الجزيرة : إشتباكات شمال هجليج إنتهت بصد القوات الحكومية المسلحة

ماقلنا ليك …الجنوب طريق قاسى وصعيب من اولو…. مارضيت كلامنا وجيت براك …اهو ده الدمار اتحملوا ؟؟؟؟؟؟ مع الاعتذار للاغنية الراحل المقيم محمد ميرغنى

أفطر الصائمون بأكل تمرة، ثم اختلفوا هل يصلون قبل الأكل أم بعده؟ ورجح
خيار الصلاة أولا، وعندما أقاموها جات غنماية وخلصت على الأكل. بعد
انتهاء الصلاة قال أحدهم: يا جماعة كان تخلونا ناكل، انتو شفتو ليكم صلاة
أكلتا الغنماية؟
ظلت القوى السياسية تدعو إلى التوافق على وثيقة الدستور أولا ثم الدعوة
إلى تشكيل حكومة برنامج، لكن يبدو أن الرأي الآن هو نعمل حكومة وبعدين
نشوف حكاية الدستور. يا جماعة باركوها انتو شفتو ليكم حكومة أكلتا
الغنماية؟

00000

كلامات – د. كمال عبد القادر

ذهبت الفتاة لاستلام صورها من الاستديو، وقالت لصاحب الاستديو: الصورة دي
شينة كدا ليه؟ فرد عليها بكل برود: “هو أنا جبت حاجة من عندي؟”
الذين أوكل إليهم أمر اختيار الحكومة القادمة إذا أرادو إشراك الأحزاب
التقليدية يجدون أن خيارهم أولاد هناي وبنات هناي، وإذا أرادو الأحزاب
المنشقة سيجدون خياراتهم ناس هناي الذين انشقو عن حزب ناس هناي، وإذا
أرادوها مع الحركات سيجدون حركة هناي وهناي، وإذا جعلوها زيتنا في بيتنا
يجوكم تاني ناس هناي.
سينظر الشعب إلى صورة الحكومة مهما كان التشكيل ويقول الحكومة دي شينة
كدا مالا؟ وسيقول الرئيس هو أنا جبت حاجة من عندي؟

000000

كلامات – د. كمال عبد القادر

برفيسور جامعي ضعيف الذاكرة توقف للحديث مع أحد طلابه لدقائق وعندما
انتهى سأل الطالب “أنا كنت ماشي في الاتجاه كدة ولا كدة؟” فأشار الطالب
للاتجاه وعندها قال البرفيسور “يعني بكون فطرت وراجع المكتب”.
وفي مصر كان المصريون يشاغلون من يلبس الجلابية “جناح ام جكو” يقولون يا
زول انت رايح ولا جاي.
الصادق المهدي رقم مهم في السياسة السودانية لكن يصعب علينا أن نحدد إذا
كان رايح ولا جاي. إذا كانت المشكلة في الجلابية فإننا نقترح أن يكون
ضمن طاقمه شخص يحدد الاتجاه في كل يوم يسمى هذا المنصب “سايق البوباي”
لأنه الذي يحدد الإشارة “جاي ولا جاي”.

0000000

كلامات – د. كمال عبد القادر

اشتكى رجل إلى الدكتور من ألم في مؤخرته وقال “يا دكتور أنا عندي بواسير”
كشف الطبيب عليه لتحديد موقع الألم وفي كل مرة كان الرجل يقول “لسع فوق
شوية” وعندما كررها قال له الدكتور إنت بكون عندك “التهاب لوزات” وطلب
منه أن يفتح خشمه ويقول “آع”.
اعتقد الجميع أن السودان يعاني من ألم في مؤخرته ناحية الجنوب وأن بتر
هذا الجزء سوف يكون نهاية الألم. والآن ظهر أن الألم “فوق شوية”.
قبل أن تجرى العمليات في جنوب كردفان والنيل الأزرق أرجو أن نطلب من
الشعب السوداني أن يفتح خشمه ويقول “آع” وعندها سوف نعرف “محل الوجع”
لأنه قد يكون “فوق شوية”.

00000

كلامات – د. كمال عبد القادر

حاول الأب جاهدا منع ابنه “الحنكوش” من السهر إلى وقت متأخر خارج المنزل،
واستمر الحال في حاله. كلام من الأب وعدم التزام من الابن. في يوم قرر
الأب أن ينتفض وظل ساهرا حتى عاد الحنكوش ودق جرس الباب. هنا قال الأب
“ما بفتح ليك الباب أمش بيت محل ما كنت مساهر” رد الحنكوش ” يا دادي بطل
العوارة وقوم افتح الباب”. وقد كان
واشنطن دعت بالأمس لمؤتمر جديد “لنج” لمناقشة مشكلة دارفور ومن الطبيعي
أن ترفض الحكومة فتح نقاش بعد الدوحة. واشنطن تعرف سجل الحكومة في رفض
الأشياء ثم الموافقة. أمريكا تقول للرافضين “يا جماعة بطلوا…… وقوموا
اركبوا تعالوا.

