تااااني
ساخر سبيل
تااااني
الفاتح يوسف جبرا
قد لا يعلم الكثيرون أن العبدلله وقد وصل إلى أرذل العمر لم ينتم في حياته لأي حزب كان ولم يستطع (ود مقنعة) أن يستقطبه لأن يكون عضواً في أي حزب أو جماعة ، والعبد لله يحمد الله على ذلك كثيراً فكل الأحزاب السودانية حتى ذات الصبغة الدينية تضع مصالحها أولاً قبل الوطن (والدين ذاتو) !
عدم التحزب إلا لحزب (السودان) جعلنا نقول للأعور أعور في عينو .. إذ أن وجودنا دون غطاء حزبي يجعل مسألة إتهامنا بالعمالة أو الإرتزاق أو محاولة تقويض النظام أو الإتصال بسفارات أجنبية أو (قبض مظاريف) غير واردة بالمرة ! ويبدو إنو (الناس) فاهمة كده كويس إذ لم يتعرض قلمنا (للتحقيق) أو المصادرة إلا مرات لم تتعد أصابع اليد الواحدة ومن جهات وجدت أن الطاقية طلعت على مقاسها وراس (السوط) وصلها ! والحمدلله لم ندان في اى قضية بل تم شطب كل البلاغات في مراحلها الأولية إذ لم تكن منطلقاتنا أبداً (شخصية) أو ذات (غرض) سوى مصلحة هذا الوطن العزيز !
طيب أيه لزوم الرمية الطويلة دى؟
لزوم هذه الرمية هو عدد من الرسائل الالكترونية والتعليقات عل صفحتى بالفيسبوك والتي تسألني لماذا لم تكتب عن هجليج ؟ وقبل أن أواصل الكتابه حول هذه الأمر أود أن أوضح موقفي بإدانة حكومة الجنوب لما إقترفته من تعد على أرضنا وأناشد كل مواطن سوداني الوقوف خلف قواتنا المسلحة وجنودها البواسل لإستعادة هذا الجزء العزيز من الوطن إلى حضن البلاد فليس هنالك من مواطن شريف يرضى الإحتلال لأرضه أو الإنتهاك لعرضه .
أها وبعد أن نستعيد هجليج ؟
هذا هو السؤال الذي جعلنى (أتأخر شوية ) في تناول هذا الأمر .. فالقصة ليست تحرير أرض أغتصبها عدو .. (كان على دي ساااهلة) لأنو نحنا في الحارة (معروفين) والحرب ما بيخوفونا بيها .. ولكن العبدلله يعتقد أنه آن الأوان بعد تحرير هجليج ( بإذن الله) وعزيمة أولادنا أنو الناس تقعد في الواطة عشان تشوف ليها حل للورطة الأنحنا فيها دي .. فالأمور ابداً لا تبشر بخير إن سارت كما عليه ، إن المشكلات التي تواجه البلاد تتكاثر والحالة العامة (معروفة) وما عايزه ليها دليل ويكفي أن (الدولار) يقترب بخطي حثيثة نحو (السبعة جنيهات) !
إذن الحكمة تقول أنه لابد من وجود خطة إسعافية عاجلة يتبناها الجميع للخروج من هذا المأزق .. إن مواصلة (الكنكشة) وسياسة (لحس الكوع) والشنو ما عارف لن تفضي إلا إلى مزيد من الإخفاقات والتدهور كما أن وجود معارضة (ما عندها برنامج) يجعل أى محاولة للتغيير بإستخدام ورقة (شظف الوضع الراهن) الذي يعانيه المواطن هي مغامرة معروفة النتائج أقلها الفوضى وإنعدام الأمن (ونحنا ما ناقصين) !
يعني يا جماعة الخير القصة (بالعربي كده) بقت ما قصة (معارضة وحكومة) القصة أصبحت (قصة وطن) .. السودان ده بتاعنا كوووولنا .. ما بتاع زول عشان لمن تغتصب أراضيه نقول ليهو أمشي حارب ورجعا براك .. مفروض نحارب كوووولنا عشان دي بلدنا كووولنا .. وبرضو السودان ده ما بتاع جماعة تعمل فيهو العاوزوهو (بي مزاجا) ويكون الحكم وإدارة البلاد (حصرياً عليها) لأنو برضو دي بلدنا كووولنا .. لازم من وجود دولة تبني على المواطنة .. كل مواطن في البلد دى يكون ليهو شرف البناء والتعمير وتولي المسئولية وإتخاذ القرار لا فضل على آخر بالعرق أو اللون أو (اللحية) .
