بعض من تراث سوداني
افرحني الاخ عبد الرحمان فضل الله من السعودية بخطاب الكتروني جميل . تطرق فيه الي بعض التراث السوداني . واحب ان اشرككم في جزء من الخطاب . وتذكرت بعض المشاركات في موضوع اثاره التشكيلي والاديب الاخ عبد الله الشقليني قديما .
اقتباس.
أهلنا الشكرية كانت لهم ثارات مع المهدية . كان ود تورشين يؤكد للجماعة ، مع اقتراب جيش كتشنر من امدرمان ، ان يطمئنوا لأن نبي الله الخضر قد ابلغه بأن ارواح جيش كتشنر تحت فروته أي فروة ود تورشين . وعندما حمي الوطيس فى كرري هرب ود تورشين تاركا أهلنا يواجهون المكسيم . قال الحردلو : تكضب فى الخضر من الكضب ما بتروى / ما قلت الترك ارواحا تحت الفروه / درب السبعتين سويتو ليله وسروه . وكان عبدالله شقيق الحردلو محاربا فى جيش محمود ود احمد . وهزم جيش محمود ود احمد فى واقعة النخيله قرب عطبره . وفر الكثيرون من جيش الانصار ومن بينهم عبدالله شقيق الحردلو . وتعليقا على انكسار محمود ود: يا عبدالله اخوي سويتو الدحيح والدي / قطعتو الاتبراوي لا سعن لا ري / قايلنو تكسير خمامير وشراب عجينا ني / دا طرش الحديد الجانا من بومباي . خمامير هي جمع الخمارة وهي وعاء فخاري يخمر فيه العجين اذا نسيت يا شوقي .
________________________________________
شوقي بدري
رفاعه والبطانه ووادى عبقر السودان .
قبل عدة شهور سمعنا عن مسئول انقاذى . يطالب بقفل البطانه وان اى انسان من خارج البطانه يجب ان يحصل على فيزا دخول والا سيعاقب بالسجن والغرامه او العقوبتين معاً . وسمعت عن مسئول انقاذى آخر يعترض بان رفاعه لا تستحق كبرى . وهذا المسئول يحتاج الى تبديل عقل . فرفاعه لا تحتاج فقط لكبرى بل لقطارات انفاق من كل مكان فى السودان . لكى يتواصل السودانيون مع تراثهم وادبهم وتاريخهم .
حتى نحن اللذين نشأنا فى امدرمان . نتنفس البطانه ورفاعه لان من خلفونا وربونا نشأوا هنالك . وما كون شخصيتنا ووجداننا هو قصص البطانه وادب وتراث البطانه . يكفى وجود آل ابو سن فى البطانه وروعه آل البنا لكى يغترف الناس من ادب البطانه قصصها وتاريخها .
من ابطال السودان واهل البطانه اولاد فتر اللذين سارت بذكرهم الركبان ونسيهم الناس الآن . فحتى بعد اعدام ملك سنار على الخازوق . وخوزقت ود رجب الذى مشي بثبات وبسمه نحو الخازوق وهى موته بشعه تأخذ فترة طويله قبل ان يموت الشخص متعذباً . والخازوق هو عود طويل يدخل فيه الانسان , لم يتوقف اولاد فتر من المقاومه واليهم يرجع المثل
الباشا البحكولوا شن حولو وشن طولو حت شرق الله البارد هولو . وبعد نضال طويل قبض عليهما . وعندما كانوا يعدون لهم المشنقه وعبد الله ود فتر يجلس مستخفاً قال اخوه الماحي باستخفاف اكثر وهو يرى اصطفاف العسكر . آ عبد الله قوم اتعلق خلى العسكر يتفرق . ولهذا كان ابطالنا يذهبون الى المشانق بثبات كما عمل رجال البطانه .
حتى الكبابيش اللذين اثروا غرب النيل بتاريخهم وادبهم وتراثهم أتوا من البطانه . وقصه رحولهم ملحمه كان يجب ان يعرفها وتدون لطلاب المدارس . فعندما فكر الكبابيش فى الرحول والتحالف مع الجموعيه فى الغرب لايجاد موقع قدم فى غرب السودان . لم يتفق شيخا القبيلتين . وعندما اراد شيخ الكبابيش الرجوع الى الشرق استفسرت ابنته الصغيره عن السبب فقال والدها لانه لم يتفق مع شيخ الجموعيه . فقالت ابنته بأنها وصديقتها الجديده ابنه شيخ الجموعيه متفقات . فاعاد الشيخان نقاشهم بصراحه مدفوعين بروح البنتين . ووضح ان الجموعيه كانوا يتخوفون . انه فى حاله الحرب ان ياخذ الكبابيش مراكبهم ويعودوا لشرق السودان . وان الكبابيش كانوا يقولون ان الجموعيه اصحاب خيل وقد ياخذوا خيلهم وينطلقوا لحالهم . فاتفق الجانبان على حرق المراكب والسروج . وتحالفت القبيلتان وصار الكبابيش اهل الدار . منذ طفولتنا نسمع قول الحردلو .
