الشرطة ورقم الشاسيه
ساخر سبيل
الشرطة ورقم الشاسيه
الفاتح جبرا
الشرطة ورقم الشاسيه
تحت عنوان (عاجل إلى مدير الشرطة – واقعة لا تحتمل الانتظار) جاء بالزميلة (التيار) عدد امس الثلاثاء الموافق 12 أكتوبر 2010م ما يلى :
هذه الشكوى الخطيرة وصلتنا من أحد المواطنين، ترددنا كثيراً في نشرها.. وطلبنا منه أنْ يسلك السبل الإجرائية الرسمية للتعامل معها.. لكنه وبعد حوالي الأسبوعين من التلكؤ الإداري انتابه الإحساس بأنّ قضيته مصيرها تراكم الرمال.. فالنسيان.. القصة باختصار.. رجل وزوجته وشقيقها.. كانوا يقفون في شارع الطيار الكدرو في حي شمبات قريباً من قسم شرطة الصافية.. الوقت كان بعد منتصف الليل.. فجأة تتوقّف أمامهم سيارة كريسيدا بيضاء في مقعدها الأمامي رجل بملابس عادية.. سأل شقيق الزوجة لماذا لمس (طرحة) المرأة التي تقف بجانبه.. ردّ عليه الشاب أنه لم يلمس الطرحة وفي كل الأحوال هي شقيقته وبجانبها زوجها.. ما هي إلا ثوانٍ حتى صاح الرجل بأعلى صوته (قوة ..أجمع هنا) .. وفي أقل من ثانية وجد الرجلان والمرأة أنفسهم في قبضة مجموعة مدججين بالأسلحة الرشاشة.. كل ذلك مرّ سريعاً وكأنه فيلم سينمائي مثير.. أُقتيد الرجل وزوجته وشقيقها إلى قسم الشرطة.. ليتعرضوا لتهديد بعد استبقاء الزوجة في القسم وطرد زوجها وشقيقها إلى الشارع. ونترك بقية تفاصيل القصة التي أرفقها المواطن في شكواه التي سلّمها إلى رئاسة شرطة ولاية الخرطوم.. ولا تزال تتلكأ في إجراءات بيروقراطية.. سيدي مدير الشرطة.. أليس مخيفاً أنْ يخاف الناس الشرطة.. أليس مرعباً أن يُصبح القانون هو الرعب.. نحن في انتظار ردكم ..
إنتهت الشكوى التى أوردتها الزميلة صحيفة التيار والتى ذكرتنى بالشكوى التى تقدم بها شخصى الضعيف قبل قرابة الشهر ونصف (2 سبتمبر 2010) فى هذا العمود تحت عنوان (فى كلام تانى) عندما قام فردان من أفراد الشرطة يركبان الدفار رقم (39082 – شرطة) بإرهابى وخلق نوع من الفزع فى نفوس أسرتى التى كنت أصطحبها معى فى مساء ذلك اليوم الرمضانى وعندما أوضحت لهما خطأ تصرفهما قالا لى فى تهكم وإزدراء : (إنتا لو ما كان زول كبير كان يكون فى كلام تانى)
على الرغم من أن الحادثتين واضحتين وضوح الشمس وهما يعتبران مؤشرين خطيرين للخروقات التى يمارسها بعض من أفراد الشرطة تجاه المواطنين إلا أن التعامل معهما من قبل (جهاز الشرطة) ينم عن تراخ وعدم متابعة لا تتناسب وفداحة الفعل .
