ان شاء الله البشير ده …
ان شاء الله البشير ده …
شوقي بدري
[email][email protected][/email]
قبل سته سنوات كتبت وابديت تأييدى بقرار محاكمة البشير وتدخل الامم المتحده فى دارفور . ووجدت الهجوم والسخريه والاستخفاف . ووصف وزير خارجية الانقاذ الزعيميين الدينييين بأنهم سجمانين . ولا اذكر اذا اضاف رمدانين ام توقف فى السجم . وبالرغم من هذا ابناء السيدين فى دحلوب الحكومه .
الآن عندما يتباكى الناس ، ويعلن حتى البشير ان الخماره انكسرت والعجين ببح ، لا يزال بعض زعمائنا عصايا نايمه وعصايا قايمه . لقد تألمنا لزياره نقد رحمة الله عليه لشيخ ابليس ( الترابى ) والآن نسمع بسكرتير الحزب الشيوعى الجديد يقول بانه لن يرحب بالثوار اذا دخلوا الخرطوم عن طريق الحرب . ما عارف ده حزب شيوعى ولا نادى كورشى وقضبه . رحم الله الثوره . يعنى البشير ده يعمل ليكم شنو بعد ده ؟ .
بعد كل جرائم البشير سمعنا زعيم سياسى يقول .. البشير جلدنا وما بنجر فيهو الشوك .. محن …. محن . وسمعنا اسقاط البشير سيجعل الدماء تسيل .. مش عارف البتسيل فى جباال النوبه وفى النيل الازرق دى دماء ولا دمعة الشوق .
بعد ايام الاستالينيه تبقى بعض رؤساء شرق اوربا من الاستالنيين ، منهم كادار فى المجر ، وقومولكا فى بولندا ، وانطونين نوفطنى فى تشسلوفاكيا . وكان الشعب الشيكى قد تعود على الوقوف فى الطوابير . وحتى جريده براغ المساء كان الناس تقف فى طوابير لشرائها . ولم يتحرك الناس . وكان الشارع يردد . ان الجموع اتجهت الى ( هرادشانى ) القصر الرئاسى . وهم يهتفون بحياة الزعيم . وعندما ضاق بهم زرعاً طلب من نائبه ان يطلب منهم ا لانصراف ولكنهم واصلوا الهتاف ، وعندما يئس الزعيم قال لنائبه اطلب منهم ان يقفلوا مؤخرتى . فرجع النائب قائلاً ايها الرفيق ( اونى سي زراجيلي ) اى لقد وقفوا فى طابور . وهذا هو حال الشعب السودانى اليوم .
…………………………………………..
هذا الموضوع كتب من قبل
منقول ……
لاهاى وتدخل جنود الأمم المتحدة
قرأنا فى طفولتنا أن جحا استعار حلّة من جاره . ثم أرجعها له ومعها حلّة صغيرة قائلا : (عندما كانت حلتكم معنا ولدت هذه الحلة الصغيرة .) فأخذ الجار الحلتين وذهب لحاله سعيدا . وبعد مدة استلف جحا الحلة مرة أخرى . وعندما تأخر جحا فى ارجاع الحلة طالب الجار بحلته . فقال جحا ان الحلة ماتت فى النفاس . فسأل الجار ساخرا : (كيف تموت الحلة فى النفاس ؟) فقال جحا : (اذا كانت الحلة تلد , فيمكن أن تموت فى النفاس . )
نحن السودانيون لفترة كنا نحسب أن الأمم المتحدة خلقت لكى نحلبها . ونسبة لالمام السودانيون باللغة الانجليزية قديما , ولأنهم الوحيدون الذين يعرفون المحاسبة وادارة البنوك باللغة الانجليزية , ويمكن بجانب العراقيين ، فلقد وجد السودانيون مناصب عديدة فى التعليم . ومنظمة اليونسكو وكثيرا من منظمات الأمم المتحدة .
أما منظمة الفاو فلقد اعتبرها السودانيون منجم لا ينضب . قاموا بمصها ومضغها وبلعها . ولقد بعث السودان وفدا الى الأمم المتحدة قبل الاستقلال شاكيا الانجليز والمصريين , ووجد دعما من أغلب أعضاء الأمم المتحدة وعلى راسهم أمريكا .
