عاوزين فتوى
عاوزين فتوى
الفاتح جبرا
[email][email protected][/email]
قرأت بالأمس خبراً يقول أن مجمع الفقه الإسلامي بالخرطوم أصدر فتوى حرم بموجبها بيع النوع الواحد من النقود ( الفكة) بسعر مختلف، وقال المجمع أنها من الربا المحرم شرعاً، و لمن لا يعلم فإن (بيع الفكة) هذه تجارة صغيرة يمارسها بعض الأشخاص في مواقف المواصلات حيث يقوم الشخص بوضع الفكة أمامه على تربيزة لياتي إليه الكماسرة فيشترونها منه (الجنيه بتسعين قرش مثلاً) وذلك حتى يستطيعوا أن يردوا للركاب (الباقي بتاعهم) !
حقيقة بعد قراءة الخبر أحسست بسعادة غامرة لا توصف .. فعلى الرغم من أن (قصة بيع الفكة) هذه سلوك محدود يقوم به عدد قليل من الأشخاص وهو سلوك غير ضار في حد ذاته ولا يؤثر على النمو الإقتصادي او يهدد الأمن القومي ولا يتضرر منه شخص إلا أن أخواننا العلماء بمجمع الفقة الإسلامي أبت غيرتهم على الإسلام إلا أن يجتمعوا ليناقشوا (المسألة) من ناحية (فقهية) ليخلصوا إلى حكم الدين فيها ويبينوا للناس حرمة هذا السلوك ليقلعوا عنه .
سعادتي جاءت من منطلق أن يهتم مجمع الفقة الإسلامي بهذه الممارسة الصغيرة المحدودة التى لا تضر بطرف ما ، إذ أن ذلك يعد مؤشراً واضحاً يدل على أن هذا (المجمع) يفتى بلا شك في ما هو أكبر من ممارسات والظواهر والتعاملات التى لها من الأضرار ما لها ويتأثر بها ملايين الأشخاص ، والأمثلة عن هذه الأشياء (ذات الوزن) و التى تحتاج إلى فتاوى عاجلة كثيرة للأسف الشديد ونحن نعيش في هذا الزمن الأغبر الذي كثرت فيه الفتن وإنساق الناس وراء الشهوات وانصرف الخلق إلى الدنيا وانهمكوا فيها وأصبح (الفساد) حاجة عادية وبقينا ما عارفين (الحلال) من (الحرام) والعقد (العلني) من العقد (السري) وخط هيثرو من خط (18)!
كثير من هذه الممارسات والظواهر والمعاملات (ذات الوزن الثقيل) يعلمها علماؤنا الإجلاء ولم يفتوا فيها بعد (إحتمال ما عارفنها)، لكن طالما القصة جابت ليها (فكة) فالعبدلله عاوز فتوى مستعجلة يعلمها العلماء تمام العلم بل ويشاركون فيها بصورة شهرية !
أخواننا العلماء الإجلاء الذين قاموا بتحريم بيع الفكة .. هم جميعاً مثلنا قد قاموا بشراء عداد (الجمرة الخبيثة) من شركة الكهرباء وهم جميعاً مثلنا يقومون بدفع إيجار شهري (نهاية أجله غير معروفة) ، السؤال البرئ جداً ألم يستوقف أحد هؤلاء العلماء الأجلاء هذا النوع من أنواع البيوع التي لم ترد في كتب الفقة ولم يعرفها الإسلام ولم تعرفها الجاهلية (ذاااتا)؟ أليس هذا هو الحرام ذات نفسو أن تشتري (شيئاً) فيقوم من باعه بتأجيره لك بإجرة (لا يعرف منتهاها) ، أوليس هذا الأمر أكثر وزناً وأفتك ضراراً من قصة (الفكة) ويستوجب الوقوف عنده وإصدار فتوى لإيقاف هذه القصة (الما بتخش في الراس) وتبيين رأى الدين فيها ؟!
