صندوق دعم الرادار
ساخر سبيل
صندوق دعم الرادار
الفاتح جبرا
للمرة الثالثة على التوالى تخترق الطائرات الحربية الإسرائلية أجواء بلادنا وتحرز (هاتريك) كما يقولون فى كرة القدم بعد أن تصيب أهدافها بدقة متناهية (وعلى مهل) وتعود إلى قواعدها سالمة وهى تخلف وراءها عدداً من المواطنين القتلى (المتفحمين) ! وأين .. فى (بورتسودان) المدينة التى بها قيادة الدفاع الجوى وهو السلاح الوحيد المناط به المحافظة على الأجواء من الإنتهاكات !
لقد إنتابتنى ضحكة أسيفة حزينة (من الغلب طبعن) وأنا أستمع إلى السيد وزير الخارجية بعد واقعة ضرب بورتسودان الأخيرة حيث صرح سيادته بأن السودان يؤكد (شوفو يؤكد دى) على إحتفاظه بحق الرد على هذا العمل الإجرامى !
هذا التصريح ينفع أن يكون نموذجاً (للكلام الساااكت) ! أتوقع إن إستمع إليه وزير الدفاع الإسرائيلى أن يضحك حتى يستلقى على قفاه … أى رد حياك الله وأبقاك يا سعادة الوزير؟ وبأى سلاح؟ إذا كانت طائرات العدو (تدخل وتمرق) زى الما حصلت حاجه ! لا رادار (يشوفا) ولا دفاع جوى (يضربا) ولا طيارات (حربية) تتعقبها !! فى بلد يرضخ أبناؤه لان تكون ميزانية (دفاعة) عشرات أضعاف ميزانية علاجه وتعليمه وذلك حتى ينعم بالأمن والإستقرار !
إن أكثر ما حيرنى فى أمر هذه الضربات (البقت كتيره ومسيخة) هو مسالة التصريحات المتضاربة التى يطلقها المسئولون بعد كل (ضربة) ! والدربكة واللخبطة التى يتعاملون بها مع الحدث وإليكم بعضاً منها :
* قام التلفزيون الرسمى ببث الخبر بعد أن بثته كل القنوات والمحطات العالمية !
* على الرغم من أن كل هذه القنوات العالمية التى بثت الخبر (قبل تلفزيون السودان) قد أوضحت بأن الطائرة التى شنت الهجوم هي طائرة إسرائيلية إلا أن تلفزيوننا (ربنا يهديهو) قد أشار بأن الطائرة مجهولة الهوية (ليه ما تعرف) !! يكونو يا ربي ما عاوزين يتبلوا على إسرائيل ساااكت وخايفين يصيبوها (بجهالة) !
* تم بث تصريحات وزير الخارجية التى إتهم فيها إسرائيل مباشرة بشن هذا الهجوم على كافة القنوات الفضائية العالمية قبل أن يبثة (تلفزيون السودان) !! ربما كان مسئولو التليفزيون ماشين بالمثل (كل تأخيرا فيها خيرها) والذى إن كان من الممكن أن يتناسب مع كل شئ فهو لا يتناسب أبداً والإعلام !!
* فى الوقت الذى أكد فيه وزير الخارجية الهوية الإسرائلية للطائرة، كما ورد فى تصريحاته للقنوات الفضائية الخارجية صرح نائب والى ولاية البحر الأحمر بأن الطائرة قد أتت من الشرق و لكنه لم يحدد هويتها. (مش كويس إنو عرفوها طيارة) !
* أشار وزير الخارجية بأن القتيلين هما مواطنان سودانيان، فى الوقت الذى أشار فيه نائب الوالى الى أن أحدهما مواطن سوداني، و لم يحدد هوية القتيل الآخر!! (عرف واحد وما عرف القاعد جنبو .. أيه الفتاكة دى)!!
