه العقلية
لكن يبدو ان الشيخ جن … و لحق اخوته البقية … ولا الشيخ بكسر تلج ؟
المجنون نصح و جنو النصاح
رجل عهدناه بهدؤء البال .. و صون اللسان . و حسن الكلام لا يمكن ان يقول ما سمعته فاما ان الرجل قد اصابه داء … و من هنا انادى بعلاجه فورا لعل ذلك يعيد لحوش المجانين عاقله … او مسه شئ من الجن فجن … فارجوكم اربطوه لكى لا يصرح ثانية.
غفر الله لك في هذا الشهر الفضيل الاخ نجم الدين كفيت وأوفيت وآصل وننتظر المزيد
قال البشير ـ فيما قال ـأنه سيسلم السودان كاملاً للأجيال القادمة لا ينقصه شبراَ واحدًا
( كبر مقتا عند الله أن تقولوا ما لا تفعلون).
بلا تعليق ..
بلا تعليق ….
بلا تعليق …
أللهم أنى وغيرى صائمون عن الكلام المباح .. حتى موعد الافطار ..
أن تكتب فى ( على عثمان) وموقفك منه وفيه فهذا حقك يا(نجمُ) ( الدين) ولكن
المساس ( بأبيه ) وعمله ومهنته والسخريه من والده فهنا نتوقف !!!.. ما ذنب
أبيه .. كونه عمل (خفيراً ) فالغفر والخفر هم ممن ربوا وعلموا وزرعوا ..
ورغم جلال وعظمة مكانة النبى (ص) فقد ( رعى الغنم ).. فالمهن ليست بالعيب
فأكرم من مشى على الارض رعى الغنم يا (نجم) …
( فما الفرق بين رعى الغنم وحراسة حديقة الحيوان ) ..
تكلم فى الرجل فى وفى ظيفته المهنيه وقل فيه مالم يقله الامام (مالك من ذمٍ )فى الخمر
فالتجاوز غير مقبول فقد يكون فى (أبيه ) فى رحاب ربه فما ذنبه؟ .. لماذا نُقحم
العائله وكراماتها وكبارها فيما لا شأن لهم به ..
وكل رمضان ونجم الدين بخير ..
الجعلى البعدى يومو خنق .. من مدينة الدندر ولاية سنار
يا شباب ما تتزاعلو ساكت .
فهناك بعض الحالات الأولاد بيجيبو فيها الهوا لأبهاتهم ، خاصة عندما يثري الشخص ثراءا فاحشا من وراء السُلطة بعد أن كان معدما .. أنا سمعت شيخ علي ده ما كان عندو بيت .. ومكتبو كان فاضي ما لاقي حق الإيجار لأنو كان محامي فاشل على ذمة ناس جريدة ألوان .
وقروش الدنيا الكباها البشير في حوش ودبانقا في الكافوري .. ومسجد أيا صوفيا القومو لينا في ركن حوشو وقال عليهو (وقف) لأبوهو .. أها البعزقة الحاصلة هناك ما كان عمرت لينا مشروع الجزيرة صُرة اقتصاد السودان ؟؟
والوقف اللي بالشكل ده ما ظنيتو يرضي رب العالمين .. والله يرحم موتانا وسائر موتى المسلمين .
الأخ كاتب المقال نوافقك على كل ما كتبت وتكتب من نقدٍ لاذع لهؤلاء الخونة البلهاء، لكنني أخالفك تماماً في الإشارة إلى أن الرجل كان ابن خفير حديقة الحيوانات، يعني أيه كان خفير حديقة حيوانات هذا لا يزيد الرجل إلا عزةً وفخراً لأن أباه من العمال المكافحين الذين استطاعوا تربية أبناءهم من عرق جبينهم وأمثال هؤلاء نحن نفتخر ونعتز بهم أيضاً بغض النظر عن اختلافنا مع هذا المدعو علي عثمان لكن يجب علينا أن لا نقحم مثل هذه الأمور في صراعاتنا،،،،،،،،،،،،
عـيب كبير منك يا نجم الدين انك تتعـرض لوالـد السيد / على عثمان طه . كل المهن شريفة ولا يجـب ان تصل الى هذا الدرك القـبيح ويجـب أن تعـتـذر كتابة على هذه الخطـئية التى افـسـدت ما كنت ترمى اليه .
هسع لو الجيش و الشرطة و قوى الامن الاخرى واقفة فى الحياد و بمسافة من كل القوى السياسية و الحزبية يعنى بتخضع للقانون يقدر زول يقول الحسوا كوعكم او بلوه و اشربوا مويته او ح نقطع الاوصال و الرقاب او ح نشهر السيوف او او او يهدد و يتوعد زى ما عايز؟؟؟!!!! لا اعتقد ان هذا سيحصل و اذا حصل ح يكون كلام هوا ساكت و مدعاة للسخرية و الضحك!! هسع فى الدول المحترمة و المتطورة و الفيها سيلدة قانون و حرية و حقوق انسان يقدر زول يقول كلام زى ده؟؟ ما طوالى ح يحققوا معاه و يخضع للقانون و القضاء!!!! بعدين التهديد ده اولى بيه اعداء السودان مش المواطنيين!! و بعدين هل يعتقد اهل الانقاذ انهم اكثر وطنية و تدين من باقى اهل السودان لا والله و الف لا!! و اذا عندهم وطنية بحق ما كانوا اتمسكوا بالسلطة و لو ادى الى تدمير و تمزيق الوطن و لما عملوا مؤتمرات صلح خارج السودان و يشركوا فيها اجانب اكان دول شقيقة او غير شقيقة!! كانوا عملوا مؤتمر قومى دستورى داخل الوطن و ما فيه اجنبى واحد و ما فيه املاء من احد من الاحزاب السودانية و كان الناس اتوصلوا لاتفاق الحد الادنى و اى زول كان لقى حقه فى وطن واحد حر فيه ديمقراطية و سيادة قانون و عدل و مساواة بدون تفرقة دينية او عرقية او جهوية او قبلية وطن السودانوية فيه هى الاساس و محروسة بالقانون و الدستور و الحرية!!! والله ناس الانقاذ ديل ما يعرفوا الف باء سياسة وهم مجرد حكام و ليسوا قادة انها ثورة الخراب الوطنى وليس ثورة الانقاذ الوطنى و يا فرحة اعداء السودان و الاسلام بيكم!!!!
يااخوانى مااعتقد انو الكاتب قاصد حاجة حين اشار الى مهنة ابو على عثمان. لكن انا محتار ليه قفلوا جنينة الحيوانات ؟؟ أوعى اى زول يقول لى مظهر حضارى والكلام السازج ده .اجمل مافى اهلنا السودانيين سماحتهم واصلهم الطيب ..
مع شكرى للكاتب
لقد أفسدت أيها الكاتب مقالك بإصرارك على إدخال مهنة والد علي في الموضوع فاختلافنا مع الرجل لا يجيز لنا أن ندخل أبيه ومهنته موضع الصراع ..
ثم ثانياً العمل ليس عيباً فالرعي كان مهنة الأنبياء …
أنا لست معاك بتاتاً في فيما ذهبت إليه بشأن مهنة والده وأرجو أن يرقى خطابنا لما هو أسمى من المكايدات الشخصية …
ودمتم ..