الإخوة علماء مجمع الفقه الإسلامي أنتم مطالبون اليوم قبل الغد بإصدار فتوى توضح لنا معشر المواطنين إن كانت هذه المسألة تقع في باب (الحرام) وأكل أموال الناس بالباطل ، وإذا القصة طلعت (حرام وكده) هل الشركة من ناحية شرعية مطالبة بإعادة هذه الأموال التي دفعها المواطنون إلى أصحابها
وللعلم فإن شركة الكهرباء والتي تمتلك هذه الخدمة الضرورية (حصرياً) تبيع العداد الواحد بما يفوق( ما يعادل) الألف دولار أمريكي مع أن سعره لا يتجاوز الخمسين دولاراً ودى ما عاوزين فيها فتوى (عشان ده جشع ساكت) !
كسرة :
الأخوة العلما ء الأجلاء .. بيع الفكة عرفناهو حرام أها شوفولينا قصة يبيعوا ليك الحاجة ويأجروها ليك دي !
كسرة ثابتة :
أخبار خط هيثرو(شنو(ووووو)؟
يا جبره انت تتابع ديل حتتعب وحتجيك امراض مستعصيه ومقدوده ارجع القرلانو ديل شغالين بالفارغه يه بتاعتك فى حلفا الجديده وارتاح من المشاكل
باااااااااااااااارك الله فيك يا جبرا
الموضوع دا الصباح كنت بقول فيهو
انا غايتو دفعت والله قريب 7 مليون
ولسه بدفع في الاقساط
عدادي عندي اشتريتو منهم ومأجرو برضو
اتاوت وكده
غايتو حظنا كان ناس الفقه ديل افتوووووا برجيع القروش الدفعناها للايجار لانو اصلا العداد حقي دافع قيمتو عدا نقدا …
ابشر ياشاب حق حاجات رمضان طلع
خصمتك النبى ود امى خط هيثرو دا موضوعو شنو انا جيت الراكوبة متاخر من حر000000
ايوة كدا اها نحن راجين الفتوى دي
والله يا جبرة دى شدييييييييييييييييييدة الليلة… واقول ليك .ز انت هبشت الكهرباء براها مالك؟؟ فى كم (حاجة كدة) دايرة الشديدة بتاعتك….
والله العظيم عارف انك ما بتاع(لف…وكدة)
اى حاجة _ولو عظمت ذنبا_بتمس الحكم والحاكمين دى أعذروهم فيها وما تحرجوهم ودخلوهم فى حته ضيقه ..أما الحاجات ال(الميته ميته ) فهم لها..بس هم فى خطر عظيم الدين ما فيو (مسك العصايه من النص)
كلام عجيب ياناس والله بقت تحصل لينا وحولنا حاجات ماجايبين ليها خبر يا الفاتح يامتحف لكن قول لى يا الفاتح هى غيرادات الكهرباء كلها بتمشى وييييين دى عايزه فتوى برضو من الجماعه
أستاذنا جبرة الداير الفتوى كتير بس هم يبدوا بالأهم …!!
مثلاً :-
عقوبة من يعتدي عل أموال الأوقاف لإنها حقة الله …
وعقوبة من يأكل اللحم والسمك ويحلي باسطة والباقي يجدعو وجارو بايت القوى ..!!
ونريد فتوى أيضاً عن قضية الدرداقات التي يتعيش منها بعض الصبية والشبان الواحد فيهم يشتري له أهله درداقة ليكسب بها عيشه فتصادرها المحلية وتضع لها رقم متسلسل وتؤجرها له. بأي وجه حق تصادر الدرداقة وتؤجر لصاحبها؟! اذا كانوا يريدون رسوم عمل يومية يمكن أن يطلبوها بدون مصادرة.