مسئولية الكلمة تجعلنا نقولها بكل الصدق والوضوح أن مستقبل البلاد في خطر وعلى الجميع القعاد في الواطة دى بأعجل ما تيسر لإنقاذ السودان …. (تااااااني) !
كسرة :
هجليج دى (حمرة عين ساااكت بنرجعا) .. البرجع خط هيثرو شنو؟
كسرة ثابتة :
أخبار خط هيثرو شنوووووووووووو؟
نحمد الله على عودتك للكتابة والرسالة وضحت ولا مش ده يا () البكره راجل ودادو قرفان وزهجان ومستغرب وحسن يس وشمالى والحعلي الاحمق و….. والبقية من مناضلي الراكوبة والالكترونيةاين انت اصوا شوية
ياود جبرا حمرة العين البترجع هجليج ما ترجع بيها خط هيثرو
نعم البلاد فى ورطة كبيرة جدا ولكن من ادخلها فى هذه الورطة وما الغرض من ذلك يجب ان يحاسب كل من اخطأفى حق هذا البلد والشعب واذا لم تتم محاسبة لن ينصلح الحال
اها يعني نسجلك في متحرك حماده نافع ولا تقعد تمص اللالوب في ظل الشجره يا استاذ الحكاية ما حكاية وطنية الكل يحمل يذور الوطنية في صدره وهي اساس للبقاء بس الموضوع انوا خلاص كفاية من السياسات اللي تودي في داهية دي خلونا قبل التحرير نحاسب المتسببين في الحاصل وبعدين نقوم علي التحرير مش هجليج . هجليج والفشقة وحلايب كمان علي شان لو خلينا عملية المحاسبة دي عودتنا الايام انو الموضوع بينتهي زي ما اتنست محاسبت الكثير من من تسببوا بالالام للسودان ولانه بعد التحرير الجماعة بيجوا نافشين الريش ومنتشين من الرقيص يدقسونا في عملية المحاسبة دي ونافع كمان قال كلام خطير يعني بعد التحرير هم حيعملوا تهرير للداخل وانت اول الناس بيجي اسمك لانك مضيع خط هيثروا ومبشتن الخطوط التانية وكمان بيوت الاشباح كتيرة وممكن في ظل الهجليجة يعملوا ليك بيت منها برضك وعلي شان ما يزايدنا واحد علي الوطنية الوطنية تقتضي ان نحاسب من فرط في ماحصل ولا انت ما معاي . في الختام السؤال انت ماشي مع محترك حماد نافع ولا تقعد تمص لالوب يعني بالعربي تلحس كوعك ولا تمص اللالوب .
وكسره بكسرة وزير المالية اللالوب طعمه كويس …………
يا استاذ جبرا ، تاني دي ابلغ ما في هذا المقال ، لا شك في مواطنة وبسالة القوات المسلحة السودانية والشعب السوداني من خلفها ، ونحن ما عندنا مانع من القعاد تاني ، وارجاع هجليج برضو مافيهو مشكلة ، لكن وآآآآآآآآآآه من لكن فكرك الاصلاح ده في مواطن بعد ده بقدر يطول بالو تاااااااااااااني 15 – 20 سنه وهاك يا هتافات وشعارات وناكل مما نزرع والكلام ده والله الواحد وصل الحد لكن الله يصتر ويسهل الامور
تحياتي
اسهل حاجة (تحرير)هجليج بس البحرر الخرطوم شنو
إنت إلا تقوم دفرة؟
أسمع كلامى دا كويس يا جبرا
( هجليج حقتنا وحترجع) و بعد ما ترجع هجليج
الحكومة حتقول للمعارضة: ( لو جاء كلب شالكم ما بقول ليه جررر).
والمعارضة حتقول للحكومة:(المشتهى الحنيطير إطير)
والطيب مصطفى حيقول للجنوبيين :(كب كرررب حرررب المديدة حرقتنى).
ونافع حيقول للشعب السودانى :( كلكم زق وما عندكم وطنية….وشوية كلمتين عفنات.)
وتولع تانى من جديد وغالبا فى أبييى
وكل زول إقول دا حقى ..لغاية ما يمشوا المحكمة
القاضى حيقول ليهم :( إنتو ما إتطلقتوا زمان ، العوة فوق كم؟)
وبعداك إستئنافات والقصة الما حتنتهى ديك …وتدور تانى من جديد
والله من رميتك الطويلة دي عاااااارفك بتظبط لي خط هيثرو … هيثرو تطير ياجبره وهي اصلها طارت
خلينا نركز علي قعااااد الواطه .. اكتب فيهو تااااني ورينا نبدأ من وين راس الخيت .