الخبر الاكيد قالوا البطانه اترشت .
وكنا نسمع الكبار يرددون هذه الجمله عند اى فرح او زواج او بشرى وحفظنا منذ طفولتنا ما قيل فى مدح ابراهيم بك ابو سن وكنا نتمنى ان نكون مثله .
جيتك بامتثال صحبى المتمم كيفى
ابراهيم ثبات عقلى ودرقتى وكيفى
سترة حالى فى نساي جناي وضيفى
مطموره غلاى مونه خريفى وصيفى
هل مثل هؤلاء الرجال يغقلون بيوتهم اوديارهم امام الآخرين . ولا خوخت شم الفهم والكرم .
ولقد قال الحردلو
الشم خوخت وبردت جرادق الحره
وشوف عينى الصقير بجناحو كفت الفره
تلقاها ام خدود الليله مرقت بره
الحردلوا مثل اهل الباديه احب الطبيعه ودعا لرعايه حيواناتها وام خدود هى الظبى . وحالنا اليوم نحن كحال فرخ الاسد الذى اتوا به مجلوباً للبيع فتألم الحردلو وقال كما اذكر ..
جابوك للبلد ساكت درادر وضيعه
وام فى الحريم مرتاً ولى وسميعه
ونترت ناس ابوك اللرجال لويعه
وات اكان كبر جنباً تقلب البيعه .
فى موقع سودانيات بدأت مجادعه . ثم استفسر البعض عن مقدره شوقى وعدم تمكنه من المشاركه . فكتبت هذا الكلام . ولى قصائد اخرى كان يقول لى الشاعر محجوب شريف انت يا شوقى الكلام العجيب ده بتجيبوا من وين والمفردات دى عرفتها كيف ؟ ولا بد اننا كسبناها من من ربونا واللذين نشأوا فى البطانه . وهذه بعض المشاركات . وكل هذا الكلام من الذاكره فقط .
الشقلينى ورفاقتو ادونا بس ضحويه
والضاق الحرب مابتخوفو الصقريه
البقرطع ود العود مابتغلبو البقنيه
كيف يغلبنا الكلام والقومه امدرمانيه؟
…………….
الصقريه .. مبارزه صوريه بالعصى
ود العود .. العرقى
عكود , لومنا ما بتشيلو حت بشاريه
ما قريت الخبر إلا وخرى عشيه
والمره دى امسحها لى فى وشيا
ام صُقع اريتا بى رُقابتن مبريه
الجمال البشارية اقوي الجمال للحمل
شغلتنى هذه الايام الجيوب الانفيه كما يقول اهلنا فى الباديه ام صُقع ويعالجوها بعود سنين .
الشرح ما ليك يا عكود
انتو اهل الفهم والجود
لكن للما بعرفو كد العود
والفراش بدايتو كانت دود .
كد العود … علاج للبطن
انحنا بحر غاير ما بتحدو الا صريمه.
لكن لعكود بس اقل من تخريمه
جود كرم وبشاشه , فيكم المحريه
بنجيكم خفاف لا سرج لا حويه .
الى الطيب اقروب واقروب هو الرجل الذى يمشى مع الراكبين .
عصر السرج ما بوجع العرقوب
والزول المحدر ما بذكروهو الطوب
والمهله والوقوف دوام طلب اقروب
خلفه كراعو الدرشي بقول الروب
المحدر هو الجريح المسنود او الانسان المريض جدا
الدرشي … جمل الركوب القوى
الطوب … المقصود به القبر
—————————————————————————
( بسبب تداخل الاخ الطيب بالانجليزيه اقول له . )
الطيب اخوى ماهو ده المطلوب
والانقليزى ما ركوب عنافى بالمقلوب
عارفك وخبرك منى ما محجوب
( خلفة كراعك الدرشي بقول الروب )
العنافي هو الجمل
الأعزاء
سارة ، قوت القلوب ، الشقلينى ، عصمت ، عكود ، أبوالحسين ، الطيب ، ومهند
لكم التحية .