لا اقول اكثر من ان انقل لكم فتوى الشيخ بن عثيمين في بيع الفكه
السؤال: بارك الله فيكم يقول المستع من الدمام أ. س. ع. سمعت فتوى من أحد أهل العلم بأنه يجوز استبدال العملة الورقية بأخرى معدنية مع التفاضل والزيادة في أحدهما كأن يستبدل خمسين ريال ورقية بثمانية وأربعين معدنية فما حكم الشرع في نظركم فضيلة الشيخ في هذا وإن كان هذا يجوز فأرجو توضيح العلة في ذلك أثابكم الله؟
الجواب
الشيخ: الذي أرى إن هذا جائز ولكن بشرط التقابض في مجلس العقد فيجوز أن أعطيك عشرة ريالات ورقية بتسع ريالات معدنية أو خمسين ريالاً ورقياً بثمانية وأربعين معدنية أو بالعكس بأن أعطيك عشرة ريالات ورقية بإحدى عشرة ريالاً معدنية لأنه أحياناً تكون الرغبة في هذا وأحياناً تكون الرغبة في هذا وذلك لاختلاف الجنس وإن كانت القيمة في نظر الحكومة واحد لكن الجنس مختلف والتقويم هذا تقويم نظامي ليس تقويماً حقيقياً بدليل أن الحكومة لو شاءت لجعلت بدل الريال الورقي ريالين من هذا الريال المعدني أو أكثر أو أقل فإذا كان هذا ثمناً بحسب نظام الحكومة لا بحسب الواقع فإن التفاضل لا بأس به وهكذا نقول في جميع الأوراق النقدية إذا اختلف جنسها فإنه يجوز فيها التفاضل لكن بشرط التقابض في مجلس العقد وهذا الذي قلته قول وسط بين من يقول إنه لا بد من التساوي والتقابض وبين قول من يقول إنه لا يشترط التقابض ولا التساوي فهذا القول وسط أن ما عدا الذهب والفضة إذا اختلف جنسه فإنه يجوز فيه التفاضل ولكن بشرط القبض في مجلس العقد أما الذهب والفضة فإنه إذا بيع الذهب بالذهب فلا بد من أمرين التساوي وزناً والتقابض في مجلس العقد وإذا بيعت الفضة بالفضة فلا بد من هذين الأمرين أيضاً التساوي وزناً والتقابض في مجلس العقد وإذا بيع ذهب بفضة وإن كان كل منهما نقداً كالدراهم والدنانير فلا بد من التقابض في مجلس العقد وأما التساوي فليس بشرط
عمي جبرة .. انت منو القال ليك العملاء اقصد العلماء بدفعوا لشركة الكهرباء من اساسو .. ما ملح وكدة..
شكرا يا عم كلام فى الصميم. ما تنسى (عمود)الكهربا ضيفه للقائمه يدفعوك الثمن وازيد وكمان يوصلوا لجيرانك بفلوس (رسوم العمود).
الفاضل جبرة
السؤال ليس للفتوى ولكن نطلب منهم تبرير لاستمرار الاجار ، اجارك الله يا جبرة وانشاء الله انت فى الجنة لو ده كمية الفلوس البتنسرق منك :أخبار مولانا بتاع ال 60 الف ريال و40 الف جنية شنوووووووووووووووووووووووووووووووووووو؟
هولاء ياجبرة لايرون الا مايراة السلطان ديل علماء السلطان هولاء واناس كتر عندهم درجات علمية وكلنا عارفين وفي كل المجالات تحصيل حاصل وكدي وبدون مجهود بس كان عندهم فتوي يفتوها في جماعة الارشاد
(اعوذباللة)
مجمع الفقه قراده تعيش على دماء الشعب السودانى .. هؤلاء هم شيوخ الضلال وتجار الدين .ما قلته ياسيد جبرا عين الحقيقه .. ولكن شركة الكهرباء تملك المال الوفير جدا لتسكت به اجعص فقيه .. اما بائعى الفكة اصلهم فكه ولا قيمة لهم فى فقه كهنة الجبهة الاسلاميه الحراميه ..اخبار البرادو الهديه شنو ؟ ياسماحة الشيخ ؟ لو مواعيد الترخيص جات امشى رخصها . طبعا انتو ما بتدفعوا رسوم ترخيص لانكم سياد الشريعه وكده .
