الفنان القديرة عمسيب: المسرح اليوم أصبح تجاريا وأي زول يمكن يمثل
الفنانة القدير فائزة عمسيب من أمهات المسرح السوداني اللائي عملن من أجل أن تسمو قيم الفن ، لها الباع الكبير في عكس صورة السودان وإرثه الثقافي في الكثير من المحافل ، إستطاعت أن تسطر نجوميتها بأحرف من ذهب في سماء الفن السوداني شقت طريقها إلى رحاب الشهرة من خلال عملها المتقن وأدائها الرائع ومن خلال تقديمها للكثير من الأعمال الدرامية إبتداء من حصان البياحة ، فهي رقم لايمكن تجاوزه في مسيرة الدراما السودانية ، فرضت وجودها من خلال أعمالها على ذهن المتلقى لتكون حضورا أنيقا في الذاكرة الجمعية لإنسان السودان ، الرأي العام إلتقت معها في حوار خفيف قلبت معها الكثير من الجوانب .
حوار: مجاهد باسان
المبدعة فايزة في غنى عن التعريف لكن نود أن يعرفك جيل اليوم؟
أنا فايزة بت عمسيب من رفاعة حيث المنشاء إنتقلت إلى الكثير من ولايات السودان وأستقر بي المقام في أم درمان التي إحتضنتنى إلى اللحظة كنت معلمة في التدريس بالإضافة إلى نشاطي الخاص وهو الدراما والأعمال الفنية الأخرى .
العمل الدرامي هل أثر على علاقتك بالمجتمع؟
علاقتي الإجتماعية لم تتاثر بأي نشاط كما أنها واسعة جدا ولم تنحصر على المجتمع الفني بل بحكم عملي في التدريس أيضا ولدي علاقات كثير في الريف والمدينة ، كما أنني قبل الظهور في التلفزيون وبعده ما تأثرت علاقتي بالناس بل إزدادت ، وأنا بيتي فاتح لكل الناس ونحنا السودانين عندنا البساطه والزول لو ظهر أو بقى مسؤول علاقتو الإجتماعية مابتنهار نهائي وده ديدن كل السودانيين .
موقف طريف يتردد في ذاكرتك؟
لدي الكثير من المواقف التي مرت بي فالبعض يقول لي انتي مافيزه عمسيب انتي بتشبهيها ساي وانا دايما لامن أكون عندي بروفه بقوم أندمج مع النص وبكون بقلد فيهو في الشارع لانو البيت كان قريب من مكان الشغل وبعمل حركات النص والكلام وانا ماشه في الشارع والناس دايما كانت بتخاف مني بقولوا علي مجنونه وأذكر أنو في نسوان جرن مني .
مالذي دفعك للدخول لأبواب الدراما؟
الدراما دي أن دخلتها عن طريق الصدفة كنت في التدريب العسكري ايام نميري مالدفاع الشعبي في الفرقة الرابعة ومن خلال معرفتي بناس التلفزيون ومعاشرتهم لينا إكتشف الأستاذ محجوب الحارث إني حقو أدخل التمثيل لأنو عندي الموهبة ومن اليوم داك انا مشيت في التمثيل ، فالأستاذ هو ابونا ومعلمنا ويرجع ليهو الفضل ، وكان أول عمل درامي أنا قمته بيهو كان حصان البياحة مع فرقة أضواء المسرح الذين إحتضنوني.
شخصيات تأثرت بها في العمل الدرامي؟
مافي شخصية إتأثرت بيها من خلال العمل في مجال الدراما.
هل تجربتك مع ممثليين مصريين غيرت شئ في طريقة عملك في المسرح؟
العمل مع الممثلين المصريين جعلني اتغير في طريقة تعاملي فالإنضباط في العمل كان له الاثر الكبير ، لذلك عندما رجعت كنت بتضايق من التسيب والإهمال وعدم الإهتمام من الممثلين السودانيين لكن مع طول المده الواحد بيتعود على الوضع لأن المصريين عندهم إنضباط وإلتزام في عملهم وده سبب نجاحهم وإهتمامهم أدهشني وحرصهم الشديد جعلني اتحسر.
المسرح السوداني اليوم؟
المسرح زمان كان كل منا يعلم متى يحين وقته ومتى ينتهي لأن الدولة كانت تدعمه وترعاه في كل المناحي لكن اليوم أصبح المسرح تجاري واي زول ممكن يمثل الدور وبي اقل قروش ، ففي زمنا كان المنتج يأتي بممثل وليس زول ساي ليؤدي الدور كما أن هنالك لجنة تدرس النصوص وتوزع الادوار ، فالمسرح اليوم أصبح هابط والهدف منه كسب تجاري وليس معنويا والدولة اهملت الجانب ده عشان كده إنتهى دور المسرح السوداني .
نصيحة لمن تقدميها؟
نصيحتي للدوله ماللمسرح السوداني على الدولة أن تنتبه للمسرح فبيئة المسرح ليست مهيئة بالصورة التي ترتقي للتمثيل كما أن على الدول أن تستفيد من الخريجين وتوظفهم في كل ولايات السودان فالولايات لديها موروثها الثقافي والإجتماعي البيدعم المسرح بدل من أن يكونوا عاطلين عن العمل ، وأن لاتوظف للمسرح أناس برواتب من وزارة الثقافة لايهمهم أمره.
الممثل السوداني هل وجد مايتمنى؟
الممثل السوداني مظلوم بالرغم من عملو وجهده ومثابرته لايجد حقه كاملا ، فهنالك ممثلين شهرتهم تملاء السودان والله تخجل من مرتباتهم البدوهم ليها ، الدولة مفروض تجعل معاش للمثلين وأنا أقول ليك حاجه في العراق لامن مشيت سنة 88 قريت فيها مقوله لي صدام حسين الله يرحمو بتقول ( البلد التي ليس بها فنانين كبار لايوجد فيها سياسيين كبار ) .
الراي العام
الاستاذة القديره فائزه عمسيب حفظك الله ارجو ان تسمحى لى بالاجابه على السؤال الاخير .الذله والاهانه الشوفناها من حكومة الانقاذ ماسبقتها عليها حكومه سودانيه.
يا حجة فائزة هو المسرح براه البقى هملة ما أي حاجة في البلد بقت أكثر من هاملة . بلد وزير داخليتها أريتري وفيها وزير مشي بقى وزير في مالي ولا وين في غرب أفريقيا ما عارف ، تتوقعي فيها شنو . ده يا حاجة آخر الزمن