000000

كلامات – د. كمال عبد القادر

ذهبت امرأة إلى الدكتور وشكت من أن كل جسمها يوجعها وقالت كل ما أخت
إصبعي أشعر بالوجع وجربت ذلك أمامه وفي كل مرة كانت تصرخ من الألم نظر
الدكتور إلى إصبع المرأة ثم طلب صورة أشعة للإصبع ووجد أن الإصبع مكسور
وهو مصدر الألم.
من المعارضين من لا يرى للإنقاذ أي حسنة ويشير إليها بإصبع الاتهام حتى
لو تأخر المطر.
مطلوب عمل صورة أشعة لأصابع المعارضين حتى نعرف إذا كان مصدر الألم في
جسم الإنقاذ أو إصبع المعارضة.

0000000

كلامات – د. كمال عبد القادر

خرجت مظاهرة ضد الحكومة وحمل المتظاهرون قائد المظاهرة وهو يهتف بقوة
والمتظاهرون يتبادلون حمله. وعندما تفرق معظم المتظاهرين قال القائد لمن
يحملونه بعد كدة نزلوني لانو بقينا شوية وناس الأمن ممكن يجونا يقبضونا.
وهنا قال من يحملون الرجل نحن ناس الأمن ذاتنا تعال اركب معانا.
ناس الحكومة كانوا قد وصلوا إلى مخبأ نقد عندما زاره صلاح قوش في المخبأ
بمنتهى التهذيب، وقبل أيام وصلوا إلى قلبه عندما أجرى عملية قسطرة ناجحة
بمركز القلب الذي يديره أخو الرئيس. ويبدو أن الحكومة قررت أن زعيماً آخر
يمكن الوصول إلى قلبه عن طريق بطنه، وثالث يمكن الوصول إلى قلبه عن طريق
جيبه، وآخر مثل قائد تلك المظاهرة يجو “شايلنو شيل”. هذه خريطة الطريقة
إلى الحكومة “القلبية”.

000000

كلامات – د. كمال عبد القادر

جلس رجل وزوجته في أحد الاماكن العامة بينما الأطفال يلعبون. وبعد لحظة
صمت الرجل وقال لزوجته “بتفكري في شنو؟” فقالت له “بفكر في نفس البتفكر
فيه انت”. هنا انتفض الرجل وقال لها “طلقانة يا خاينة!”
ظلت وفود الشمال والجنوب تتفاوض حول العملة واتفقوا على استمرار العملة
القديمة ستة أشهر بعد يوليو وأثناء مناقشة التفاصيل طرح الجنوب عملته
الجديدة بعد يومين وهنا انتفض الشمال وقال هاك العملة دي.
الجنوب والشمال كانا يفكران بمنطق هذا الرجل وزوجته.

000000

كلامات – د. كمال عبد القادر

احد معارفي في بلاد الغربه ضبط اولاده وهم يشاهدون قناة تلفزيونية تبث
افلاماً “ما تمام” فقام الرجل باعطائهم دروساً في الاخلاق وقرر حرمانهم
من مشاهدة التلفزيون بعد الساعة عشرة مساء. بعد مده سافر الاولاد مع
امهما للسودان في اجازة واتصل الوالد تلفونياً وبعد استفساره عن الصحة
والاحوال قال للام “انتي القناة الكانو بتفرجوا فيها اولاد الكلب ديل
رقمها كم؟”.
الذين حاولو منع بث برنامج “اغاني واغاني” ثم نجحوا في تحويل زمن البث
إلى الحادية عشر مساء، هل كان ذلك لان البرنامج “ما تمام” ام لانهم
يريدون التفرغ بعد صلاة التراويح وبعد نوم الاولاد لمشاهده البرنامج
بمزاااج.

000000
كلامات – د. كمال عبد القادر

في ايام الدراسة سافر وفد طلابي في رحلة علمية إلى الجنوب وعند عودتهم
تحدثت المجالس عن طالب كان مشهودا له الاستقامة والتدين وقد شوهد في جوبا
في احدى القعدات وهو يرقص بالكاس ويغني “يالزاهي تعال زورني بالله”.
سالت الرجل عن الحادثة فلم ينكرها وقال في تبريره “ياخي ضربنا هوا الجنوب
داك والواحد بقي ما عارف بسوي في شنو”.
ملاحظتي ان الفريق سلفا يقول كلاما معتدلا في الخرطوم وعكسه في الجنوب
ولذلك شعرت بالانزعاج عند تاخر عودة الترابي والمهدي من الجنوب لاني خايف
عليهم من الهوا وخايف من شريط “يالزاهي تعال زورني بالله”.
ابديت مخاوفي لصديقي فقال لي: هوا الجنوب دا عرفناهو “هوا أديس دا يسوو
معاهو شنو”؟…