لا أعلم إلى أى مدى قام هذا المواطن الذى أورت التيار شكواه بمتابعتها ولكن بالنسبة لشكواى فقد قمت بمتابعتها (وسكيتا سك شديد) لأكثر من شهر قابلت فيها رتب عديده (عميد ? عقيد ?مقدم – نقيب ? رائد ? ملازم) … ولكن للأسف (الأسيف) ورغم إنقضاء أكثر من شهر على الواقعة إلا أن الشرطة لم تتوصل لمعرفة فرديها اللذين كانا يستغلان الدفار رقم 39082 ? شرطة فى تمام الثامنة والنصف من مساء يوم الأربعاء الموافق 1 سبتمبر 2010م .. نعم عزيزى القارئ .. على الرغم من تحديد الوقت واليوم والزمان والمكان ورقم الدفار لم يستطع جهاز الشرطة معرفة من كان يقوده ؟؟ ومن كان معه؟؟ (معقوله بس) ؟
وحتى (يتظاهر) القائمون على أمر التحقيق بأنهم (عملوا العليهم) وحتى تضع الشرطة (الكرة فى ملعبى) فقد تم إستدعائى من قبل القسم الذى يتبع له (الدفار) وقاموا بعمل طابور شخصية لجميع السائقين الذين (بالطبع) لم يكن بينهم (من قاما بإرهابنا)!!! مما جعلنى أخاطب المشرفين على الطابور :
– يا جماعة الناس الوقفونى ما موجودين مع الجماعة الفى الطابور ديل !
– إلا أن الإجابة جاءتنى سريعة : ياهم ديل الجماعة العندنا !!
بالطبع لم يستدعينى أحد (تانى) كما لن يستدعينى أحد مرة أخرى .. والقضية ح تموت (كان ما ماتت لى هسه) .. كما سوف تموت قضية ذلك المواطن التى أوردتها الزميلة التيار .. وتستمر هذه الخروقات الشرطية بناء على المقولة التى تقول (من أمن العقاب ساء الأدب) فطالما أن تعامل جهاز الشرطة بهذه السلحفائية فى التحقيق من أجل حسم هذه الخروقات وطالما الشرطة لا تستطيع تحديد منسوبيها الذين يستغلون إحدى مركباتها الرسمية مع وجود كل البيانات اللازمة (رقم المركبة ونوعها والزمن بالساعة والدقيقة واليوم والشارع التى كانت تتواجد فيه) فكل ذلك كفيل بأن يجعل هذه الخروقات تستمر بهذه الصورة السافرة حتى يأتى اليوم الذى نطالب فيه بإنشاء شرطة لحمايتنا من الشرطة .
سعادة الأخ الفريق محمد الحافظ مدير شرطة ولاية الخرطوم :
(البلاغان) أمام سعادتكم فماذا أنتم فاعلون فى هذا الأمر الذى يمس سمعة الشرطة فى الصميم ؟ نرجو ردكم العاجل حول هذين البلاغين لننشره لكم فى هذا المكان حتى يطمئن المواطنين بأن الشرطة لحماية الشعب وليس لإرهابه وترويعه .
كسرة :
كنتا مفتكر (رقم لوحة) الدفار كفاية عشان يجيبوا الناس ديل .. الظاهر لازم كمان رقم الشاسيه
يا جبرا المواطن صاحب البلاغ الأول عرفناه لمس طرحة اخته وفى حضور زوجها ,, طيب انت ماوريتنا مالك ؟ عملت شنو ؟ وارتكبت ياتو نوع من جرائم النظام العام ؟
اوعك تقول لى والله انا ماعارف عملت شنو ,, علشان الناس بتاعين الدفار رقم : 39082 اختفوا من الوجود بسبب فعلتك السوووودة دى وما حتقوم ليهم قايمة تانى أبداً..
