القصة ما قصة جنوب
ساخر سبيل
القصة ما قصة جنوب
الفاتح يوسف جبرا
أول أمس إنفصل (الجنوب) .. هلل البعض لإنفصاله .. قال البعض: (يغور في ستين داهية الجنوبيين ديل هم الأخرونا ) !! هكذا قام البعض بتحميل الجنوب مشكلة فشلنا (وحالنا المايل) الذى لا تخطئه العين !
كما إستمعت إلى إمام أحد المساجد يقول فى خطبته : بعد انفصال الجنوب لم يعد هنالك عذر لعدم تطبيق الشريعة ! وكأن (الجنوب) هو من كان يعطل أحكام الشرع !
العبد لله يقول بإنو القصة ما قصة جنوب .. القصة قصة (جيوب) .. قصة ضمائر .. قصة تطبيق لمبادئ العدل والنزاهة والمساواة تلك القيم التى أرساها ديننا الحنيف .. وعشان ما نكون بنتكلم (سااااكت) أقرأوا معى خبراً نشرته الزميلة (الصحافة) قبل أقل من شهر يقول :
هدد مواطن تسلق صهريج المياه بمستشفى أم درمان بأن يلقي بنفسه من أعلى، اذا لم يحضر والي الخرطوم ويحل مشكلته.
وعلمت «الصحافة» أن المواطن الذي يقيم بمنطقة الثورة الحارة «75» حضر أمس الى مستشفى أم درمان بغرض اجراء عملية في الفخذ لابنه البالغ من العمر خمس سنوات، وبعد الفحص رفض الطبيب المسؤول أن يمضي في التقرير بحجة أن والد المريض عجز عن دفع مبلغ رسوم العملية «مائة جنيه» ،ما أثار الغضب بداخله وتسلق صهريج المياه، وهدد بأن يلقي نفسه من أعلى اذا لم يحضر والي الخرطوم ويحل مشكلته .
وأكدت المصادر، أن الشرطة هرعت الى مكان الحادث بعد تلقيها بلاغا، وأقنعت المواطن بالنزول، وأحضرت له التقرير وعليه امضاء الطبيب وبعده اقتيد الى قسم الشرطة ودون بلاغ في مواجهته بتهمة الشروع في الانتحار.
وتعالوا معى لنقرأ ما صرح به (مؤخراً) السيد وزير المالية لرؤساء تحرير بعض الصحف السياسية اليومية بعد أن تمت إماطة اللثام عن دفع الدولة لمبلغ (32.391.70) دولار أمريكي .. (اثنين وثلاثين ألفاً وثلاثمائة واحد وتسعين دولاراً وسبعين سنتاً) وذلك لعلاج (طبلة أذن) ابنه (عمر) بإحدى المستشفيات الأمريكية لنقرأ (إفادات السيد الوزير) يعقبه تعليق (العبد لله) .
الوزير : لم أطلب من جهة دفع فاتورة علاج ابني !
العبدلله : مصدقنك يا سعادتك .. الحكومة في الحاجات بتاعت المسئولين الزى دى بتشتغل (فل أتوماتيك) يعنى يمرض ليك زول تلاقى الفاتورة (منها وليها) ادفعت على طول..
الوزير : قطعت تذكرة السفر لابني ووالدته بالدين.
العبدلله : يا حرررام … بالله إنتو زينا كدة برضو بتتزنقو وكمان بتتدينو.
الوزير : من يملك دليلا على تورطي في شبهة فساد فعليه التوجه إلى رئاسة الجمهورية وتقديم شكوى ضدي.
العبدلله : العفو يا سعادتك .. مش ولدك ده مشى (القمسيون) الطبي وقالو ليهو لازم تسافر عشان مرضك ده هنا مافي ليهو علاج وكلو شئ ولا (طبل أضنين أولاد المسئولين) !
الوزير : إن الوزارة هي التي طالبت بدورها بدفع قيمة فاتورة العلاج باعتبارها حقا كفله القانون ، لاسيما أنه كان في مهمة خارجية.
