حليل زمن قفة الخدار !!!
حليل زمن قفة الخدار
أسماء الجنيد
[email][email protected][/email]
سلام يا الحبان في كل مكان..
حياتنا البسيطةا لجميلة صبحت للأسف حجوة في أفواه الممكونين وصابرين.
يحكوها بي حسرة للجيل الحالي والجاي إن ما إنعدل الحال المائل!! و تتمثل في الآتي :
يحكى في قديم الزمان إنه اي بيت سوداني فيه قفة ملاح ? آي والله قفة ملاح عديل عندها اضانين
يشيلوها كل يوم الصباح لي سوق الخدار ولا الجذر ،صاحبها لما يجي راجع بجي شايلها بي (ميلان)
لأنه بتكون ما شاء الله تبارك الله ملانة من مجاميعو, لحمة وخدار ورغيف(عيش) وشوية فواكة وطلب ولا إتنين فول للفطور.
ده غير المغيرب في سيد لبن بجي يكوكو الباب وبرسلوا لي الجردل ولا الحلة يعبي بالرطلين والتلاتة.
واحيانا اكتر لما يكون ناس البيت دايرين روب او زبادي وإمكن لبن سااي لي بسكويت شاي !
ديل ناس ذوي الدخل المحدود،وبرضو اهلنا ناس اليومية البجيبوا قفتهم دي نهاية كل يوم من شغلهم ومعاها مصاريف يوم باكر!
وفي بعد البيوتات المتوسطة الدخل, بكون في قفتين واحده صغيرونة في بطن القفة الكبيرة.
والقفتين ديل يوميا بطلعن من دغشا باكر بعد شاي الصباح وراديو أمدرمان شغال نفحات الصباح،والصوت الرخيم للراحلة المقيمة ليلى المغربي?.وبعض اغنيات الزمن القبيل ،السمح وعديل ،والغنوات البتسند الحيل
مع انغام الرحلوا مننا بي سماحتهم والعايشين وسطنا متحسرين على زمنا ولى وراح دون رجعة !!
نسمع الفلاتية وسمسم القضارف الزول صغير ما عارف، وما عارفة بعد رحيلها اصبح الزول كبير وما عارف!! والمطربة منى الخير الكان في زمنها الخير كتيرو وفير، وعبد الدافع عثمان والشفيع وغيرهم كتير وكتير…
نرجع لي قفة ملاحنا الرحلت مع الرحلوا..
يطلع الصباح سيد البيت ولا ست البيت لي اقرب جذر في طرف الحلة ولا في طرف السوق.
لأنه اي جذر متوفرة فيه اساسيات الوجبات العادية لي اي بيت سوداني.
اها ناس القفتين ديل? القفة الصغيرة للحمة والكبدة وبعض من ام فتفت لزوم فطور .
واللحوم القلناها دي بختوها براها في القفيفة الصغيرة دي عشان ما توسخ باقي الخدار )
والقفة الكبيرة للخدار بي انواعه, لازم خدار اساسي كل يوم زي البامية،القرع،البطاطس ،البامبي،
الرجلة،الخضرة،الورق وتوابعه من شمار أخضر يسمى في بعض مناطق السودان بي( الشبت) هسه لا شبت لا شبط اجاركم الله
اها ومع الخدار تجي السلطة بي انواعها الطماطم , نوعين للسلطة وللطبيخ, وعجوراو تبش او خيار, والبصل الأخضر والجرجير والفجل والليمون, وربطة نعناع لزوم شاي بعد الفطور والغداء بي كيف ومزاج عالي.
و كوم ولا إتنين من الأسود( الباذنجان ) لزوم زيادة صنف مع الغداء.