* وقال مصطفى مندر نائب الدائرة (10) القومية في تصريح لـ(smc) إن الطائرة ظلت تتابع العربة حتى قصفتها موضحاً أن شهود عيان كانوا يتابعون الطائرة حتى قصفت السيارة. (طيب الدفاع الجوى ما كان بيتابع مع الشهود ديل ليه؟) !
ولعل المدهش من هذا كله أنه وعلى الرغم من مضى وقت على الحدث فالعبدلله لم يقرأ ولم يستمع ولم يشاهد أى من جنرالات (وزارة الدفاع) والذى يعنيها هذا الأمر الجلل أى مقابلة أو مؤتمر صحفى أو تصريح !! من أجل توضيح الحاصل بالظبط (ولو ده حصل بيكون حصل متأخر جداً )
يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقو يدخلو ويكتلوا ويمرقو زى ما عايزين .. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى اللى خلفونا فى التعليم والصحة والعلاج والشنو ما عارف .. عشان كده أنا بقترح على (الشعب الفضل) يعمل ليهو صندوق يحل بيهو المشكلة دى عشان ما نبقى (ملطشة) ويسميهو (صندوق دعم الرادار) !
كسرة :
.. يا سلام … دخلوها وخفيرا نام ! هييييييييييييييع !!
تحية للاستاذ بس كترتها على الشعب كفاية صندوق العدة بتاع حلتنا و5 فطور بيت البكة و2 غسيل العدة الواحد خريج اقتصاد بس احنا اتفوقنا على جميع النظريات الاقتصادية الدور والباقى على فى بالى :crazy:
يا خوي الفاتح الضمان شنو بعد ما المواطن يدفع دم قلبه لشراء الرادار إنو الرقاص اب جاعورة او أخوانه الحرامية يبنوا بالقروش عمارة عمارتين في كافوري (انت نسيت موضوع الفضائية وشريان الشمال؟) … ولو اي مواطن او صحفي لمح بي حاجة او احتج عليهم يقوم الرقاص يعمل مهرجان راقص ويشبعنا رقيص وجعير وشتيمة واتهامات بالعمالة زي ما جرت عادتهم في كل مرة يكونوا فيها عاملين عملة او مقصرين في حاجة … بس إنت يا جبرا ادعي معاي إنو الرقاص اب جاعورة والحرامية المعاهو يرقصهم الله في نار جهنم بحق كل مواطن جوعوه او عذبوه او شالوه الصالح العام او باعو ارضو وكرامته او … الخ
اي والله يكفي دخلوها وخفيرا نام !!هيييع!!!!!!!!!!!! الله يجازي شيطانك!! والله الكسرة دي لو جعلية ساي اكان اقلت وزير الفداع والطيران والداخلية وقائد الجيش وقائد الشرطة وقائد الدفاع الارضي(جوي ماظنيت في قائد) وحتي المره كان طلقتها لو دقت دلوكة هيييع تاني!!
الأستاذ جبرا
أنا أول المشاركين في هذا ( الصندوك ) شرطا تدوني الصرفة الأولي !!!!
دخلوها وصقيرها عام
ضربوها والناس نيام
والله ياجبره ديل عاوزين صندوق جنائز ( نعش) عشان ندفنهم ونريح بالنا من هذه العصابة الماجنة الذين لاهم لهم غير كنز المال وزواج النساء مثنى وثلاث ورباع والشعب لايجد قوت يومه ولايامن على نفسه من اسرائيل وغيرها فالاجواء منتهكة ولاحياة لمن تنادى
اقتراح جميل وانابساهم معاكم بس زول الصرفة الاولى نعمل ليهوشنو؟
ولدنا / جبرا ……..
عليك الله قول رآيك وبصراحة !!!!!!!!!!!!!!!!!!!!!
لانني شايف الجيش عندنا ( معارك ) في الجنوب ( سابقا )
وجبال النوبة ثم دارفور ( حاليا ) يعني الشغل كلو ( داخلي )
;( ;( ;( ;( ;( ;(
وهسي عندما جاءت ضربة (خارجية ) ما سمعنا منهم كلمة!!