هي بس في العداد يا الفاتح؟هذا المستهلك والذي عليه ان يدفع مقابل خدمة الكهرباء فقط هو الذي يمول البنية التحتية لهيئة الكهرباء من عمود وسلك وحاجات تانية عليه المطلوب فتوى كاملة وليس فتوى للعداد فقط ؟ كيف ادفع قيمة عمود كهرباء ولا امتلكه ؟ يعنى كان رحلت من المنطقة يفترض اشيل معاي عمود النور ” حلوة دي ” ايوة مش دافع فلوسة ؟
يمكن لو في محامي شاطر يتولي هذه الأمر ويرفع قضية على هيئة الكهربا القضية ويكسب في المؤمنين ثواب
يا جبرا أضف إلي ذلك تأمين العداد الذي لم يرجع لأصحابه عند إلغاء العمل به .
الله يبشرك بالخير يا جبرا
يعني آخر السنة دي حنقبض لينا كم جنيه كده . وإحتمال نقبض الريح بكشيش زيادة .
ديل لوموت عايزين فيك ضريبة ولانسيتوا البموتوا في البحر وكدا وشكرا استاذ جبرا
بيع الفكة جائز شرعاً مثل بيع بصيغة السلم .
والله الكلام دة من زمااااااان محير افكارى
يااستاذ الفاتح … هو شنو الفي البلد دي ماداير فتوي ….
بس انا عاوز فتوي واضحه وصريحه وسريعه في موضوع
اصبح شائعاً في هذه الايام وظاهره لم اراء بها طول حياتي
ماحكم ذهاب النساء الي المقابر مع الجثمان … وهل يجوز ذلك
بقينا نشوف الحاجات دي كتير وكمان ينقلوها ليك في التلفزيون البشاهده
كل العالم … ارجو ان يجتمع مجلس الافتاء اليوم .. ويخلو مواضيع الفكه دي
الالف بي تسعميه … حاسدين الناس في الميه دي … وموضوع الكهرباء داء
خليهو علي جمب …
وبالمرة خليهم يفتونا فى زول يدفع حق الموية دا سبعة اشهر هو وجيرانه وماعندهم موية لاليل لا نهار وقاموا بتبليغ ناس الموية ولا حياة لمن تنادى . والدفع بقى مع الكهرباء . اها القروش الشالوها دى حلال والا حرام ؟
وزمان شالوا رسوم كبيرة على الأطباق الفضائية مغ إنه الطبق تشتريهو بي حقك والريسيفر تشتريهو بي حقك والتلفزيون تشتريهو بي حقك والقمر الصناعي ما عندهم بيه أي علاقة
تضامن جبرا أخبار خط 18 شنووووو؟
ياسلام ولله فقة وعلماء !!!! حزين انا يا استاذ جبرا!!! اللهم لانسالك رد القضاء لكن نسالك اللطف فيه..اللهم ثبت قلوبنا على الايمان ..حسبي الله ونعم الوكيل .
انت كعب شديد يا الفاتح جبرة ..!!
السودان مسرح العبث والملهاة والشعب المخدر.خلاص اتملت البطون وعم الامن وفضلت على فكة الحديد
والله اصغر عالم عارف انه لا يجوز عمل بيع وايجار لحاجة واحدة لكن اضان الحامل طرشاء
وعلى فكرة يا جبرا انت كده بترفع ضغطتناااااااااااااا الله يسامحك
أولا : الشعب يريد ارجاع حق الايجار وبأثر رجعي كمان ولو ماعندهم سيولة ممكن ان يعتبر مقدم استهلاك بعد ان نعرف المبلغ ذاتو كم وده طبعا بعد الفتوى تكون في صالحه ولاشك في ذلك لانو ماممكن يأجروا ليك حاجة حقتك اشتريتها وانا خائف بعد شوية يأجروا ليك بيتك ذاتو .
ثانيا : نريد فتوى في ان المواطن موقع عقد مع ناس الكهرباء عشان يمدوه بالكهرباء بعد دفع القيمة وتجي اول الشهر يقولوا ليك لو ما دفعت حق الموية ما بنديك كهرباء مع انه لايوجد نص في العقد يشير لذلك كما ان هناك عقد بين المواطن وناس الموية لاينص على ان يتم التحصيل بواسطة ناس الكهرباء وانه لو ما دفعت ليهم حق الموية ما يدوك كهرباء . نريد فتوى دام فضلكم
أخوي جبرة عليك الله الإنتخابات الجاية كان ما رشحت نفسك و ليك علينا كان ما دخلناك البرلمان و أنا أول واحد بديك صوتي
الأخ الفاتح
تحياتي……إحتمال كبير ناس المجمع ديل لا بيقروا جرايد ولا راكوبة..مشغولين و كدا
أنا لو ما بعيد كنت مشيت لحد عندهم و طلبت الفتوى بخطاب رسمي.