والخطبة العظيمة التى ألقاها محمد أحمد محجوب باسم الدول العربية بعد اجتياح لبنان فى 1956 لا تزال تذكر كأعظم الخطب . وهنالك لوحة فى الأمم المتحدة تشير الى تلك الخطبة .
ورشح السودان المحجوب لسكرتارية الأمم المتحدة . وكاد أن يفوز بها لولا تدخل جون فوستر دالاس وزير خارجية أمريكا . ولقد قال المحجوب لجون فوستر دالاس الذى أبدى أسفه لخسارة المحجوب ما معناه وما أورده المحجوب فى كتابه الديمقراطية فى الميزان , (أفهم أن تناصر المرشح الآخر . ولكن أن تمارس أمريكا الضغط والترغيب للوفود فهذا شيء لن ينساه لكم بلدى) . هل تحاول الانقاذ الآن أن تنتقم للمحجوب ؟ .
وماذا يقصد البروفيسور رئيس المؤتمر الوطنى عندما يقول : (كوفى عنان , أى رجل أنت وأى منظمة تلك ؟) . هل يمكن أن يصدق هذا البروفيسور أن نظامه على حق وأن كل العالم مخطئ ؟ .
عندما قال أحد شيوخ الاسلام فى مصر للسادات : (سأشكوك الى الله .) ابتلع السادات الطعم قائلا : (لا لا تشكونى الى الله , أنا انسان مسلم , وأخشى أن يشكونى أى انسان الى الله) . فقال الشيخ بدهاء : (لماذا تخشى الشكوى الى الله ؟ . هل الله يظلم ؟. ألا يعلم الله كل شيىء ؟ . ) .
لماذا يخشى أهل الانقاذ المحكمة الدولية ؟ . هل هنالك قضاة فى هذا الكوكب أدرى بالقوانين الدولية من قضاة المحكمة الدولية ؟ ولماذا الكلام عن السيادة الآن ؟ . فلقد تقبل رجال الانقاذ الضرب على القفا والجضّيم والاهانة وحظر الطيران فى دارفور وعدم تحريك قوات مسلحة فى ذلك الجزء من السودان . أى أنهم نزعوا سلطة الانقاذ وأهانوا حكومة السودان . ولم يتكلم رجال الانقاذ عن الكرامة السودانية . شيىء غريب والله .
البليونير الألمانى كروب والذى أنتجت مصانعه أغلب آلة الحرب التى استغلها هتلر فى تحطيم العالم , واجه الحكم بالسجن طويل المدى بشجاعة وثبات فى محكمة نورينبيرغ . ولكن عندما ذكر القاضى بأن امبراطوريته الصناعية ستصادر أغمى عليه مباشرة . هذا الحادث يذكرنى بالانقاذ الآن .
لقد أرسل السودان جنودا تحت امرة الأمم المتحدة . وفى أيام الجفاف التى عمت شرق وغرب أفريقيا فى الثمانينات , كان السودان يصرخ ويستنجد بالأمم المتحدة – التى لم تعرف شغلها – وانهالت المليارات على السودان من كل صوب وحدب حتى من خارج الأمم المتحدة . ولقد جمع المغنون 8ر2 مليار دولار . ونذكر ألاغنية :
We are the children
هذه الملياردات لحسها السودانيون وكأنها (مديدة تمر بسمن) . وسمير لسه ماشى . ومال القصور الأتبنت فى التمانينات دى الناس كان وفّرت من حق الفطور ؟ ولا قطعت سيف فى قهوة شديد ؟ ولا لعبت كاشف فى قهوة الحريق غرب البوستة أمدرمان ؟ . ما ضربوا قروش الأمم المتحدة دى شمال ويمين والهسى قالوا عليها كعبة دى . يكفى أن النولون لنقل البضائع من بورتسودان تضاعف ثلاثة مرات فى ظرف شهور . وتكونت شركات مثل ريكال طلب احتكرت نقل البضائع . وباع تجار العيش العيش بأضعاف ثمنه للأمم المتحدة .