0000000

كلامات – د. كمال عبد القادر

الحاجة مريم اصبحت تصف زوجها شيخ الفاضل بانه بقى “كحيان ومكعكع”.. شيخ
الفاضل تناول علاجاً مكثفاً عند الدكتور، واخبر الحاجة مريم بانه استعاد
نشاطه وصحته، فلم تصدقه وطالبته بشهادة من الدكتور… الطبيب حرر شهادة
تقول: إلى الحاجة مريم، بهذا نشهد ان الشيخ الفاضل تناول العلاج واصبح في
حيوية شاب في سن العشرين… عندما قرأ الفاضل الشهادة قال للدكتور: سيبك
من حاجة مريم، اكتب لي الشهادة “إلى من يهمهم الامر”.
بعدما تفاوضنا مع الجنوب لسنوات عديدة، ومع دارفور لسنوات، وفي الطريق
اخرون، لماذا لا نعمل نسخة اتفاقية ونحررها “إلى من يهمهم الامر”، وكل
زول يقرأ ويمضي؟!.

000000
كلامات – د. كمال عبد القادر

جلس المسطول شارداً امام زميله، ثم قال: من قبيل أنا محتار إذا كنت عازم
لي واحد * يوم الأثنين، أو عازم اثنين * يوم الأحد.
إذا كان عدد الجنود الأمميين * نيفاشا واحد يساوي 8.400، واصبح * نيفاشا
اثنين يساوي 4.200.
السؤال: 1- احسب عدد “النيفاشات” التي نحتاجها حتى يصبح عندنا جندي اممي واحد.
2- احسب مساحة السودان في ذلك الوقت بالملمتر المربع.

0000000

كلامات – د. كمال عبد القادر

أصر الرجل على الزواج للمرة الثانية، وأخبر زوجته بذلك، فخيرته بين
الاستمرار معها لوحدها أو الطلاق، فاختار الطلاق.
جاء الأجاويد يعددون محاسن الزوجة من أنها جميلة ومن أسرة محترمة وذات
دين، فقال لهم: والله كلامكم ده كلو صاح، إلا نفيستي دخلت في أبو تلاتة
قطع (اسكيرت وبلوزة وطرحة)، أما أم الأولاد كان القسمة أدت بنرجع لبعض.
إذا لم تتمكن الإنقاذ من تغيير خطابها بحيث تستوعب تطلعات الشباب، فقد
يأتي يوم يقول فيه الشعب السوداني: والله ماقصرتو معانا، لكن نفيستنا
دخلت في حكومة أبو تلاتة قطع (قدر المقاس واكثر التصاقا ولو كانت شفافة
يكون كويس)، وكان الظروف جابتكم تاني بنتلاقى!!!.

00000000

ملحوظة: هذا المقال لم يتعرض إلى اي حذف أو رقابة قبلية، لكن بقية
الكلمات “من الحلقوم ابت تطلع”!!!

000000

كلامات – د. كمال عبد القادر

يقال إن شخصا لقي دكتوراً فى الشارع وقال له: أنا عندي وجع فى الضهر فقال
الدكتور ارقد نكشف عليك فقال المريض تكشف علي هنا؟ فقال الدكتور انت شكيت
لي وين؟..
فى الأنباء أن قيادي بالحركة الشعبية قال إن كلام البشير للمصلين عن
الاتفاقية فى المسجد ما مناسب..
أرجو أن تصدر الرئاسة بيانا من أديس يقول اللول اللول يا لولية ما دايرين
نيفاشا الحبشية.

000000000000

كلامات – د. كمال عبد القادر

من حكاوى السبعينات أن اثنين من التجار كانا يقتسمان شراء محصول العيش
شهريا. وفي مرة تأخر تمويل أحدهما فانتهز الآخر الفرصة واشترى كل
المحصول، وعندما جاء للتعبئة وجد أن الآخر اشترى كل الخيش، قائلا له
دايرين خيش جيبو العيش. وقد كان.
وفي السبعينيات أيضا راجت أغنية تقول:
يا حاجة دقي لينا كاروشة–ادونا فندكن–ندق ونديكم–تدقو تدونا–ندق
ونديكم–ابيتو تدونا–كاروشا تمسكم–يا حاجة لا اله الا الله.
عندما يقول البشير “إن تصدير البترول مقابل رسوم نحددها أو نقفل البلف”
فهو يطبق مبدأ مجرب زي دايرين خيش جيبو العيش لأنه لا يريد أن يقول
“ادونا بترولكم–نكب ونديكم–تبيعو تدونا–نشيل ونديكم–ابيتو
تدونا–تقفلو بلوفكم–يا سلفا لا اله الا الله”…

