هل ح يجي يوم ؟ا
ساخر سبيل
هل ح يجي يوم ؟
الفاتح يوسف جبرا
* خريج يتوظف وبعد 30 سنة يقدر يتزوج؟
* تنعدم (الحفر) من شوارعنا الرئيسة؟
* يجى الخريف (ما فجأتن)؟
* يصبح التعليم مجانن وكمان العلاج؟
* تغطى أموال الزكاة كافة الفقراء والمساكين ؟
* يعود الناس تااااني لأكل 3 وجبات و(بعدهم تحلية كمان)
* طياراتنا تقوم في مواعيدا؟
* المغترب يكون راضى عما تقدمه له الدولة ؟
* يحترف أحد لاعبينا في نادى أوروبي (إن شاء الله درجة عاشرة)
* تعمل مخالفة يستوقفك رجل المرور ويقول ليك : دى آخر مرة تاني ما تعمل كده !!
* يطلب رئيس نادي كرة إخراج لاعب من المباراة وتبديله بآخر ويقوم المدرب يرفض؟
* تتم إجازة زيادة اسعار السلع الضرورية ويقوم أعضاء البرلمان (ما) ح يصفقوا؟
* تسأل مسئول متزوج أربعة كيف يستطيع أن يصرف علي (الكلام ده) ويقدر يجاوبك؟
* يرتفع سعر سلعة وتنزل تااانى لسعرها الأولاني؟
* المعارضة تكون أحسن من الحكومة؟ أو الحكومة تكون أحسن من المعارضة ؟
* ح يجى يوم ناكل مما نزرع؟ و نلبس مما نصنع؟
* تحل باصات الوالي أزمة المواصلات؟
* يصمد المرتب حتى يوم 15 في الشهر؟
* يؤثر استخراج البترول علي حياة المواطن ومعاشهم ؟
* ديناصورات السياسة يدو (الشباب) فرصة؟
* يقدم مسئول إلي المحاكمة في قضية فساد؟
* يكون أورنيك 15 هو الأورنيك الوحيد في تحصيل رسوم الدولة؟
* تختفي الجبابات علي الشوارع السفرية؟
* تكون عندنا سكة حديد وقطارات زينا وزى باقي خلق الله؟
* لا ينتقل وزير من وزارة إلي آخرى (مترقياً) ؟
* قروش (المعاش) تغطى مصاريف 5 يوم (للمعاشيين)؟
* تعود للغناء عافيته ونستمع إلى ما يشابه (ضنين الوعد) و(الوكر المهجور)؟
* تكون لدينا شبكة مواصلات داخلية مريحة؟
* يكون جمع ونقل النفايات مسئولية الدولة وليس المواطن؟
* يختفي المتسولون من أمام شارات المرور والصيدليات؟
* نتداول السلطة سلميا بواسطة صناديق الإقتراع؟
* يتفق الناس علي رؤية هلال شوال؟
* يمتطي المسئولون عربات (ما موديل السنة) !
* تسند إدارة أنديتنا لي زول مخو مليان و(جيبو فاضي)؟
* تستبدل قطع رقعة الشطرنج بقطع (جديدة) ؟
* يرجع حجاجنا وهو يلهثون بالشكر (لبعثة الحج) لأنها ما قصرت !
* ياتي العام الدراسي والمدارس مصانة والأستاذ متوفر والكتاب والكراسي (موجوده) !
* نقدر نحدد نحنا بلد صناعي وللا زراعى وللا بترولي؟
* تقوم في الخرطوم شبكة صرف صحى زينا زى باقي عواصم الدنيا !
* يكتفي المسئولون بوظيفة واحده ويخلوا حكاية (عضوية مجالس الإدارات) والشنو ما بعرف !
كسرة :
ما ظنيت !!
