الشرطة : الرد بعد عام
وصلنا هذا الرد من الأخ العقيد محمد عبدالله الدسوقي مدير الأحوال المدنية ببحري تعقيباً على ما جاء في مقالنا بعنوان حبر مافي والذي أشرنا فيه إلى تحصيل إدارة السجل المدني لرسوم أكثر مما هو مكتوب في الإيصال .. نشوف رد الأخ العقيد وبعد داك نشوف الحاصل شنو :
السيد رئيس تحرير صحيفة الخرطوم
السلام عليكم ورحمة الله نعالى وبركاته
الموضوع : المقال الوارد بصحيفتكم بعمود ساخر سبيل
إشارة للمقال الوارد بصحيفتكم بتاريخ 29/4/2013م بعمود ساخر سبيل للكاتب الفاتح جبرا تحت عنوان (حبر مافي) نرجو التكرم بإفادتنا عن إسم وعنوان الشخص المبلغ والإيصال المالي المعني حتى نتمكن من تكملة الإجراءآت الإدارية فب هذا الموضوع ولكم الشكر
إنتهي خطاب الشرطة .. وما لا يعلمه (الأخ العقيد) هو أن هذه الحادثة قد مر عليها عام وقد قمنا حينها في(6/5/2012م) بكتابه هذا المقال الذي بعنوان (نبلغ لمنو يعني) والذي لم ترد عليه الشرطة حتى الآن .. !!
بلغ لمنو يعني
عزيزى القارئ : بتاريخ 23 يناير 2010م كتبت مقالاً بعنوان (بدون أورنيك ذاتو) تحدثت فيه عن توجه ولدنا (عبدو) إلى أحد مراكز السجل المدنى لإستخراج شهادة (بدل قيد) إذ يعتزم إستخراج شهادة تسنين للتقديم بها إلى وظيفة بعد أن جلس على (دكة العطالة) لسنوات طوال منذ تخرجه ، لاحظ (عبدو) وهو لا يزال فى الصف ينتظر دفع الرسوم (المكتوبة على الإيصال) والبالغ قدرها (عشرون جنيهاً) أن (الناس بتدفع) ثلاثين جنيهاً وقد رفض (عبدو) أن يقوم بدفع الثلاثين ما لم يتم إعطاؤه أيصال بثلاثين جنيه وعندما أحس (جنابو) بأن (عبدو زول حقانى) طلب منه الدخول (لى جوة) حيث أفهموه بأن (العشرة جنيه الزيادة) دى تعتبر (دعم) ولابد من دفعها كما درج بقية المواطنين على دفعها (بالتى هى أحسن) وأحسن ليهو يدفعا (وما يعمل فيها تفتيحة) عشان أمورو تمشى وكده !!
بعد نشر المقال إتصل بي بى الأخ المقدم (محمد زين) من قوات الشرطة طالباً (الدليل) فبعثت له ببطل القصة والشاهد العيان (ولدنا عبدو) الذى تم التحرى معه وذكرلهم كل صغيرة وكبيرة تتعلق بصحة الأمر فعاد الأخ المقدم للإتصال بى موضحاً بأن هنالك تحقيقاً سوف يجرى فى المسالة وسوف يتم إخطارى بما يسفر عنه ? ولما تأخرت نتيجة التحقيق قمت بكتابة مقال آخر حول الموضوع بعنوان (نسال منو تاني) نستفسر فيه عن نتيجة التحقيق .. ولكن لا حياة لمن تنادى ولم يحرك إخواننا في الشرطة ساكنا ليعلمونا بالنتيجة !
لأن العبد لله (زول على نياتو) إعتقد بإنو (الشرطة) لما عرف عنها من (ضبط وربط) قد قامت بإيقاف تلك التجاوزات ومحاسبة من يقوم بها لكن إتضح مؤخراً وبالصدفة أنو القصة ماشة عال العال وفل الفل .. القروش البتدفعا حاجة والبكتبوها ليك على الإيصال حاجة تانية (ناقصة طبعن) ! ولا زالت هذه الممارسات غير القانونية تمارس عيني عينك (ما شرطة وكده) ! وهاكم الدليل (تااااني)
المكان : مكتب جوازات بحري
الزمان : قبل عدة أيام
المعاملة : تجديد جواز مواطن
الرسوم المكتوبة على الإعلان : 96 جنيه
الرسوم التى طلبها المحاسب : 98 جنيه
المواطن : طيب الإتين جنيه الإضافية دي شنو؟
الموظف : دي دمغات
المواطن : طيب ليه ما تكتبوها في الإيصال !
الموظف : دي رسوم براها !