العبدلله : دى الوزارات وللا بلاش .. الباشكاتب يمرض الوزارة تطالب بتسديد فاتورة علاجو .. المحاسب (عمل ليهو عملية ) تطالب بدفع قيمة علاجو .. والتصديق يطلع على طول بدون أى مساسقة أو لوائح أو قوانين ! وبعدين يا سعاتك (لا سيما أنه كان فى مهمة خارجية ) دى دخلها شنو فى الموضوع ؟ عشان نفهم لأنو مرات فهمنا بيكون تقيل شوية !
الوزير : لم أطالب الوزارة بدفع الفاتورة على الرغم من أنه حق كفله لي القانون !
العبدلله : أهو دى أنا ما فهمتها .. إنتا وزير على العين والراس .. لكن معليش (ما ظنيت) يكون فى (قانون سائب) بالشكل ده ! يعنى عشان إنتا دستوري يقوم المواطن الغلبان يدفع ليهو ما يعادل (مية وعشرين مليون جنيه) عشان (ثقب في أضان ولدك) ؟ إنتا ما شفتا (الزول الطلع الصهريج؟) طلعوا عشان كم جنيه؟
عزيزى القارئ : كما أن السيد وزير المالية عندما واجهه ذلك الصحفي بالزميلة (السوداني) بذلك العقد الملياري الذى يخص السيد مدير سوق الأوراق المالية لم يناقش موضوع العقد بل طلب من الصحفى أن يدله عن مصدره تاركاً أصل الموضوع متحدثاً عن (هامشه) .. (على طريقة ده ما مهندس ده فني ساااكت) .. ها هو الآن السيد الوزير يصرح بأن أحد المستشارين يقف وراء الموضوع من أجل إبتزازه (ياخى يقيف ولا ما يقيف ده ما موضوعنا) موضوعنا هو هل يكفل لكم القانون علاج من هم فى كفالتكم بهكذا مبلغ وأنتم شخصياً تدعوننا لربط وشد الحزام تقشفاً وأكل (الكسرة)؟ وهل إلتزم سيادتكم بأخذ التصديقات اللازمة من الجهات المعنية لهكذا علاج؟ وهل إستوفى ابنكم كافة الإجراءات المتبعة التى يسمح فيها العلاج بالخارج ومن ضمنها تقرير (القمسيون الطبي) وهل لو أن ابنى (ناجى) حدث له ما حدث لإبنك (عمر) سوف يتعالج بنفس الطريقة لا سيما وأن العبدلله ربما يكون حينها في مهمة رسمية ! (أو كما قال) !
كسرة
ما قلتا ليكم المسألة ما بتتصلح .. يا جماعة القصة ما قصة جنوب .. القصة قصة جيووووب !!
الرأي العام
ما أحزنني حقاً هو الأحتفالات والذبائح التي ذبحت أبتهاجاً بالأنفصال …
والمخالفة الصريحة للدستور الذي ينهى عن أشاعة البغضاء والكراهية و والنعرات العنصرية والدينية.
لكن أنشاء الله ما يكونو ما ضبحوها كلها … لأنو في مناسبات سعيدة تانية جاية
الجنوب طار … وفي كم جنوب كده في المطار ( على ذمة عثمان مرغني).
من حلفا لي نمولي من نمولي لي حلفا
مليون فرح ممـــدود علــى حضنو ندفا…
كسرة:
التور الضبحوهو المرة دي لونو أبيض ياربي يكون أبوهو من الحوش:D :D :D
انت حسبتها مية وعشرين مليون كيف ياجبرة ياخي – الولار بقي بي اكثر من
وهل لو أن ابنى (ناجى) حدث له ما حدث لإبنك (عمر) سوف يتعالج بنفس الطريقة لا سيما وأن العبدلله ربما يكون حينها في مهمة رسمية ! (أو كما قال) !
خليك من ولدك يجبرا الله يكملوا ليك بصحتو
انت دا لو اضنيك الاتنين اتقددوا ما بيدوك جنية واحد .
