أوعك تخاف.. قصيدة جديدة للأستاذ محجوب شريف
أوعَك تخاف
محجوب شريف
يا من تموت بالجوع وقدامك ضفاف
والأرضِ باطنها ظلَّ مطمورة سواك
عطشان وقد نزلت عليك
أحزان مطيره
مُزَن سماك
الدنيا أوسع من تضيق
قوم أصحى فِك الريق هتاف
إن الذين أحبوا روحهم ضيَّعوك
وبيَّعوك أعز ما ملكت يداك
أوعَك تخاف
الخوف محطه محطه ما سكَّة وصولك للطريق
إن الأيادي الحُرَّه ما بْتشعِل حريق
تبْ ما بْتقيف تستنَّى قدامها بْتشوف
يَحْتِل غريق تلو الغريق
ما تنسى إنك كنت صاحب راي وبيت
أهلا حباب لو دقَّ باب
عندك مخدَّه وعنقريب هبَّابي،
لمَّه وقهقهات
تصحى وتنوم وتقوم معطَّر بالنشاط
تنعس وقع في لحظه من إيدك كتاب
وقلم كما برق السحاب
يتهادى ما بين السطور
كان سرجو كرسي الخيزران
عند المغيرب رادي
بغ بِنْ المزاج
يدخل من النفَّاج عليك عثمان حسين
يا عُشرة الأيام تمام
أهو دا الكلام
يا سلوى جك المويه
أعملوا لينا شاي
الأسره ممتده وحِداك جيران لطاف بي جاي وجاي
جار المسيحي سكن إمام
إلفه ومودَّه وقرقراب
والناس قُراب
ناس من نيالا وآخرين
من وين ووين
هسَّع جهنم في الحقيقه معسكرات
من أين جاءكَ هؤلاء
ما جونا من قيف السراب
أو جونا من خلف الحدود
بل جونا من جوّانا هم حُترب
هنالك باقي في حلق الكلام
تلك البذور الراكده في قاع الجُراب
ما اتنفَّست فلق الصباح
نفس الأزقة الفيها
سكَّتنا الكلاب..
ولكم وكم غلب الغُنا السمح النباح
كم نحن أحياناً شربنا المويه
من كاس الجراح
من بين أصابعنا المخدَّره بالسُكات
من بين مسامات العيوب..
يا الله مين جلَد البنات
جلداً موثق في القلوب
وسكتنا ساي
جُوّانا منْ فصل الجنوب
هم عَسَّموك وقسَّموك خلُّوك مشتت في الدروب
حدَّادي مدَّادي الوطن قد كان
حليل الأغنيات
يا أيها الأسف الشديد
أكتب نشيد من تاني أجمل أمنيات
لا للشهيد تلو الشهيد
إلا إذا خطأً وصدفه تِحِتْ هدير التنميه
موت الله ساي حتماً أكيد
أو جانا من خلف الحدود
وطن الجدود وطن الجدود
نفديك بالأرواح نذود
من بعد ذلك يا جميل
أحلم بما لك من حقوق
كشك الجرايد في الصباح،
كيس الفواكه والملابس والكراريس والحليب
نكهة خبيز والدنيا عيد إنسان عزيز
وطن سعيد والشعبِ حر
وطن التعدد والتنوع والتقدم والسلام
حيث الفضا الواسع حمام
والموجه خلف الموجه والسكه الحديد
حرية التعبير عبير
تفتح شهيتك للكلام
النهر ما بِستأذن الصخره المرور
جهراً بِمُرْ نحو المصب
أمواجو تلهث من بعيد
أكتب نشيد راسخ جديد
الشمسِ تشهد وبرضو أستار الظلام
السبت 7 سبتمبر ألمانيا
الله عليك ياشاعر الشعب
يا سيدينا الرائع: بكري الصائغ
ممكن تزور الاستاذ وتطمنا عليه..
النهر ما بِستأذن الصخره المرور
جهراً بِمُرْ نحو المصب
أمواجو تلهث من بعيد
أكتب نشيد راسخ جديد
الشمسِ تشهد وبرضو أستار الظلام
يا حليلك لسه عندك امل انه دا نهر
خووور وانت الصادق مواسير
وسكتنا ساي
_____
يا ابونا ما لانو التقدميين عندنا حمام ساي تقدميين احمر شفاه زي ما بقولو افنديات ومثقفاتية مكنشكين في النضال المريح ودرب السلامة وما عندهم الاستعداد النفسي والتهيئة الفكرية للقيام بما يلزم لاستئصال الورم الاخواني
هو محجوب شريف، الإنسان نفسه، السودان نفسه، قمة الروعة في الامساك بكل ما يجعل السودانين ذات الاسرة، هو محجوب شريف كما كان امام كل طغاة ومخربي السودان، لك الشكر العم والخال والوالد العظيم محجوب ،،،
عليك الله اكتب واكتب واكتب
انت رجل قامة
وفعلا انت شريف
الأستاذ محجوب شريف … دائما مبدع , كتر الله من أمثالك , فعلا الشعب محتاج لمن يهزه و يصحيه بعد الدخل فيه.