(بعد تسلم الإيصال يتضح للمواطن بأن قيمته ليست 96 جنيها ولكن 84 جنيهاً فيعود ليسأل الموظف)?!!!
المواطن : طيب الجنيهين بتاعين الدمغة خليناهم .. هسه القروش الأديتك ليها دي ناقصة 12 جنيه تاني
الموظف : في رسوم عشرة ألف بتاعت غلاف ودمغة تاااني 2 جنيه
المواطن : طيب انا الغلاف ده ما عاوزو
الموظف : أي معاملة بدون غلاف لا ينظر فيها
المواطن : طيب ليه ما إتضمنت قروش الغلاف والدمغات دي في الإيصال ؟
الموظف : دي رسوم براها !
السيد مدير عام الشرطة :
إذا كنا نعول على (الشرطة) أن تحمى المواطن من أى (جبايات) غير قانونية (معقول) تقوم (الشرطة ذااااتا) بهذا التحصيل غير القانونى لهذه الأموال والتى من الواضح أنها لا تورد في خزينة الدولة (ح تورد كيف و إذاى يعنى؟ وبواسطة ياتو مستندات ؟)
لقد ساءني جداً كمواطن أن أنبه إخواننا في قيادة الشرطة (قبل عامين ونص) إلى هذه التجاوزات فيتم الرد بان هنالك تحقيق في الأمر لأفاجأ بأن (القصة مستمرة) وإنو المسألة (ماشة) رغم عدم قانونيتها ومخالفتها للقواعد المالية !
عزيزي القارئ :
? تري لماذا تمادت الشرطة في ممارسة هذا السلوك الغير قانوني على الرغم من تنبيهنا السابق لها؟
? ما هي نتيجة التحقيق في قصة (ولدنا عبدو) التي اشرنا إليها قبل حوالى عامين ونصف ؟
? ما سر هذه الرسوم التي تتحصل دون إيصال؟ وأين تذهب؟
? لمن تتبع هذه الدمغات وهذا (الغلاف الإجباري) أبو عشرة(ألف) !
كل هذه الأسئلة سوف يقوم بالرد عليها أخواننا في (المكتب الصحفي للشرطة) قبل أن تصبح (كسرة ثابتة) وكده !
كسرة :
إذا كان تحصيل أي مبالغ من المواطنين بأي اورنيك غير أورنيك 15 يعد جنحة يجب ابلاغ الشرطة عن مرتكبها .. أها هسه في الحالة دي نحنا نبلغ لي منو يعنى ؟
كسرة
إنتهي المقال الذي ردت عليه الشرطة بعد عام بالتمام والكمال !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟
[email][email protected][/email]
تسال فى الحاله دى نبلغ لمنو يعنى ؟ اقولك ارفع شكواك وبلاغك للواحد الاحد الذى لايظلم عنده احد . لان بلاغك لايى جهه اخرى سيكون تحصيل حاصل ليس الا
انت يا الفاتح جبرا ما شايف ابراج الشرطة الببنو فيها طوااااالي دي … شي في ابو حمامة و شي في الشجرة و شي في شمبات جنب السوق المركزي و شي و شي ……
تفتكر القروش دي بجيبوها من ويييييين ؟؟؟؟(دي كسرة جديدة )
ما من محمد احمد الغلبان دا ……
حقو تاني ما تستغرب
ولك مني اجمل التحايا ………
الاخ الفاتح جبرا التحيه لك وعلي اهتمامك بقضايا المواطن ولكن الشرطه دايما مدخلننا في حرج والعجب العجيب بما يسمي بشرطة المرور ديل مسوينها ظاهره وما بيستحوا والواحد التقول طالبك دين وغايتو الله يكون في عةن الجميع .
السيد العقيد داير يريسلوا ليه الشخص المبلغ ورقم الايصال ,,,,,,,,,,,, مع انهم قبل ذلك رد المقدم محمد زين ان الموضوع جاري فيه التحقيق …….. دائما الكذاب بنسي كذبته
ياشيخ جبرا ما تعذبنا وتفور دمنا …ياأخى البلدى بقت فتة سااااااااااااكت وجبانه هايصة كان راجى من وراها تانى عدل وصلاح مع ناس المشروع الح…..رامى خم وصر ؟؟؟؟؟؟؟؟؟؟؟؟؟؟!!!!!!!!!!!!!!