وبي فوق القفة بعد تتملي بالخيرات الذكرناها دي, برضو في كيس ورق بني كبير ملان رغيف (عيش) وجمبه ربطتين تلاتة موز وبعض الفواكه المتوفرة في السوق.( الحاجات دي كلها في متناول اي فرد مهما كان مستوى دخله)
يوم الجمعة بتزيد الحاجات الفوق دي لزوم البحبحة لي ناس البيت وإحتمال زيارة ضيف غير متوقع
طبعا ديل ناس ذوي الدخل المتوسط. والحياة دي كانت اكتر من عادية وكل يوم بتتجدد الأصناف حسب الرغبة ، والكمية حسب الطلب.. والأمسيات تطلع الناس مرتاحة ودايرة تفرق شوية من زحمة يوم الشغل الطويل.
شيء سينما وشيء اندية شبابية وأسرية وكروية، وحتى في القرى الناس بتفرق بي سهرات التلفزيون الدسمة والبرامج الجميلة من اصحاب الخبرات الثرة والطرب الأصيل.
اما اهلنا الربنا فتحها عليهم ،التجارالأصليين ،العمروا شغلهم بي حقهم وبي تعبهم ، ما تجار دين ولا تجار صحوا فجعتن لقوا روحهم تجار!!
وبرضواصحاب الوظائف المحترمة وكبيرةالجابوها بي دراستهم وعلمهم وسهرهم،ونجحوا في مجالهم بي جدارة.
وحافظوا عليه بي نزاهة وإخلاص وتفاني .
ماوظائف همبتة ساي ولا شغل واسطات ولا جربندية ولا حرامية بنوك ولا نهبوا حق اهلهم الغلابة.
ولا ناموا بي ديون البلد ولا لهطوا قروش اليتامى وعلاج المساكين المطحونين!!
اهلنا الطيبين المستطيعين ديل ما شاء الله وتبارك الله, اولا عينهم ملانة ,وحلالهم غانيهم ومكفيهم شر الحرام والسؤال.
يحمدوا سيدهم متعلمين وميقينين وفاهمين وعارفين أصول دينهم برا شعارات ولادجل.
اهلنا ديل في اي بيت عربية بوكس تمشي سوق الخدار قبال شراب الشاي، خيرهم يعمهم ويعم غيرهم ولا في زولا واحد بحسدهم..
الحياة الجميلة البسيطة الحلال دي كلها،أجاركم الله بقت في خبر كان،إندثرت قفة خدار الصباح.
وإندفنت معاها الحياةالبسيطة دي،وماتت وشبعت موت! ومات معاها الإبداع والتعليم والأصالة وإرثنا القيم الذي لا يقدر بأي ثمن!!!
الحياة قلبت الهوبة في البلد الميجوع, إستكتروا علينا حتى ابسط مقومات الحياة!
من قفة الخدار البسيطة وابسط سبل العلاج والتعليم !!
التجار الكانوا ليهم شنة ورنة، وكانوا ركيزةالبلد ورأس مالها الحر وحلال، حقهم انقلع عينك عينك يا تاجر!
اصبحوا وبكل حسرة يفتشوا لي قيمة صحن البوش!! حقهم شالوا ضرائب وزكاة بي قانون وشريعة مقطوعة من نافوخ تجارالدين ناس ابو جكة!!
والموظفين الكانوا ليهم هيبة وشأن في كل المجالات, تعليم واخلاق وفهم ، ديل قصوهم زي شدر الغابة !
وهم يانعين وفي عز شبابهم،حتى كبارنا الوهبوا حياتهم لي خدمة البلد راجين معاشهم بي حلالهم وسترة حالهم.
شردوهم بإسم الصالح العام ونهبوا حقوقهم وقطعوا ارازقهم!
نسوا تماما إنه حرمة قطع الرزق اكثر جرما من قتل الرقبة( قطع الأعناق ولا قطع الأرزاق)
امااصحاب الدخل المتوسط والمحدود ، عدموا الموجود, منهم من هج برة البلد وديل محظوظين لحد ما.
وبعضهم مغلوب على امره ما زال هائم في بلده زي الغريب! بلد اصبحت زي الغابة ويحكمها قانون الغاب
الفرق الخوة والأصحاب ، قانون شعاره القوي يغلب الضعيف, والضعيف يموت ويتشرد وينضرب ويتحرق وما يقول بغم!
