انتو مضبوطين عشان تضبطوا الشارع
انتو مضبوطين عشان تضبطوا الشارع
عمر الفاروق عبد الله
[email][email protected][/email]
ناس الحركة “الإسلامية” قالوا عايزين يضبطوا حركة الشارع والقنوات الفضائية وده جا علي لسان مسعول منهم اسمه اردب وقال دي من أكبر التحديات التي تواجه المشروع الحضاري الذي حقق الكثير للسودان وتبقي له فقط ضبط الشارع وقنوات قلة الادب!
تعالوا نشوف بعض من انجازات المشروع الحضاري التي حققها للشعب السوداني والسودان:
تغفرتك يا مالك روحي علي قول بت قضيم
المشروع الحضاري قسم مساكن شعبية لذوي الدخل الأقل من محدود
المشروع الحضاري وفر تعليم مجاني بمدارس موفر بها كل مستلزمات التعليم
المشروع الحضاري وزع منح زواج للذين لا يستطيعون الباءة ليتزوجوا
المشروع الحضاري كافح الأمراض المزمنة والبتودي احمد شرفي مثل الفشل الكلوي والسكري والحمي الصفراء والملاريا
المشروع الحضاري بني مدناً جديدة لتخفيف الضائقة علي العاصمة
المشروع الحضاري: اعاد تعمير مشروع الجزيرة ومصانع النسيج والسكة حديد
المشروع الحضاري حافظ علي وحدة السودان واستعاد حلايب وشلاتين والفشقة
المشروع الحضاري جذب دو لارات المغتربين بمشاريع وتسهيلات ضخمة
المشروع الحضاري: أدار الإقتصاد السوداني بكفاءة وإقتدار مما أدي لإرتفاع قيمة الجنيه السوداني مقابل العملات الأخري بما فيها الدولار الحقار حيث أصبح مساويا 3 دولارات وتلت
المشروع الحضاري خلي الشعب يشارك بالبيقدر عليه وفتحوا لي كافة مجالات المشاركة وعشان كدة ما في زول بيشكي من فقر مع وفرة في السلع واسعار اقل من متناول اليد
المشروع الحضاري خلق للسودان علاقات خارجية اكتر من ممتازة ولهذا السبب تدفقت الإستثمارات الخارجية علي السودان في شكل مشاريع ضخمة ساهمت في خلق فرص عمل وعمالة لمعظم ابناء وبنات السودان
المشروع القشاري مقطوع الطاري ده بعد ما حقق ما قلناه ومالم نقله قبل علي الشارع المابختشي ده بعد ما شبع واصابته التخمة طلع يضرع ويعمل السبعة من غير ذمتها عشان يتأدبوا ويحترموا ناس الحركة اصحاب المشروع المذكور
وبعدين القنوات الفضائية دي مش بتكضب عليكم متل اسكاي نيوز عربية والبي بي سي والعربية وغيرها وبتختلق اخبار من ام راسها عن انه السودان فيه المكفيه من مظاهرات واحتجاجات ومشاكل وازمات وضائقات وحروب ومجاعات وخلاقات مع الجيران وده كله ما حاصل بس حسادة من القنوات دي عشان كده لازم نوريها العين الحمرة عشان ما تكضب تاني.
أما قنوات قلة الادب والمسخرة دي لازم تشفيرها عشان تتشاف بفقه السترة لناس الحركة بس اما الباقين فلا بد لهم من متابعة فضائية السودان المحتشمة والقنوات التابعة لمرسي وجماعته في مصر بجانب المسلسلات التركية والمصرية واحسن ليهم يشوفوا حصل شنو في مشكلة هيثم وعلاء عالم لا تخاف ولا تختشي
هؤلاء قوم نسوا الله فانساهم انفسهم.هذا التصريح خطرفه من خطرفات الموت , عندما يفيق الانسان الذي ولغ في ملذات الدنياو ظلم العباد ردحاً من الزمن , فجأة يجد ان نهايته قد اقتربت ولم يفعل خيراً قط , فيحاول ان يقوم بفعل شئ من الاشياء التي زعم بانه مكلف بها حين اتى للسلطه . تماماً كما قالت ماري انطوانيت في اخريات ايامها في القصة الشهيرة .انه سلوك الطغاة على مر التاريخ .
عملتوا شنو في ضبط (جوهر )الشارع ؟ اكل العيش والصحه والتعليم والسكن ؟ عملتوا شنو في ضبط الانفاق العام و ضبط سعر الصرف للعمله ؟ عملتوا شنو في المحافظه على المال العام ؟
اجيبوا على هذه الاسئلة , ثم بعد داك تعالوا اضبطوا مظهر الشارع العام.
المقشور القشاري ، فقع مرارتنا ورفع حرارتنا، جوع أطفالنا وشرد رجالنا، كتر خرابنا و شتت شبابنا، الله يجازيهم وفي النار يرميهم!!!! آمييييييييييييييين يارب العالمين.