أحمد محمود كانم
الشعب قرر وانتهي
واحتج في عز الضحي
قال ليك تسقط يا البشير
جفت صحايفك وانطوي
لملم صعاليكك وطير
خلينا أرحل ياخ كفي
صابرين عليك تلاتين خريف
رغم المواجع والأذي
عسكر مؤدلج بالدجل
بالسيف حاكمين واللظي
دائما شعارك ضرب نار
وخلف دور .. طابور صفا
ما شوفنا ليك غير الرقيص
و وعود سخيفة علي الهوا
يوم قلنا ليك دارين رغيف
ومعاه بنزين والدوا
حركت فئرانك وجيت
رصاص وبمبانك بكي
ما خوفنا واتجابنا يوم
ما فينا زول خاف واختفي
اقسمنا تسقط يا سخيف
لاهاي تناديك والردي
لا طاعة لا سير لا حوار
ما عاش من طاع واستحي
لو جيبت روسك والمغول
أو كل تجار الوغي
أو عدت للماضي السحيق
وجلبت عنترة والرحي
برضو الشعب قرر وقال
تسقط وتدفن في الثري
#تسقط _بس
19/1/2019