( السودان ده بناعنا كلنا) !!!! منو القال ليك. ما هو ده الاستعباط البخلى الناس بيتمردو ضدكم يا اهل المثلث. امس قالوا انه فى 160 حارة طرفيه فى امدرمان تمثل معقل الطابور الخامس. يعنى انا الاخوى فى هجليج مصنف انى طابور خامس لمجرد انى من دارفور. يا ناس المثلث ما تحاولو تتذاكو على الناس و تتغطوا تحت( ارض سودانية احتلها اجانب). و مال حلايب هذه ارض نيوزلندية؟الحرب ده واضحة ، اهل المثلث ضد الجميع. فاهمنها نحن من زمان و حتستمر كده.
والله الحل هو واحد هو الثورة الدموية فقد فقدنا الكثير بعفا الله عما سلف عليك الله تعليق نافع ده مستوى يحكمنا(اكان طلعوا ووب وكان ما طلعوا ووبيين)وكمان تنزل فى الصحف اى ركاكة هذه
واله ووالله ما تكون هناك ثورة فيها دم للركب لن ولم ينصلح امر هذا البلد رئس كضاب و الوالى كضاب والله لهم بالمرصاد انهم قوم لا يتدبرون القران العظيم وقصص القرى ولو اراد الله ان يهلك قرية امر مترفيه ففسقوا فيها فحق عليها العذاب والله جاية جاية
الصصصصصصصصصصصصصصابر
يا ستاذ، ليتك لم تبين رأيك في إحتلال هجليج العزيزة علينا فقد أتي رأيك مموجا ومتسما باسلوب كتاباتك الساخرة.
فكان الأحرى بك أن تناشد الشعب لأسقاط حكومة الدمار الوطني أولا ومن ثم فإن الشعب قادر على تحرير هلجليج وصدقني أنه بعد أسقاط هذه العصابة ومحاسبتها على كل ما أقترفته في حق الشعب السوداني، سوف تنسحب قوات دولة الجنوب من تلقاء نفسها لأن مشكلتها ليست مع الشعب السوداني بل مع هذه الطغمة الفاسدة الجاسمة على صدر الضعب السوداني بقوة السلاح وعنجهية ضار على نافع.
يا أخي إلى متى تظلوا دافنين رؤسكم في الرمال، الساكت عن الحق شيطان شيطان شيطان
لولا دا سيلفا (ما سيلفا حق الجنوب.. دا الرئيس السابق للبرازيل) بكى مرتين .. الأولى لما فازت البرازيل بشرف تنظيم الألعاب الأولمبية لعام 2016 .. والمرة الثانية عندما سألوه فى مقابلة تلفزيونية فى أواخر ايام حكمه .. سألته المذيعة عن ماهو اكبر انجاز حققه خلال فترتى حكمه؟؟ .. فنزلت دموعه قبل ان يجيب بأن اعظم انجاز له هو ان المواطن البسيط بدأ يشعر ويعرف ان له وطنا ينتمى اليه يدعى البرازيل وله شرف الأنتماء وقد كان المزارعين والبسطاء علاقتهم مع الدولة تنتهى بنهاية كأس العالم..
فالعدل يخلى الناس كووولها تشعر بأنها شركااااااااء وكل واحد عنده مسؤولية وواجبات وبعدين تجى الحقوق
.. فما دايرين نتكلم عن الخلفاء الراشدين عشان ما تقولوا الزول دا سادى وداير يعذبنا ساكت..
بى مزاجها وحصريا عليها دى ذاتها الطيرت مننا حلايب والفشقة و هسع لايصين وراء اللالوب ..
كتب جبرا0000
إذن الحكمة تقول أنه لابد من وجود خطة إسعافية عاجلة يتبناها الجميع للخروج من هذا المأزق .. إن مواصلة (الكنكشة) وسياسة (لحس الكوع) والشنو ما عارف لن تفضي إلا إلى مزيد من الإخفاقات والتدهور كما أن وجود معارضة (ما عندها برنامج) يجعل أى محاولة للتغيير بإستخدام ورقة (شظف الوضع الراهن) الذي يعانيه المواطن هي مغامرة معروفة النتائج أقلها الفوضى وإنعدام الأمن (ونحنا ما ناقصين) !