بل الكلام جاء من وزارة ( الداخلية ) !!!!!!!!!!!!!!!!!!!!!!!!!!!!!!!!!
* دحين يا ولدي ( جبرا ) قول لي (انا) كبرت وخرفت ( لقد هرمنا )
وراسي صار لا يفرق بين (الجيش و الشرطة )!!!!!!!!!!!!!!!!!!!!!!!!!!
ولاه ( الجماعة ) في السودان جايطين الحكاية و عكسوا الشغلانة
:confused: :confused: :confused: :confused: :confused: :confused:
قبل كدة وفى عهد المرحوم نميرى القذافى طالبنا برد مبلغ تسعة مليون دفعها للنميرى مثل القروش التى دفعها لساركوزى لكن ساركوزى رجعها ليهو صواريخ وقنابل ونحن تبرعنا بيها ولكن الى الان ماعارفينها رجعت للقذافى اواتاكلت
السودان بدا ينتج النفط منذ فترة وكلما تتملى سفينة وتتباع نشاهد رقص وحفلات من الرئيس والمعاهو تجيهم شوية دولارات يقعدو يرقصو ويغنو والشعب السودانى منتظر يضوق قروش البترول حتى بترولنا باعوه لينا باكتر من سعرو
والناس دى لانها شبعت ورقصت نست انو فى حاجة اسمها سودان وامن وصحة وتعليم فراح الجنوب وانهار التعليم والاخلاق نسو االله فانساهم انفسهم
انهار كل شى
الان امامهم اما ان يتم اعدامهم رميا بالعزرة ومصادرة ممتلكاتهم او نفيهم الى محارق النفايات والحكم عليهم باكل رمم النفايات وبقايا الكلاب والقطط لانهم ارازل
الحكومه قالت حترد طيب انت دورك شنو والا عاجباك الحكايه الحكومه مع حماس وضد اسرائيل انت مع منو
وصندوق لدعم الشكوى فى مجلس الامن لزوم مصاريف السفر والفنادق اصلو الجماعة قالو حق التذاكر ماعندهم يعنى يضرب مجهول وندفع نحنا دى مصيبة شنو;( ;( ;( ;(
دحين دا ما شغل الصوارمى انو ينورن ……..؟؟؟؟؟؟؟؟
رادار شنو عليك الله انا سبق قبل كده قلته الكلام ده حتى لو في رادار حيصل الاتي البطاريه طبعا ما بتكون مشحونة لانه الوصله ما مركبه في البلك وبعد الضربه ما تحصل كل واحد يقول للتاني الله البطاريه ما مشحونه هو انت ماشحنتها انا قايلك انت شحنتها.
فمافي دعي ندفع الناس حق دعم الرادار كفايه لحدي هنا
أنا الخايف منو الرد اوعا يكون كباري و سد…………قال رد قال………………
ياجماعة الخير وزير دفاعكم بيشتغل بعد الضهر سواق للرئيس وما داسيها، شا كدى الناس اللي تحته هاملين شغلهم هم كمان.. وسيد العربية طالما سواقو مريحو ما بيقدر يعاتبه وكدا
المدهش المبكي قالوا صاروخ وقالوا طيارة وقالوا هيلوكبتر ولي هسي ما ثبتوا علي
كلام واحد..!!
والقالوا طيارة قالوا واكدو انها جات من جهة الشرق وبعد تنقيذها للمهمة عادت ادراجها
بنفس الاتجاه الجات منها !!
والكلام دي كلووو على لسان مسعولين عاملين فيها عبيد كبار ..
يعني لو كانت طيارة او صاروخ ما مهم وعذرناهم فيها لانو قد يكون تشابه عليهم البقر
الادوهو للحلب …. لانو بالجد صعب تحديد الضارب ان كانت طيارة او صاروخ وخاصة
وهم خاتينا في الاعتبار انهم الاتنين سريعين جدا..
