من أنتج، أو أتقن عمله، ونظّف شارعه، فليخرج في هذا الشارع، النضيف، مطالباً الحكومة الانتقالية بالاستقلالة!
من خرج ضد نظام الكيزان بعد سنة واحدة من مجيئه، ولم ينتظر ثلاثين سنة، فليخرج مطالباً بإسقاط حكومة حمدوك بعد سنة واحدة من مجيئها!
يا أخوان وأخوات الوطن: حددوا المشكلة وين في الأول وبعدين أطلعوا طالبوا!
المشكلة فيكم يا شباب!
آي، والله فيكم كلكم! وأنا منكم!
إنتو ما عارفين الرغيف البتضربوه دا مدعوم بدم قلب الاقتصاد السوداني؟
وما عارفين البنزين والجاز والغاز مدعومين بدم ولحم وعضم الاقتصاد السوداني؟
عارفين الساحق والماحق؟
الساحق والماحق هما الرغيف المدعوم والوقود المدعوم!
مين وين يجيبوا ليكم الدعم دا؟ من حتتين:
إما من الشحدة وإراقة كرامة الدولة والشعب (وشايفين كيف رؤسانا بتجاروا لدول ما حصل ملوكها وأمراؤها جوا زارونا)؛
وإما بطباعة الجنيه رب رب رب!
والله لو كانت حكومة سويسرا تدعم الخبز لجمييييع المواطنين حتى أصبحت ثمانون خبزة بفرنك واحد، وتدعم الوقود، حتى أصبحت تعبئة خزان الوقود بخمسة فرنكات، لدق الفرنك السويسري الدلجة ولأصبح الدولار يساوي من الفرنكات السويسرية ما يساويه من الجنيهات السودانية!
والله لو كانت الحكومة البريطانية تدعم الخبز حتى أصبح بالجنيه الأسترليني الواحد تشترى أكثر من مية رغيفة لرضي الشعب البريطاني بالوقوف، في البرد، ساعات طوال، في صفوف الرغيف!
ووالله لو كانت الحكومة الأمريكية تدعم الوقود فيصبح التفويل بخمسة دولارات لامتدت صفوف الوقود عبر الولايات، ولتعلم الاحتياطي الفيدرالي الربربة!
يا أخوانا المشكلة ما حمدوك! ولو جا الما حمدوك حيبقى الحال في حالو طالما إنو الساحق والماحق ديل قاعدين!
وطالما إنتو دايرين دعم (أو رشوة حكومية) وما دايرين تنتجوا، والله لو جا الاستعمار الإنجليزي ما يحلكم!
وأكيد ما حيحلّكم الارتماء في أحضان الصهاينة (زي ما في كتيرين أصبحوا بيحلموا بكدا!)
وبعدين إنتو جاهلين حاحة مهمة (من بين حاجات كتيرة) في الدين!
أكل الدعم دا حراااام!
أنتو فاكرين ربنا ما ح يسألكم عن الرغيف المدعوم البتاكلوه ساكت دا؟ إنتو عارفين دعمه جاي من وين؟ وبياتو حق بتاكلوه؟ هل أنت مستحق للصدقة؟ الدعم دا شاحدينو، فهل إنتا مفروض تشحد ولا يشحدوا ليك؟
الناس جاهلة وفاكرة الدعم دا حق!
لازم تعرفوا إنو الدعم دا قروش وقمح وبترول نحنا أجبرنا حكومتنا خليناها تمشي تشحد في الخليج وحول العالم!
والسبب إننا ما دايرين ننتج!
نحنا ما عايزين شغل بسيط ومتواضع: الزراعة وتربية الجداد والغنم والعمل في النضافة والشغل باليومية!
نحنا دارين وظائف فوق كراسي وثيرة وعربات مكيفة!
نحنا ما دايرين ناخد سيلفي ونحنا عرقانين في الزراعة وشغل اليومية!
نحنا عايزين الحكومة تعاملنا وكأننا طلبة في داخلية!
نحنا عايزين حكومة ترشينا بدعم الرغيف والوقود!
وبالنسبة لينا الدعم دا خط أحمر!
لكن هل معقول الحكومة تدعم الخبز لسكان العمارات والفلل!