وكما عمل المصريون فى التسعينات ذكرنا أرقاما خرافية بخصوص الأرتريين والأثيوبين الذين لجأوا للسودان , وذكر الأمر بتلاتة مليون , اربعة مليون وخمسة مليون فى بعض الأحيان للاجئين فى السودان عامة . وقبضنا الثمن بالرأس . وامتلأت رفوف المتاجر فى السودان بالزيوت واللبن المجفف والمعلبات المخصصة للاجئين . ده كلو من الأمم المتحدة البطالة دى .
وفى التسعينات حدد المصريون بأن عدد اللاجئين السودانيين فى بلدهم خمسة مليون . والله خمسة مليون سودانى ينزلوا القاهرة , بعد سنة المصريين يكونوا بتباطنوا فى العرس . مصر كانت تعطى كل لاجىء مسجل 285 جنيه وتستلم تلتمية جنيه على كل رأس سودانى للأمن والتعليم والصحة . ونحن فى السودان كذلك كنا نقبض على الارتريين . كلو من الامم المتحدة الكعبة دى . الله ينعلها .
أها بعدين بعد الجفاف , جانا الجراد بتذكّروه . أحد أخوانا فى الموردة اسمه (الله عاشنا) . فبينما هو عاطلا جالسا فى القهوة فى الخمسينات . أظلمت السماء . وعندما شاهد الجراد خرج صارخا (الله عاشنا , الله عاشنا) وصار موظفا فى الجراد . وكان يروى أنهم يدفنون السم ويقبضون الجرادة ويبوسونها قائلين (أنا أعدمك كيف أولادى ياكلوا شنو ؟ ) .
بابكر بدرى ذكر فى كتاب حياتى , فى رفاعة فى بداية القرن . أن المفتش الانجليزى سأله من الذى أكل قروش الجراد ؟ فرد بابكر بدرى أن هذا ليس عمله . فساله المفتش الانجليزى شغلك شنو ؟ وكان الرد شغلى التلاميذ ودروسم وواجباتم . يعنى من الزمن داك أنحنا بناكل فى قروش الجراد .
وعندما طلع المفتش الانجليزى على جمله ووجد شيخ البلد ومساعديه يقتسمون قروش الرشاوى , اعتقلهم . فذهب بابكر بدرى متشفّعا لشيخ البلد . فقال له المفتش ده ما شغلك . انت شغلك تعليم الاولاد , دروسهم وواجباتهم . الا أنه قبل أخيرا شفاعة بابكر بدرى, الذى زعم أن الشياخة افقرت الشيخ بمصاريفها وضيافاتها والرجل طيب وغفلة , فعزله المفتش وأطلق صراحه .
أشهر مختلس فى السودان قديما كان ود البدوى . الذى اختلس عشرة ألف جنيه . وبالمقارنة بما اختلس الآن يجب أن يعطى ود البدوى جائزة للأمانة .. ولقد صرف ود البدوى الفلوس فى ليالى صاخبة . وكانوا يغنون له . يا ابو البدوى زورنا مرة , يا ابو البدوى عيرنا نظرة . وعندما سجن بعد تحريات ضابط البوليس أبّارو تغيرت الأغنية الى يا ابو البدوى غادى غادى , يا ابو البدوى السجن بعادى . يا ابو البدوى البيرة مرّة , يا ابو البدوى السجن أمرّ. هل تغيرت أغنية الانقاذ الآن ؟ من أمريكا قد دنى عذابها الى أمريكا نبوس حذاؤها .
ثانى أكبر مختلس قديما كان (…..) . وهو من سكان حى الموردة ومنزلهم على خط الترام . هذه المناسبات كان يؤرخ بها قديما . ولم تكن عادية كما هو الآن فى زمن الانقاذ . بل صار من لا يختلس ويستبيح المال العام يعتبر مغفلا فى زمن الانقاذ . أين القضاء هنا ؟ لا سمعنا يوم عريضة , لا سمعنا يوم موكب قضاة , اطرشنا ما سمعنا قاضى استقال بسبب تعذيب أو قتل .
