حمدوك يصل كاودا وسط إستقبالات شعبية حاشدة

يا اخونا جميل بثينه ، في حاجه فائته عليك خالص بخصوص منطقه كاودا و علم الحركه اللي شفتو متضايق منو دا . في حاجات ينبغي انت تعرفو و بالمنطق كدا :
– اولا كاودا دي كانت و لم تظل خارج حكم المركز و اعني دوله السودان و بعلمها المعروف دا و لسنين مش هسي و مش من زمن جون قرنق و من قبله من زمن يوسف كوه ، و مش كدا كمان المنطقة مهجورة من قبل المركز منذ الخمسينات و هي خارج منظومه المركز لسنين و ما فيها حاجه كدا عملوها كويسه ناس المركز بذكرك بانها تابعه للمركز علي الإطلاق ، حتي ميزانيات الدوله كانت ما بتحسبها تماما جزء منها حتي قبل نشوب الحرب ذاتها و غير مذكوره أصلا و لا أصلا في حاجه بذكر الناس اللي هناك بالخرطوم غير قنابل الانتنوف صباح و مساء ، طيب جهه تحت علمها كانت تسير جيوش جراره و تقذف فيهم بشكل اشبه الي الاباده الجماعيه و دبابات و طائرات كانت تحمل علم المركز و نازله فيهم تدمير. و تقتيل لسنين . بالله بالمنطق كدا و كمان قبل اي اتفاق سلام يرد ليهم اعتبارهم في زول واعي كدا فيهم يقدر يرفع علممركز بسببه عيالهم قتلوا و شردوا و نساءهم أرملت و ثكلت امهاتهم ساكت كدا .
– ثانيا ، انت عارف كويس المنطقة لسه منطقه حرب بدليل تمديد فترات وقف العدائيات كل ثلاث شهور و لسه ما ذال هناك جنود مرابطين في خنادقهم من كلا الطرفين و كل واحد فيهم رافع العلم اللي مقتنع بيهو و بيحارب من تحت امرته ، طيب كيف ح تضمن تصرف عسكري قابع هناك في خندق و ما جايب خبر و فجاه يشوف ليهو عربيه رافعه علم الجهه اللي بتقاتل فيهم ، دا في حد ذاته ما بجيب هستيريا العسكريه للجندي دا اللي ح يمسكوا جنون المعارك و ح يقوم يعبي في العربيه دي صاروخ و يجيب خبر الناس اللي فيها . ، مش احسن يطمئن انو دي عربيتهم اللي جايه بالعلم من بعيد .
– ثالثا زياره السيد رئيس الوزراء لكاودا مش زياره دوله لدوله مستقله حتي يرفع العلمين لإظهار سياده كل طرف عن الآخر و إنما زياره تعزيزيه لمساعي السلام و تزويب المرارات و الآلام اللي نتجت من هول عمايل الكيزان الخبيثة بالمنطقة و العنصريه البغيضه التي مورست هناك بكل بجاحه و استعلاء اجوف ، و أوجدت المرارات عميقه دي في وجدان الناس اللي هناك بصوره ما ممكن زول يتصوروا وهو جالس مرتاح في الخرطوم ، الناس اللي هناك حساسيه نظرتهم لعلم السودان اللي ما يوم جابت ليهم خير و بالعكس جابت الموت من وراها لسنين سببت ليهم عقده زي عقدتكم لرويه علم إسرائيل مع انو إسرائيل ما كتل فيكم زول زي الكيزان و مع دا انتو بتكشو في علمهم بالنفسيات ساكت من شغلهم مع الفلسطينين . بس هسه نفس الشعور اللي بجيهم من علم المركز ، عشان كدا زياره السيد حمدوك دا مش مجرد زياره و إنما علاج اجتماعي لازاله مضاعفات الحرب الاجتماعيه و تهيئتهم للرجوع الي حضن الأم . بعدين حتي في الاسره الواحدة ساكت اذا الوالد كان ظالم و بيعامل أولاده مش بإنصاف بحيث يحابي الباقين علي الآخرين و بيظلم واحد فيهم ، أكيد الولد المظلوم دا ح يتفش من البيت و اكيد ح يكره اي شي بيرمز للبيت دا كلو كلو ، الا اذا الوالد راجع نفسو و حس بظلمو ليهو و تواضع مشي ليهو و طبطب عليه اكيد ح يزيل منو الكره اللي الوالد ذاتو بنفسه زرعو فيهو .
عشان كدا يا اخوي حلل موضوع العلم و الناس اللي حولوا بموضوعيه اكثر و ح تلقي اللي عملوا كان ما فيها اي حاجه و بالمنطق اللي هناك عادي جدا و مفروض كدا بس من غير حل تاني و من غير اي شائبه . و دمتم .