ناس الحيكومة متدينين شديد
ناس الحيكومة متدينين شديد
عمر الفاروق عبد الله
[email protected]
ذكر مولانا ود الطاهر رئيس برلمان المؤتمر الوطني بأنو عمل شوية تحقيقات مع مسئولين متنفذين في النظام بين قوسين حامت حولهم “شبهة فساد”!! وما لقي حاجة ضدهم بس هي عملية تسوية حسابات واحقاد شخصية ضد من حامت حولهم الحمامة!! يعني المالي النت والجرايد ده يا ود الطاهر من ملفات فساد والجماعة من شباب المؤتمر لما زنقوا الريس ود البشير زنقة زنقة في موضوع الفساد المالي البلاد برضه ده كان محرد شبهة حامت حول من حامت حولهم ياخي عذبتنا وبعدين بياتوا صفة انت بتحقق وبتحاكم وبتصدر الأحكام يعني ما كفتك الهلمة من ناس العدل ديل من وزير العدل والنايم العام وووكلاء النيابة ووووو ياخي حيرتنا!! لها السبب يا ريس برطمان المؤتمر الوطني حنعمل موقع باسم ويكليس الفساد في أقاصي البلاد
وقال ود الطاهر بانه التدين الموجود وسط قطاع واسع من المتنفذين الحكوميين هو المانع الحقيقي لفساد وليس القانون .. “لكن ما في حاجات تاني مانعاني” يعني ناس الحيكومة ديل متدينين زينا وكدة من قائمة يطول شرحها بمعني متدينين من سيد البيت وبتاع الدكان وبتاع الجزارة وبتاع الخضار وبتاع القروش بقت عليكم حكابة بتاع احم فؤاد نجم!! يعني القروش اللهطوها من قروش الشعب السوداني دي نعتبرها دين عليكم ولا شنو؟ قال متدينين قال!! ياخي جننتنا!!
وبرضه ود الطاهر رئيس برلمان المؤتمر الوطني قال: والله يكفينا شر القوالة!! انه الفساد الموجود ده موجود فيث الأجهزة الدنيا يعني فساد الناس التحت وديل مقدور عليهم وأنه حكاية الفساد الدايرة في أذهان العباد ماهو كافي لتغيير سلطتهم المتدينة!! يعني الناس اللي تحت هم الفاسدين وانت وجماعتك يا ود الطاهر الطاهرين؟ الله يورينا فيكم يوم!!
وقول بالله دوركم شنو تجاه الناس التحت ….. هو في تحت اكتر منك وبرلمانك قاعدين زي الحبوبات تبصمو وتختمو ختم الله علي قلوبكم
يا عمر الفاروق صلى على النبى!!!!!
هـبـل ده قبل كده سالوهو عن الفساد و ما هم فى البرطمان فاعلين لمحاسبة المفسدين؟؟؟ كان ردو جاهز فقال لافض فوه المفسدين حسابهم عند العزيز المقتدر!!!!!!!!!!!!! و قريبو الفلاتى (هجى زوار) بتاع الشباب قال بيحاسبو المفسدين من السؤولين فى التنظيم بفقه السترة !!!!!
ما قدامك هـبـل دا البتتكلم عنو !!! دا راتبو الشهرى 30 مليون و جملة المخصصات الكاش 50 مليون !!!! يعنى يوميتو زى 3 مليون !!!! و ما قال بدل الضيافه كم ؟؟ و ظرف الرئيس فى المناسبات و العيدين !!!!!! و نثرية السفريه لليوم 45 الف دولار !!!! بعد ده احسب فاتورة الموبايلات و الجمره الخبيثه ( تتصور عندو فى البيت ما اقل من 10 اسبليت يونيت مدوره 24 ساعه نن استوب فاتورتها لا بقل من 15 مليون للشهر ) و العلاج العلى حساب المسكين محمد احمد فى الاخل والخارج و تذاكر الطيران للاجازات و للسفر للعلاج ( بالمناسبه دا عندو قاوت وضغط و سكرى و بدانه مرضيه و برود ج……….. ) و العربات ليهو و للاولاد !!!! الاولاد ديل بس النسوان لانو عاقر ما ولد !! و البربراويه ماليه البيت بناس بربر زى البرازايت ………. و بعد دا حيكون فى فساااااد يا حاسدين !!!!!!!