أنتـنـ وفيات
أنتـنـ وفيات
الفاتح جبرا
[email][email protected][/email]
عندما يكون الحدث متكرراً يجب التحضير لكيفية التعامل معه ومن هنا جاءت هذه الإقتراحات
? بيان حكومي (جاهز للتعبئة) :
? تحطمت (صباح/مساء) اليوم …….. الموافق ……………….طائرة نقل أنتنوف 12 بعد (إقلاعها/هبوطها) بقليل (من/على) مطار ……………… (متوجهة/قادمة) (إلى/من) مدينة ……………… كان على متنها ………………… شخصاً إضافة إلى طاقمها المكون من ………… أشخاص توفي في الحال منهم …………… شخصاً ونقل …………. إلى المستشفي وقد كان سقوط الطائرة نتيجة لعطل فني في محركاتها .
? إستقالة مدير الطيران (جاهزة للتعبئة) :
? سيدي الرئيس :
? انطلاقاً من المسؤوليتين العامة والاخلاقية، ونسبة للحوادث المتكررة للطائرات والتي نفقد فيها عدداً من خيرة أبناء الوطن وبما أن هذه هي الحادثة رقم (……….) فإني أتقدم لسعادتكم بإستقالتي متحملاً كل ما يسفر عنه التحقيق .. (بعد رفض الإستقالة يتم شطب الرقم ليتم وضع ملء الخانة عند الحادث التالي)
? جمعية الحماية من الأنتينوف :
? وهي جمعية طوعية تعمل على تقليل حوادث الأتينوف عن طريق جلسات الدعاء والإبتهال ونصح المواطنين على عدم ركوبها وذلك عن طريق الإرشاد والتوعية وطباعة الملصقات التحذيرية من شاكلة (يا الأنتينوف منك خوف) !
? تخصيص عنبر بكل مستشفي يسمي (عنبر الأنتينوف) يكون مجهزاً بكل المعدات والأجهزة اللازمة للإصابات الناتجة من حوادث الطيران على أن يكون رئيس العنبر طبيب (روسي) عشان يشوف طياراتهم دي بتعمل فينا شنو؟
? تخصيص رقم 888 للإتصال والتبليغ الفورى عن حدوث إي سقوط لطائرة أنتينوف
? إنشاء (صندوق دعم ضحايا الأنتينوف)
? تشييد (هيئة الطيران المدنى) لكشك صغير فى كل مطار يكون فيهو موظف يستلم فيهو من المسافرين الشهداء بياناتهم ووصاياهم لأم العيال..!
? الطلب من شركة الأنتينوف الروسية بفتح مكتب في الخرطوم مزود بأجهزة قراءة الصندوق الأسود (عشان مافيش داعي للتكلفة وللتلتلة وكل يوم والتاني مرسلين صندوق)
? فتح باب عطاء سنوى لتجار الخردة لشراء مخلفات الطائرات التي تسقط كل عام على أن يتم تخصيص العائد لدعم (جامعة إبناء شهداء الأنتينوف) !
? تكوين لجنة تحقيق (دائمة) تكون في أهبة الإستعداد لشد الرحال إلى أي منطقة من مناطق السودان تسقط فيها طائرة إنتينوف ويمكن لهذه اللجنة أن تستعين بأي لجان مشابهه (لو الشغل كتر عليها وما قادرة تحصل)
? إنشاء مجسم في أحد تقاطعات الطرق الرئيسية بالعاصمة للطائرة أنتينوف يكتب عليه (إنها أسوأ من الملاريا)
? تخصيص قطعة أرض لتكون مقبرة للضحايا (مقابر الأنتينوف) !
? عمل دورة رياضية سنوية تشارك فيها كل فرق الممتاز تسمي (دورة الإنتينوف) يوزع دخلها لأسر ضحايا الطائرة في كل عام
? اصدار مجلة شهرية تسمي (إنتينوف) تعني برصد وتحليل حوادث سقوط هذه الطائرات شهرياً على أن تحتوي المجلة على مقابلات ولقاءآت مع أسر الضحايا (عل وعسي الدولة تحن وتوقف المهزلة دي) !