مشكورالأخ العقيد محمد عبدالله الدسوقي مدير الأحوال المدنية ببحري لتجاوبو مع المقال اولا
لا يلام الرجل على ما حدث قبل سنتين يمكن ما كان مسوؤل او ما سمع
المهم الان سمع وشاف حا يعمل شنو
إذا كان تحصيل أي مبالغ من المواطنين بأي اورنيك غير أورنيك 15 يعد جنحة يجب ابلاغ الشرطة عن مرتكبها .. أها هسه في الحالة دي نحنا نبلغ لي منو يعنى ؟
## إحنا نروح الإسم بأه على رأي عادل إمام في شاهد ما شافش حاجة مع العلم أننا شعب شاف كل حاجة وعارف أي حاجة . (( كتمت .. كتمت ..ولابد لها أن تتنفس ويرونه بعيدا ونراه قريبا وكان ما عارفين أسالوا الخبير الوطني ))
والله يا استاذ جبرا انت بتنفخ ليك في قربة مقدودة شنو شابكنا اورنيك 15 وومابدفع الا باورنيك 15 يعني خلاص انت متاكد انه اورنيك 15 ده بيحفظ ليك حقوقك والقروش البتندفع باورنيك 15 قاعدة تمشي وين ومنو صاحب القرار في التصرف فيها والبراجعها منو انصحك تشوف ليك موضوع مفيد 0
الشكية لى ابو ايدا قويه يا ابو ناجى
والله يا جبرا مقلاتك كلها بقت شرشر من تحت زي خريطة السودان الانقاذية كدا انت بتتعب وتتعبنا معاك بالواااوات ما خلاص ورق واتفرك قنعنا من بلدنا
أخوى جبرا تحية و إحترام,يعنى انت داير لما يكون فى مناسبة سمايه ولا طهور ولا بكا زوجات الباشاوات ديل يمشن المناسبة مبشتنات, لازم من البهرجة و كده, لو كانت زوجة جندى دى دايره حاجات بى خمسمائة الف جنيه, و لو زوجة ضابط بى مليون و ما فوق, واما لو الباشا مركب مكنة لواء أو مركب مكنة وزير فدى بتمشى دبى تلقط حاجاتها براها, و بعدين ما فيها حاجة إطناشر جنيه ولا عشرين ما نحن شغالين بالشعب فى خدمة الشرطة.
هو المشكله يا اخ ياسر عبد الصمد كان رسلو ليهم الشخص المبلغ ورقم الايصال دا اكيد مش عشان يحلو ليهو مشكلتو طبعا ولا عشان يقدمو ليهو اعتذار لكن عشان يلمو فيهو وهاك يا تحقيق انت شغال شنو وانت منو وانت جبت الكلام ده من وين وانت ياذول عاوز تطلع الشرطه حراميه وانت معارض للنظام و كمان بتمشي تشتكي لي ناس ( الفاتح جبرا ) وووووو سين وجيم لمن يكروهوا اليوم السأل فيهو من حقهو وما بعيد كمان يحاكموهو بماده او مادتين وانت عارف ديل بسووها مالبلد فوضي ساكت .
إنت بس يا الفاتح جبره عينك في الفيل وتطعن في الضل….
مرة قرينا نعي لي واحد جندي في الشرطة توفي لرحمة مولاه ولكن تم نعيه بطريقة وكأنه مدير عام الشرطة وتدخل بعض الخبثاء أو قل الظرفاء ليشرحوا لنا سر ذلك النعي لذلك النفر العادي من الشرطة وذلك بأن المرحوم كان يدخل مكتب كبار الضباط ويسألهم من جوازاتهم ثم بعد ذلك يذهب ويستخرج تذكرة من أي وكالة سفر ثم يذهب لبنك السودان ليستخرج لذلك الضابط الدولارات المصرح بها لموظف حكومي في مهمة رسمية من بنك السودان ويعود ويتناول الفيها النصيب من الضابط الكبير… وهكذا… ولما توفاه الله خرجت كل وزارة الداخلية في وداع الدولارات الساقطة ونعيها في صفحة كاملة في كل الصحف السيارة بإسك ذلك الجندي الخدوم يا عمك جبره….
سعادة العقيد معذور يا جماعة يكون منقول جديد و عاوز يوري انه شايف شغله !! بس دخل غلط علي شارع الصحافة و جبرا دون ان يبحث في لجانه القديمة.. ومن بينها لجنة المقدم محمد زين ..