لقد كان مال الأمم المتحدة يعتبر مالا سائبا , خاصة لمكافحة الجراد . أحد المختلسين كان يأتى بأسماء وهمية , ويوقّع باسمهم , أو يبصم . وعندما أتى خبير البصمات اكتشف أن أغلب البصمات متشابهة , ولكنها لا تشبه بصمات البشر . وبرضو تقول لى السودانيين ما بعرفوا السرقة ؟ .
فلوس الأمم المتحدة الجات لمساعدة الفيضانات فى 1988 راحت وين ؟ ما فى بطون تماسيح السودان . وأى مسئول ركب ليهو جنريتر كهربائى فى بيته . وخيم الأمم المتحدة الجابوها للمساكين ما ركّبوها المسئولين فى جناينهم وبيوتهم أو فى مزارعهم . ومين يقدر يقول البغلة فى الابريق ؟ .
كل زول تجيهو قبضة , حتى لو منادى سيارات فى الخرطوم أو ست شاى يودّوه الأردن للعلاج . والدكاترة الأردنيين بيقولوا : لمّن كنا بندرس فى انجلترا كنا بنستعين بالدكاترة السودانيين المعانا لأنهم أكاديميا كانوا أحسن مننا . كيف الناس تخلى السودان وتجى الأردن ؟ . سمعنا قالوا الأردن فيها امكانيات أحسن . طيب الأمم المتحدة دى ما عندها قضاة أحسن . ولو قضاة السودان ديل فيهم فايدة كانوا شغّالين فى حكومة أعدمت مجدى لحيازة مال , والطيّار جرجس , وطالب جنوبى . يا عالم مال , فلوس مش متفجرات أو انتراكس أو غاز الحردل .
والقضاة ديل كانوا وين لمّن فتحوا بيوت الأشباح وأهانوا الكبار والصغار ؟ وخلوا كل سودانى يرجع بيتو بسرعة راجف , ويشيل قسيمة زواجو فى جيبو قبل ما يوصل مرتو لأهلها لزيارة . والقضاة ديل وين وستّاشر سنة البلد فيها حظر تجول ؟ والله هولاكو لمّن دخل بغداد ما عمل حظر تجول ستّاشر سنة . والقضاة ديل وين لمّن الانقاذ دقّت وهرست دارفور ؟ . واغتصبوا وحرقوا وجوّعوا ؟ ود المضوى كان بضوى كان ضوّا فى بيت أمو .
أها يا جماعة أنا مع قرار الأمم المتحدة . فأرجو تسجيل اسمى بالخط العريض . واذا كانت هذه خيانة للوطن , فأنا خائن خائن خائن . المهم أن تعود البسمة الى أهلى فى دارفور . ودى أكتر مرة فى حياتى احترم الأمم المتحدة . وعدالة شنو البتعرفها الانقاذ (خبر يا توكر فيكى القطن وأهلك عرايا ؟) والجرّب المجرب حاقت بيهو الندامة . الانقاذ دى ما كتلت ليها اتنين مليون فى الجنوب . ولم تأخذ أسرى حرب أبدا . وهذا يتعارض مع مؤتمر جنيف وحقوق الانسان والشيطان والشريعة . بعد اتنين مليون مشرد فى دارفور وميتين أو تلتمية ألف قتيل يعنى العالم ده يقعد يتفرج لمتين ؟ . فى حاجة أمريكا أو العالم ما عاوزين يعلنوا عنها . اليوم انت بالأقمار الصناعية ممكن تشوف لو فى زول بياكل فى صحن فول , ممكن تعرف اذا فول مصلّح أو ساكت . لاكين أمريكا ما ممكن تقول شفنا فلان بيغتصب فى فلانة أو بيضبح فى فلان , لاكين كلّو فى ومصّور .
الانقاذ لمّن سلمت كارلوس السعر كان دولارات اتقسموها الناس الكبار . وصور لمعسكرات الحركة الشعبية بالأقمار الصناعية , وهذا هو السبب فى الضربة الكبيرة التى أصابت الحركة حتى تمكنت من تغيير مواقعها . كلّو مصور .وناس الانقاذ عارفين لمن يمشوا المحكمة الأدلة بالصوت والصورة , وبعد ده السوط . وده المخوف الناس .
وأنا فى العاشرة من عمرى قصدت شجرة لالوب كبيرة فى بيت المال وهى فى الزقاق الضيق جنوب حوش نقد والد الدرديرى نقد , وغرب حوش آل المطبعجى . وبدأت فى اطلاق الحجارة بالنبلة على الطيور والقمرى . فشاهدتنى طفلة فى السابعة من عمرها , فنهتنى عن فعلتى لأننى قد أصيب انسان . فقلت لها ( لمن أضرب لى زول .) فقالت لى وليه يستنّوك لحدى ما تضرب ليك زول تقد عينو؟ . فأفحمت بردها المعقول , وأدخلت النبلة فى جيبى وانصرفت . ان هذه الطفلة فى السابعة من عمرها لأعقل من أهل الانقاذ . لمتين الأمم المتحدة والعالم ينتظروا ؟ .
انا مع تدخل الامم المتحده وارسال جنود لحمايه اهل دارقور.
شوقي بدري
واللة انتو شعب جاهل وتستاهلوا عشان شبكتونا البشير البشير وعاملين ليهو قيمة …البشير منو طالب ثانوي درس سنتين صفا انتباه في كلية حربية مستوي سوداني(ملك الاردن درس كلية سان هرست العسكرية ببريطانيا)والزول دة من اصغر بطون الجعليين منو السمع بحوش بانقا قبل الانقلاب يعني تربية غبشاء حمير وكتاحة وتمشي فيي الحوش خمسين متر عشان تصل الادبخانة مش التواليت لاهو تربية عز ولا عائلة كبيرة ولامفكر ولا ثقافة ولا فهم باللة قبل ماتعملوا ليهو هيلمانة زيي فيران البرلمان بتاعم دة تذكروا الزول دة من وين وتربي كيف بلا بشير بلا لمة حتي لو كان رئيس
في الزمن الجميل عايشنا دبلوماسيين يتعاطون الأدب ويقرضون الشعر، مثالا لاحصر القانونى الضليع والمهندس والأديب والدبلوماسى ورجل الدولة محمد أحمد محجوب وجمال محمد أحمد وعبد الهادى الصديق وصلاح أحمد أبراهيم ومحمد المكى ابراهيم، أسماء من ذهب ، وزراء ودملوماسيواليوم شرزمة طاغيةأفاكة همهم جمع المال عن طريق الفساد (شرفانين)والسودان لديهم كعكةيقتسموهافيما بينهم وعندهم نهم شديدلم نر له مثيلا وليس فى قلبهم مثقال رحمة .,هل وزير الخارجية الحالى عنده احساس بالشعر والجمالوهل يستطيع أن يؤلف بيتا واخدا من الشعر مثل الذى خطه المحجوب أو ود المكي أو ضلاح أحمد أبراهيم تبا لهم أعداء الجمال ؟ حتى وجوههم تنبئك بأنهم قتلة وسفاحين.
سوم سمعت انو البشير مطلوب لى محمكمة العدل الدولية دا كان من ايام سعادتى و يوم السعادة الحقيقية يوم اتحاكم فى لاهاى … آميييييييييييييييييييييييييييييييييييييييييييييييين
يعني بي كلامك الخارم بارم دا طلعت السودانيين كلهم حرامية من العهد التركي … إنت بني آدم غريب!!
تسلم يالاستاذ
انا كذلك مع تدخل الامم المتحده وارسال جنود لحمايه اهل دارقور وجنوب كردفان وقبض مجرمى حرب وتسليمها محكمة العدل الدولية وحذر طيارن حربى لمناطق دارفور وكردفان.
