غنية للصباح الجاي ..شعر د. آمال حسّان فضل الله

شعر د. آمال حسّان فضل الله

وَاحِد
وطنى وَاحِد
إتنين
إتقسم إتنين
تلاته
تَجَزَّأ
وَقِصَّة حُبَك ما بتتجزأ
زى ألصَخْره إنكسرت مُويه وجَابَت عَزه
زى التاكا الحَارسَه رِمَالك عشَان خَيْماتَك ما تتهدا
وزى النَّخْل الضَّارِب عُمْقك
حُب وَ مَعْزه
مَا بتتجزأ
حُبى ألاول حُب سوداني ما بتحَول
مِنَ تُوريت أدانى أمانى
طرز قَمرك فى فستاني
وقبل الليَل ما يَلاقي صَباحُو
شَتَّت أَمَلك في أحْزانِي
وحُبي التاني بِقى عُصفوره
طارتْ مني
رَكَّتْ تاني
سُكسُك غالي في البنطال الامبريالي
قَسَم الدوله
كَسْره وَشَولَه
إنتَ جَنوبي ، إنتَ شَمالِي
لبَّس أرضِك بُرقُع أسود
وطْلق أشْباحَك في حيشاني
وحُبي ألتالت
حُب تارِيخي
حُب إسطوره
حُب إنساني
رَفعَ الكسِره ـ فتحَ ألشَوله
نَظَّم دَوله ـ ضِد ألدوله
ضِد أوراقا وَضِد أسوارا
ضِد سُلطانا وضِد تُجَارا ـ
شارع … شارع
عَالم كامل نَقدل فيهو
نَكْتب شِعرو وَنَحلم بيهو
وَلمَّا يَجيك فى ألزمن ألقادم حتعرفيهو
فَارِد شَمسِك زى بلوره
ولابس رَحَطِك بِرقص بيهو
نَاحِت إسمك في محاره
ولافَِح نِيلِك بيعرض بيهو
ساريه بتهدي طريق بحاره
وزى حُميدك حتغنيهو
و برمل أجدادِك حتغطيهو
شَايل وَلدِك جوَّا عُيُونُو
وحَاضِن بِتِك في جَوف نُونُو
وبِشوق أجياليك حتضُميهو
ويا أمي حَتفرحي بيهو
وَهُُو طَالِع منِك بِنضف دمِك
وَحَتَحبيهو

واشنطون دسي ، ديسمبر٢٥/ ٢٠١٢