والله صاح القصه ما قصةجنوب ولكن القصة قصة جيوب ولكن الحل شنو؟ الله يعينك يا بلد:lool: :lool: :lool: :lool: :lool: :lool: :lool: :lool:
الوزير استدان ثمن التذكرة؟
! طيب لماذا لم يستدن حق العملية كذالك؟؟
طييب متوقع يدفع حق العملية منو؟؟
;( :lool:
القصة ما قصة جنوب وما قصة جيوب القصة انو ربنا ابتلانا بمن نامت ضمائرهم واسودت افئدتهم فلا ذمة لهم ولا حرمة !!! بلد يحكمه ارازله ويسوسه من لا يفقه في السياسة ولا يعرف كيف يتحدث فيرمي الحديث هكذا علي عواهنه !!! القصة ما قصة شريعة وما قصة اسلام ومسيحية اولا دين؟!! القصة ان من يحكمنا عصابة من اللصوص ومن لا خلق ولا قيم لديهم سوي نفسي نفسي وما عداي فليذهب الي الجحيم فانا الشعب وسيدهم وما انتم الا عبيد لنا نشكلكم كيفما شئنا ؟ ويقف ما يسمي بعزة السودان شاهدا علي خسة هؤلاء ؟يسممون افكار ابنائنا في لحظة تكون شخصياتهم فتري ان الشباب السوداني منذ مجئ هؤلاء العصبة اصبح مسخا مشوها فلا دين قد سلك ولا دنيا قد ملك!!! الفاتحة علي روح وطن كان اسمه السودان
اها يا الفاتح جبرة اقرا الفاتحة علي روحك الكوز دي بيسلط ليك ناس كان جاملوك بينفوك لي الجنوب شيل شيلتك
ما قصة جيوب قصة ضمائر اتسخت والمزعلنا انهم بيتكلموا باسم الدين كاننا ما بنعرف الدين وياريييييت لو بطبقوا عشر ما فى الدين 000ربنا يرحم ويخلصنا منهذه العصبة الظالمه والضاله
والله يا استاذ جبرا أنت رائع
جيييييييوب السودااااان وييييييييييييي ويييييييييييييييي
يااخوي الفاتح كدي خليني من وزير المالية داير اسألك سودانير ماتت مشيت عزيت وله مامشيت الصيوان مضروب خارج صالة الوصول وده كل من امريكا ماسمحت ليهم اجيبو ليها الادوية عشان عندها مرض القلب وامس بقناة الشروق مع الاخت نسرين سوركتي بيناقشو في سبب الوفاء مع صديق برعي والمدير عبيدالله اعتذر لانو مامصدق والصدمة كانت علية شديدة وارجو منك ان توصل تعازي وانالله وانا الية راجعون 0
ياخوي يا جبرة مالك ومال ديل ! خليك في جباياتك وكدة .ديل خليهم لي الله ومن بعده الفاجومي ولله دره :
سنانهم مبارد تفوت في الجليد
ما فيش سخن بارد بياكلوا الحديد يا جبرة من ناس ديلا وا اسفاي
يا سيد الفاتح جبرا عندى سؤال !!!! !!
نما لعلمنا انو حضرة وزير الكسرة طلب من العـامـلـين فى السفارة فى واشنطون يأخـدو ابـنـو ابـو ثـقـب فى اذنه للدكاتره و لم يدفع و لا مليم و الـجـمـاعه هناك اتخاتتوا المصروفات و عشان سيادتو يعرف المبلغ الاندفع سلمو الايصالات التى تم الدفع بموجبها و سيادة الوزير جا و راح ساكى الدلارات هنا و التى تم صرفها من وزارة الخارجيه بالخرطوم لغاية تمن التذاكر القال من جيبو الكذاب ( راجع الخطاب بتاع الوكيل المكلف !!!!)……….يا للدناءة !!!!!!