مهاجرالكلام دا والله شفتووو وسمعتووو هههههههههههههههههههههههههههههههههههه
والله اذا في حد الي يومنا هذا بفتكر ان الشرطة هي التي تسهر على سلامة وامن المواطن والوطن يكون موهوم .قرات الكثير عن تجاوزات تحدث من افراد في الشرطة يشيب لها الراس ضباط صغار يمتلكون عمائر ومنازل فخمة من اين لهم هذه واستهتار وتعامل غير لائق مع المواطنين عندما تتوجه لانجاز اي معاملة في الشرطة ويكفي ان كير من المواطنين اخذوا البصمة ووسافروا الي مناطق اخرى يتم الاتصال عليهم بعد اسبوع وبمنتهى البساطة بصمتم ماواضحة تعال تاني وكان هذا المواطن بجاورهم هذا غير الجرائم الغريبة التي ترتكب وكثير ما نقرا نظامي فعل ونظامي عمل قوموا لموها بلا نظامي بلا بطيخ
الخرطوم:عزالدين أرباب: وجهت محكمة المال العام ببحري، اتهامات تتعلق بتزوير مستندات وانتحال صفة موظف عام واستلام مال مسروق لـ«9» متهمين بينهم نظامي اشتركوا في اختلاس اكثر من 4 مليارات جنيه من مستحقات المعاشيين من خزينة التأمين الاجتماعي للشرطة.
والمتهمون التسعة احدهم صاحب مكان لتصوير المستندات وبينهم نظامي شاركا في تزوير مستندات واستغلاها في صرف اكثر من 4 مليارات جنيه من خزينة الشرطة بالتعاون مع اخرين مدنيين.
ووجهت المحكمة في جلستها امس برئاسة مولانا معاوية عبدالقادر، الي المتهم الاول تهمة استلام مال مسروق قيمته 198 الف جنيه، كما وجهت الي المتهم الثاني تهمة الاشتراك الجنائي وانتحال صفة موظف عام واحتيال واستلام مال مسروق (42.448) الف جنيه نقدا واستلام شيكات بمبلغ 96 الف جنيه ،كما وجهت المحكمة الي المتهم الثالث تهمة استلام مال مسروق قيمته 44 الف جنيه ، وإلى المتهم الرابع ايضا استلام مال مسروق بقيمة 78 الف جنيه ،وإلى المتهم الخامس ايضا تهمة استلام مال مسروق بقيمة 22 الف جنيه كما وجهت للمتهم السادس ايضا تهمة استلام مال مسروق قيمته شيكات بمبلغ 110 الف جنيه والي المتهم السابع ايضا تهمة استلام مال مسروق عبر 4 شيكات بقيمة 88 الف جنيه، والي المتهم الثامن تهمة الاشتراك الجنائي والتزوير، والي المتهم التاسع والاخير تهمة استلام مال مسروق بقيمة 20 الف جنيه.
وحددت المحكمة السابع والعشرين من الشهر الجاري لمواصلة الحكم في القضية. ……..الرد الرد بالسد……بالقد والجكاية أصبحت ما بتترقع ولا يحزنون قومولا ألى ثورتكم….يا ….
عادى يا جبرة انت اظنك ما شفت البيحصل فى الولايات – فما يحصل فى الولايات تقشعر له الابدان قلة ادب ونهب عينك عينك – ورشاوى بالجملة ومحسوبية ضاربة ؟.
شرطة فاسدة …….حكومة فاسدة ….. دقون فاسدة ………… كهرباء قاطعة يعني ملاح فاسد ,,,,فساد فساد……….نكورك نصيح نقطع ثيابنا …………نعمل شنو يا جماعة
أخي جبره ، كم أنت جميل بوقوفك مع المواطن المغلوب علي أمره مع ضنك العيش الذى جبرنا عليه ، وفيما يختص يختص بتعليل القائمين علي أمر جباية هذه الدمغات من غير أيصال رسمي ، فقد عرفنا منذ نعومة أظافرنا أن الدمغات المفروضه علي كل شهاده أو أى مستند كانت هذه الدمغه تلصق بالأوراق الثبوتيه التي تستخرج في شكل طابر بريد بالقيمه المحدده ، فأين نحن من تلك الأزمنه ؟ .
ياجبره اكتب مقال جديد قول ليهم خلاص ياجماعه انسو القديم والضربتو والسرقتو تعالو افتحو صفحه جديده وخلونا نحس بان عندنا بلد ماشه لقدام بلاش الغشغيش والله اتحيرنا ياجماعه اسي القروش البشيلوها بتاعت الاورنيك والدمغات لو في خدمه المواطنما في مشكله بس داخله جيوب الجماعه الطيبينانا قاصد الحراميه ياناس دي احلوها كيف
تصدق أو لا تصدق القنصل السوداني في الرياض قام بتجديد جوازات سفر لمواطنيين سودانيون يحملون جوازات خضراء عليها صقر الجديان وفي ضواحي القصيم بالتحديد بدون أي ايصالات ولما سأل عنها ؟ قال تسوي بهاشنو الايصال الجواز مش مجدد خلال.
وأقسم بالله هذه حقيقة، وبعد نهاية عمله في الرياض عمل له مهرجان تكريم!!! لاخلاصه وتفانيه في آداء مهامه بتمكن واقتدار.