متين حتفهم ياشعب

متين حتفهم ياشعب
انو الانقاذ حكومة حرامية جات عشان تنهب البلد العبادة موحدين، متين حتفهم انها ماحتقيف من نهب خيرات البلد
ولمن خلصت الخيرات دي قبلت تنهب المواطن، متين حتفهم انها ماحتقيف وحتواصل لحدي ماتمص اخر قطرة دم في جسد المواطن السوداني

متين حتفهم انو الشعب كلوا ما واحد وانو الناس معايشها مختلفة، الليله انت قادر توفر لقمة العيش لي اولاد في غيرك ماقادر وبكرة بيجي عليك الدور

عارفين المشكلة وين انو نحنا شعب مابنشوف الصورة الكاملة، كل زول فينا بيعاين تحته وبس، قادر تاكل انت واولادك وعايش ماليك هم بالباقين، الجوع الناس دي الليلة بيجوعك انت واولادك بكرة

ليه كل مرة بينتفض الشعب بتقدر الحكومة تسيطر علي المحتجين؟
مافي زول سال نفسة السؤال ده !!!!!!
هل هو القمع المفرط من الحكومة ولا ضعف المعارضة ؟
الاسباب دي موجودة بس السبب الاساسي هو انو الناس البتطلع وتنتفض ماهي الشعب !!!!!
بعض الناس من ابناء الشعب الضاق بيهم الحال وجاعت او البعض الاخر الشايف المستقبل مع الكيزان حيوصلهم لي وين بيمرقواز وبتقدر الحكومة تقمعهم باساليبها الوحشية وتقتل الشهداء ويرجعو الناس بيوتهم مرة تانية
وتواصل الانقاذ في مص دماء الشعب لحدي ما يطلعوا ناس تانين وتسيطر عليهم الحكومة وتقتل نصهم ويهاجر بعضهم

الانقاذ جات من يومها تاكل خيرات الوطن وتقضي علي الاخضر واليابس وحراميتها مامقصرين باعوا ونهبوا ودمروا وفصلوا وقبلوا عليك يامواطن ورفعوا الدعم.
لازم تعرف انو في ناس مالاقية تاكل الليلة ولا قادرة تتعالج ولا قادرة تودي اولادها المدارس، وبتمرق تقول “يسقط حكم البشير” و ” جوعت الناس يارقاص” و “الشعب يريد اسقاط النظام ” وتلاقيهم الحكومة بالبمبان والرشاشات وتحصد ارواح الشباب ونمشي المقابر ويجونا الحرامية يعزونا ونكتفي بانو نطردهم بكل بساطة “برة برة”
ونرجع بيوتنا مكسورين ومحبطين ويموت فينا البيموت بالجوع او المرض ويهاجر البيهاجر ويخلي البلد للكيزان.
وانت قاعد تتفرج كانو الناس دي جاية من كوكب تاني وبتطالب بسقوط حكومة تانية وترجع تتونس مع اصحابك عن ضعف المظاهرات والرصاص والبمبان والشهداء وتترحم عليهمز

وتستمر الانقاذ تمص دم المواطن

بكرة الدور بيجيك وبتمرق وتقول نفس الشعارات القالوها الناس القدامك وتلاقيك الحكومة بالرشاشات والبمبان ويموتوا الشهدا وترجع بيتكم بالحسرة ياتموت بالجوع والمرض او تهاجر.

وتواصل الانقاذ في مص دماء الشعب

متين حتفهم ياشعب وانو مافي مستقبل مع الانقاذ وانو الخلاص مابيتم بصورة فردية وانو تغيير الانظمة محتاج لالتفاف الجماهير

ماتكون اناني وماتفكر في نفسك وقدرتك علي توفير لقمة العيش ليك ولي اولادك

واتاكد انو الدور بيجيك

بقلم: حوشة
[email][email protected][/email]