كسرة :
ما تستغرب لو لقيت ليك في كشك واحد كاتب (ودعمارى الإنتينوف .. سفة واحده وتسقط قبل الإقلاع)
كسرة ثابتة :
أخبار ملف خط هيثرو العند النائب العام شنو(ووو وووو ووو)؟
أنتفتنا عدييييييييييييييييييييييييييييييييل كده
وأنتفتهم
وانتنف فيهم زيادة ( أكان ) يتأنتفوا تفوا فوا وا وا أسفاى آى آى آى آآآآآآآآآآآآآآآآآآآى
المفروض تكون في استمارة للناس الزهجانيين والقرفانيين من الدنيا
وعايزين يغادروها باسرع وقت ممكن …..
يتعهد فيهاالراكب بانه بكامل قواه العقليه ركب طائرة الانتونوف
ويخلي المسئولين اي مسئولية حال وقوعها –
حيث انه عارف سلفاً انها حتق الدلجه….
اعتقد ان حل مشكلة حوادث الانتنوف هو عمل شارع زلط تمشى فيه
لانه المشكلة كلها انها بطير !
وما تنسى تجهيز عربه سريعة الحركة مزودة بمعدات الحفر من طوريات وكواريك وأزمات وواسوق وأيضاً الكفن والريحه كمان.
واخشى ما اخشاه ..دمغة الانتينوف ..
اقامة زواج جماعي لي ارامل ضحايا الانتنوف ممكن للكوز الدفع الرباعي ياخد تلاتة دفعة واحدة اكيد الرابعة في واحدة
والله يا جبرة ضحكتنى الله يديك العافية و كمان كل التعليقات مضحكة شديد الله يضحكم كمان و كمان و يبعد الأنتنوف عن شوارعكم
ولماذا لا توجد أستمارة لطالبي الشهادة تعبأ قبل تحديد السفر
عشان يكون في (اولوية وكدة)
وبعد ده كان سجل لاقوني
انا ما بسف لكن يا ود جبرا حكايه “ودعمارى الإنتينوف .. سفة واحده وتسقط قبل الإقلاع” دي باااااااااااااااااااالغتا فيها عديييييييييييييل كدا
المزعلني يا اخوانا انو حكومة السجم والرماد دي للا ن عندهم في تلفزيون السودان في الشريط الاخباري اعلان او
مناشدة للمواطنين والخيرين ورجال البر والاعمال انهم يتبرعو لشهداء طائرة تلودي وايواء اسرهم واعاشتهموالتكفل بهم
والخ من الاخبار البتفقع المرارة وكمان بكل بجاحة ووقاحة وقوة عين خاتين ارقام حساب لاستقبال التبرعات حساب داخلي وحساب خارجي شحاد وعينو قوية للتاكد من الخبر دة افتح تلفزيون السودان تلقي الخبر دة جاري علي طول في الشريط الاخباري لا بيكل ولا بيمل؟
الشي العاوز اقولو الماتو ديل كلهم شخصيات مهمة في الدولة يعني اكيد ليهم الرحمة اسسو نفسهم في الاول وبيوتهم الا تكون في طوابق لم تكتمل بعد؟
علي اسر هؤلاء المتوفين مطالبة الحكومة بالكف عن الشحدة باسمهم
هل الحكومة ستقوم بكشف حساب التبرعات وتقول لاسر الشهداء بكل شفافية دة كشف الشحدة نحن شحدنا ليكم 100 مليون مثلا ودة كشف الحساب اهو؟ نحن شحدنا ليكم 100 مليون حقنا كدة تحت بند العاملين عليها وحق الدولة كدة وحق اعلان التلفزيون كدة ووووالحقوق المابتخلص دي؟
وتقسم الباقي عليهم بالتساوي دة لو فضل باقي (ابقي قابلني) ولا حتدي اي زول علي قدر مكانتو يعني اسرة جندي الدفاع الشعبي حياخذو نصيبهم زيهم وزي اسرة الوزير وهل اسر الطيارين الروس ديل حياخذو نصيبهم من الشحدة وانا لو عرفت اسر الطيارين الروس ديل بوصلهم الشمار دة واخليهم يرفعو قضية ضد الدولة السودانية وياخذو حقهم ولا يصعدو الموضوع تمييز عرقي وديني ونحن ما ناقصين تزيم علاقات دولية