نبض الشارع وصوت الأمة ،،،
متعك الله بالصحة والعافية يا استاذنا لكبير ،يا حبيب الشعب والشعب حبيبك
رغم ألامك وبعدك عن البتحلم بيه يوماتى… رغم عذاباتك شايل هم الوطن وشعبه المغبون… شعبك أيها الشامخ يبتهل للمولى عز وجل أن ينعم عليك بموفور الصحة والعافية وترجع تلقى الوطن رجع حدادى مدادى وزغاريد فرح الحرية يستقبلك بها وطن كامل تعافى من سرطان الكيزان وعاد له رونقه وديمقراطيته وحريته وتعانق الكل فى حضن الوطن الأم.
تبا لمن فصل الجنوب
نتمنى تلحين وغناء تلك القصيدة، والقصائد التى نشرت مؤخرا حتى ترسخ في الاذهان
التحية للمناضل الاستاذ والشاعر محجوب شريف….بس اوعك تخاف دا هاجر وخلا البلد…سبعة ملايين من اكثر الكفاءات فى البلد هاجرت لبلاد الغربة … ومابقى فى البلد مازالت تسكو الكلاب فى الازقة الضيقة… وكان تعب بهاجر برضو…ويخلى وراءه البلد ويخلى معاها اوعك تخاف
السودان :حيث الحقوق البسيطة الأصيلة في منزلة الأحلام بعيدة المنال
أحلم بما لك من حقوق
كشك الجرايد في الصباح،
كيس الفواكه والملابس والكراريس والحليب
نكهة خبيز والدنيا عيد إنسان عزيز
تسلم أستاذنا الغالي محجوب شريف ..
متعك الله بالصحة والعافية ..
كلامك درر بس الناس الكيزان ربوها وبدلوها ماعادت الناس الزمان …
متعاك الله بالصحة والعافية استاذنا الجليل مربي الاجيال الجليل محجوب شريف .. ودائما كعادتك نهر من الابداع المتألق المتجدد المتدفق …… والثورة الثالثة قد دنت بأذن الله
*تستضيف جمهورية المانيا الاتحادية شاعر الشعب محجوب شريف مستشفياً بإحدي مشافيها حيث غادر وطنه الذي كم وكم تغني به عشقاً وحباً وهياما، ندعوا الله تضرعاً وخفيةً بأن يَّمن عليه بموفور الصحةِ والعافيةِ وراحة البال. (اللهم آمين)
مبدعنا محجوب شريف “شاعر الشعب” .. دثرتُك العافية.. وزملتُك الصحة.. وحياك الغمام.. أيها الصوفي المُتبتل في محاريب الوطن .. قدس الله سرك.. وبلغك تمام المزاج.. وغطتك السلامة.. أيها النقي الحداثي النيل النبيل.. جُودك الغيم الغاسق الوابل في محاريب الأرض .. يُغثنا إبداعاً وأنت تستسقي الحياة فينا .. يقول: المبدع (ناظم حكمت) ” أعطي نصف عُمري للذي يُعطِي طفلاً باكياً وردة” .. وها أنت أعطيتنا وأطفالنا حقول من الورود.. الإسم الكامل إنسان.. الشعب الطيب واّلدي.. ماك هوين سهل قيادك.. سيد نفسك مين أسيادك.. يا والدة يا مريم.. يا عامرة حنيا.. أكتوبر دنميتنا.. ساعة السفر ركيزة بيتنا.. ويا شعباً لهبك ثوريتك.. وغيرها.. وغيرها .. من أشعارك الراعدات بمزن البشارة.. وخصب الحياة وملح الارض وأنت في عروق الثرى نخلة أصلها ضارب .. وفرعها في صدر السماء.. أشعارك مصابيح أغنية الوفاء للوطن الساجدة في فعل الخلود.. ندعو الله أن يكشف عنك العلل وغم الداء.. يا رحمن يا رحيم يا مجيب الدعوات..أجبنا دعائنا ولا تردنا عن سؤالك خائبين.. يا أرحم الرحمين.. آمين.
