حكومة جناح امجكو
حكومة جناح امجكو
أسماء الجنيد
[email protected] البريد
سلام يا اهلنا في كل مكان داخل وخارج السودان
زماااان بسمع الكلمة دي وماني فارزة معناها ضمة
اها يوم كده سألت امي الله يديها العافية , قلت ليها جناح امجكو ده شنو هو زاتو؟ قالت لي بوصفوا بيها الهدم الماكن ومو مجيه وتحديدا الجلابية البتخوججوا بيها ساي برا فايدة في الفارغة والمقدودة , والله اعلم ,, المهم
اها يا اخواني حكومتنا دي ياها جناح امجكو جد جد
شايلة داخل كرشها كل شيء وحايمة بيه ,, كوشت اللخدر واليابس بي جوة كرشها امجكو ,
في البداية ومن يوم ما هلت علينا في اليوم الأسود داك عرفت تفر اكمام جلابيتها في الجهات الأربعة وتعمتوا جواها لامن شاف لا من درا
, ولامن إتمكنت شوية شوية و المسروق ستف جيوب جلابيتها كلهاو انسدت ووقفت ست ,, والربوب بقى مارق بي تحت وبي فوق رقبة الجلابية
وبي فتحات الأكمام بقى كل شيء ظاهر للناس وبرضو حكومة امجكو ما واقفة ,و ما شبعت ولا خجلت يا اخواني
زمان الفساد كان بي تحت تحت
شويتين بقى عمارات وفلل ومزارع وحدائق ده غير الكاش المسفرنوا بره بكل العملات? ورئيسنا الله عامي بصيرتوا يقولك مافي فساد !!! عجبي
والكاش البسفروه اشكال والوان زي ما تدور ,شيء إسترليني وشيء دولار امريكي , وشيء يورو وما بغلبهم شيء مستعدين يحولوا بي الين اليابانى والروبية الهندية والباكستانية !
المهم يكاوشوهو برة البلد ,, قدروا كملوا العملة الصعبة وسقطوا حجر الجنية السوداني ولحقوهو امات طه
بقى الجنية السودانى شدة مو بقى لا يسوا التكتح , إن لقيتو واقع في الواطة ما بتدنقر تشيلوا , ولا بتعاين ليه ا, ده ما قلت ده شنو العيفة التليفة ده!! هو زاتو
تسوي بيهو شنو ؟ بلا إرفع ضغتك ساي ,!!!
وبما إنه السرقة بإسم الدين
والشيء بقى كتير , بقت لازم تكون في تدابير لسرقة تانية يخموا بيها الفضل
اها جونا مثلا بي بيت الله البنوهو لينا في الساحة الخضراء
خلوا الناس يجكوا يا حليلهم في خلا الله والرسول ,وإمكن يكون جمبهم اباليس جاكين وعلالتهم واقفة ألف أحمر
مشقينها عليهم سااااااااااي على الشقاوة العليهم
يعني قدر المروة الموفرنها يحجوا بيها جد جد في بيت الله البصح مو بالكضب , كملوها هنا توروا نفسهم برا فايدة غير إنه كتروا ليهم التعب و الأمراض
مع إنه الحج في بيت الله مافيه المعاناة والشقاوة الصنعوها ناس بنو جكة من دماغهم المصوفن ومتعوفن ومدود كمان
وما غريب يجونا بي تقليعة جديدة ما يعرف يفكر فيها إبليس ذات نفسو , إلا هم بس البقدروا علي التفكير الخبيث وعجيب ده .
يعني القروش البتبعزقوا فيها في الفارغة دي , ما كان اولى بيها طيارتنا البقت الركشات اكتر مروة منها
الشكية لي الله الطيارة تتهوزز ساي حديدة مصدية ودخانها فايت بابور الجاز ,,!! وكل مرة رايح ضحيتها الشعب المسكين ده , الليلة لولا عناية المولي كان عدد ركاب الطيارة السودانية القامت قبيل ووقفت قلوب الناس
كان عدد ركابها ال37 حسب ما ذكر كانوا لحقوا ضحايا سودانير للمرة التانية وامام نظر الجميع وبرضو رئيسنا عندو يخت بي قيمة طائرة لصالح البلد, يختوك قريب في كوبر زي حسني مبارك وتتذلة قدام حلق الله شاحدة ليك الله إنت ورفاقتك ,,
مطاراتنا مكركبة , طيارتنا بنطون الجنيد رفاعة الزمان داك ضكران وبعوم وسط الشيمة وبوصل اهلوا سالمين تامين
شفع مدارسنا لافين بالشوارع عشان ما دفعوا الرسوم والغصة في حلوق اهلهم المغلوب على امرهم
المرضى مرصوصين بالمستشفيات برا علاج ولا عاناية وإهتمام من الدولة وبرضو اهلهم يعاينوا ليهم واملهم في رب العباد يفرجها عليهم والدموع نحرت عضام وشيهم
الجوع كسح البلد من كل صوب والغلاء بقى يرفرف زي العلم في كل زواية من ارضنا الحنينة واهلنا الطيبين مغلوب على امرهم
وقدر الطلعوا عبروا عن مرهم ووجعتهم
نط صاحب لحس الكوع وقال ديل الشيوعيين ممولنهم عشان يتظاهروا
الشيوعين اريتهم كان لموا فيك ولحسوك كوعك عشان تعرف التمويل الحرام الممول بيه روحك وماطي ليك مزرعة بطول النيل سااااااااي همبتة مهمبتة من خلق الله
وناسي باكر بمطوك في ود الأحد الشبر الواحد وتشوف الوريتوا لي عباد الله الطحنتوهم 23 سنة
الناس الطلعوا ظاهروا ديل من وجعهم ومرهم , ما بدوروا ليهم تمويل ولا وصاية ولا حريش!! واليتيم ما بوصوه على البكاء!!!