انا جاد.عاوزين تلاتة من الخرطوم يقوموا بالمهمة دي وأجرهم على الله
هؤلاء (العلماء)، للاسف، شغله ماعندهم…! اذا كانت وزارة الاوقاف والزكاة الحج والعمرة، غرقانين لاضنينم، في السرقة والرشوة والمحسوبية والقساد، واكل اموال الناس بالباطل، من مستحقي زكاة، وحجاج والدولة والناس عموما، وهؤلاء (العلماء) مكون اساسي لهذه المؤسسات، ولم يقتح الله عليهم بكلمة حق واحده. ثم ياتو ليفتوا في (الشحادين) الذين كان يجب ان يعطو من اموال الزكاة، لان جل الذين يعملون في تبديل الفكه، هم من الشحادين او من يتعاونون معهم،… وكتر خيرم وكت بقو يفيدو ويستفيدو….؟!
قالو الماعندو شغله بهمز امو…..!!
عينم في الفيل، البياكل بالطن… ويدفس الباقي بي رجلينو…. يخلو ويطعنو في الارنب، البلقطا قشه قشه؟ عجب .؟؟؟؟!
من رحمة ربنا بالمسلمين ان الاسلام انتشر له عدة قرون قبل ظهور الانقاذ ، لان الاسلام الجديد الذي تنادي به الانقاذ وعلماؤها لا يشبه الاسلام البنعرفه في اي شئ , وكانت حتبقي كارثة لو كل المسلمين في كل العالم اعتنقت اسلام الانقاذ .
لا00لا00لا00ياجبرا إياك والوقوع فى المحظور!!حتى لايحسبوك من زمرة المجدفين(لان المجدفون كانوا أخوان الشياطين)عن ابن آوى بتصرف !!اولا: صدر الاسلام لم يكن فيه عدادات ذات دفع رباعى آسف اقصد دفع مسبق وإذا الحكاية جابت ليها افتاء المفروض السؤال يكون كالاتى المواطن فضلا عن الكلام الجميل الذى ذكرته انت يرغم على دفع إستهلاكه مقدما ويفترض ان تضمن له الجهة البائعه إستمرارية إستهلاكه من الكهرباء ليحقق منها الفوائد المرجوه ،فمثلا إذا كان (الممول) صاحب طاحونه او فرن او حلاق وكل هذه الجهات وغيرها كالجزارات ومحلات المرطبات او ست البيت التى تتعامل مع السوق مره فى الاسبوع وتفضل شراء حاجياتها من المواد الغذائيه وتحفظها فى المبردات ثم تفاجئهم الجهه البائعه التى قامت بتحصيل حقوقها منهم مسبقا بقطع الامداد الكهربائى دون أخذ الاذن من الطرف الثانى وسبب لجميع الذين جاء ذكرهم خسائر لاتعد ولا تحصى ولايجدون فقهاء سلطه يقتصون لهم حتى ولو (بحتة فقهايه تبل الشوق!!) ولن يعجز فقهائنا بعلمهم (الغزير جدا)كالذى ظهر جليا فى فتوى (الفكه) ان ينحازوا ولو نحت تحت لجانب الشعب وهم القادرون على الافتاء فى مسائل (الفكه) ولكى لا نطلق عليهم (فقهاء الفكه)بدلا عن فقهاء السلطان،ويخيل الى ان حكاية (عدادات) الدفع المقدم دى بالذات خارج نطاق إختصاصهم ولا مرجعية لهم فيهاوهذا ما جعلهم والله أعلم أن لا يقتربوا من الساده الفنانين ويفتون فى شأنهم وكما نعلم ان المطربون ايضا لهم فلسفتهم من تناول عداداتهم مسبقا وهضمها هنيئا مريئا وقبل المناسبه لان ما فيش حد أحسن من حد!! حتى إذا ما حلت بأصحاب المناسبه نازلة فلا مجال لارجاع العربون او المبلغ كاملا وإن كان لا بد فعلى الجميع التوجه للتواليت الذى يرتاح فيه الفنان!! وفى أى مكان فى العالم نعلم يقينا بأنه(لايضيع حق وراءه مطالب)إلا داخل الهيئه القومية للكهرباء00عشان تبارى منو00ولا00منو الى (تواليتاتهم) لتأخذ حقك من00منو تحديدا؟ وقديما كنا نسمع جملة (الدفع قبل الرفع!!) والذى فهمناه لاحقا بعد البلوغ فيما قيلت الجمله وماذا تعنى الجمله سوف نأتى على ذكرها وتفصيلهابعد ما ينوم الاطفال وفقهاء الحيض والنفاس والله قادر يا ودعووضه (SORRY) أقصد يا جبرا0
مجمع(عملاء) (الفكة) (السودانى) كملو الفتاوي بقت عي الفلبان الصابر
تسلم يا جبره .
