العَجِين المُر..شعر : هاشم صديق
العَجِين المُر
شعر : هاشم صديق
سَكّيتى
السحابة السمرا
من قيسان
ولي قِبلة
سما أمدرمان .
………..
يوم الجمعة
صلّينا
دعينا المطرة
شان تنزل
جات المطرة
بالبمبان .
……….
اتحرّينا لي رؤية
شهر رمضان
اتفاجئنا بي رمضان
كان حاضر .
مَرّ الحول
وما فاتنا
كان واقف
وكان حارِن
تقول حردان .
…………
تمام حولاً
ونحنا تملّي
ناس صايمين
وماعارفين .
ما حللنا صوم
بي تمرة
ما بلّينا بي حلومر
حلق نشفان .
…………
شن الصوم
وشن الرؤية
يا ( عشمانة )
كان عزّ القِرِش
في اءلايد
واتقدّد
جِلِد جُزلان ؟!
…………
لا زِرّيعه
لي الآبري
لا عجالي
لي شرموط
لا ( تيبار )
عجيناً مٌر
ولا في عصيدة
بي ملاحاً
لذيذ ويسُر
……….
لا في بليلة
في حلة
ولا تمراً كُبار
في كورة
يتبلا.
……..
لا فحماً
ولا ملحاً
ولا قِرشاً
يجيب شيتاً
من الدكان .
……….
اتشققنا
لّما نشفنا
واتقلّينا
لما نجِضنا
واتفتفتنا
لما كملنا
وأسيادنا السُمان
(كيزان ) .
……….
قرصنا الجوع
مرقنا هتفنا
ضد والينا
ضد خانقنا
ضد كاتلنا
كان صوت
الوجع عالي
وكان نقحي الجروح
مسموع
ضحكوا علينا
ناس ( كاكوما )
و ( ود برهوما )
قالوا علينا
أحسن لينا
( لحس الكوع )
سبحان الخلق
أشتات
ديل ناس الشرف
ناصل
وناس أصل الخجل
مجدوع .
………..
صعاليك البلد
حاكمين
أشراف الوطن
صاغرين
يمرقوا غلابة
للبمبان
وتتكندك
سما أمدرمان
والفراجة
و (المهراجا )
بس لابدين .
………..
سمح والِينا
لما يفور
ولما يثور
علي منصة
ويهز الايد
كمان تجديد
في أصل
( العرضة )
والرقصة
يهيج فينا
وكمان يدينا
كم حصة
عشان كوركنا
من جوعنا
كسرنا الخوفة
والرصة
طلعنا هتفنا
مرقنا دفرنا
زي سيلاً نتر
دفَاق
و بقينا وصرنا
عند الوالي
متآمرين
كمان شماسة
ضد الدِين
وناس عُملا
و( شذاذ آفاق ).
………..
مسكينة يا عشمانة
قالوا تقاطعي
حسه اللحمة
كان حمرا
وكان بيضا
تحاربي طماطمة
حُمرة عين
وتبعدي من البيض
حت ءان بيضة
أو بيضتين
دحين
قبال كلامهم ده
كنتي مقاطعة
اسرائيل
أو الكفار ؟
كنتي بتاكلي
يا عشمانة
ديمة سخينة
أو كافيار ؟!
………
مسكينة
يا عشمانة
يا حيرانه
جاتك حسه
نار كُربه .
حتي الكهربا
شوف عينيك
سماع اضنيك
جن ضَرَبا
ووقدت نار
كمان قَدَلَت
رافعة النخرة
واتنفَشَت
تقول سد مروي
ءاتْلبّش
بجن حبشي
ونازل ظار
………….
شنو الخلوهو
ما زادوهو ؟
غير نَقَص العُمر
والحيل
شنو السابوهو
ما قطعوهو
كان حتي الوطن
قصوهو
من مليون
صبح كم ميل ؟!!
………
( وا أسفاك (1)
يا عشمانه
من ناس ديك
و ( وآ أسفاي
من ناس
ديل )
ناس ( المؤمن
الطعّان
والفاحش
واللّعان )
تقول ( القُدوة )
ما كانت
( رسول الله )
ولا المسلم
لسانو تُقَا
وحديثو نبيل .