يعني يا جماعة الخير القصة (بالعربي كده) بقت ما قصة (معارضة وحكومة) القصة أصبحت (قصة وطن) .. السودان ده بتاعنا كوووولنا .. ما بتاع زول عشان لمن تغتصب أراضيه نقول ليهو أمشي حارب ورجعا براك .. مفروض نحارب كوووولنا عشان دي بلدنا كووولنا .. وبرضو السودان ده ما بتاع جماعة تعمل فيهو العاوزوهو (بي مزاجا) ويكون الحكم وإدارة البلاد (حصرياً عليها) لأنو برضو دي بلدنا كووولنا .. لازم من وجود دولة تبني على المواطنة .. كل مواطن في البلد دى يكون ليهو شرف البناء والتعمير وتولي المسئولية وإتخاذ القرار لا فضل على آخر بالعرق أو اللون أو (اللحية) .هسع كلامك دا ما زي كلام النظام ووقت البلد دي بلدنا كووولنا ما شاورونا لية علي اتفاقية نفاشا 0واذا اصلا في دولة مواطنة كان الجنوب انفصل 0المشكلة ما هجليج المشكلة النظام والحرب دي انا شخصياَ ليست حربي 0وهم يادوب عرفوا البلد دي بلدنا كووولنا
الاستاذ الفاضل / الفاتح جبرا
هجليج انشأالله حترجع ومنصورين باذن الله ولكين زي ماقولته الناس ديل هيعملوا الدارب ساساقه عشان كده لازم الناس تعين الي الجيش بعين اكثر واكبر وفاحصه : تاهيل وتدريب واسلحه متطوره والاهم ثم الاهم والمهم هو عودات هؤلا الضباط الكبار الزين هم الان في المعاش والله كلهم جاهزين عشان الوطن وعشان السودان وعشان العرض والدين ولامن والامان …………..
وبعدين الدولار البقي با6 جنيه دي بينفع معها معاش ياعمك والله مااظن والله في ضباط هاجروا البلد ومامعرفو شغالين شنو في الغربه …….
وبعدين ياخي خط هيثرو دا الا تجيب كورمبو او شارلوت هولموز او ………….. ياخي لوبقيت علي خط هيثرو بسيطه شوف السوفت وير بتاع سكر النيل الابيض مشي واين وشوف سودانير مشيت واين وكانت واين…………………ياخي والله الهموم لاتحصر ولاتعد
وأنت البرجعك شنووووووووووووووو
الاستاذ جبرا:
تحية طيبة
ارجو ان تسمح لي
خرجة سخرية سبيلك عن طريقها المعروف
البد البتقول حقتنا كوووووووولنا دي انقسمت قصبا” عن عين كل السودان
والبلد البتقول حقتنا كوووووووولنااحتلال اجزاء منها كان قصب عن عينا
كان حلايب او شلاتين او الفشقه او او او …… الخ الخ الخ
يعني بقت علي هجليج ولا عشان الاحتلوها اخوانا الجنوبيين؟؟؟
عن اي مواطنة تحكي يا استاذ والشعب لايجد ما ياكله بلاضافه لتلوث المياة والنيل شاقي البلد
اي مواطنه والكهرباء مقطوعه والتعليم معدوم والصحه غير متوفره الا لعدد من الاثرياء
اي مواطنه والفرد محروم من ابسط مقومات الحياة
تخريمة:
الواطه الداير الناس تقعد فيها بقت تتوزع للمصريين والقطريين
دا غير الاراضي الاحتلوها
تضامن جبرا:
اخبار سجم الرماد شنو؟؟؟
اقصد اخبار خط هيثرو شنو؟؟؟
هكذا يجب ان نفرق بين الوطن والوطني … ونامل كما قلت يا استاذ جبرة هجليج ان شاء الله حا تتحرر لكن ماذا بعد هجليج ؟؟؟؟؟؟؟؟؟؟ ان شاء الله يكون الحرب على الفساد والمفسدين وان لم يكن الجماعة جادين بعد دا مافي غير الاعتصامات والشارع ولا نريد ان نلدغ مرة ثالثة فلقد بلغ السيل الزبى . وانت دائما منطقي ومقنع وواقعي ودا حال معظم الشعب الصامت الغير متحزب . لله درك يا وطن.
والله يا ود جبرة بنحترمك بس لامن تقيف لى مع ناس حماس وطالبان وايران والانتنوف والشاينيز بتلقونا واقفين مع الامريكان واسرائيل ودارفور وسوريين وجبال النوبة وجنوب النيل الازرق و(الجن الازرق )زاتو نقيف معاهو عشان النتيجة يكوم تعادل ومافيش حد احسن من حد .