الحقيقة أننى لم أعش فى السودان طويلا. ولكن أمدرمان كانت لا تزال تحتفظ بالكثير من بداوتها . ومن يبحث عن البداوة وسماحة أهلها يجدهم حتى فى داخل أمدرمان .
وفى الاجازات خاصة بعد اكمال الثانوية كنت أتواجد فى المشاريع الخصوصية . وأخرج فيما يسمى بالدعاية . وهى استقطاب البدو من غرب النيل الأبيض بجمالهم وأغنامهم وفرقانهم فى عملية جنى القطن .
وحتى فى الاجازات من أوربا كنت أقضى الوقت مع كمال ابراهيم بدرى فى مشاريع النيل الازرق واختلط بأهل البطانة . كمال رحمة الله عليه كان يحب عيشة الخلا . وعن تلك الحياة قلت قديما :
سمح السمر تحت البروش تحت الكرب
فوق البروش فوق الجريد الفوق الكرب
وست النهيد الواقف تقول قاصد حرب
وشية صيد والموية باردة من القرب
الكرب : بكسر الكاف والراء قماش العمة
الكرب : بفتح الكاف والراء ، قوائم قصيرة بثلاثة أرجل فى شكل شعب مقلوبة تغرس فى الأرض لحمل الجريد ، وهى الأغصان التى تشكل سرير الرحل .
نشأت بينى وبين الشيخ المنشلخ صداقة وحب وكاد أن يقنعنى بأن أترك حياة المدنية وأستمر بالعيش معهم وأنا وقتها ابن الثامنة عشر . شقيقه الشيخ جار بيضو كان له أكثر ابناء الفريق أدبا ومعقولية ، وله بنات رائعات الجمال .
المنشلخ قال اختار كان سيب كان بكرى
جار بيضوالفارس بناتو شغلن فكرى
وبيت برش المطرة التقيلة ما توصلنى
وسيدابا عريض يشيلنى أنا والكاتلنى
السيداب : سرير البدو الرحل
ود تمنطاشر شن عرف شن يدرى
فكرى كان بدلة وبنطلون وسديرى
واتكتب الندم لمّن اقع من طولى
ما بنخبر العديل لمّن يدقو الرورى
دق الروري هو صياح النساء عندالموت
أظن أن وجود شقيقى عبدالمجيد محمد سعيد العباسى فى فترة دراسته حتى المرحلة الثانوية فى منزلنا قد أثر علىّ كذلك . والشيخ محمد سعيد الشاعر الفحل كان منزله فى أمدرمان هو بيتنا . ولأننا بمثابة الأهل فلقاد شاركناهم وشاركونا أفراحنا وأتراحنا . كما شاركنا حمودة أبو سن السكن . فرفاعة موطن آل بدرى الرباطاب .
وقبل أن أبلغ الخامسة عشر كانت لى سكين ضراع مثل عبدالمجيد ، وبل فرار وعكاز وأنا فى داخل أمدرمان . وأخيرا امتلكت سكين وجاهة أفاخر بها ، لازمتنى فى الطيارات وفى أوربا الى أن سرقت وقلت :
أبنوسن سمح ومنقاشا نجيض سرقوها ديك الخوسة
ياى قندران شارب ملح فى أمدر صنعتا مخصوصة
جفيرا حر سمح شبعان مردس عرد , وجلد بامسيكا
متمّنة وقنطرة فضة ، والعاج ضفر وصايا ومو توليفة
الخوسة : السكين
المردس : بضم الميم
والعرد : بفتح العين والراء ، نباتات تصبغ بها الجلود
بامسيكا : هو التمساح ، اشارة الى المسك
المتمّنة والقنطرة : فى نهاية العود لمسك النصل
العاج : ما يلتف حول الذراع
عن امدر قلت
يابلدا ذي نهدا ما عرف شقريب
حلوه ذي الحجري الفي الشلوح عسليب
فيكي العليل بيطيب وللمريض محريب
ساكن البقعة ابدا ما بضوق المر
وزول امدر كان ما نفع ما بضر
الشقريب هو انفطار الجلد بسبب الترهل او الحمل
الحجري هو الشمامة او البطيخة في اول الشلح او العرق
الشقلينى ، أجمل كلام وكت ود آمنة يشكّر زولو
ما خلاّلوم فرضــــا ناقص لا يقول ولاّ يقولوا
نضما سمــــح زى مهر السبق مربّع حولو
القول والشكـر الزول ما بشتــرى بى عولو
تلاتة خصــال مؤكد فى رفيقـى بعـاد
الخوف والبخــل وطمــع النفس فى الزاد
ات بتسيـها يا البتقضـــى كل أغـراض
ضبح أم سـرى ودفع النقى بوعقــــاد
ودآمنـــــة
أم ســــرى : الناقـــة
النقـــــى : الجمل المختار المنقّــــى
بوعقـــاد : مربوط عليه تميمة أو حجاب وهذا يخص خيرة الجمال .