0000000000

كلامات – د. كمال عبد القادر

في طفولتنا كانت قوانين البيت لا تسمح بلعب الكورة داخل المنزل خوفا من
كسر العدة. جاء أخي الذي يعشق لعب الكورة وسأل عن الحجاج ديل وين؟، قلت
سافروا كلهم لزيارة مريض، فسمعته يقول وهو يقفز في الهواء “يهوووهووو”.
لعبنا كورة وكسرنا البيت والعقوبة عند العودة معروفة.
في المجمع الصناعي سأل صاحب العمل عن ضابط الأمن ونائبه فلم يجده، وفي
اليوم الثاني سأله أنت وين؟ والحارس المجمع دة منو؟ فقال حارسو جان سيدنا
سليمان، فرد صاحب العمل انت امشي بيتكم وخلي الجان يجي يصرف اخر الشهر.
بالأمس كان الرئيس في الصين والنائب في غينيا ونافع في اديس وسلفا في
جوبا ولم نسمع زول واحد يقول “يهوووهووو” أو يلعب كورة.
أنا مقتنع ان البلد محروسة بي جان سليمان والمغالط يراجع كشف المرتبات.

000000000

كلامات – د. كمال عبد القادر

إحدى معارفي اسمها سهام تعدت الثلاثين من العمر دون أن يتقدم أحد للزواج
منها. قالت ذات مرة “والله أنا الزول البعرسني ده أديهو كف لمن يقع من
الكوشة وأقول ليهو أنا مجهجهة عشرين سنة كملت قروشي في الكريمات وعيوني
اتقددن من سهر الحفلات (انت كنت وين)”؟
سألتها يوم زفافها الى ابن خالتها إن كانت ستنفذ تهديدها فقالت “ايوة
وكمان زيادة على الجهجهة جاني بعد ما ماتت أمي”..
في الأنباء أن أحزاب المعارضة الكبرى أصبحت قريبة من الدخول في حكومة
موسعة بعد تناحر أكثر من عشرين سنة، كان القسمة أدت ألا يحق لشعب السودان
أن يقول “جهجهتونا عشرين سنة وكمان جايين بعد انفصال الجنوب”؟.. ثم ينفذ
التهديد “بتاع” سهام.

000000000

كلامات – د. كمال عبد القادر

في نهاية جلسات تناول الخمور البلدية يلجأ السكارى لاختبار جودة المشروب
بإشعال عود كبريت وإلقائه في الزجاجة الفارغة، فإذا اشتعل بسرعة يكون
المشروب جيدا وإذا لم يشتعل يكون العرقي مغشوشا. وفي مرة ذهب أحدهم
للبائعة قائلا: “يا حاجة ما بتخافي الله تدينا عرقي مغشوش” فقالت له: “يا
ولدي معقول أربي أولادي بالحرام؟ والله حبة موية ما فيهو”.
ولأن شعب السودان يختبر جودة الأشياء بعد نهايتها فقد قررت الحركة اختبار
جودة الانتخابات في جنوب كردفان بأن تحاول إشعال الولاية. كان ولعت تكون
انتخابات كويسة وكان ما ولعت تكون الحكاية مغشوشة.00000

الشغله سايقنها ناس العدل والمساواة وشايتين ضفاري والجيش الشعبي في هجليج مرتاح _نظام إستراحة محارب وكده وشيلو شيلتكم يااكيران

بتاع الجزيره دة ما عندو موضوع وطابور خامس

2012 is a year for teaching NCP a military lessons….and 2013, Sudan is FREE of NCP. Prophecy

الوطنية
أن الوطنية فطرة مولودة داخل وجدان أي سوداني و لا يحتاج لدرس
لكن من يختلف مع المؤتمر اللا وطني يكون غير وطني …. عييييييييييييب يا جماعة
وشنو الفنانين اليومين ديل لا بسين الكاكي أمثال ….. السكاري … السطلجني وقت مافي حفلة جاري يشارك عشان يعطوه حفنة جنيهات يشتري العرقي …. بلاء تخمكم…. وحنشوف في الأيام الجاية من هم الوطنيون .
هل الوطني ينهب اموال الدولة ذي السنجاب ويخزن بره
هل الوطني يخصص الشركات لأهله
هل الوطني يعين خريج الأدبي في وظيفة مدير محاسب
هل الوطني من يقتل الحريم
هل الوطني من يغتصب النساء
هل الوطني من يقتل الطلاب
هل …… وهل …. وها ؟؟؟؟؟؟؟؟؟

جنس ججهه جنس هجلجة جنس بشتنة

كل القوة الخرطوم جوه