( بعد تحرير هجليج ( بإذن الله) وعزيمة أولادنا–) بكلامك دا مش حتكتل ليك زول وانما الآلاف من الشباب القادر علي العمل والذين تحتاجهم بلدنا في الأنتاج بدل ما نستورد بصلنا ولبنا وبالعملة الصعبة من الجيران ؟؟؟ واثبت التاريخ انه الحروب هي حماقة بين طرفين ؟؟؟ وبعد ان يتدمر الطرفين يتدخل الوسطاء ويجلس الأحمقين ليمضوا اتفاقية ويبوس كل منهم الآخر وكأن شيء لم يحصل ؟؟؟ والمستفيد الأول يكون تجار الأسلحة والمؤن العالميين ووسطائهم المحلين والصغور والحيوانات التي تلتهم الجييف وما تبقي من جثث يفيد الأرض كسماد عضوي ممتاز ؟؟؟
عندما اراد هتلر غزو الدنمارك ٍسأله رئيس الدنمارك لماذا تريد غزونا ؟ أجاب هتلر اريد مواد غذائية لجيشي الجرار الرهيب ! فرد رئيس الدنمارك وقال تفضل يا سيدي وخذ ما تريد دون قتال ؟؟؟ غضب شباب الجيش الدنماركي وسألوا رئيسهم لماذا تسمح لهذا النازي ان يغزوا بلادنا ؟ رد رئيسهم وقال لهم كم من شعبنا تريدون ان يقتل لكي نوقف هذا المتوحش ؟؟؟ فدخل هتلر الدنمارك وأخذ ما يريد من مؤن غذائية دون ان يقتل دنماركي واحد ؟؟؟
عندما اختلف اقليم سلوفينيا مع تشيكيا وطالب بالأنفصال جلس معهم رئيس تشيكا ووقع ورقة الأنفصال دون اراقة اي دماء والآن هم دولتين تربطهما علاقات جيدة دون اي خلافات ؟؟؟ هذه أمثال توضح العقلانية وتنبذ الحماقات والبطولات الزائفة ؟؟؟ سوف يتجوعل البشير ويحارب وبعد ان يموت الآلاف من شباب الجانبين وتنهك الدولتين الهزيلتين اقتصادياً تتدخل الدول الصديقة ليجلس الطرفان لأمضاء اتفاقية سلام ولكن بعد ان يقتل كل طرف حصان عربة الآخر ويحتار كل طرف في كيفية جر عربته؟؟؟
اصبت استاذي لك التحية فالكل يجب ان يدافع عن ارضة وعرضة.
يا جبره كلنا نشجب إحتلال أى أرض سودانيه أينما كانت و أنا متفق معك لازم كلنا الشعب السودانى نقيف خلف قواتنا المسلحه وقفة رجل واحد و أنا متأكد دا ممكن يحصل بس مش تحت قيادة أبو رياله والكيزان و الفاقد التربوى الذى مكنوهو فى السنوات الأخيره دى من قيادة الجيش و هم فعلا ثبت عجزهم تماماو فشلوا فشلا ماحقا و الدليل …. ما نحن عليه الآن…….إنى أرى الحل فى إعفاء كل القياده العسكريه الحاليه و الوزير البشتنه ده و إعادة كل القيادات التى تم إعفاءهافى العشرين عاما الماضية لعدم الثقة فيهم أو لما أبدوه من مناصحة لم تجد الأذن الصاغية من هذا النظام المكابر … لتسلم مواقعهم و منحها كل التفويض لعمل عسكرى وفق المهارات التى كانوا يتقنونها….. كما أرى إعادة كل الدلومسيين و قيادات الشرطة المحترفين و ليس ذوى القربى و المقربين الذين تم إعفئهم بزعم الصالح العام لمواقعهم لإدارة العمل الدبلوماسى و الأمنى الإحترافى و خلونا من ناس زعيط و معيط ديل…… يوم دا حتحرر كل هجليج و الفشقه و حلايب بإذن الله …….و بدون كده أفتكر ؟؟؟؟ ما قادر أتصور والله…..