باجبرا….سلامات
علماء السلطان دول يا سيدى أكتر من كده ما يقدروا يقولوا شئ……هم فى هذا الزمان صاروا عاملين (موظفين) فى الدوله و بياخدوا رواتب و مخصصات …صحى ما زيّنا لكن فى صورة حوافز ومخصصات شهريه راتبه و اللغف من عدة جهات فى صورة الرقابه شرعيه ( سمعت طول عمرك المديد دا بالرقابه الشرعيه…دا مسمى زى ما تقول سوق موازى للسوق الأسود!!!)…فهم بإختصار عبد المأمور و أبواق سيّدهم …. و عشان كده هم سكت بكت و بكم الليله يوم دخول البنك المركزى السوق الأسود رسميا للمتاجرة فى بيع و شراء النوع الواحد من النقودالأجنبيه !!!!! دا حلال …يــا مرسى ؟؟؟ و أللا عايزه ليها فتوى زى الفكه ؟؟؟ … و طال ماهم براهم بكرعينم جو للميدان و بقو يفتوا فى مسألة التعامل بالمال و الفكه و كده… نحن فى رجا سماع وجهة نظرهم بس فى حكاية دخول الحكومه الرسمى لــ …دولار… يورو … ريأل و ما دايرين فتوى……
اححححححححححححححححححححححححححححححححححححححححححححح
وبس
واححححححححححححححححححححححححححححححححححححححححححححححححح
وبس
واححححححححححححححححححححححححححححححححححححححححححح
وبس
الهم بس
ثبت قلوبنا على الاسلام
لكن دى فتنه كبييييييييييره
قال ايه قال هيئه قال
اها عرفنا سجود الكورة .. وبيع القكة .. و بيع ثم ايجار عداد الجمرة الخبيثة ..
ايه راى علماؤنا الاجلاء فى جعل الدولار (سلعة) تباع وتشترى على عينك يا تاجر وبصورة ربوية فاضحة ؟؟؟
جزاك الله خيرا – ونطالب هيئة علماء السودان الاجتماع الفورى وافادتنا افادة شرعية عن ايجار المبيع بعد قبض البائع للثمن ؟
ياجبره موضوع الفكه دى ما موضوع ترابيز بس دى لها وكيل عديل وهو موظف سابق فى بنك السودان وبعلم البنك واذا انت مشيت تورد فكه بكميات كبيره بنك السودان ما بستلمها منك ويرسلك الى الوكيل عديل ابحث عن الوكيل عشان تتاكد بنفسك
سوف يكون ردهم الله ومن قال الله اعلم فقد افتي.