الناس ركّـزوا على قروش العلاج بس الـــ32400 دولار و نسوا الوزير ذو الدفع الثلاثى بتاع الكسره ماشى فى مامورية رسميه بتاعت يومين تلاته ( و دى عشان نحسب النثريه اليوميه الاخذها و بالتاكيد و لا رجّـع الباقى كما عهدناه الرجل و قالا بخشمو انو عادة ما بيرجع الباقى من النثريه !!!!) طيب ساق العيله ليه !!! و التذاكر كلها بالدرجه الاولى على حساب منو ؟؟؟ و علاج الولد الكان فى الاردن طوّل حسب كلامو لما ساق العيلة لاجتماعات البنك الدولى الاياما المحدودة دى ما كان عامل حسابه انها برضو حتطوّل ؟؟؟؟؟ دا معناه الزول دا شال نثريه مفتوحه !!! يعنى لما يمشى لامريكا كل ما الزوجة تنزل السوق يمكن يمشى معاها صراف السفاره ما ديل حسبما ورد هم الكانو بيصرفو ( و الزول ما قال ساق ياتو زوجه ام الثلاثه عشان يعدل؟؟؟) و بعدين ما ممكن كل الفامليا الكريمه يكونو نزلو فى بيت السفير او الفندق بتاعت الضيافه للبنك الدولى لانهم بيحجزوا بس للوفد الرسمى !!و اللا بيكون كذّب كعادته على الجماعه ديل و قال انو عيلتو كلها الوفد الرسمى؟؟؟
اكببببد المنصرف فى الرحله دى بيكون زى مليار جنيه !!!!! و عشان وزارة الماليه تنفى الكلام دا بس يطلعوا بيان ما تم صرفوا بالتفصيل !!! و اللا يقولو وزارتم دى بقت تكيه للزول بتاع الكسره دا !!!!!
يـــــــــــــــا فـضـيـحـه بـجــلاجـل للوزير الفضيحه دا الدستورى المتدين و المتوضى على راى رئيس البرلمان !!!!!
اي والله كلامك صاح بس نقول شنو ، هم قالو الماعجبو يلحس كوعه ، حرامية وبلطجية :mad:
نقول الى امام المسجد ده والله الحال ماشى الى اسوا اليوم الدولار حصل اربعة جنيهات بركاااااااااات ياالانفصال
هو ياجبرا الناس ديل ما قالوا ناس شريعة سااااكت وهى لله اها ماسمعوا بى قصة أمير المؤمنين عمر بن الخطاب مع ولده عبد الله بن عمر رضى اللله عنهما لمن هدى ليه نصيبه فى احدى الغنائم وكان عباره عن قماش جلابيه عشان أمير المؤمنين ربنا مديه بسطة فى الجسم ونصيبه وحده لن يكفى لجلباب له فسأل نفر من المؤمنين واحتجوا ظنا منهم أن أمير المؤمنين أخذ من الغنيمة نصيب اثنين فقال لهم ان ابنى عبد الله هدى نصيبه لى .هذا الدرس الاسلامى الشرعى المفحم يقول بكل البساطة والوضوح ان المساواة فى الاسلام والحقوق والواجبات لاتعرف وزيرا ولا غفيرا انما الجميع سواسية كاسنان المشط والنمازج الاسلامية كثيرة فى هذا المعنى .لكن انا يقينى انا الله يريد لهذه العصبة التى تدعى الاسلام زورا وهى ابعد ما تكون عنه أقول يريد الله ان يفضحواأنفسهم بأنفسهم فالله عز وجل يمهل ولايهمل وواهم وضال من ظن أنه سيخدع الله أو يدوم خداعه على الناس
والله القصة ما قصة جنوب بالجد القصة قصة ضمييييييييير!!!!!!!!!!!!!!!!!
يا أستاذ جبرا
الموضوع ده نزل فى الراكوبة يوم 5/7/2011
ونحنا ضمَنا تعليقاتنا على الموقع…
وزير بيت مال الإنقاذ يعالج ثقب ( بأُذن أحد أبنائه ) بتكلفة (32.391.70) دولار بس!!!!!
دفعت من حر مال المغتربين فى سفارة البشير بأميريكا.وعند عودته أبرز الفواتير بالتكلفة (32.391.70) دولار تانى من خزينة مال الشعب الذى تم بيع جزء من أطفاله لضيق سعة يد أسرهم فى تربيتهم.
إنت نسيت تذكر تكلفة العلاج الأولى بالأردن موثقة بما يلى:
كيف بدأت القصة؟
– سبق أن أخذت أبني للعلاج في الأردن قبل أن أكون وزيراً للمالية وأجريت له عملية جراحية وبقينا هناك فترة طويلة وجاء الطبيب وقال إن العملية ناجحة وعدنا للسودان، لكن العملية للأسف فشلت وصار الحال أسوأ مما كان عليه وعرفت أن افضل مستشفيات يمكن ان تقوم بعلاج مثل هذه الحالة في أوربا وأمريكا لذلك أخذت أبني معي.