العزيز أبوالحسين
أريتك عافية
ناغمونّا الكرام يسلم أبوك يا حسين
انتو الأصل والحاجب ما بيعلى العين
من صغر عارفين سيرة الرجال للحين
متل الفارس العلى بنات فريقو أمين
أنا التوب العشارى الباهى زيقو
أنا فرج الرجال وقتين يضيقو
أنا المأمون على بنوت فريقو
أنا الدابى ان كمن للزول بعيقو
أنا الجن المخالتاهو أم غزيّل
أنا رحل الكحل وكتين يميّل
هذا والله أجمل ما سمعت فى الفخر . وينسب لود الفراش فارس بربر
زكر بابكر بدري ان عمه التاجر مالك قد اشتكي له ان بعض التجار ، قد جعلوه يدفع 5الف ريال في المهدية مرتين . واصل الدين يرجع للتاجر ود الشقليني جد الوزبر الاديب جمال محمد ابراهيم وعبد الله الشقليني . وعندما استرجع المال حمله لعتالي واخذه لعمه .
الشقلينى , فى المهدية مال جدكم بيشلوا بالعتالى
لكن يا أمير ورثتو الأدب والعلم وده الغالى
نحلا قديم معروف وفى أمدر الاسم عــــالى
عديم الأصل ومستجد النعمة البيقول داك مالى
ع . س . شوقي
[email][email protected][/email] _________________
ياسلام ياود البدرى ومليون سلام وما تبخل علينا
I had always thought that Sudanese should start living just like how American lived when they conquered north America, government should start giving piece of land to every body instead of living in cities and towns the way we do now, then you develop it the way you wanted .
الحاجة المحيرة انت ام درماني اكيد بتعرف عبدالله الخليفة و عبدالسلام الخليفة اولاد ابوقرجة واولاد الامير يعقوب وده ساكن جاركم جنب ناس ملة بتاعين الذهب واولاد الامير احمد فضيل واولاد الامير احمد ودعلي وكل الناس دي تعايشة من ام درمان حي الامراء انا ما عارف لية بتكرة عرب التعايشة وانت شفتة سحنتنة في ام درمان حي الامراء ونحن اجمل من أل البدري بمراحل وعلي فكرة ابن عمك ابرهيم الله يرحمة ويحسن الية بعرف اكثر منك عن تاريخ ام درمان واعتقد كان في الدنمار المهم قول لصاحبك عبدالرحمن بلاش تزوير للتاريخ
حرام عليك ياشوقي معلومة خاطئة قاتلة اوردتها قلت ان الكبابيش رحلو من البطانة وتحالفوا مع الجموعيه فى الغرب…الخ!!
دولة الكبابيش في الشمال الغربي عمرها يعود للعهد الفرعوني وهنالك مؤرخات بتجارتهم مع الفراعنة وفيما بعد مع الرومان وبعدهم كل من حكموا مصر وحتى الدولة الخديوية تحالفت معهم هذا بجانب انهم كانوا اكبر قبيلة من حيث العدد وعدد المواشي في السودان يليهم الشكرية قبل المجزرتين الاولى في بداية العهد التركي ومجزرة المهدية الشهيرة ونهبها للقبيلة وهذا موضوع اخر.
اما الجموعية فهؤلاء رحالة قدموا من الجزيرة العربية من جهة العراق هاربين من اجتياح التتر لبغداد وحولها عام 1250 واستقروا بمصر لفترة قبل طردهم منها الى مناطق دنقلا ثم ترحلوا الى وسط السودان حتى استقروا حول الخرطوم
حقق هذه المعلومة سيشل جاكسون عندما ذكرها له تاجر الرقيق الزبير باشا وهو جموعي بالمناسبة ولم يقتنع جاكسون اول الامر بها كما سرد في قصة الزبير ولكنه تحقق لاحقا من التواريخ التي ذكرها الزبير ثم اشار الى تاريخ الجموعية
نعم الكبابيش مرتبطين بمنطقة جزيرة الجعليين التي تضم البطانة لكن معظم المعابد المروية ترتبط بتواريخ لقبائل الكبابيش وتعرف انهم يمتدون الى الجنوب الشرقي لليبيا ومصر والواحات
لاتوجد مقارنة اوعلاقة بين تاريخهم والجموعية بتاتا اما غير ذلك فهو اختلاقات فالجموعية القبيلة مشهورة بتزوير التاريخ مع كامل اعتذاري للقارئ وانما نسب انفسهم للقبائل النيلية القديمة وهنالك بحوث هبطرش بهذا الخصوص تنفي اي ارتباط لهم سوى مع الجعلين او غيرها من القبائل النيلية
مع فائق ودي
جلبوك السوق لي درادر وبيعة
أمك في الحريم موها المرة السميعة
نترة ناس أبوك اللرجال لويعة
إت هدا كان كبرت جلبا تقلب البيعة
يا سلام يا عم شوقي بالحيل نضميك سمح، واهي فرصة عشان جيلنا يعرف كثير من هذه المفردات الرائعة روعة اهل السودان.
