الليلة الشمار حااااااار

شمارات
بابكر سلك

*كل الدنيا عرفت منو الفض الاعتصام
*إلا لجنة مولانا أديب لسه ماعرفت
*لكن مصيرها تعرف
*وفي ناس في الشارع العام عرفوا حتى منو الكان عارف وعمل حميل
*بل عرفوا منو الكان عارف وبارك
*بل عرفوا أكتر من كده
*بل ساي؟
*بل وبل وبل
*هتلر لما انتهى انتحر
*حفاظاً على كرامته وعدم جرجرته وإهانته
*خت مسدسو في راسو وعرف خلاصو
*طااااااخ
*بلغ الآخرة على طول وجمع في طابور الأموات
*فهل يا لجنة نبيل نتوقع قراراً يسمعنا رصاصات في المكاتب تنطلق من مسدس سيدها على الراس عدل؟؟؟

*كنت أتشوق لأعيش يوماً بعد سقوط البشير
*حتى أرى الافتراء ولحس الكوع والماعاجبو يمرق الشارع بتعمل شنو
*الآن أدفع نص عمري لأسمع قرار لجنة أديب
*بعد داك إن شاء الله القيامة تقوم
*ومافارقه معانا
*أسي نحنا قيامتنا ماقايمة؟؟؟
*السخانة براها قيامة
*الكهربا أسكت بس
*وبمناسبة الكهربا دي
*أنا مامقتنع بأنو العذاب ده سببو ضعف التوليد
*توليد شنو
*كهربتنا دي لو عملتوا ليها حقن مجهري كان ولدت
*القصة قصة ضعف إدارة
*والحكومة الانتقامية أقصد الانتقالية لي أسي لا أنقذت اقتصادنا ولا اشتغلت قصادنا
*وما أعدت للانتخابات
*يبقى قاعدة الزمن ده كلو بتسوي في شنو؟؟؟
*قول ياحمدوك استلمت بلد مافيها ولا توربينة
*وفقيرة طالع أقصد طالعة عينها
*الزمن ده ماكان ركبنا إن شاء الله توربينة وغرسنا محصول في طينها؟
*ماكان أسي نكون خالفين كرعينا!!!!
*كل الأعذار ما أكلت فينا
*كل المكنات ماقسمت لينا
*صينية المواطن هي جهاز كشف الحكومات الجيدة
*زي جهاز كشف الدهب
*مروحة المواطن دايرنها لافة في سقف الغرفة مابتقيف
*موش المروحة واقفة والمواطن لافي مروحة
*أيها الناس
*تلتين سنة الأحزاب بتاعتنا ماقالت بغم
*يعني الناس العمرهم أربعين سنة الليلة مابعرفوا حزب يعني شنو
*لاقاكم حزب بعد سقوط البشير عمل ندوة أو نشر نشرة أو شرح للشباب ديل حزب يعني شنو؟؟؟
*ولا مشغولين كحاضنة
*حاضنة على بيض ماملقح

*الجدادة الحاضنة بعد واحد وعشرين يوم بتنتج للدنيا كتاكيت يسهمون في رفع المعاناة عن كاهل أصحاب البيت
*انتوا حاضنين حجار ياكافي البلا؟؟؟
بابكر سلك:
*يا الحكومة بشقيها
*ياحاضنة الحكومة المدنية
*خليتوا الشعب يغني مع القلع عبدالحفيظ
*إن شاء الله القيامة تقوم
أها
*نجي لي شمارات والي الخرتوم
*كان شفت يا والينا
*كتمت لامعروف فيكم أم فينا
*ولكنها كتمت يا والينا
شمارات الكلب
ننساك كيف والكلب قال ده موش ياهو نفس الشعب الكان بغني مع وردي حنبنيهو!!!
وإلى لقاء
سلك.