في إنتظار.. عودك الميمون.. وأنت تتقبع تيجان الصحة.. وتعتمر العافية.. تدعوا لك.. شبابيك المدن وسراريق مسارب الضوء من القطاطي والكراكير القصية.. وبيوت الطين التي جرفها السيل بأطراف المدن وضواحيها .. “هامش الهامش” من أبناء شعبك الذين قهرهم ضنك الحياة .. وطفيلية رأس المال وطحنهم فائض القيمة ..الذي خلف أرتال من الشهداء وكثافة في النازحين حشفاً وسوء كيل و هرباً من الموت وحفاظاً على حيواتهم.. ووطن ممزق وشعب شاخص الأبصار وتري الناس سَّكارى وماهم بسُكارى ولكن وقع الرزء أليم . . أستاذنا حيتك العافية وسكنتك الصحة وحفاك الأمان..
ياسلام ياسلام وتاني ياسلام كلك جميل يا استاذنا عيشتنا خمسة دقائق من الزمن الجميل زمن النخوة والعزة والكرامة ذمن الرجال رجال والبلد عزيز في قلب الكل حسع بقينا ويين ربنا يعينا لينا القلوب الكانت يوم بتنبض
تك البذور الراكده في قاع الجُراب
ما اتنفَّست فلق الصباح
نفس الأزقة الفيها
سكَّتنا الكلاب..
ولكم وكم غلب الغُنا السمح النباح
………………….
كثر النباح يا استاذ ، واصبحنا نجتر الصمت
متعك الله بالصحة والعافية
محجوب شريف ياشريف ربنا يديك الصحة والعافية ويكفيك شر المافيا
من أين جاءك هؤلاء
ماجونا من قيف السراب
هم جونا من خلف الحدود
لله درك …إنها نفس تساؤلات الطيب صالح ..من أين أتى هؤلاء الناس..
ونفس الإستدراك…لقد سقطوا علينا من أحد ثقوب القرون الماضيه…
لقد تسللوا كالنمل من أخطائنا…أو كالقمل..بل كالنصل فى أحشائنا
إنهم غفلتنا وخطايانا التى صارت طينه فحكمت فينا
فعلاً جونا محقوبين على ظهور الأمهات كإسبيرات موتر الفسبا من خلف الحدود
إنهم جداد الوادى الذى طرد جداد الحله ..أو السواق الذى فنشه مساعد الحله
إنها الدنيا أم قدود إن ماكتلتك توريك كنفوس أمك…
أخي الحبيب اللطيف..الخفيف…الثقيل…الجبل الشامخ… لم ولن ينكسر…سأله الطاغية وهو يتفقد طابور المناضلين في السجن من أنت؟…. محجوب شريف…..نظر إليه وتأمل القامة المرفوعة والوجه المتحدي والعيون ثابتة لاترتعش وقال…لاأعرفك….هل تتذكر ماذا قلت: وأنا لا أتشرف… وأهتز أبوعاج وزمجر..والحبيب واقف بطل… ومازال هو البطل.. رغم المرض والألم… لكن مرض وضياع البلد عنده أكبر وأشد ألما..
متين يابلد تحضني من غني لك …والشرفاء.. العفيفين ..والحفاة العراة ساكني الخيام وبيوت الصفيح والقش …متين يابلد تصحي وتتجمعي ويشد البعض البعض..ونحن كثر مقابل قلة باغية…طاغية..فاسدة ..مفسدة… ضعيفة… تتستر وراء عدد من ابناء جلدتنا بمدافعهم وذخائرهم …ولكن حتما سيتروكها وتجدهم مع الجموع الهادرة…لأنهم مسحوقين.. يعصرهم الجوع والألم ..ويعرفون عن الساده أكتر مني ومنك.
سامحني يا أشرف الشرفاء..فأنت ملهم وذكراك ..وتعليقات ألأحبة بعث فينا أمل النصر والي………حتي النصر
سلام يا ناس الراكوبة
أرجو إضافة الفيديو للقصيدة مع وافر التقدير..
https://www.youtube.com/watch?v=G2_VEX_GLz0
محجوب شريف ،،،اسم كبير وقامه ساميه،،،بشعرك بنشوم هواء يعنى بينتنفس،،،ربنا يدك الصحه والعافيه وتعود للوطن،،وطن حر وفيهو محمد احمد يقدل بجلبتو وتوبو وسيدرتو،،،يااااالله انصرنا على الظلما واقشع مننا الظلمه