والمرأة في بلادنا الإسمها السودان, اصبحت تهان وتغتصب وتذل وتسب بأفظع الألفاظ وتقهر امام رؤوس الأشهاد!!
رغم فقد المواطن البسيط لأبسط سبل العيش وفقد اي بيت لي قفة الخدار وحتى الكسرة الناشفة في تلتلة ! تطل علينا صينية الترابي سبب البلاوي وهو متحكر اما السفرة المتنوعة الأصناف ، مشمرللهجوم عليها بكل انانية وضمير ميت ومجرد من الإنسانية !
اي لقمة تدخل جوفك يا كبير العصابة عبارة عن نار وعلقم من دعوات الغلابة والمحرومين من شعبنا المطحون.
ورغم كل الوجع والجوع والمرض والتشرد يصر ربيع عبد العاطي إنه متوسط دخل الفرد 1800 دولار والشعب ما لاقي سخينة !!!
ده كلوا حاصل وما زال الشعب صامت !! لا ندري هل هو خنوع أم جبن العياذ بالله ام عدم مسؤولية !! وكلها صفات دخيلة على الشعب السوداني !! ومع السكات والهم المتوهط نص البلد يشربكونا السرقوا قوت اليومية بي عنجهة وجربندية , يشربكونا بي كل بجاحة مع عدو يهشهم بي طرف اصبع ويدوسهم بي خفو القديم،والمشكلة ما بتقع في رأسهم هم ، الضحية الشعب النائم ده، نائم في العوج ومستكين! الحكومة تسرقوا وإسرائل تضربوا !!!
حسبي الله ونعم الوكيل عليكم جميعا
متاوقة
إذا كان دي صينية الترابي وده الظاهر الشفناه وما خفى اعظم! صواني باقي علية القوم المجارمة بتكون كيف يا ربي؟؟
يمهل ولا يهمل
يالروعة المقال والذي عاد بي إلى الزمن الذي لن يعود,
ولكن إذا آخلصنا لله وآخلصنا فى نوايانا وصدقنا مع أنفسنا,
سيعود من ذاك الزمن ناسو, لأنى واثق أن هنالك الكثيرون ممن
حملو معهم رفات الزمن السمح وهاجرو…….. وطفشو
يا سلام يا حاج عبد السلام حليل زمان وايام زمان و قفة زمان وفطور الجمعة الزمان زمن الامان
ما تخافي ارحم الراحمين موجود يقتص منهم حقوق الشعب اورام في حلوقهم وهلوسة وهم صاحين ولسة الجايى اكتر
زمان قفة الملاح كان بجيبها أبوى لحالو أسع نحن سبعة أخوان ما قادرين عليها يا بت الجنيد بالله شوفي الحال ده بقى كيف وكمان الشعب ساكت لأنو ناس الإنقاذ ديل ما خلوه قادر على الصراخ – أنا مره جيت ماري بي عند بيتنا لقيت كلب الجيران لما يجي يهوهو يتكل على الحيطه ويهوهو شوفي حتى الكلاب حقتنا بقت ما قادره على الهويهو – هههههههه والله محن يا السودان الله يكون في عونك يا رب .
ما تذكرينا بالزمن الجميل والله الفرق بين الغنى والفقير ومتوسط الحال كان فى نوعية بناء البيت وده عنده عربية وداك ما عنده لكن ممكن يكون عنده حمارة او عجلة او المواصلات الراقدة بى كثرة وكمان يدفع لاصحابوا بكل كرم!!!لكن فى الاكل والشراب ما كان فى زول عنده مشكلة فى دى وتلاتة وجبات فى اليوم!!!اعطيك مثال واحد من التجار العظام الوطنيين مش زى ناس قريعتى راحت والقاموا من نومهم ولقوا كومهم بالفساد والواسطة الوطنى عثمان صالح كان بيساعد المزارعين ويصدر انتاج السودان الزراعى لبريطانيا وما شغال بعملة صعبة ولا يحزنون بل ياخذ من البنك عملة سودانية محترمة عشان يجيب بيها قفة الخضار وهذا مثال وليس حصر لان كل التجار وناس القطاع الخاص جابوا قروشهم بعرقهم وفكرهم زى ما قلتى!!!!اما ناس الحركة الاسلاموية فديل مكانهم اقرب صندوق زبالة مع مخلفات الكرشة والبعر!!!!! ويديك العافية وشكلك كده بت بلد واصيلة.