ياجبرا أعمل حسابك سلك الكهرباء ده عريان
كدى خليهم يفتونا فى المرتب البياخدو عليهو الزكاة
وهو ما بحول عليهو الاسبوع خلى الحول
يا أستاذ
علماء مجمع الفقه الإسلامى ديل بتاعين ( فتًاتْ) عاوزم يعملوا ليك فتوى؟؟
مبدأ ترك الفيل وطعن ضلو اصبح سمة اساسية فى كل انواع التعاملات السودانية.. والسادة العلماء المبجلين دايرين يحللو مرتباتهم .. يسووا شنوووو؟؟؟ اهو يطلعو فتاوى لذيذة زى دى…اخير من قعاد ساى….هه قال علماء قال…
walahi sowal sa7i 3ageeeb
يا شيخ جبرا قيمة العداد ده 20 دولار فقط بما فيها عمولة الوسيط السوداني مع العلم انو الشركة ممكن تجيبو من مصدر ثاني باقل من هذه التكلفه وبجوده عاليه
ملاحظة اخرى المواطن يدفع قيمة الاعمدة ايضا وتذهب ملكيتها للشركة
يلا حلها مع علمائك
يبدو انك مصدق حكاية الدين دى وكده يا سيد جبرة ؟؟؟
اولا اطلب من هولا العلماء ان يفتونا في الاتي
1/الانقلابات العسكرية
2/اعدام مجدي محجوب
3/تعويم الاقتصاد السوداني
4/ترقية المفسدين الي مرتبة اعلى
5/الجمرة الخبيثة للكهرباء و المياه
أخيرا المعيشة با لسودان أيضاًء تحتاج الي فتوي
هل هى حلال ام حرام وانت تنظر يوميا الي حجم الفساد والغلاء والجبايات التي تؤخذ دون حق او باطل
والتضارب فى القرارات والروتين القاسي والبطى للأجهزة التنفيذية بالدولة
يا استاذ جبرة احد المعلقين قال القصة وراها وكيل وكان موظف سابق في بنك السودان لو كلامو صاح تبقي القصة عمل منظم ورباها واضح وعفنتها ضاربة وبذلك يكون مقالك OFF POINT يعني القصة ما صغيرة والله ديل ما بتقدر تبحر في عالمهم وخيالك الرشيد ابدا لايمكن ان يتوقع افعالهم وعالمهم النتن واكل مال الضعفاء والايتام والارامل والمستضعفين قبحكم الله يا عديمي الاصل يا هوان يااحقر من وطي الارض .
نعم تكسب هللات حرام بس تكسب مليارات ولا حد يكلمك.
وهل يستطيع المجمع ان يحرم ويحلل علي غير الفقراء والمساكين!
طيب ياستاذ الفاتح … الصراف الالي دا مابياخد منك جنيه في الالف جنيه
ليه ماحرام ….. لكن مابحرمو حاجه في البنوك لانه كلهم مراقبين شرعين وبياخدو
مرتبات من البنك … وليه مايفتو في العوايد البتاخده الحكومه سنوياً من الناس
وليه مايفتو في الحاجات البتمس حياه الناس مثلاٍ زياده الاسعار نصيب الفرد في البترول زياده المعاشات
والله انا شايف احسن يسكتو عن هذه التخريفات ويعملو ليهم حاجه يحللو بيها مرتباتم …
كسره ….. انا سالت هل يجوز ذهاب المراه الي المغابر لانه في الاونه الاخيره اصبحنا نراء ذلك كثير
ولانها ظاهره جديده علي المجتمع … اريد احد القراء بان يفتيني في ذلك …
وياانور انت لوماقادر علي ذلك الرجاء ان تلزم الصمت …
اولا السلام عليكم ،،، الموضوع دا ذكرني حاجة غربية من دون احساس ومقدمات لقيت نفسي بمارسا ،، كنتا من احد المدمنيين لمشاهدة قناة طيبة الفضائية لانها دين وقران وناس بتخاف الله وبعد الهجمة الشرشة علي هجليج خط الغناء قلب ساحات فداء والجهاد فرض عين وكلام من هذا القبيل من اللحظة ديك قناة طيبة بقيت لامن اشوفا بطني بتطم … اقوليكم الاسباب ..
1/ جميل ان تستنكر القناة الاعتداء علي الوطن وجميل ان تحث باقي الشعب الفضل علي الجهاد .