تعرف ىا ساخر إيه رأيك نعمل كشف لتحرير الهجليجة بعدين يرجعو ليناحقنا بترول يكون منها حقنا رجع و دقنا بترول بلدنا
اما بينى و بينك أنا حاسدك عديل في قعدتك فى الجرطوم أموت ان في ام درمان اتفنونى في الهجليجة السلام أمانة لجنودنا
الفرسان دا اول شي تأتي أنا عازك اطلب منك طلب أنا عازك تدينى100$ ولا اقول ليك ان برسلا ليك وآت تقوم تشترى
عصير و حلاوة وتوزعا على جرحي عمليات الهجليجة دا كلام رجال ما كلام حكومة
كسرة من بلاد برا
شنو اخبار الهجليجة يا عم عبدالرحيم
الجماعة ديل باعوا خط هيثرو المعلق فى السماء يعنى تفتكرح يدقسوا مايبيعوا الاراضى الفضلت كدى عاين يمين وشمال فى حلتكم شوف فى مبدان كورة فاضى ما اتباع يا استاذ ديل المدينة الرياضية شلعوها وانا كل ما ازوراقاربى فى امبدات والحاج يوسف بشيل جوازالسفرمعاى يمكن السعوديين اوالمصريين يطلبوا تاشيرة دخول اوتصريح زبارة واحسن فكرة نجنمع فى الفيسبوك دة ماببفدروا يبيعوه
وليه من زمان ما كنا كووووولنا ….يعنى البترول وقروشوا ماوزعوها لينا كوووولنا ليه الاراضى والعمارات السوامق ماادونا منها كووولنا ليه.. يعنى الوقت داك كانوا ناسننا والان اتذكرونالألأ… لألأ ياجبرة … نكته (كان فى واحد بلدينا حارس للعمارة بتاعت اولاد راحات وحناكيش وكان كل يوم عندهم بارتى واعياد ميلاد وحاجات زى دى .. وبلدينابسمع الحفلات كل يوم ..وفى يوم من الايام ماتت حبوبة الحناكيش ديل وقام جاء واحد وقال لبلدينا ياعمو عليك الله عندنا حبوبتنا ماتت تعال ادفنا لينا !!بلدينا قال ليهو : وقتين البارتياااات والتورتهااااات والجكس مااااا تعزمونا .. وقتين يكون عندكم مره(إمرأة) عجوز ماتت تعزمونا).
هذا هو الحال يا هيثرو .. اقصد يا جبره.
هذا ماندعو وندفع به وندافع عنه. الوطن يحترق، لذا يجب على الحكماء الجلوس في الأرض كما كان يفعل الأجداد، والوصول إلى حل (عسكري أو سلمي) مع هذه الدويلة النكرة. والله أن منظر قتلانا يمزق القلوب، إن كانت هناك قلوب تتمزق. من يشمت في الوطن فليس حرياً به أن يحمل جنسيته، وليتجه صوب الجنوب الذي فتح رجليه لكل طالب جنسية شمالي.
يا جبرا الكلام البتقول فيهو ده كلنا عارفنو ، وصدقني الوطنية العندنا ما عندهم . لكن يا جبرا الموضوع الكيزان ديل انا في إعتقادي اكثر حاجة مقعداهم في الحكومة مش ضعف المعارضة لكن فهمهم لطبيعة الشعب واستغلال عواطفه [ نحن شعب عاطفي] .يعني :
1- البيوزع في الاراضي السودانية لمدة 99 سنه بعقود بدون توكيل من الشعب السوداني وعلي عينك يا تاجر [المشكلة ديل سودانيين ].
2- بناء سد مروي حتي الآن دو فائدة [ اتضح انو الفائدة للمصريين ( الطمي وكدة) مع العلم انو القرض وفائدة الربوية باسم الشعب السوداني ، وكم تقاس جريمة ترحيل شعوب من اراضيها ، وديل برضو سودانيين .
3- وسكر النيل الابيض ودولارات رواتبهم ولم يعمل حتي اللان .
4- الذهب لذي يرحل الي فرنسا من دون ان بظهر في ميزانيتهم .
5- شركات كل كوادرهم وفسادهم .
6- فصل الجنوب .
يا جبرا ديل ما بشر عشان تتكلم معاهم بالمقدمة المافي داعي ليها.
هم بس في ورطة شديده عشان كدة عملوا مشكلة هجليج عشان كل الناس تتوحد لعدو واحد هو الحركة الشعبية.
[السؤال كيف بدولة بترولية وذهبية وميزانية الدفاع والامن اكثر من 70% ، ورجالها مشهرين بالبسالة والشجاعة ولها خبرة في الحروب من العهد المروي ، ان تسقط مدينة البترول في ساعات من دولة لم يكتمل تكوين جيشها بعد ] ولا اقول للطيب مصطفي الغزاه ديل هم السودانيين الاصليين
انا حتى الآن ما بصدق انك ( يا الفاتح) ما مع الجماعة ديل لانو في كل مرة منتظر فتوى ، من الجماعة اياهم ، تهدر دمك والله تعتبرك فاسق – وحركات توقيف واستجواب وكدا لعبة معروفة لدفع شبهة مساندة قلمك للنظام – وعندك توقيف الانتباه والتيار وألوان – كلها حركات نوبة
لكن خلينا نتفق انك مسنود ومدام جبرا لديها شركة خاصة لا تخضع للمحاسبةمثل شركات صلاح ادريس والله الوالي وبنت الفاتح معينة في موقع حساس وكدا مثل بنت احمد عبدالرحمن ولذلك حديثك عن بعض الممارسات والفساد لا يختلف عما يكتبه عثمان ميرغنى ، والطيب مصطفى واسحق احمد فضل الله وبقية العقد الفريد الذين يرددون الاسطوانة المشروخة قوات الجيش والدفاع الشعبي والقوات النظامية الأخرى الآن داخل هجليج / وهجليج محررة 100% والمجاهدون يلاحقون الخونة والله اكبر والعزة للسودان
في الوقت الذي يعرض تلفزيون جوبا أفراد وطلبة الدفاع الشعبي الأسرى ( زغب الحواصل لا ماء ولا شجر ..)