ليك التحية ولاسرتك الكريمة وربنا يحفظكم من ال( الشرطة فى خدمة الشعب) وانا خايف واحد يضيف ليها حرف الميم قبل حرف الطاء وتبقى مصيبة . :lool: :lool: :lool: :lool: :lool:
الاستاذ / جبرا
متعك الله بالصحة و العافية
ياجبرا ميييييييييييييييييييين البقول البغله في الابريق
ياتري تقدر الشرطه تحاسب نفسها و تانبها ؟؟؟؟؟؟؟؟
ما اظن
لسبب بسييييييط اي واحد خايف علي كرسية يطير منه
يااااااااااااااااااااااااااا معتصماه
حاميها حراميها
وهم شايفين الكبار بعملوا شنو ومتأكدين انه عملهم دا ما بجي شي جنب عمل الكبار
يعني شي تافه مهما كان في نظرنا انه من الكبائر
ومن البشير وانت نازل لحدي ما توصل لرقيب اسال الله انه أي واحد استغل منصه او ظلم ان يفضحه ويعذبه في الدارين وان يصيبه بكل بلايا الدنيا ويخليهو لا ميت لا حي معلق كدا زي ما علقتو الناس ، وشوفوا جماعاتكم المعاكم الماتوا كيف ماتو ؟ كلهم كانت خاتمتهم سيئة وانتم على دربهم سائرون
أنصحك بإحالة شكواك إلى عمرو أديب في تلفزيون أوربت فهو يعرف كيف يهزئ محمد الحافظ كما فعل بعد مباراة الجزائر و مصر. لكم كان الحافظ صغيرا ولم يستطع إلا حفظ لسانه من الرد. ديل بيعرفوا لينا و ال
يعني لا ادوك كف ولا ادوك شلوت ولا شتمو امك ولا قفلوك في حراسة – احمد ربك واعمل نايم يااااااااااخي.(ياهو دا السودان):mad:
لك التحية استاذ جبرة
والله ياجبرة الظاهر كدا رقم الشاسيه مابحلك , غايتو نمرة الكارنيه لو عرفتها يمكن بعد سنة كدا يقول ليك شطبنا البلاغ لرفت المذكور اعلاه.
الواحد بقى يخاف يمشى فى الشارع مع أمه يقومو يلمو فيه يقولو ليه ماسك المرة دى من ايدها ليه , مع العلم إنك عايز تقطعها الزلط.
:D اتخيل لى احسن تاخد رقم الموبايل
زولك ده مسكين .. انا اخلي مرتي مع ناس الشرطه واطلع بره؟؟ والله الا ميت وقبل ما اموت يموت نص المركز ولو قدروا طلعوني بدون مايموت واحد اقسم بالله واقسم بالله كل يوم اقتل شرطي عنده ذنب ولاماعنده المهم بتاع بوليس والبوليس بيهتك اعراض المواطنين دي بس خلاص .. تقولوا همجيه تقولوا تخلف لكن الامور دي مع الناس ديل ده الحل بتاعها مافي غيره .. اذا كان لو اشتكيت حقك مابجي ولولزمت الصمت يوصلوا لحدي مرتك .. والله الموت بس الموت بس الموتبس
يا عم جبرا العسكرية د
ي ما تصرف يعني كيف يجيبو ليك الناس الارهبوك في الطابور وا
كويس انها وقفت هنا….. وما لم يصل الاعلام ويكشف عنه يشيب له الولدان ويكفي ان تعلم ان البعض يعمل في الشرطة لشرب خمرالكشات اوالمقايضة به، سحب معروضات البلاغات خاصة المخدرات، ارهاب المساكين من عامة الشعب خاصة ستات الشاي، حليل كان شرط الانضمام للشرطة ان لا تكون ادنت بجريمة تخل بالشرف والامانة
سيدي المحترم: فاقد الشئ لا يعطيه………. وكل اناء بما فيه ينضح
احفظنا في مالنا وعروضنا يارب….
انت ياجبره خاطب السيد الرئيس عمر البشير مباشرة والسبب انه سودانى وابن سودانى وسودانبة امكن يكون بينكم صلة دم او معرفه لكن تخاطب ليك وزير الداخلية ده راجل اجنبى من دولة اريتريا وزول مش سودانى اكيد مابشتغل بيك لان الوازع الوطنى مش عنده انت روح راسل السيد افورقى او السفارة الاريترية بالخرطوم تاكد الجنس للجنس رحمة
يازول دى بسيطة فى واحد ناس البوليس غالطوا فى امو
يا سلام علي الشرطة عندنا هنا يا خي والله يعقدوك عديل كدا يقولوا اقعد في الكرسي ويجيبوا ليك شاي ويتعاملوا مع معاملة راقية جدا جدا .