زمان عمي ياسين معني عليه رحمة الله كان عنده برنامج مشهور اسمه في ربوع السودان كان من اجمل البرامج الاذاعية، روعة البرنامج انو ما خلى حتة في السودان ما مشاها واجمل الحلقات كانت عن البطانة وعن رفاعة، على فكرة لدينا اصول كبيرة في رفاعة، عمة والدي خديجة معني عليها رحمة الله متزوجة من الاستاذ يوسف شريف والد مدير المساحة المهندس عوض يوسف شريف عليه رحمة الله وعمتي رقية متزوجة من ابن عمها القانوني الضليع مهدي شريف المحامي عليه رحمة الله والله كان من اعظم السودانيين. الى الان كثير من ابناء عمة والدي ما فارقو رفاعة ولدينا جنينة كبيرة في رفاعة اسمها جنينة معني، الى الان يتوارثها الاحفاد.
مع مؤدتي
البلقى هبوبو بضري
الخليفة عبد الله أداب العاصي
معظم القبائل السودانية ….زائفة بمعني انو القبائل هذه اختلطت من فترات و طويلة و يعاد تكوينها جزافا فقط تحت الاسم فقط .. اللهم الا القبائل بجنوب السودان … سؤال هل المحس قبيلة و الحلفاويين قبيلة و الدناقلة قبيلة…. و ما هو تعريف القبيلة … هل من سكنوا الخرطوم ممكن بعد ميات السنيين ندعوهم قبيلة الخرطوماب … علي وزن الدناقلا و الحلفاويون … و الله اعلم …!! حتي افرس الناس اليوم لا يستطيعون فرز الناس علي سحناتهم … و كثير من الناس يتكهنون بقبيلتي ان وجدت …و لا يستطيعون جزم شي …!!!
اقول لكل الرائعين خارج حدود الوطن بيت شعر بدوى من بادية المتمة وشندى
بنوتنا الكبار وين راحن ؟ بتمر الهبايب داحن
واقول ليهم برضو
ياولادة النجاح المابتلدك البلمة ويابحر التساب الفى الجروف عم
التساب هو الفيضان والبلمة من البلم وبقولو القلم مابزيل بلم
لك الف تحية عمنا شوقي وياريت تخلينا طوالي مع التاريخ والشعر وتبعدنا عن السياسة وخليك علي هذا الهط طوالي واتحفتا بقلمك الجميل
الخليفة ما جبان عشان يهرب .they are the braviest men who walk on the esrth
مع احترامى وتقديرى الشديد لك العم شوقى بدرى وانا من القراء المداومين على الاطلاع على مقالاتك الثرة ,وانت رجل موسوعة معلوماتية وتاريخية متحركة, لانك ملم بتفاصيل ودقائق عن التاريخ والتراث السودانى قل من يعرفها فى هزا الزمان الاغبر.فلك التحية والتقدير .
لكن لى تعليق فى مسالة هروب الخليفة التعايشى اثناء معرك كررى,فالخليفة لم يهرب وانما كان انسحاب تكتيكى لاستجماع قوة الانصار فى ام دبيكلرات شانه شان كل القادة فى المعارك العسكرية فى التاريخ الانسانى,الخليفة عبدالله كما تعلم عندما احس امر الله سوف ينفز فرش فروته متجها الى القبلة ليالقى ربه وهو قائم وقد كان فكيف نصفه بالهارب والله دة قمة الشجاعة و الاقدام.
هزه المعلومة موثقة من جدى الامير ود ابراهيم والد المرحوم خالد محمد ابراهيم مدير عام هيئة شئون الانصار سابقا,وكتاب سلاطين عن الثورة المهدية لا يعتبر من الصادر الموثوقة لانك يا شوقى بتعرف كويس سلاطين حصل ليه فى زمن الخليفة.