الوجع كتير يا أخواني وما بنحسب ولا بنقدر نعدو
يحلنا الله من فوق , كلكم كتروا الدعوات في كل الأوقات والله كريم بعباده,
ــــــــــــــــــ
متاوقة
شاعرنا ود الخامة من ديم القراي قال
الزول ان اباك من غير سبب ما تسكو.
امسح اسمه من خارطة ضميرك حكو..
جامل البجاملك والبدكك………….. دكو…
الناس زي الهدوم فيها الغالي والزي جناح امجكو….
واحد ساتر وواحد احسن منو تمشي امفكو
اها شفتو نحن حكومتنا دي ياها جناح امجكو , لي ساترانا ولي مخليانا في حالنا , اخير يختونا ناس بنو كوز يخلولنا بلدنا ام فكو
بلا رئيس وبلا وزراء ولا حيكومة زاتها
النعمنو وجودهم مرض وورم قلب ساي
الله يخلصنا منهم قادر يا كريم
يمهل ولا يهمل
ودعتكم الله
أسماء الجنيد
والله العظيم يابت الجنيد كلامك سمح شديد ودعواتك سمحة بس نقول آآآآآآآآآآآآآآآآآآآآمين يارب العالمين تستجيب لدعوات بت الجنيد وهى دعوات صادقة ونابعة من بت بلد اصيلة مو ملفق جنسها واتعرف اصلها من كلامها وشعورها بمأساة البلد
مقال ممتع حسستيني إني قاعد أتونس مع حبوبة الله يرحمها ،،،
لك كل التحية و التجلة أختي الأستاذة أسماء
الاخت / اسماء
جناح امجكو دى جلابية السادة الانصار كان بلبسوها للجهاد وميزتها انها تلبس بالجهتين وليس بها جيوب حتي لاتشغل لابسها فى النفرة للقتال فى البحث عن الاتجاه الصحيح اوتقع منها قروش
اقترح تعتذرى لانصار الامام المهدى قبل ان تشب ليك فى رقبتك واحدة من بنات الامام الصادق ( رباح او ام سلمة ) ويوروك المكشن بلا بصل
افو افو بت الجنيد بخوفوها بى بنات الامام ومكشنن دا بعملنه مع الحكومة حتى يكبرن النصيب من الكيكة للامام وبت الجنيد دايرة الكيك كلها لى ناسا التعبانيين الغلبانيين
بت الجنيد ادى الامام والسيد فلعة فلعة
اللهم يا واحد يا أحد ، يا فرد يا صمد ، يا جبار السماوات و الأرض ،ياحكم ياعدل ، يا سميع يا مجيب ، تسمع دعوة أسماء الجنيد وتشف صدور قوم مؤمنين وشعب صابر فاض به الكيل، وأعوزته الحيلة ولم يبق أمامه الا الدعاء .. فاكثروا من الدعاء عسى أن يرفع عنا البلاء
تسلمى اختى بت الجنيد جلابية جناح ام جكو حسب علمى خاصة الانصار وظهرت تحديدا فى عهد الخليفة بس تفسرى والولدة دا ما كنت عارفاه لكن غالبا ما يكون حقيقة لانو فى ذاك العهد اشتهر بحكم اب تكو يعنى كل حاجة بتدخل جلابية جناح ام جكو ام تفسير الاخ الطاهر ممكن يكون صح ولكن التفسير الاول هو الارجح
واحد ساتر وواحد احسن منو تمشي امفكو l اقتباس من المقال
بس فى حزب اسمه حزب أم فكوا
اسماء بنت الجنيد .
جناح امجكو فعلا هي الجلابية الانصارية وهي زي المجاهدين في زمن المهدية الاولي فهي ليست بها جيوب وتلبس من الاتجاهين لسرعة ارتدائها ، ونظرا لان المجاهدين وقتها فقراء و زاهدين فهي اقتصادية و لاتهتري من الجانبين بسهولة بسبب كثرةالجلوس في حلقات الذكر و ركوب الخيل .
وبما أن الانصار الحاليين يحاولون التشبه بالسابقين فلقد تم عمل جيوب لها وتم تطويلها ،فقط احتفظت من النسخة القديمة باستخدامها من الاتجاهين .
ولقد اضحكني تعليق احد الاشخاص في موقع اخر قال لو سيدنا يوسف عليه السلام كان لابس انصارية عندما قد قميصه كان شرب مقلب عينة .
اما ( العلي الله ) فهذه زي شباب الامام في نسخة المهدية الثانية اي مهدية الاربعينيات و الانصار الحاليين ناس الجهاد المدني .
و الله اعلم .
يا أخوانا ما تلخبطواساي…. الأستاذة سألت عن حاجة وجاتا إجابة معينة وقالتا ليكم وما في داعلي تلخبطوا الكيمان، و (أم جكو) دي طيرة عدييل كدة وشبهوا بيها الخرقة دي … يعني ما أنصار ولا حاجة… إمكن جلابية الأنصار برضها بيقولوا ليها كدة ما الحكاية بس تشبيه فجلابية الأنصار أسماها كتيرة على الله، المقلوبة، تلبس تلبس (يعني تخش فيها بأي اتجاه)
تسلمي بت الجنيد
يا خونا محمد – اصلا ما سمعنا اسمها تلبس تلبس الا عندك انت .
وبعدين ياخي دي زي ما قلت خرقة يسموها زي ما يسموها ، بس انت مالك مورم قلبك وزعلان .
والله عالم عجيبة . بعدين تلوم في الجماعة وانت برضو جيت تعجن وتعوس و تجيب ليك اسماء من خلفيتك .
بعدين خليك في موضوع المقال الاصلي .