معقول الحكومة تدعم الوقود لعائلات كل فرد فيها عندو فارهة!
وبعدين هل معقول الحكومة تدعم الرغيف لناس نايمين!
وبعد الدعم دا تاني تطالبوا بخدمات تعليم وصحة وصحة بيئة وأمن!
ما يا هو الدعم دا هو الكان بيمشي للصحة والمدارس وللفقراء والآن بيمشي لغالبية غير مستحقة!
وققوا الدعم دا والمشكلة بتتحلى فوراً! بإذن الله تعالى!
ألبسوا العراريق وأمشوا الزراعة عشان تنتجوا والمشكلة بتتحلى فوراً!
يا أخوان وأخوات الوطن، والله الخبز المدعوم للأغنياء والوقود المدعوم لأصحاب السيارات الفارهة هما الساحق والماحق!
وما في اقتصاد في العالم يقدر يتحمل هذا الهدر والإسراف والتبذير!
وقفوا الساحق والماحق!
وقفوا الدعم غير المستحق!
وحتشوفوا الدولار يدق الدلجة في يوم واحد لما يتفَهِق!
وحتشوفوا بعدها إنو البلد دي حكمها ساهل، أي زول بسيط ممكن يحكمها. بس يكون أمين وقلبو عليها ولسانه عفيف وإيدو عفيفة!
الريح عبد القادر
[email protected]
رفع الدعم لا بحل لا بربط
الانتاااج الانتااااج ثم الانتاااج
ده الحل الوحيد
الظاهر عليك ما من المنتجين يا مجاهد
والا كان عرفت انو بدون استقرار لسعر
الصرف ما حيكون في إنتاج
الاخ الريح اظنك نسيت امور لم تتطرق اليها….جل من لايسهو ولاينسى وانت بشر
**ما قلت لنا كشعب : علينا ارجاع شركات التصنيع الحربى والمنظومة الدفاعية لوزارة المالية والتى بسببها ابعد وزير المالية
**ما قلت لنا كشعب :علينا ارجاع شركات تهريب الذهب والتجارة الخاصة بنا نحن شعب قبيلة ال دقلو لوزارة المالية لمنفعة الدولة وبالتالى برهان وحميرتى
**ما قلت لنا كشعب :من اين لكم اموال تجييش المليشيات الحميرتية وشراء الاسلحة والسيارات …مع علمك ان عائد تصدير المرتزقة للامارات والمهلكة(حرب اليمن) اقل من
المصروفات على تجنيد المليشيات
**ماقلت لنا كشعب:لماذا لم تعملوا على ارجاع المليارات الحايمة عالميا وبشاهد ام الكل امريكا….فعلا نحن الشعب مقصرين
**ما قلت لنا كشعب :انت منو..وشايت وين…وبتشجع منو
جدادة حمدوكية تافهة و كمان بتدافع عنو ؟ هسي فرقك شنو من الكيزان الكانو بيطبلو لبشير السجم بي سجمنتو ديك لمدة 30 سنة ؟ عاوز تطبل لما تلحقنا 30 تانية كمان ؟ الناس طلعت عشان المعايش و ضد الفساد و الإستبداد و دة كلو زاد شديد مع حمدوك و كلابو المجنسة و المدنسة . ما قادر على الشيلة يتفكفك يتخارج غير مأسوفا عليه .
صدقت جدادة حمدوكيه ماكنة و سمينة و كذابة ،،، السودان اغني من السعودية لعلمك بس حكموهو الاقزام و الارزقية و الانتهازييين من زمان بعيد ،،،،
الجماعة انتقلوا للدفاع عن حمدوك. استراتيجية كيزانية جديدة
العيب ما في دايرين و ما دايرين الاشكال في من تولوا السدة و المناصب و يعملون بحكم الوصايا … لابد من اعلان و نشر الفضايح لابد ان عرف الجميع ان الدعم شحدة و الدافعها الان منو لابد من خروج المسؤلين و ذكر المعوقات الان ..
لابد من اجاد الية لمناولة الاراء و الاخذ بها و تفنيدها ان لزم العالم اتصال و قنوات و موظفين دي شغلانتهم