مرقنا مرقنا
مرقنا مرقنا مرقنا مرقنا
لا اتراجعنا و لا اتفرقنا
لسانا سلاحنا ايدينا درقنا
و عارفين مين بالضبط سرقنا
منو الغشانا و مص عرقنا
منو الذلانا و منو الافقرنا
و نحن عزاز من الله خلقنا
نحن الليلة مرقنا مرقنا
اطلع ياخي مع أخوانك
أقلع حقك من سجانك
أرفع صوتك و أقرا بيانك
دي الحرية عشاني عشانك
كنكش فيها بي اسنانك
ياما بكينادمعنا شرقنا
عشان ننجمه وننسى ارقنا
نحنا الليله مرقنا مرقنا
ده الاسلام اصل الحريه
لا هو فساد لا محسوبيه
وسوق الناس بي يد ملويه
جاك شبابا صافي النيه
عايزين عزه ولقمه هنيه
ما غشوهم بالحوريه
عهدك ليه مزقنا ختفنا
وكلبك ليه بلسانو سلقنا
ونحنا الليله عشانو مرقنا
قول للزول الما بغباك
جيت للسلطه من شباك
مما جيتنا قلبنا اباك
فجرت غدرت حتى اباك
نحن قعدنا كتبنا ورقنا
ونحنا الليله مرقنا مرقنا
انتوا الداء السكن اجسامنا
انتوا الغول الاكل احلامنا
انتوا العار وانتوا ظلامنا
انتو العار في جبين اسلامنا
خلاص اختونا ما بنستغنى
وربنا من الذله عتقنا
ونحنا الليله مرقنا مرقنا
ياما زرعتوا بينا الفرقه
وكم حرمتوا علينا المرقه
كم مسجون في سجنك يشقى
وكم مكلوم مسحون بالحرقه
لا بنخاف بنبان لا طلقه
قسما عظما مهما تبقى
انتا حتمشي ونحنا حنبقى
كتايبك عاجزه ما بتسحقنا
ولا بترهبنا ولا بتلحقنا
ونحنا عشانك الليله مرقنا
[email][email protected][/email]