كفاية شحدة عليكم الله يا حرامية انا لو عندي قروش عليكم الله اديكم ليها انتو ولا اديها للزول البسيط
البيموت كا يوم في طريق مدني بسبب رداءة الطريق ولا طريق التحدي ولا الانسان البسيط الفي الخلا في دارفور ولا الزول الماعندو حق معيشة اولادو ولا للبت الجامعية البتاكل من فضلات اصحابها
كسرة
لو في زول عايز يتبرع ويعول اسرة من الاسر المحتاجة دي ليه ما تختو رقم تلفوناتهم او ارقام حسابتهم هم عشان ما تلقو طريقة تاكلو وتلغفوا منها؟ في ناس مابيثقو فيكم بعدين في ناس ما محتاجين ولا بيقبلو زول يتبرع ليهم نوع من الكرامة
زي اسرة الوزير دة هسةاكيد ما محتاجين حاجة من زول واذا كان اسرتو رضيانة انا بقوليهم الشحدة مع المقدرة حرام عديل
ولا انتو عاوزين الموضوع روكة وجايط كدة يا كيزان
حاجة تمغص بس
وانا حايف واحدة تقول لولدها .. يا ولد امشى جيب الزيت قبل ما الانتينوف تقع
الأخ الفاتح جبره …تحيه طيبة…
ياأخى نسيت أمر هام إختلط علينا البقر فيه …و هى مسألة توزيع الشهادة الجد لضحايا الأنتينوف ديل …و لذا أقترح بتكوين لجنه قومية مكربه ما تخرش ميّه من السادة المشايخ والمفتيين الحكوميين و جماعة علماء السودان و تنابلة السلطان بقيادة عصام احمد البشير و عبد الحى يوسف ومحمد عبد الكريم و رفقاتهم ليكونوا مسئولين من تحديد من يقال له شهيد و أستشهد فى الحادث حتى تقوم الحكومة والمؤتمر الوطنى بنعيه رسميا و الإحتفال بزفافه للحور العين و تكوّن اللجان لفتح الحسابات فى البنوك و جمع التبرعات النقديه بالعمله المحليه و الدولار لأسرهم …… و من يقال له قتيل و قتل فى الحادث و يدفن فى صمت و لامن شاف ولا من درى و لا عزاء بعد الدفن و يكن تسميتهم بـ(الراحو فى حق الله ) …….
والله العظيم يا خال الجماعة الروس ديل يلقو ليهم زول يترجم كلامك ده الا يبولو في هدومهم من الضحك، ابداع غير عادي رغم انو الموقف محزن
وأهم حاجة إنو كبار الكيزان البتمنوا الشهادة تكون لهم رحلات دورية لسائر ولايات السودان وبالانتنوف
وعليه انت ياود جبرة عضو فى اللجنة على ان تتمتع بكل الامتيازات مع تذاكر سفر سنوية مجانا على طائراتنا الانتينوف (تبراء انت لا تركب الروسية ولا تسكن المنشية )والله يخليك اهو كده ضحكنا من الصباح قبل ما نطلع حق القفه والملاح
كتب الكاتب قبيح الوجه بذئ الحروف الكوز المعفص اسحاق فضل الله كلام عجيب فى الانتباهة بل الغافلة (وكل حدثة مدمر دعانا الى كشف المدمر فنقص الاثر فيقودنا الاثر الى حوش ثم يتكرر حدث مدمر ثم نعيد الكرة فى قص الاثر فيقدنا الى نفس الحوش )ولمح لسودان لاين وسودان اير وارض المحنة ودائما ينتهى الاثر فى نفس الحوش ولكنه لم يتجراء ليضيف للحوش بانقا
ماهى نتائج مجالس ولجان التحقيق التى كونتها عصابة مذكرة العشرة ؟كتب عليها ود الحوش ريس الغفلة تحفظ ارجو ياجبرة اضافة د.عابدين لخط هيثرو مع شكرى….