كسرة
وبالنسبة لخط خط هيثرو يا ناس الراكوبة حلمت أن الفاتح الذي يسال عن اخبار الخط – هو بطل القصة الذي يقف وراء قضية سرقة الخط ليدفع التهمة عن نفسه ، على شاكلة روايات اجاثا كريستي
و الله يا جبرا كلام يجبر الخاطر و يجبر عقول المتحكمين و المحكومين أن تثوب إلي رشدها.
البرجع حلايب والفشقة شنو ولا بس احتلال عن احتلال يفرق
قال ايه الان اوضح موقفي وادين حكومة الجنوب وادعم القوات المسلحة = امك = جميل جدا والبركة فيك يا نافع عالم تخاف ما تختشيش
للاسف الحكومة التي جاءات في 30 ينونيو 1989 لم يكن هدفها ابدا انقاذ السودان كما ادعت بل كان هدفها انقاذ فئة معينة فأدت بسياستها الاقصائية والتهميشية الي تمردات هنا وهناك ونزوح وتشرد وهجرة الكثير وقد اصاب الوهن حتى القوات المسلحة فلم تعد قادرة على صد اي هجوم أو اعتداء على أراضي واجواء السودان فبلا فخر في خلال سنوات الحكومة الحالية حدثت المصائب التالية :ـ
1/ارتفاع سعر العملة الاجنبية مقابل انهيار قيمة الجنية بنسبة لايمكن ان يتوقعها احد
2/ فقد حلايب وشلاتين
3/ فقد الفشقة
4/ضرب مصنع الشفاء
5/ الهجمات التشادية على غرب السودان
6/ انفصال الجنوب
7/ الهجمات الاسرائلية على شرق السودان
8/ هجمات قوات خليل ابراهيم بظهور السيارات على العاصمة.
9/تصدر السودان قائمة الفساد في العالم
10/منح امريكا اكبر سفارة في افريقيا رغم ادعائهم معاداتها
11/اكثر من 350 منظمة اغاثة تعمل في السودان (سلة غذاء العالم)
12/انهيار الخدمة المدنية.
13/انهيار الخطوط البحرية والجوية (سودانير)والبرية والسكك الحديد
14/انهيار الخدمات الصحية والتعليمية بالبلاد
15/وغيرها كثير
الليلة يا عمو جبرة كووووووووووولنا ما مبسوطين منك (ما عدا كتيبة الجهاد الإلكترونى الواضحين من تعليقهم عليك)
يا ريتك صمت عن الكتابة فى الموضوع من الأصل
يا تر الحاصل شنووووووووووووووووووووووو؟ كووووووووووووووووووووولنا بنسال!
ده هي الحكمة:
مسئولية الكلمة تجعلنا نقولها بكل الصدق والوضوح أن مستقبل البلاد في خطر وعلى الجميع القعاد في الواطة دى بأعجل ما تيسر لإنقاذ السودان…
شكرا كتير جبرة علي المقال الممتاز.
ماليزيا تمشو براكم..