يعني بنفس المنطق والعذر ممكن نقتنع بكلام المسعولين القالوا كان صاروخ ..
ونكمل الحبكة المضروبة ونصدق ونقول :
الصاروخ جا من جهة الشرق وبعد تنفيذه للمهمة عاد ادراجو بنفس الاتجاه الجا منو !!
أخخخخخخخخخخخخخخخخخ
شوف ي جبرا امحاوله فاشله من دول البغي والاستكبار ,التي حاولت ان تمس سيادة الوطن ونحن جاهزين ليهم,مايجونا عديل ياعازل هوي انقرع,ممكن لو جكة ساكت نمرق في اسرائئيل ,وتانيا السودانيين الفي اسرائيل براهم ممكن يحرروها,انت قايل البلد فوضه ساي البلد مافيها رجال:D ,اكان يورنا تشوف البحصل ايه اسرائيل شنو كمان,نحن راينا في امريكا فقد دنا عزابها علي ان لاقيتها ……اكمل البقي ايا زول ها فالحين في النضم,كلام سسسسسسسسسسسسسسسسسسساي
ياجبره…
وبعد مانلم قروش الخته نديها منو ..لو اديناها للجماعة بياكلوها ولو اشترينا الرادار نحنا بتسلبطوا فيه وببيعوهو ..!!
نحن موافقين على ختة الرادار لاكن شوف لينا ضمانات .. خلاص اتفضحنا اكتر من اللازم شوفو لينا حل ..:mad:
:D :D :D :D :D :D :D :D :D :D
شر البليه مايضحك
الله يهدينا ويهديك يا حبرا الجماعة ما يصدقوا تفتح ليهم باب جبايه جديد يضيفوهو للصناديق القاصه ضهرنا امثال صندوق الشهيد ودعم الطلاب وما الي ذلك
الطائرة (مجهولة الهوية) دى ياربى تكون من دار المايقوما ؟؟؟؟؟؟؟؟؟؟ (؟) (؟) (؟)
يا اخوانا انتو الطيارة ضربت العربية ولا العربية ضربت الطيارة …. فهمونا
مسطول
الأخالفاتح لك التحية:
دقة تفوت ولا حد يموت,,, حمات وطننا شغالين بنظرية(( دحين كان قمت ما كان طبقلى)),, ومع ذلك سنحتفظ بحق الرد (( لو قمنا)).
الفارس المقدام المصنوع من كلام كذب على نفسه فصدق كذبته وصدقة الناس بأنه البطل الذى لا يشق له غبار ,, تبجح على أهل القرية(ان كل من أراد أن تثكله أمه أن يخالفه الرأى خصوصا إذا تعلق الأمر بالعزة والكرامة).
وفى يوم من الأيام وأمام أهل القرية والناس يتزاحمون أمام دكان خميس الجزار إذا بشاب نحيف البنيه قصير القامةيحمل بيده اليمنى (عكاز مضبب) وباليسرى كيس بلاستيك عله يظفر (بكوم كمونية) وسط هذه الزحمة المليونية,, وبدون أن يدرى قام بدفع الفارس المقدام,,, غضب المقدام وسبه بأقبح الكلام ( الفارس المقدام فالح فى الكلام),, لم يحتمل الشاب وكان رده حاضرا فضرب المقدام بعكازه ضربة (لفخة) واحده فأرداه أرضا,,,
لم يتحرك الشاب شبرا وظل واقفا عند رأس المقدام الممدد على الأرض والناس فى ذهول وخوف,, ذهلو كيف سقط المقدام من أول لفخة وخافو على مصير الشاب من الموت على يد المقدام,,,
لم يتجرأ أحد من الحاضرين بالتعليق أو الكلام,, إنتظروا قيام المقدام ,, وشق الصمت صوت طفل صغير مولع بمشاهدة المصارعة والأفلام,, واحد,, إثنين,, إتناشر… بعدها ركل الشاب المقدام وذهب لخميس الجزار وسالة : كمونية وعندى بس مية,, أجاب خميس: كمونية وعلى الطلاق نصف كيلو فخدة منى ليك يا همام,, أخذ الشاب الإكرامية وذهب الى من حيث أتى,,
عندما ذهب الهمام انتفض المقدام,, عندها تجرأ الناس على الكلام,,
الحاصل شنو رقدتك طالت,, أفتكرناك تقوم تأدب الشاب المفترى,,
أجاب المقدام:
والله أنا راقد على رأى..