هل ح يجى يوم
نسمع فيهو الشعب يريد إسقاط النظام؟؟
يكون فى العاصمة شبكة مترو زى دبى ..بدل بصات ود الخدر؟؟
يكون الموية والكهرباء من الخدمات الأساسية المجانية؟؟
ننتج التفاح والعنب والكمثرى والفراولة والتين والزيتون ..بدل الدوم والنبق واللالوب؟
تمتلك سودانيرأسطول من الجامبو والإيرباص أسوة بشكات الطيران العالمية؟
نشوف فيهو كل الإتمنيناهو ده قبل مانروح فى ستين داهية؟
أكيد نايم وحلمان … ويمكن المدام جات صحتك وقالت يا راجل ما ماشي الشغل ؟
وقطعت عليك باقي سلسلة ( الامنيات) والتي ربما كنت ستكتبها حتي صباح اليوم التالى…. والله يهون القواسي ويحقق الأح…………….لام
انت بتحلم يا جبرا ديل احسن منها العنقاء والغول والمدينة الفاضلة
لو طال الزمن او قصر اليوم البنقلع فيهو الحراميه ديل جااااااااااى . لكن المشكله فى ديناصورات المُعارضه ديل ؟
ما ظنيت … طالما الجماعة قاعدين
تقيف في الاستوب و ما يجيك بياع مناديل ثم بياع الاسكراتشات ثم بيع الولاعات ثم بياع السكاكين ثم بياع الطائرات الورقية ثم بياع لعب الاطفال ثم بياع العنب المستورد ثم بياع عدة الميكانيكا ثم بياع عدة الحلاقة ثم ثم يدي تعبت من الكتابة
يا خي
ظناً زي ده ماتظنو
أن يعامل المغتربون العائدون لأرض الوطن في الموانيء والمطارات ، معاملة كريمة بأدب وأحترام لانهم كانوا ولازالوا البقرة الحلوب ، التي سندت الأقتصاد السوداني وحافظت على توازن المجتمع بالمساعدات الهائلة التي قــدمها ويقدمها لكل مغترب على الأقل لعشيرته الأقربين ، ناهيك عن المساهمة في بناء المدارس والمراكز الصحية ، والتبرعات التي يقومون بها للجماعات والأفراد ( كسيارات الأسعاف ) و( خزانات المياه بالمستشفيات وووووألخ
أننا نحلم بهـذا اليوم ، ، ولن يأتي هـذا اليوم الأ أذا ذهب هؤلاء ( المكنكشون ) في السلطة كأنها ورث أبائهم ،، ولن ينصلح حال السودان عموما الأ برحيل هؤلاء المجرمين الحرامية وذلك سوف يحــدث لأنه للصبر حــدود وصبر الشعب السوداني قــد نفـــد … ياهوي
جاكم بلا ياجبهجية يا حراميه
00000واصل الحلم
بعد كدا ما فضل لينا الا ح يجى يوم الجار ما يعرف اسم جارو والاخ مايعرف اخاه….ومن ثم يفر المرء من اخيه …وامه وابيه وصاحبته و بنيه :mad: :mad: :mad: :mad: :mad: :mad: :mad: :mad: :mad: :mad: :mad: :mad: :mad:
دخلت نملة وشالت حبة………..وعيك النمل زاتو تعب
كلامك ده يا جبرا ممكن يحصل في حالتين اتنين ….
يا في حلم يا في فيلم ………..
انت قبيلتك شنو …. اذا طلعت من نفس قبيلة السائل اتوظفت ….. هذا هو السودان …وا اسفاى
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه لو الاماني بايدي كنت …………
:
:
:
:
:
:
:
:
كنت ….كنت ….. ادخلت عمر البشير وزمرته جحر ضب !!!!!!!!!!!
مابين زمنا متمنيهو وزمنا زادنى اسية
الجنة ام نعيم الجنة ام قصر يا عم عبد الرحيم الا ورا القبر :eek: :eek: :eek:
يا فاتح يا جبره يظهر عليك انت زهجت مننا يا أخي ده كلام تقولو .طبعا حيجي اذا كلنا انتقلنا الى مقابر البكري او الحاج يوسف وقابلنا اهلنا الزمان العايشين وما زالوا في ذلك الحا يجي .
والله شيء عجيب قال يصمد المرتب حتى يوم 15 قال ( ان صمد وقعد انا يصمدني الوجع يا جبررررررررررررررررررررا.
حلم الجعان عيش هههههههههه خليهو ياعديله النمه دى بتريحوا شيه(عدليه دى مرت استاذنا الفاتح جبره )
يا أبو أمين …والله مشتاقين …ما شفتا مقالات شريفة شرف الدين ؟.بالله عَرٍج
من صفحتك ولي الله .. وبضيف نتمني يجي يوم وما يكذب زول باسم الدين
وده متين ياخاااااااااااااااااااااااااااااااااااااااال يوم 32\13\20100
وهكذا بلغ بنا الحال
اصبحت المطالبة بالحد الادني من سبل العيش شبه الكريم
اضغاث احلام واماني واحلام يغظة
شدة ما تعود الناس على العيش في الدرك الاسفل من الحياة اصبح مثل هذا الكلام
منتهى الرفاهية وقوة العين , قال: (ضحكولو دخل بي حمارو)