وهجليج نمشي معاكم؟؟؟؟؟
كلامك صاح اها اخبار حلايب والفشقة شنووووووووووووووو ولا دا ما وقتها انت برضك بتقول كده؟ . هل هي ما بتستاهل القعاد في الواطة وكده؟
أرضنا وعرضنا نفديهما بدمنا
بقولوه سبب حرب هيجليج إنو في ناس من كفار قريش أبو لهب وجماعتوه ظهروا في هيجليج عشان كده البشير أعلن الجهاد لرفع كلمة لا إلله إلا الله والدفاع بلنيابة عن الإسلام والمسلميين في كل بقاع الأرض … الف مبروك مقدما وبعد ما تحرروا هيجليج موروه علي القدس وحرروها ويكون جزاكم الله الف خير وتكونوا حليتوه مشكلة كبيرة جدا من زمن هجرة موسي عليه السلام الي أرض الميعاد ماإتلقه ليها حل … أهو الإسلام كده ولا بلاش …
ياجبرة انت عارف ومتأكد انو بعد ماترجع هجليج الجماعة ديل حيرجعو لسياسة لحس الكوع وحاجات اخري
ما يهمك لو مشو وادونا خاتيروم ااكد ليك حترجع هجليج والفشقة وحلايب يعني باعربي كد كل شبر من السودن القديم والجديد يا اخوي اركز وما تلاوز؟؟؟؟؟
والله ياود جبرا اليله انا زعلانه منك جنس زعل .. ودا ماكلامك .. طيب ياعزيزى الفاضل انت مش وطنى ومفروض تعرف كل كبيره وصغيره تهم المواطن العادى .. يعنى قديتنا بسؤلك عن خط هيثروا .. والجماعه متعامله معاك معاملة الكلب ينبح والجمل ماشى .. عليك اله من دى ما كان اولى ليك ولينا
تعاض عديل وتريحنا … اخير من الالوان الرماديه دى ؟؟؟؟.. على العموم لك تحياتى ….
تحرير هجليج والفشقه وحلايب وشلاتين يمر عبر تحرير السودان من الغزو الإنقاذى الكيزانى
يعنى نساعد المغتصب الإنقاذى فى تحرير هجليج عشان قروش البترول تمشى لناس محمد عطا
ويجى يعذبنا بيها هو وكلاب أمنه ويغتصبوا بيها ناس صفيه ويقتلوا عوضيه ؟
ياراجل قول كلام يخش العقل ؟
ولا عشان أبوالعفين يقول لينا دقستو وأمشو ألحسو كوعكم ؟ ويبنى قصر لتوا الزوجها للهالك الزبير؟
ولا عشان البشير يتزوج الرابعه ؟ ويهديى ليها قصر فى كافورى ومزرعه فى السليت وشقه فى عمارة النصر
وبعدين عن أى جيش تتحدث ؟ الجيش العمره ماخاض حرب خارجيه وكل حروبه ضد شعبه؟
ولمن جاته أول حرب خارجيه فى هجليج ولى الدبر؟ جيش الخنا ده 20 سنه عميان من حلايب والفشقه ؟
الجيش البحرق القرى فى دارفور وجبال النوبهوالنيل الأزرق ويقتل الناس فى بورتسودان وكجبار؟
لمن يكون الجيش قومى ومابتدخل فى الشأن السياسى بعدين ممكن نعتبره جيشنا .ز لكن دى ملشيات الإنقاذ
وماعندنا بيها شغله .. لة إتحرقوا .ز إتحرقوا بنارهم الولعوها..
المره دى الحرب حقت ناس حماده نافع وحماده المتعافى وسحاسيح الكيزان
لاسرقنا معاهم ولا إتوزرنا معاهم ولا درسنا بقروش الشعب فى أوربا ولا إتبنت لينا قصور من بترول هجليج
وليه الجماعه الإنقاذيين مايقعدوا هسع مع الناس قبل تحرير هجليج ويشكلوا حكومةحرب
بقيادة ناس وطنيين وحكومة البشير الفاشله تقدم إستقالتها
دى الحاله الوحيده الممكن نحارب فيها لتحرير هجليج
والإنقاذيين لو قلبهم على الوطن وزى مابتهموا الناس بعدم الوطنيه نحن نرد لهم بضاعتهم
لو إنتو وطنيين شكلوا حكومه حرب وطنيه بقيادات وطنيه وتذهب حكومة الفشل الحاليه
غير كده الله معاكم شديد وأمشوا حاربوا براكم وسوقا حماده نافع وحماده المتعافى المتجدع فى لندن
يا خالد حسن و أنا سودانى إنتو فهمتو حديثى عن (كتيبة الجهاد اللإكترونى)غلط. كتيبة الجهاد الإلكترونى هم مجموعة الأمن الإلكترونى العاملة فيها بتأدى دورها فى الجهاد بمتابعة ما نكتب فى المواقع الحرة المختلفة والرد علينا بالردود الكيزانية المايعة التى ترفع ضغطنا أكتر و أكتر. والله أنا حاسة بالحزن الشديد لمجرد إنكم فهمتوا إنى مع الجماعة ديل و حاسة بإهانة ما طبيعيةو لن ينتهى حزنى إلا بقراءتكم لردى دة و الرد عليه مرة تانية، و بالمناسبة يا سودانى أنا (النك نيم) بتاعى لولى بوب ، يعنى بالبلدى حلاوة حربة