أنا ماعارف حكاية الرتب الموزعة لناس الشرطة دى شنو ؟؟؟؟؟؟؟الخرطوم بس فيها أكتر من سبعة برتبة فريق وأكتر من خمسين لواء ….والله الرتب دى فى اوكستلنديارد مافى ………ووزير داخلية زى ماقال أخونا أريترى وللعلم كان رئيس اتحاد الطلبة الاريتريين بالقاهرة وسبحان الله أصبح بقدرة قادر وزير داخلية السودان شوفتوا الشطارة دى كيف ….؟؟؟وأبناء البلد المخلصين الاوفياء تم طردهم للصالح العام ……….عجبى
سلام عليك يا جبرة . اولا ما بطلع من المركز لو كتلونى والله ثم والله اقاتل لاخر رمق فى حياتى ديل ناس كلاب ما بحترموا المواطن ولا حاجة واحسن حاجة الواحد اعملها انو ياخد حقوا بايدوا مع الجماعة ديل,. يا جبرة ديل تلبوا بالليل وقلعوا السلطة ما قادرين يعنى يدقوا ليهم مواطن برى وفيها شنو يعنى اخو واقف مع اخته طيب لو كانت خطيبته الكان بيحصل شنو انت فسر وانا ما بقصر وانت عارف البيحصل شنو ____ الناس تاخد حقها بايدها فى دولة الغاب ودولة المشروع الحضارى قال مشروع حضارى ___
يا سيد الفاتح أنا مابلوم جهاز الشرطة أنا بلوم الراجل وزوج مرتو … أول ما طلعو إمشوا يلموا باقي القبيلة وإمسحوا قسم الشرطة باللي فيهو وخليها تولع نار … بحصل شنو يعني أكتر من كده
والله يااستاذ جبرة دى مصيبة كبيرة وما بتحصل الا عندنا فى السودان معقولة جهاز شرطة مايعرف متحرك من متحركاته سايقها منو اصلا الحكاية ما كان محتاجة طابور شخصية طال ما اتحدد الدفار الزمن فالشرطة تعلم فى ذلك الزمن الدفار فى صحبة منو وقد تكون المصيبة اكبر لو ان الشخص المستلم الدفار يتصرف فيه ويعطيه لمن يشاء وعلى كيفه ومافى حد حايساله ودى برضو عندنا فى السودان بس
السيد الفاتح جبرا مازكترته من تعاملات لافراد الشرطه فيض من كثير فمشاكل الشرطة مع المواطن اكثر من حمايته فافراد الشرطه يتربصون بالمواطن المسكين ومن اقل مشكله ممكن ان تسمع ما لايرضيك اسمع ما حدث لنا بينما كنا نعود من ورديه ونحنا عاملين فى مجال الكهرباء ونحن امام كبرى الجامعه امام استاد الخرطوم فازا بنا نتفاجا بعربة شرطة تعترض طريقنا وبكل استفزاز طلب منا سائق العربه وافراد الشرطه الوقوف ووقفنا وسالنا عن سبب توقيفنا قالو انكم اعترضو طريقنا ولم تفتحو لنا الطريق معنو الطريق طريقنا وطالبو السائق بالرخصه مع انهم ليس من افراد شرطة المرور وبعد شد وجزب مع الضابط المسؤال عنهم لم يختنع الا بعد انا اعتزرنا لهم من المخطى اخى الفاتح نحنا ام افراد الشرطه
ياود جبرا انت في حاجه فايته عليك دفار الشرطة كان مسروق منهم وماعارفين الحراميه ديل منو وهم محرجين اقولو ليك والشرطة مساكين ما قادرين يحمو نفسهم فكيف يحموك انت والمره الجايه اكتب النمرة العسكريه بتاعه العسكري ولا صورهم بالجوال كان ما يقولو ليك تصويرك مدبلج وامكن يطلعو ليك مسلسل تركي هههههه هاي هيهيهيهيهي
غايتو السلحفائبة دي حلوة;)