الهادي بورتسودان
بالنسبة للجدل الحاصل بسبب قروب شركاء التعدين .. المهندس مبارك أردول مدير شركة موارد التعدين اذا ما كان قد أخطأ أو أرتكب جريمة جنائية لما طلب من الشركات تتبرع لدارفور وحدد المبلغ ويسلموها لزول من مكتبه.
مبارك خرق قواعد السلوك المهني السليم breach code of conduct مبارك ما أستوفى معايير الإلتزام والحوكمة السليمة Compliance & Corporate Governance standards في الاساس لما خش مع الناس في قروب زي ده
.. لأنه لا يعقل أن تكون مشرف مسؤول عن موارد الدولة تكون في قروب باسم المسؤولية المجتمعية تملي على الناس المسؤول منهم شروط الدعم المجتمعي .. التصرف قطعاً فساد ما فيها أتنين تلاتة مهما كان المبرر.
لكن السودان مافيه قواعد للحاجات الزي دي .. زي الحاجة البتحصل بره لما يقول ليك وزير بريطاني ساق صاحبه في الطيارة أو قبّل زميلته والصحافة تسـلخه ويستقيل .
قواعد الحوكمة والألتزام دي ياها المخوِّفة العالم مننا .. وخير مثال ليها الخوف من بنوكنا في موضوع التحويلات…
في أكتر من مرة قلت آفتنا في البلد دي إدارية ما آفة كيزان ودولة عميقة وبس .. الجوطة بتحصل لأنه تأهيل أداري مافي .. في بيئة خدمة مدنية اقل ما توصف انها فوضوية .. عشان كان بتشوف التأخير والمحركة والألتفاف في تطبيق القرارات .. وبسببها الإصلاح ماشي أقل مما أنت متوقع بكتير…
كأن أوجب على حمدوك وهو زول فاهم يعني شنو أدارة وحوكمة يبدأ من البداية في وضع القواعد دي وعندك معهد السودان للعلوم الإدارية لو ما عارف تتصرف كيف كان بختوها ليك لكن خالد سلك .. مناوي .. أردول ومدني عباس .. ألخ ديل كل عمرهم قضوه في النضال ومناهضة النظام السابق كأن على الأقل تدخلوهم دورة إدارية قبل تدوهم مناصب .. وهسه مافات كتير
….
في الدفسيبة الحاصلة دي مرات تتكلم مع زول بإعتبار أنو مستشار مسؤول أو في مكتب مسؤول .. يقول ليك أنا قريب من المسؤول الفلاني تسـألوا عن مسمى وظيفتو يرد ” لا ياخ أنا بساعد من بره بره ساكت ولا بحب المسميات ” .. غير أحتضان وخلط شديد تلقى المكتب مليان بالراكزين والراكزات ما تعرف الشغال من الما شغال تقول نحن في مواكب
..
كسرة:
حبيبنا أردول يا ريت كلامي ده تمر عليه .. أنا واجعاني حكاية (يسمى و يدعى) البتوصف بيها الناس البنتقدوك ما بترفع من قدرك ولا بتأيِّد حجتك : جربتها مع غازي الريح وتوم منعم وأسعد التاي وهسه مع سهير عبد الرحيم ..
فيسبوك
هذا الرجل منذ ان اتت به المقادير فهو موضع شبهة ولكن ما يحيرنا صمت السيد رئيس الوزراء وغضه الطرف عنه وكأنه هو يبارك افعاله وتصرفاته وحتى السيد المراجع العام ابعد من منصبه بسبب ان يتم التغطية على مثل هذه التصرفات فالجميع يخوض مع الخائضين وستكشف الايام حجم التعدى على المال العام في زمان من يدعي النزاهة وعفة اليد واللسان ولكنه في الحقيقة غارق في غيه
حتما سوف تحين ساعة الحساب والعقاب فالليل يعقبه النهار
غض النظر عن حسن النية يجب علي الوزير مساءلة مبارك اردول من هذا السلوك فهو موظف دولة وليس عضو جمعية خيرية ليقوم بجمع أموال من الموظفين تحت ادارته وهذا مخالف لقواعد السلوك ويعتبر نوع من المحاباة لأن الموظفين سيدفعون لإرضاء اردول المدير وليس بقناعة منهم.
انه ليس سلوك مهني غير سليم بل فساد على عيون الاشهاد حركة اي أموال تكون الحكومة او موظف حكومي او اي جهة حكومية طرف فيه بغير الإجراءات المحددة قانونا ونظاما يعتبر فساد يعني سرقة ممكن اردول ده فاكر نفسه بشتغل في مزرعة ابوه
انا البعرفو واللى هو الصاح انو مفروض تكون الاموال كلها تبع الخزينة العامة والداير يتبرع يتبرع من جيبو ولكن شكلو انو التجنيب تبع الكيزان للاسف لسه مستمر ويقولوا لك انحنا بنحارب فى الكيزان طيب ده ما شغل الكيزان انتوا بتسوا فيهو عيان بيان ومن غير حياء الواحد ما سك الوزاره جعان فقران ويقولك انا اتبرعت بكذا من اين لك هذا غير انه تجنيب والتجنيب سرقة من اموال الشعب لو ما عارفين اعرفوا تحاسبون عليها يوم لاينفع مال ولا بنون .
المناضل اردول جاته ليلة القدر في صمة خشمو عشان كده دي فرصة يكون مغفل لو فوتها.. سلوك مهني شنو الداير تذكروا بيهو ده زول شغال حمرة عين مع جلابة الدهب ديل يقول للشركة الفلانية عينو الراكز قريبي ده ملاحظ عام يعينوه وهو نايم في بيتهم مكافأة لنضاله واتبرعوا لقبيلة فلتكان يتبرعوا طوالي خوفا من الغاء رخصة تعدين الدهب
الأخ الهادى لقد أصبت رأس المسمار بتنبيهك لمسألة الإداره. ورثنا خدمه مدنيه مشهود لها ولكن التطهير والتمكين أحدثت فجوه فى إنتقال الخبرات وأصبحنا فعلأ نفتقر للخبرات الإداريه. على المختصين إقتراح الحلول مثلا بإلزام الإداريين بكورسات مكثفه فى الإداره فأمامنا الإنفتاح على العالم بكوادر تنقصها الخبره من أولئك الذين سيحلون محل الذين تمكنوا بعد كنسهم (حالة أردول مثالا). نتطلع لنهضه لابد وأن يتوفر للقيام بها كادر مؤهل .
ياجماعه انتو خلاص نسيتو قبل كم شهر كدي هذا الفاسد قام بتوزيع ٨ مليارات علاوات لبعض موظفيه دون علم اي جهة حكومية والدنيا قامت وتوقعنا مسائلتة من ريس الوزاء ولكن كان شئ لا حصل؟ ماذا تتوقعون منه؟ وحينئذن قالو بدواعي العنصرية؟ واهو رجع تاني بكل وقاحه يتصرف في الاموال العامة؟ غايتو ….كيزان فاتو ..كيزان جو….وان واثق ..اذا هنلك مراجعة ..يكون تبرع للمرتزق من اموال التعدين؟ ….مافي حد بحاسبة ..فاليتصرف كما يشاء ؟ غايتو ارواح الشهداء ضاعت بكل حزن في وجود هؤلاء الحقراء الفسدة……..توفوووووووو عليكم؟؟؟؟