قصيدة جديدة من ” قرفان خالص ” لدعم الانتفاضة
هذه قصيدة جديدة مني لدعم الكتاحة السودانية وجمعة لحس الكع القادمة باذن الله
عفارم تمام .. صاح الكلام .. كده يا شباب
كتمت خلاص بلغ النصاب
نفد الصبر والجو كتم.
وجيبك نضف
وطنك نشف
كتمت سخانة الف الف
اغضب وثور
قوم وانتفض
قف وانتصب ..
لا تستكين ..أو تستخف
للحالة والعيشة القرف
نفد الصبر والجو كتم ..
جيبك نضف
وطنك نشف
لو بكرة عن وطنك سئلت
امام عيالك تنكسف
مهما تبرر او تقول .. ومهما تصف
حتنكشف
لا تنحبس للحسرة والالم المرير لا ترتجف
فك البلف
كتــــــــاحة تكتـح
ما تخلـــي تك تح
غبارها يلفـــــــح
تكشف وتفـــضح
للدمعة تمــــــسح
للظلم تكــــــــشح
حرية تشطـــــــح
في وطن مشــلح … حضن العذاب
عفارم تمام … صاح الكلام كده يا شباب
كتمت خلاص بلغ النصاب
*******
كتاحة كتاحة
اعصار ودوامة
طلاب شيوخ ورجال
نسوان بنات اطفال
الناس هناك لآمة
ام در وارض القاش
جرافا ديامة
كتاحة قبلية تبرق أمل وشعاع
تحمل صراخ الجاع
تهتف بصوت مسموع .. عن ظلم ساد أنواع
تبكي الصرير المر.. من شدة الأوجاع
كتاحة تلغي فساد .. وتقلع قلع من باع
تنقذ بلد قد ضاع . .. من خائنا جعجاع
كتاحة غربية … ومرات جنوبية
وفجأة شرقية ….. تقلب شمالية
شايلة البرق والرعد
شايلة الأمـل والوعد
تحمل دعاش وعبيـر
لثورة التغير ..كتاحة للتغير
كتاحة تحت وفوق .. تكسر قـيود الطوق
تقذف يمين وشمال… تنسج خيوط الفال
كتاحة للتعبير عن ثورة التغير
الحكم ما هو خلـود
بكرة الظلم حيفوت
الكبت والجــبروت
لو كان دوام لســـواك
ما كان بترجع ليك !!
والله أحسن ليك … فالنفس لوامة
حسرة وأسف وندامة
والحالة مش دوامــة
كتاحة كتاحة… إعصار ودوامــة
طلاب شيوخ ورجال
نسوان بنات وأطفال
ام در وارض القاش
ساحات هناك لأمـــة
جرافا ديامة .. الكل نزل وأجاب
عفارم تمام …صاح الكلام … كده يا شباب
كتمت خلاص بلغ النصاب
*************
كتاحة كتاحة … جوة البلد لافة
يا العسكري السراق
مين فينا شاذ آفاق !!
ياالكاذب الافاك .. لا خلقة لا أخلاق
مين الاباد شعــــبو ؟؟
مين الخســر ربــو ؟؟
مين الكــلام كذبــو ؟؟
مين الخلف وعدو ؟؟
مين البخون للـعهد .. للكلـمة والميـثاق؟؟
مين فينا شاذ افاق !!مين الكلامو نفاق ؟؟
ياالكاذب النقناق .. لا خلقة لا أخلاق
قول ياا
اسم مكتوب .. في المحكمة العلياا
يا متهم مطلوب…… لعدالة دولياا
يا هاربــا شــارد .. في هذه الدنياا
وينك تمش حتروح ؟؟
من رب عوضيــــاا ؟؟
انت الشذوذ نفسو لو تم وصفك بيه
اتبرا منك وزاق !!
مين فينا شاذ آفاق!!!
والكل منك ضاق
طبعك كضب ونفاق ..اصلو الطبع غلاب
عفارم تمام ..صاح الكلام ..كده يا شباب
كتمت خلاص بلغ النصاب.
قرفان خالص
أخخخخخخخخخخخخ
[email][email protected][/email]
لك التحية والإحترام إستاذ قرفان خالص
والخزي والعار لسارقي قوت الشعب
الخزي والعار لشاتمي الثوار بشذاذ الآفاق والفقاقيع
الخزي والعار للكيزان
الخزي والعار للجرذان
ولانامت أعين الجبناء
وإن عدتم عدنا
لك التحية ولكل الشرفاء
عفارم عليك قرفان….وطلعت من فحول الشعراء علاوة على أنك عمدة من أعمدة الإنتفاضة! …..بس أبشرك كتاحتنا لا تبقى ولا تذز منهم أحدا.