قلت أرقد لان الأمور تنجلى (( كان قمت كان طبقلى)),,
قبل كده يا استاذ دفعنا ومازلنا صندوق دعم الشريعة وانت شايف الشريعة وصلت لحدى
وين ! ودفعنا صندوق دعم التلفزيون(فضائية قالوا) وشوف تلفزيونا محلك سر !! ودفعنا
دمغة الجريح ومازال جرحنا ينزف !! ودفعنا رسوم ماليها اول ولا اخر .. والحال فى حالو
عشان كدا خلينا من حكاية الرادار دى .. كل واحد فى الشرق يعمل ليهو سفروق وكان الطيارات جات بيكون احسن من دفاعاتهم واكتر فاعلية..
التحقيقات افادت انو
بتاع الرادار كان بتعشى
دفاعنا الجوى…. ياهو ديل
دفاعنا الحربى….. ياهو ديل
دفاعنا الجوى ….ياهو ديل
يا جبرا شكلك قربت تفلس بينا وتفلس من صبرك والفاظ الكلام … عجبتني حقت علينا وعلى اللي خلفونا بعدين انا مستغرب الراجل دة المفروض ما يصبح عليه صباح في الدفاع لو كان في رجال في حكومتنا دي.. بس نقول شنو … ما في همة ولا في غيرة على التراب. اهم شي الطبق مستور .. والصمت الذي يفقع المرارة.
دقت ساعة الصفر الى الامام صفا انتباة للخلف دور اينتباه البشبر وعبدالرحيم معتدل مارش الى الجحيم بكباشى معاش حسين فضل المولى انا الراجل الذى اسقطت هليكوبتر بخرطوش الصيد فى العراق
:lool: :lool: مرسي ابن المعلم الزناتي اتهزم يا رجاااااااااااااااااالة :lool: :lool:
ده انجليزي ده يا مرسي ؟
لأ ده ………………….
يا جبرا ولدنا داك البطللع كمبارس فى افلام المصريين بقول شنو (فى اوربا والدول المتقدمه لما احصل كده وزير الدفاع بقدم استقالته ) لكن نحنا هنا عندتا تشريع غير معلن اسمه ( فقه الستره ) بعدين ارجع لاغنية جدودنا زمان
انت ياجبرة فلست ولا شنو كلو يوم مقترح لينا صندوق
أحلى حاجة يا أستاذ البلد دخلها خليل بأكتر من 200 عربية جهارا نهارا وجماعتنا ما عارفين
دخلتها طيارة جهارا نهارا وجماعتنا ما عارفين
لا راقبو البر ولا الجو يمكن مركزين جهودهم على مراقبة البحر ، مظلومين
أنا منتظر حق الرد اللي قالو الوزير ، حنسمع طائرة سودانية تقصف مقر وزارة الدفاع الاسرائيلية قريبا
أنا بقول الطيارة من بواقي " طير أبابيل " والذين في العربة هم من جماعة أبرها ….. بعدين كانوا ماشين يدمروا بيوت …….. فكان ما كان ….. أما وزير الدفاع وبعد ما يخرج من أزمة " النزلة " إنشا الله يكون الرد بمزيد من البيوتات ……..
انت عايز تزيد الاسعار ولاشنو الجماعه يسمعوا الكلام وبكره بنفذوا وطبعا انت عارف انو الصندوق ماعندوا بدايه ولانهايه يعنلى بالعربى الفصيح تدفع حتى الممات :cool: