شبكة عصير ليمون
بعد أن فشلت (أمنا الحكومة) في القيام بواجباتها الأساسية تجاه (الشعب الفضل) والمتمثلة في مجانية التعليم الأساسى وتوفير العلاج والأمن وسبل كسب العيش (الشريف) على الرغم مما يدفعه المواطن من رسوم وجبايات (ما معروف بتمشى وين) بلغت 173 ألف جباية ، لم تكتف (أمنا الحكومة) بذلك وقررت زيادة سعر الماء إلى الضعف في بلد حباه الله بكميات مهولة من المياه العذبة تجري أنهارآ وتسقط أمطارآ في وقت تعاني فيه الكثير من أقطار العالم من شح في المياه العذبة ومش كده وبس شرعت في الإستعداد لتركيب عدادات دفع مقدم للمياه (ما تدفع ما تشرب) !
العبد لله يتوقع تبعاً لهذه القرارات التي تجعل من الماء سلعة باهطة تؤثر تأثيراً مباشراً على دخل الفرد (هو الدخل ذاتو وينو) ، أن تتأثر بعض عادات المواطنين وأنماط سوكهم وهاكم بعض الأمثلة :
? النظافة الشخصية :
من المتوقع تبعا لهذا النظام الجديد أن تتردى أجمل الصفات في الشخصية السودانية وهي النظافة فالسوداني عرف (دون شعوب الدنيا) بالإعتناء الفائق بنظافته الشخصية فهو يستحم مرتين فى اليوم ومرات أكتر .. كما يولي عناية خاصة لنظافة ما يرتديه من ثياب وخاصة الثياب الداخلية والتى غالبا ما يتم تغييرها مع كل (حمام) !
ولكن في ظل إرتفاع سعر الماء مع ربطه بعداد دفع مقدم فسوف يساهم ذلك بلا شك في تدهور صفة (النظافة الشخصية) التي لازمت الشخصية السودانية على مر التاريخ وسوف يتخلى عنها المواطنون مكرهين (يستحموا وللا ياكلو) وسوف تنتشر تبعاً لذلك الأمراض الجلدية إذ أن اجسام المواطنين سوف تصبح مرتعاً للفطريات وح يكون عادي تكون ماشي في الشارع تلاقي ليك كم زول عندو (قوبة) في نص راسو !!
? المساجد :
لأن المساجد تعمل بنظام كهرباء الدفع المقدم (الجمرة الخبيثة) فعندما تقطع (الكهرباء) عن بعض المساجد يضطر المصلون لعمل (كشف) لإعادتها فى وقت لاحق إلا أن (كشف الموية) لا يمكن القيام به في وقت لاحق (عشان الوضوء وكده) عليه العبدلله يقترح بعد زيادة فاتورة الموية وإنغاذ مشروع جمرة (الموية الخبيثة) وضع صندوقين أمام كل مسجد صندوق (للنور) وصندوق (للموية) طبعن غير صندوق (تبرعات) للأشخاص الذين درجوا على الوقوف بين المصلين عقب كل صلاة لتقديم عرضحالاتهم من شاكلة
? مرتى ماتت وما عندى حق الكف ? والذين أصبحت أعدادهم أكثر من المصلين
? المشاتل :
سوف ترتفع أسعار (الشتل) فى المشاتل مما يجعل ( أصص ) الورود والأزهار فى المنازل تختفى فما أن تسأل بائع المشتل عن سر غلاء الشتلة حتى يجيبك :
? يا أستاذ والله الشتلة دى موية سااااكت مكلفانا الشئ الفلانى !
? التشجير :
بعد زيادة تعرفة الموية إلى الضعف سوف تختفي الأشجار من أمام المنازل (هو الناس قادرة تصرف على أولادها لمن تصرف على الشجر؟) وبالتالي سوف تصبح العاصمة الحضارية خالية من الأشجار التي يقوم بغرسها المواطنين ، وما فيش تاني واحد من المسؤولين يقول لينا أزرع شجرة أو يتكلم لينا عن (الخضرة) والشنو ما عارف !!
اما على صعيد (الحدائق العامة) والأشجار التى على الطرق فأنها بالطبع سوف تتأثر بهذا القرار
فلابد لجهة ما أن تقوم بدفع (قيمة المياه الباهظة) وسوف يتنصل الجميع من الدفع (كالعادة) وتختفى تبعاً لذلك
حدائق (حبيبي مفلس) وتظهر مكانها حدائق (حبيبي مرطب) وكلو بي تمنو !
? المدارس :
بعد إرتفاع سعر فاتورة المياة سوف ينضم (جنيه الموية) لإخوانه (جنيه الكهرباء) و (جنيه الطباشير) و (جنيه طباعة الإمتحان) و (جنيه فطور الأساتذة) وربما قامت بعض إدارات المدارس بتحديد الكمية التي يشربها كل تلميذ في اليوم (500 ملي لتر) !
? إستغاثات :
سوف تمتلئ صفحات الصحف بالنداءآت إلى أهل الخير من شاكلة :
مواطن يعول أسرة من ستة أفراد و(مويتو) مقطوعة ! يرجو المساعدة إذ أنه (بالمعاش) ولا دخل له وتبعاً لذلك أيضاً فسوف تختفى للأسف الشديد حكاية تشييد (سبيل الموية) والذى يقام كصدقة جارية للمتوفين .. (هو المواطن الحي قادر يشرب لى روحو؟)
كسرة:
بعد ستة وعشرين سنة من الصبر مفروض أمنا الحكومة تعمل لينا شبكة (عصير ليمون .. مجاااانن) وكمان (مثلج) مش تزيد لينا سعر الموية وكمان تعمل ليها عدادات دفع مقدم !
? كسرة ثابتة (قديمة) :
? ? أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و+و+و
عن هذه الإعلانات
إقتباس:
“وتختفى تبعاً لذلك
حدائق (حبيبي مفلس) وتظهر مكانها حدائق (حبيبي مرطب) وكلو بي تمنو !”
شكراٍ استاذنا جبرة …
اتمنى ان يعي الجميع معنى اخر تلاته كلمات من الاقتباس اعلاه .. {كلو بي تمنو}
لان ذلك يعني فتح فروع لدار المايقوما…!!! حسبي الله ونعم الوكيل
“بعد ستة وعشرين سنة من الصبر مفروض أمنا الحكومة تعمل لينا شبكة (عصير ليمون .. مجاااانن) وكمان (مثلج) مش تزيد لينا سعر الموية وكمان تعمل ليها عدادات دفع مقدم ”
من يهن يسهل الهوان عليه ………
حبيبنا الغالى ود جبرا
تعمل ليك عصير ليمووون!!! الموية زااااتا كان لونا زى عصير الليمون وفجأة انقلب زى عصير العرديب وفجأة كدة تصدق اختفت الموية !! يا ربى تكون زعلانة مننا وغارت فى ستين اقصد غاصت تحت الواطة !!(يا النبى نووح مافضل لينا الا النوووح لكن هسة نزرف دمعة يدفعونا حق موية الدموع ! قطر عجييب
رآآآآآآآآآآآئع أستاذ الفاتح ربنا يمتعك بالصحه.
رائع ياود جبرا ،بقيت متخصص شبكات وقروبات،،بس الحيكومه دى ما أمنا ،دى حبوبة حبوبتنا ،وشمطاء ومخرفه، وكلامها كثير وفعلها قليل وقادره تعصرنا على إيدنا البتوجعنا،وقاطعه مننا مويه ونور،،وغايتو يحلنا الحل بله،،
“بعد ستة وعشرين سنة من الصبر مفروض أمنا الحكومة تعمل لينا شبكة (عصير ليمون .. مجاااانن) وكمان (مثلج)”
مش تزيد لينا سعر الموية يقال أن هناك شيخاً في دولة خليجية يملك مزرعة ضخمة للألبان أقام سبيلاً للحليب يغشاه العابرون خاصة في الصباح للتزود بحاجتهم من الحليب و معظمهم من العاملين في الطرق و النظافة و قيادة الشهحنات. و كأن هذا الشيخ كان يتوقع اقتراح الفاتح بسبيل الليمو المثلج.
في سنه من السنين كنت ماشي مع عمتي في منى وكنا نؤدي الحج معا” ففي الطريق وجدنا سيرمسين كبار وموضوع عليهم كبايات للشرب فقلت لعمتي تعالي نشرب من السبيل داعلى اساس انها موية والمفاجاءة كانت واحدة مليانة عصير ليمون مركز والثانية عصير برتقال (قال امنا قال)
لا اعتقد ان الرئيس يوافق علي مثل هذا لانه يعرف بانها ستكون نهايته والي الجحيم باذن الله
الصلاة تاني تيمم .
لو زادوا الموية والكهرباء، معناها الحكومة دي فجرت نفسها خلاص. (داعش وكده)
صباحك خير يا دكتور يا مستغرش:
أزمة المياه أتاحت لنا باستنهاض -( حلوة استنهاض دي مش ؟ ) – استنهاض ذكريات جميلة, أيام في كل حي بئر , الكلاكلة القلعة رغم أنها بجوار النيل إلا أنه كانت بها آبار متوزعة هنا وهناك , كنا صغارا وكبارا وأطفالا نحمل الجرادل والحلل الكبيرة , وكان هناك ” السقا ” ذلك الرجل الذي يحمل جوزين من الصفيح وجلب الماء من البئر وبيعه لسكان الحي.
لذلك ورفعا لحرج الحكومة نقترح عليها ترجعنا لذلك الزمن الجميل وتقوم بحفر آبار بجانب كل كشك نظام عام أو بسط أمن شامل أو جامع. طبعا ح تسألني الحكومة أيه ح تستفيد الحكومة من ده كلوووووووووووو ؟ الحكومة في إمكانها وضع رسوم أو إيجار الجرادل والحلل والآباريق الأخيرة دي بالنسبة للمساجد, فقط ما عليها إلا وضع كشك صغير إلي جانب أكشاك بسط الأمن الشامل للتحصيل. وبكده تكون الحكومة حلت مشكلتها اللي هي “الرسوم “وحلت مشكلة المواطن اللي هي “العطش”.
قال عصير ليمون قال ديل باقي لهم يبيعوا لينا الهواء وامكن الان بفكروا فيه
يبدو انه بقت علينا مقولة الشاعر” كالعير فى البيداء يقتلعا الظمأ زالماء فوق ظهورها محمول” .حبا الله السودان بخيرات لا حصر لها واهمها اكسير الحياة. قال الله تعالى : وجعلنا من الماء كل شيئ حى.الملاحظ ان زيادة تعريفة المياه لا فى مصلحة لبلد ولا المواطن ,يعنى نترك المياه تمشى كلها لمصر والفائض يصب فى البحر الابيض المتوسط زالسودان لديه فى كل عام 6 مليار متر مكعب ما قاعد يستهلكها وبتمشى لمصر على سبيل السلفة حسب ما يزعمون.وكانما زيادة تعريفة المياه الهدف منها ترك المياه تمشى بصمة خشمها لمصر وهذه تقريبا بداية حرب المياه القادمة لا سيما مع قيام سد النهضة .والسؤال البتبادر للزهن الاراضى الزراعية التى منحعا السودان لمصر ستروى من حصة السودان ولا حصة مصر من مياه النيل ؟ والانتاج حيكون لمن ؟ يا جماعة فكوا الموية خلوا الناس يستمتعوا بما حباهم به الله سبحانه وتعالى وكان قى زيادة خلوها فى الكبهرباءبس يراعى متوسطى الدخل والفقراءتباع لهم الكهرباء يسعر مخفض اما القطط السمان والذين يستهلكون اكثر من 50% من الكهرباء تضاعف لهم تعريفة الكهرباء عشان ىرشدوا فى تشغيل مكيفات الفريون.
عليك الله مش كده!!!! عالم وهم مابتخجل!! ماليزيا بنيت وسنغلفوره في عشرون عام!! وديله كهربة!!!!!!!!!!! كهلربة وموية ماقادرين!!!!!!!! له ومعاه نقز بي وراء وعرضه كمان!!!!!!!
عليك الله يا ود جبرا ناس الحركة الاسلاموية راجين شنو ما يقوموا يعملوا انقلاب وينقذوناويريحونا من حكم الاحزاب ده!!!
كسرة:انتو مش حاكمنا الصادق المهدى ولا انا بخطرف ساكت؟؟؟؟
كسرة تانية:طبعا ح يجى البشير ويقول فى بيان انقلاب الاسلامويين ان الكهرباء والماء بقوا حاجة عسيرة ومافى متناول يد اى مواطن وان الجنود الاجانب مالين البلد الخ الخ الخ!!!!
كسرة:طبعا اذا حكمونا الاسلامويين البلد ح تتصلح لانهم ناس بيخافوا الله وما بيمدوا يدهم لمال عام او حرام واهم حاجة انهم ح يدخلوا السودانيين فى الاسلام ويتركوا عبادة الاصنام زى ما حصل فى غزة قبل حكم حماس كان الغزاويون بيعبدوا الاصنام ولا بيعرفوا اسلام ولا صلاة ولا صوم ولا زكاة ولا حج!!!!!
كسرة اخيرة:اتحدى كائنا من كان ان يجد اى زول فى العالم اكثر قذارة وعهرا ودعارة سياسية من الاسلامويين او الحركة الاسلاموية بت الكلب وبت الحرام؟؟؟؟؟
يا جبرةت ماتشملنا معاك ساكت دى لا امنا لا الله قال…من الله خلقك سمعت ليك ام بترضع من ولدا.مش رضاعة بس ده مص ومصر