بس يالاستاذ عايز اعرف توجهك سياسى اى حزبك عشان نضم معكم لعلا يعجبنى قناعاتك وصراحتك وشكر….. كتر من المقالات
الانقاذ منذ مجيئها الاسود الى البلد لم تتراجع لمصلحة الوطن اولدين او اخلاق الاسلوب الذى يفهمه قادة الانقاذ هو العصا ومستعده من اجل البقاء فى الحكم ببيع ماتبقى من الارض والكرامه بالعماله والتجسس للدول الاقوى وماما امريكا دى (على وزن ماما سعاد )حقيقى البشير وحتى نافع الما نافع ده العامل فيها
بطل على ناس نجلاء سيد احمد ممكن عادى يبوس حذاء الامريكان بس لو فى ستاره يكون جميل ,والخوف كله والله ياود بدرى على المسروقات اكثر من اى شى اخر فى الدنيا ومخافة الله والحساب والعقاب ده ماشغالين بيه خالص
لكن ليك يوم ياظالم ويجعل شرورهم فى نحورهم.
واي واي واي لاهاي
يا أستاذ شوقى من قال نرفض دخول قوات الجبهة الثورية للخرطوم هو الأستاذ صديق يوسف عضو اللجنة المركزية للحزب الشيوعى وليس سكرتير الحزب الشيوعى الجديد .
سلمت يداك عمو شوقي بدري… وأنا أبصلعة الحالق دقنو أعلن أصالة عن نفسي ونيابة عن عدد إتنين مليون مواطن جنوبي وثلثمائة الف مواطن دارفوري وعشرات الآلاف المبادين عرقياً وجهوياً في مناطق النيل الأزرق وجبال النوبة وآلاف اللاجئين بالمعسكرات والمشردين بالتماس أعلن تأييدي الكامل لقرارات المحكمة الجنائية وتسليم البشير وعبدالرحيم وهرون وكوشيب وكل من ورد إسمه في اللستة الخمسينية للمحكمة الجنائية وتسليمهم فوراً لبنت الخالة فاتو بنسودة حتى تفتتح عهدها بكوتة شحمانة تثبت أرجلها في موقعها الجديد…. وبالعدم شنق كل من ورد إسمه أعلاه بميادين بلادنا العامة وبي حبل تيل بدون زيت عبرة لمن يعتبر..
..
..
..
.. وماشين في السكة نمد..
أشهدوا يا قوم وأكتبوا على لساني – أنا المواطن الفقير الغلبان الذي يحلم بصحن من الكمونية ، هذا ليس مزاح أو سخرية فأنا لم أذق اللحم خلال فترة طيلة سوى مرة أو مرتين في مناسبات – المهم أنني قررت قرارا لا رجعة فيه أنه في حال نجاح الثورة ، وستنجح بإذن الله – قررت أن أقطع لسان المدعو نافع المشهور بأبو العفين ، تذكروا كلامي هذا ، سوف أقطع لسانه من لقاليقه ، هذا اللسان القذر لن ينطق بعد نجاح الثورة ، وفي حال كان أبو العفين يواجه اتهامات يمكن أن تقوده الى المشنقة فسوف يذهب الى المشنقة بلا لسان ،،، أنا أعرف أين أجده وسوف أقطع لسانه ، سوف أقطعه وأقدمه هدية لمتحف التاريخ الطبيعي ليتذكر الشعب السوداني على مر التاريخ أن لسان من أساء لشعبه موجود بمتحف التاريخ
شيخ ابليس أو وكيل ابليس في الأرض التى سميت بيها الترابي دي رائعة وفي محلها يا / أستاذ شوقي
لبن الاغاثة ايام الفيضانات في الثمانينيات والحقن كانت بتتباع في سوق امدرمان الواحد ده
ح اجي اشرب معاكم شاي في بيتكم حضر التمر يا عم شوقي .
وبعدين ياجماعة الفلم دا بنتهى متين ؟؟؟؟؟!!!!!! ياشوقي كيف حالك ؟؟ ساعود لك قريبا لأني لدي ما اقولة وأسألك عنه بخصوص ضابط البوليس محمد مالك محمد علي .. شركة النيل الأزرق … غازي سلمان المحامي … شركة فيلب موريس … صلاح ابتر … العم حسن قرين … شركة الطلمبات الدنمركية قرنفس … مستر بل مندوب فيلب موريس … ابو شوك سمسار الدولارات … قارو فانيان بتاع ارارات العالمية والكثير الكثير مثل اعادة تعمير مشاريع شاشينا وابوبنات … بعدها سوف تعرف من انا .