اديهم في التنك ياقرفان
اقتبست قصيدتك وحتلقاها في العنوان دا؛http://www.facebook.com/username/?from_page=103460966464832#!/kattttaha
تعال احضر معانا الحلقه التانيه من مسلسل تامبيره والمرق
تامبيره و المرق
الحلقه الاولي
مشهد اول؛
وديده مرة تامبيره قاعده في الهول مع دلهانه مرة التمبرلي
وديده مشتته اللبس نوعا ما (تم حذف وتعديل بعض المشاهد حتي يناسب المسلسل كل الاعمار من سن سبعه لي سبعه وسبعين)
دلهانه ماسكه الريموت وفاتحه قناه الفطيره, فجاءه قفلت التلفزيون
وديده؛ مالك يادلهانه؟
دلهانه؛ قلبي انقبض
وديده؛ من شنو؟
دلهانه؛ خايفه الحصل للقذافي يبقي علي التمبرلي و تامبيرا
جنجنجنجنجنجنجنجنجنجنججنجنجنجنججنجنجنجنجنجنجنجنننج
موسيقي وغنية المسلسل؛
تامبيره بت الحوت باكر تتخنق وتموت
من يوم جطا البحر والبر , السمك جهزلك التابوت
مرقا كبير وقوي شايالنو حله شفوت
شايلنو شان تركب
ماتبقي تتكبكب
اركز قدر قولك
او ابقي زي زولك
في المجري دخلوا الحوت
تنتررررررراررررر نتمررررراارررررررررررررررررررررررر..
قرفان خالص لك التحيه ياثوري يا رائع ونشكرك علي الجهد العظيم والشكر موصول ايضا لناس الراكوبه والمعلقين والقراء الكرام الثوريين كل منا يعمل مجهوده لدعم الثوره و الثوار بكل مايملك لازم ياشباب نخرج يوميا في كل المدن وخاصه الخرطوم ضد هذا النظام المجرم
شكرا قرفان خالص التحية ليك ولكل الشرفاء من ابناء وطنى العزيز
alf 1000 tamam tahia lak garfan
كتمت خلاص وبلغ النصاب-
واكسح امسح قشوا وما تجيبو حى يعمل خراب..
والتحية لك ايها المعلق والشاعر المميز
…مع انو الواحد ما بحب الشعر واللفة دى وكدة ,لكن قريت القصيدة كلها , كويسة وهبشت اوتار ثورتنا , وعزفت كلمات حلوة , وخلتنى فرحان خالص..لك التحية وكدة , وعقبال القصيدة بعد الانتصار الكبير..منتظرنك ..ياقروفة.
اخي قرفان
لا املك سوى القول ازال الله قرفك بزوال هؤلاء
وبرضو كتاحة غربية … ومرات جنوبية
وفجأة شرقية ….. تقلب شمالية
ســــــــــــوداني من الشطر الجنـــــــــــــوبي
التحية لأخونا قرفان على القصيدة أولاً وثانياً على مثابرته في التشجيع وإنتقاد زبانية المؤتمر العفني الحرامية تجار الدين ..
ياااااااااااااااااااااارب يتم الخلاص لانو خلاص مافضل صبر علي الناس ديل …شكراًجزيلاً قرفان خالص وعقبال ما تغير اسمك قريب الي فرحان خالص وربنا يجيب يوم الفرح قريب
قصيده مفعمه بالوطنيه و بحماس الثوره شكرا لك يا اخ قرفان علي هذه القيده التي اوفت و انجزت
شكرا يا قرفان خالص، قريب اسمك ح يتغير ويبقى فرحان خالص
من يوم إنت جيت وقعدت فوق صنقورنا
إتباقصت الكسار وبقت ام شعيفة فطورنا
كل شيتا غِلا وعاف اللحم لي قدورنــــــا
من كتر النبيح صبحن عرايا سدورنــــا
قال شذاذ أفق !!! تدورنا أو ما تدورنا
كتاحتنا قامت ودور عليك بابورنــــــا
جائر ليك زمن عقبا تجربوا جورنـــــا
وان كتر المحاص بنواسي بي ساطورنـــــــا
لك التحية أخي قرفان والله ما قصرت ورغم إنو دة واجبك تجاه الوطن لكن أنا متكيف منك شديد وليك مني هدية وإذا ما أستشهدنا أكيد حنتلاقي وحيجي يوم نلاقي فيهو كل الأبطال فلكم التحية ووفقنا الله وإياكم في جمعة الكتاحة !!
سلمت كل الكلمات الثورية
سلملت كل الايدي البيضاء الممتدة مع الثورة
ونتمنى الانتصار قريبا جدا جدا جدا
ولكم تحياتي يا ثوار
سلام سلاح قرفان
وسلام لكل شذاذ الآفاق
ولابد لليل ان ينجلي
ولا بد للقيد ان ينكسر
روعة يا قرفان خالص
أهم شيء الـ (أخخخخخخخخخخخخ ) الفي الآخر
عانت إن شاء الله
عفارم عليك يا قرفان
مبروك لأخى قرفان خالص بهذه القصيدة الرائعة ونشكر الراكوبة بالأخراج الممتاز للقصيدة لمزيلنا المعلق قرفان خالص زد الشباب بالحماس يا قرفان هنيئا لك أيها البطل المغوار سير سير ياشعب حتى النصر وخلع الظلم من جذوره ..