صدق ياود جبرة نوف في اللغة العربية من معانيها الارتفاع والسموء وانتي في الانجليزية معناها مضاد . يبقى انتي + نوف = كارثة . وصفقو لييا صفقة قوية وهوب اهوب وهوب اهوب
بس لجنه التحقيق (الدائمه) ما تسافر ب الانتينوف …. استاذنا النوع ده سودانى ولا مستورد
ركب التونسية _ ركب ماسورة _ واخيرا ركب انتينوف
واحنا لابنخاف لاعلمونا الخوف لكن من يجيبو سيرة الانتينوف بنرقد صوف
انتن وفيات
من الاسم باين عليها بتودي الاخرة
عقبال يركبوها الفاسدين
وعقبال نسمع عنهم انهم شهداء
ما تزعلوا خليهم يقولوا شهداء
ويجي كبيرهم ويقول ابتلاءات
(ودعمارى الإنتينوف .. سفة واحده وتسقط قبل الإقلاع)
ياودجبرا عليك الله دى بى كم كرت ؟
طبعا الجزء الاول من مقترح الاورنيك يخص (الصوارمي)..؟!.. يدون منازع…؟..وربما وفر عليه الكثير من الجهد والوقت..؟! والشكر يرجع ليك.؟؟
هههههههههههه والله دي ياجبرا قوية
الله يستر اخوانا المغتربين عند العودة من ضريبة الانتنوف ..
يا حماعة انتو قايلين كلام الفاتح جبرا ده تريقة ساكت؟؟؟ والله كلامه ده عين العقل واقترح على الحكومة ومنظمات المجتمع المدنى ومحلات ود عمارى ان يعملوا باقتراحاته!!!!لانه الحكومة لحد الآن غير جادة فى وقف هذا العبث بارواح الناس!!! بس الطيارة الرئاسية اما غيرها ما مهم انشاء الله كل يوم تقع طيارة!!! لو حصل هذا الكلام فى الدول والحكومات المحترمة(طبعا السودان جكومة غير محترمة اطلاقا) لاستقال مسؤولون بل لاستقالت حكومات!!! لكن ناس الحركة الاسلاموية بيعتقدوا ان السودان وناسه ملك خاص لهم ورعايا ورعاع وليس مواطنين شركاء فى الوطن والسلطة واتخاذ القرار بس تجى اى مجموعة من شذاذ الآفاق وتعمل انقلاب ويفتكروا انه مافى احسن منهم فى الدين والسياسة والادارة وكل شىء مع انهم والله العظيم من اجهل ما مشى على قدمين والقلم ما بيزيل بلم!!!!
يكتب على جسم الطائرة وفى مكان ظاهر تحزير من وزارة شنو داك الأنتينوف تؤدى للوفاة
خط هيثرو ولا باعو الأكسجين كمان للصين والآن جارى البحث عن آلية لحبسها من الناس
ولا رأيك شنو يا الفاتح ؟
حلوة سفة واحدة وتسقط قبل الإقلاع دي … بالغت فيها يا ود جبرا
رغم أني حزين إلا أنك ضحكتني شديد يا أستاذ الفاتح الله يجازي محنك .. قلت لي سفة واحدة وتسقط قبل الإقلاع وما كدة وبس كما جابت ليها دمغة انتونوف؟ الله يديك العافية يا ود جبرا