الأخت / أسماء بنت الجنيد متعك الله بالعافية وأنتى تسردى لنا ماكان جميلا فى زمن جميل وأهله أجمل منه والله رجعتينا لزمن تواصل الأرحام وفطور الصباح ودعوات الوالدين لأبناءهم بالدعاء الصالح والفقير عمره مانام جيعان والله نزلت منى دمعات حاولت أن أكبتها. ليت ذلك الزمان يعود.ليت تذهب العصبة التى سرقت الوطن تذهب غير مأسوفا عليها لنرجع ذلك الزمن الذى ولى.
الغريبة صينية الترابي المدنكلة دي ياكل فيها براهو ما معاه ولا زول او احد من اطفاله يا حليل الصينية البتحاوشوها عشرة وبقدرة قادر تدخل يدك معهم لكن الله كريم على ناس السودان واهل السودان وربنا ينتقم من الترابي والبشير وبقية الزمرة
والاغرب من ذلك لسه فى ناس بتصفق للمجرم الترابي وعايزنو يرجع تانى يحكمنا !!
ولو الترابي دا فى دولة تانية غير السودان كان قتلوه وسحلوه وعلقوه فى خشبة فى ميدان عام عبرة لمن يعتبر
ليه كدا يابت الجنيد؟!! تعرفي دي المرة التانية تبكيني الذكريات.. الأولي إعلان في التلفزيون تصاحبه أغنية بي لحن حزين (ياحليل زمن البريد) والتانية ذكرياتك عن أيام قفة الملاح وياحليل الزمن السمح..وقاتل الله هذا الزمن الردئ ومن أتوا به.
كنا ، وانحنا صغار ، في اجازة المدرسة انا وابوي في عربية وعمي احمد الله يرحمو مع اولادو في عربية ثانية ونمشي سوق الخدار في مدني ، يوميا ،نبدا بي زنك السمك ( واالله الشرا كان بالقفه ) ثم زنك اللحمه واخيرا نمشي لي ملجة الخدار حيث الشراء كان بالقفه والربطه.
اها قولتو شنوما حجيتكم ما بجيتكم.
وبالليل كل زول بجي يتعشي مع ابوي كان بجيب يا قزازتين شري يا كرتونة بيرة ابو جمل باااارده ., واييييك ما تعدش .
ولكم التحيه اهلي الحنان ، ما بقت زكريات؟!!!!
انا بتذكر ليومك ده وانا كبير في الثانوي يدوني خمستاشر قرش امشي اجيب لحمة- اللحمة قايلها شنو ما ربع كيلو ضان تملح لبيت فيهو اكتر من سبعة انفار – وخضار وسلطة وموز ولا برتقان وابرشت كمان منها حق السينما .. تقولي لي شنو … داك كان زمن البركة وده زمن المحقه … سبحان الله مغير الأحوال …
عزيزتي بنت الجنيد
متعك الله بالعافية
الحل في رجوع قفة زمان هو بترتيب الصفوف وتضافر الجهود منذ الآن لتعرية هؤلاء السفلة في الانتخابات القادمة واسقاطهم وطردهم من جميع اجهزة الدولة ومحاكمة الذبن اجرموا في حق هذا الشعب الصابر الأبي وآمل ان يسعي الجميع الي ترتيب وتنظيم القوائم الانتخابية لهذا الغرض ولتكن الراكوبة هي المنبر الذي يتولي هذا الأمر وعمل لجان من الكتاب الشرفاء فيها والمتعاونين معها.. وخلونا نبدا منذ الآن لان هذا هو السبيل الوحيد في رأيي لعودة السودان الي ما كان عليه