……….
ديل يا زولة
ما قارين
صِحاف خُلفا
ولا عارفين
منو ( العُمَرين )
ولا دارين
شنو ( الأخلاق )
ووين ( موقع )
شتايم الوالي
عندالله
كان الشعب
شحادين
وكوم عُملا
و ( شذاذ آفاق )
والبهتف
في وش الوالي
كان تَشّاهو
جمر الجوع
أحسن ليهو
( لحس الكوع )
وبكون ( مدفوع )
وزول عولاق
………….
يا عشمانه
( رغم السيف )
ورغم القيد
راية العزّه
ما بتندّلا
تظل مرفوعة
زي رأس
الوقف جبار
ولمس النار
ما رمّش
ولا اتذلاّ
…………
وكان ألفين
ورا الأسوار
هناك ثوار
بجيبو التار
ويقولوا ( نعم )
لكلمة ( لا ) .
…………
بكره قريبه
يا عشمانه
نتماسك
نقيف في وش
لصوص الدين
ربيعنا العربي
ما مخنوق
ولا مسروق
ولا تلجين
ولا تلحين
ربيعنا العربي
من ابداع
شباب مغبون
حمم طالع
جحيم فارع
من بركان
غضب مجنون
……….
نشوف بكره
منو البلحس
عديل الكوع
ومنو الواقف
وراس مرفوع
……….
منو الشعب
الهتف طالع
ملا الآفاق
منو الخايين
منو الخايبين
ومعروفين
( شذاذ آفاق )
التحية للأستازالكبير هاشم صديق و ربنا يديك العافية و جعلك دوما زخرا للبلد…؟؟..و نبراسا للمناضلين…!!
ابداع والله يا استاذ ربنا يعطيك العافية..
لا فض فوك يا شاعر الوطن الحبيب
دى لوقعد ليها ود الامين لحنها ,, بيقى الكلام تانى
مافي كلام إبداع ولو قرولك ديل ببولوا عديل
ابداع هاشم صديق // في رأي المتواضع من أفضل القصائد التي تفضح الانقاذ وتصف حالنا المحتار ،،،
ربنا يديك الصحة والعافيه استاذنا
يظل وجود القنوات الفضائية الحرة شرط مهم جدا لنجاح اى ثورة قادمة
وغيابها يوضح مدى ضعف معارضتنا وغياب الرؤية فى اسقاط النظام المجرم
فهب ان هذه القصيدة القيت بصوت جهورى بمعدل 3مرات فى اليوم ما الاثر الذى تحدثه فى عامة الشعب
الاعلام الحكومى يصور للناس ان عمر المجرم الكضاب هو عمر بن الخطاب
ولابد من عمل ثورى يدحض ويعرى كذبهم
انا عن نفسى عندما اغيب عن صفحات الراكوبة احس بااننى قد تصالحت مع الواقع النتن
أرحتنابهايا هاشم
سلمت يداك وسلم يراعك يا استاذ هاشم لك التحية ايها الكبير لا تحزن ايها الحبيب ان الشباب السودانى سوف يجعلونك تسطر ملحمة اخرى بنضالهم وتضحياتهم التحية لجماهير شعبنا وهى تتأهب لمنازلة النظام الفاسد وركله الى مزبلة التاريخ
ياسلااااام ….قمة فة الروعه.. ماقادر اتخيل البشيكر ح يكون حالو كيف لمن يقرا قصيدة حال السودان دى
ابداع والله العظيم ما ابداع يا ود الصديق , ربنا يديك طولة العمر يارب ,,,
شكرا يا استاز ابدعت والله الله يديك الصحة و العافية.
في قلب الفيس وعبر النت كلام اتقال عن سجمانه ساجنه الجوه هالعه البره اياديك طرد الدينكا زاد السوق ده كم مليون ولما عدمنا حق الكيس ذاد سعر الشرف ……… اكان من بدري كلنا لا كان الليله ماف مغبون ولا داين ولا مديون ولادعوات تتضارينا ولسه ضرانا بي رقرقو فاجي عيون