غندور يلتقي في نيويورك بأسرة الطفل السوداني مخترع الساعة

و الله حاجة مضحكة هذه الفقرة(من جانبها شكرت أسرة الطفل السيد الوزير علي الدعوة واللقاء وعبرت عن تقديرها لاهتمام الدولة ورعايتها للمبدعين والمتفوقين) مبدعيين يعنى زى ناس ندى القلعة و حرم النور و طه سليمان و الفحيل..اما متفوقين زى ناس صافات و جياد …و انتو ما سألتو ابوهو ساب بلد الرعاية و الاهتمام بالابداع و عاش فى الغربة و الملطشة و حيث يحس الانسان بانحطاط انسانيته …و هو الامريكان اتقدموا ليه؟مش لانهم ما بكذبو و لا يجاملو و انشاء الله تكونوا اشتريتو ليهم بيت هدية و لا شفر 6 سلندر..

من جانبها شكرت أسرة الطفل السيد الوزير علي الدعوة واللقاء وعبرت عن تقديرها لاهتمام الدولة ورعايتها للمبدعين والمتفوقين .الناس ديل معقوله قاصدين السودان

اجمل حاجه زول شغال بيه مافي،عارفنه وهم ساكت.

الساعه تم اختراعه منذ قرنين من عمر الزمان

حلبى لاقى حلبى متورك ،وكوز إنتخابات الخج لاقى الكوز النقيب الدائم لعمال السودان ،أبرد يامجنون ستلقى الأجن منك ،،،

والله ناس سونا ديل مابيخافوا الله

لو قامت ثورة أول ناس مفروض يتجلدوا في ميدان عام

بعد ان قابله غندور والله تاني (كتينة) ما يخترعها.. هؤلاء القوم شؤم.. لأن الظلم شؤم مؤذن بخراب العمران كما قال بن خلدون في (الفصل الثالث والأربعون تحت عنوان “الظلم مؤذن بخراب العمران”.

وغندور لا يمثل السودان وانما يمثل المؤتمر الوطني والحزب الحاكم والمؤتمر الوطني هو الوجه الأخر للحركة الإسلامية السودانية بقيادة الزبير حسن احمد الذي وصفه الكاتب اسحق فضل الله بأنه ضعيف … والزبير احمد حسن هو الامين العام للحركة الاسلامية – فرع التنظيم الدولي للأخوان المسلمين – وزوجته وزيرة التربية والتعليم التي قدمت استقالة مشروطة عقب فضيحة مدرسة الريان بالدخينات ثم رفضت الأستقالة وفي مؤتمرها الصحفي الاخير عندما فاجئها الصحفيين بسؤال الإستقالة رفضت بحدة الاجابة على هذا السؤال وقالت (من عنده سؤال غير هذا فلسيئل عنه)

اللهم احفظنا من شر الاشرار وكيد الفجار الماكرين بالليل والنهار اللهم عليك بكل من تثعلب على الشعب وظن المكر ذكاءاً وفطنة

أي دولة تقصدوا يا أسرة؟

قبل عامين قابلني طالب من جامعة المستقبل بالخرطوم و معه تصميم جهاز تحديد مدى الرؤية باستخدام الخلايا الكهروضوئية. و يمكن تطوير الجهاز لقياس مدى الرؤية رقميا بدلا عن التقدير بالنظر كما هو الحال الان. وجهته لعرض الفكرة للارصاد الجوية و الطيران المدني. هاتفني بعد اسبوعين و قال لي انهم اصابوه بالاحباط.
قبل عدة سنوات قام طالب بدراسة اثر الطيران على مكونات طبقات الجو العليا. استخدم بيانات من مواقع عالمية لشهر سبتمبر٢٠٠١ لان الادارة الامريكية اوقفت الطيران بعيد حادث ١١ سبتمبر. و حصل الطالب على نتائج جيدة. الان هذا الطالب في دولة الجنوب.
خلاصة الامر المواهب موجودة فقط وفروا لهم البيئة الصالحة كما وجدها احمد في بلاد المهجر.

طيب في السودان في مائة الف مبدع طيب ليه الدولة ما قاعده تهتمه بي الموضوع ده . انا ما حاقلل من شأن احمد و ما شاء الله علية شاب ذكي وانسان عندو مستقبل . بس دي حركة من حكومة السودان عشان تعمل لي نفسها دعاية و بعدين هذا المخترع الصغير مدعوم من البيت الابيض و ابوباما شخصيا يعني يا حكومة السودان ما محتاج ليكم في حاجه. و لك التوفيق ايوها المخترع الصغير.

صراحه الصوره تتكلم واعتقد ان فى جعبتها الكثير من التعبير , صراحه وروه الكحل النمله منو ” طناش بمعنى ” لكن برضو اعتقد انه جاء داخل ايد وراء وايد قدام ياكافى البلاء لاهديه لا لابتوب لامفتاح عربيه لا بوكيه بتاع ورد ,عشان كده رفعوا منه القزاز وهاك يا واتس وهاك يا العاب نظام BUSY وكده ,انا غايتو ابكدوك لو مشيت بيت ناس ولقيت شفعم طبقوا فينى الفيلم ده ونستى ما بكملا بمرق طوالى لكن المشكله الناس دى جلدا تخين ياخ لكن الاب بصراحه مفتح اظن هو المخرج بتاع الفيلم ده تفتيحه لكن ياود الصوفى اتعلمت من اولاد العم سام برضو ..