2/ القناه دي ذاتا ليه مابتستنكر الفساد الحاصل في البلد ؟؟؟ طاش واطاعة ولي الامر
3/القناه نفسها ليه بتأمر بالمعرف وتقض الطرف عن النهي عن المنكر ،،
4/ عشان مااظلم القناة يمكن تكون بتغير المنكر بالقلب وهو اضعف الايمان ،، احتمااال …
5/ الخلاصة هذه القناة نموزج لعلماء السلطان .
عشان كدة يا جبرة اتوقع مثل هذه الفتاوى التي تتناسق مع النظام ولما تشوف حلمة اذنك حتسمع منهم الفتاوى التي تأمر بالمعروف وتنهي عن المنكر …
معليش اوعا اكون خرجتا من الموضوع
أخى سليمان قش ….تسأل عنك العافية
أسكت ..مش صاحب التيار وبتاع الحقنة وقعوا مع بعض قبل كم يوم؟؟ كيدهم فى نحورهم
ناس علماء الفكة ديل…أكلوا مال ( الرُقعة ) وإستحلوا المسألة..ونسوا لدين والفتاوى لأنهم لو قالوا بغم بيشحدوا وما بيلقوا البيديهم
غايتو أنا زي مابقولوا ماعندي تعليق … غير أقول حسبي الله ونعم الوكيل … بالله ياجبرة كدي نقعد نتوهط في الواطة دي ونفكر مع بعض :
مابني على باطل فهو باطل !! كدي نشوف حكومتنا دي كيف إستلمت السلطة ؟؟ وبعدين سؤالنا التاني ماهي توجهها؟؟ ماركسي ـ ليبرالي ـ إسلامي ـ برلماني .. الخ ..؟؟ كدي نمسكها وحسب ماقالوا إنهم من صلب الحركة الإسلامية ويحملون شعارات الإسلام وصراحة الإسلام منهم براء براءة الذئب من دم يعقوب عشان كدي أنا لي تقريبا (23) سنة عندي أسئلة مالقيت ليها إجابة هل تتخيلوا إنو نحن في القرن الواحد وعشرون ومع كل هذا التقدم تطرح أسئلة وماتلقى ليها إجابة :
1ـ مالذي فعله هؤلاء الذين يدعون أنفسهم إسلاميين تجاه السودان ؟؟
2 ـ هل تم تطبيق الشريعة في السودان بمعناها الحقيقي ؟؟
3 ـ أين كنا والى أين وصلنا بعد (23) سنة حكما وقهرا ؟؟؟وكما قال القرآن تفشي الفساد فب البر والبحر وديل زادوها في الجو كمان .
4 ـ الى أين وصلت أخلاقيات الناس الأن ؟؟ تخيلوا أكبر إصابات الأيدز أصبحت بالسودان . أنواع الزواج الجديدة تفشت الزواج العرفي ـ زواج المتعة ــ زواج المسيار زواج الصداقة .وبقينا والله مهذلة العالم في الأخلاق .
5 ـ أين وصل الحال بنا في الفساد .. هل تتخيلوا أننا الدولة الثالثة عالميا من حيث الفساد . سرقة المال العام أصبحت مفخرة للذين يقومون بها ..
والله ياجماعة خلاص ماقادر أواصل …
ذهبت لعمل تاشيرة خروج من جهاز المغتربين (اسم الدلع بتاعها شهادة استيفاء )و عرفت هناك ان اقل مدة تكفى لعمل هذا الاجراء هى 6 شهور صلاحية جواز و لما كانت مدة صلاحية جوازى هى 5 شهور وعملا بباب سد الذرائع قمت بتجديد الجواز ولكن ما اثار حنقى هو ان هذه ال5 شهور المتبقية لدى قد ذهبت مع الريح وتم تجديد الجواز لسنتين فقط بنات حفرة ولم تجدى احتجاجاتى فتيلا والمعروف انه فى كل بلاد الدنيا ان تحفظ السلطات للمواطن ماتبقى له من زمن عند تجديد وثائقه اليس هذا هو التطفيف بعينه المنهى عنه شرعا وبالنص القرانى الصريح اليس هذا اكل لاموال الناس بالباطل
يفكنا منهم الفكة بلة