” بتخطوا نفسكم فى مواقف بايخااااا ” .

والله فضيحة لكن الاختشوا ماتوا

الجانبين (الوزير والعائلة) كل واحد بضحك على التانى بالكلام الفارغ القالوهو دة , و الإتنين بضحكو على عقل المواطن من دون أى حياء ,

الوزير:(اكد دعمه لمشروعاته المستقبلية ورعاية ابداعه.) ,
والعائلة:(عبرت عن تقديرها لاهتمام الدولة ورعايتها للمبدعين والمتفوقين ) ,

و دُقى يا مزيكا و رأصنى يا قدع ..
——————————–
و يا ناس الراكوبة دة خبر شنو دة ال متحزمين و جايبنه لينا ؟؟
هل إنتهت أخبار العالم و نضبت ؟؟
لو كان جبتو خبر سقوط المطر كان أرحم من هذا ال شيئ الذى لا معنى له .

الراعي الأمين بالسعودية ذهب مصطفي عثمان خصيصا لتهنئته يعني ركب طياره وأستقبال من طاقم السفارة بالمطار وبعد كده مصطفي عثمان قدم درع من الخشب للراعي … يعني بالله عليكم عشان تعرفو ناس الحكومة ديه ما يتصدروا الأ علي الهايفة ، يعني كلفة مصطفي عثمان ديه كانت تفطر مدارس ولاية الخرطوم شهر ….

ثانيا غندور يطلب يقابل الطفل المبدع لسوداني الأمريكي يعني لو ما كان الرئيس أوباما أهتم بهذا الطفل المبدع والله لا البشير ولا غندور ما كانوا جابو خبره بس للأسف ناس المؤتمر الوطني والحكومة ما هم الأ منافقين وذي ما ذكرت سابقا يتصدروا الهايفة ..

في السودان عندنا مبدعين …. الشاب الذي أجتهد في أن يجعل تراكتور يعمل عن طريق الابتوب وبدون سائق …… شباب السينما الذين يقومون بعمل أفلام بواسطة كميرات الموبايل …… شباب مشروعي الذي كان علي الفضائية النيل الأزرق ..

لماذا لا يشييد بهم البشير أو غندور ليمدوا لهم يد العون ويشجعوهم علي مجهوداتهم هذه ، ومع أحترامنا لأبننا أحمد مخترع الساعة ، الفضل يعود الي مدرسته التي أبلغت علي أنها قنبلة في بدايت الأمر …..

بالله عليكم يا حكومة السجم والرماد مدوا يدكم لشبابنا قبل أن تفقدو ما تبقي منهم والأ عرقنا يمشي لغيرنا ….

خير ما فعل هذا تقدير لنابغة سودانى بالصرف النظر عن بعض الاراء التى لا تقلل من هيبة وعظمة وزير الخارجية الى اسرة نابغة سودانى

الملاحظ في الصورة ان الاولاد لا يعيرون غندور بالا ولا كأنه موجود ، حيث انهم مهتمون بالموبايل اكثر من غندور . هم في قرارة انفسهم واثقون بأنه لا يودي ولا يجيب. او انهم ليسوا من صنفه

وشابكننا ان السويسريين هم من اخترعوا الساعات واتارى الاخترعها طفل سودانى؟؟؟
غايتو الخواجات ديل كضابين جنس كضب؟؟؟
هسع تلقى الاخترع القطار مش جورج اتيفنسن تلقاه واحد سودانى وكمان الاخترع القنبلة الذرية والهيدروجينية برضه واحد سودانى بس الاعلام ساكت اتجاهلهم!!!
كسرة:لو ما اتقبض على الطفل احمد وعومل معاملة سيئة كان الموضوع ده مر مرور الكرام وانا اتذكر واحد زميلنا فى كسلا الثانوية اسمه فتحى القدال عمل اذاعة محلية لكسلا الثانوية فى نهاية الستينات وفى كلية البيطرة عمل بقرة ميكانيكية تشبه البقرة الطبيعية(حتى النميرى قال ليه ح نوديك اليابان لتتعلم الالكترونيات) ومافى زول جاب خبره تانى وبرضه عمل جيتار كهربائى وهو طالب فى الثانوية!!!!هاكم الساعة دى!!!
كسرة اخيرة:هذا ليس تقليل من شان الطفل احمد الذى يبدو عنده موهبة الاختراعات ولكن اعتقاله هو العمل الهيلمانة دى!!هل هو اعادة اختراع العجلة؟؟؟؟

بروف: ماعارف منهجية الاختراع كيفن

ولو كان بيدرس فى جامعة الخرطوم دى كارث من كوارث الخرطوم بعد كارثة سياسينها مابعد السودنة