هل ياترى ..الوزير قام بدفع تكاليف العلاج دى وفترة ( الإقامة الطويلة ) فى الأردن من جيبو الخاص؟؟ واللآ برضها دفعا المواطن الغلبان.
أهو ده السؤال….ولازم تبحتوا إنتو الصحفيين عشان تعرفوا الحكاية دى كلفت كم وإتدفعت من وين…مع ملاحظة أنه لم يك فى ذلك الحين وزيراً للمالية
والله لي ساعة اقراء الموضوع من الاول الي الاخر وما لقيت رد مناسب لكن (الله معانا)
ويسلم ليك ناجي
يا خوانا خلو الغرابي ده…. والله مسختوها …. شوفوا أولاد الشمال اليلهفوا ساكت…. ضيعتوا البلد بعنصرتكم…. يعني مافي وزير تاني تكتبوا فيه
ديل اولادهم …اما حريمهم فالواحدة برضوها لما يجو دبلو فيها بفيلا اربعة اوخمسة طوابق باحد احياء الخرطوم الراقية… والعروس الجديدة كمان لما تجى بلتزمو بالعدل غاية الالتزام هنا….ماسالتو نفسكم ليه مابنسمع كع وكف بين ضراير الكيزان زى مابحصل مع ساير الضراير على وجه الارض …سمعت فى احدى جلسات النميمة الكوزاتية ان زوجة والى كسلا راجلها دبل فيها والعبرة خانقاها ….رفيقاتها قالن ليها قطعى فى مصارينك وابشرى واستغلى الموقف لانك انت بعد ده استحقيتى ليك فيلا ولو بقيتى شديدة بسويهن ليك اتنين…الكلام ده قبل سنة والشمار حارقنى اعرف البقى عليها شنو ..وامى لما اسالها عن الشمارات دى بتقولى شمارات الكيزان دى مابقدر ارصها ليكى فى التلفون اصبرى لما تجى الاجازة
This is absolutely disgusting.. This is doomed nation…its just a matter of time before the total destruction
يا اخوانا والله ثم والله البلد دى ما فيها راجل من العينى شايفاهم ديل شغال علشان اشعب
استاذى جبره صراحه فقدتك لى يومين بفتش عليك خفت يكو بيتك طلع مع السودانى الجنوبى لانو بى طريقتك دى الناس ديل حارسموا حدود جديدهللسودان الجنوبى يودوا فيها كل الناس الماعاوزنهم طبعا دا بعد ما يقددو طبله اذنك انتا وولدك
طيب ماتكلموا السفارة فى مصر ترسل لينا الطايوق من البقر عشان نعوس
والله الزول ده بريد اولاده ريده
ده مش نفس الولد اللي بي سببوا وقفوا استيراد السيارت ذات الموديل القديم بي اربعة سنة وبقى موديل السنـة مع زيادة الجمارك 300% في المية ولا كم صححوني المهم ما في النسبه .. سعادتو الوزير بقول ولدي كان سايق احدى هذه السيارة اللي اشتريناها من تاجر وفي يوم ماشي مشوار وتاخر في العوده للبيت وامه قلقت شديد عليه ( يا حراااام ) حننتني …
اها اتصل على الولد
سعادتو : يا ولد تاخرت مالك وين انت .؟
ايوا بابا : انا مع الميكانيكي بشوف لي في العربية بتاعتي .
سعادتو : عربتك مالها متين استلمتها علشان تعطل عليك .
ولد الوزير: ايوا يا بابا فيها عطل بسيط واسي الميكانيكي بصلح ي العطل .
سعادتو : اها خلاص امك دي قلقانه عليك وخليك راكب العربية وشغل المكيف ما تقعد في السخانة .
الولد : خير خير
الميكانيكي : اسمع العربية دي عايزة اسبير كذا.
الولد : بجهل في الاسبيرات … كدي اكتبه لي في ورقة ما انساه ولا اخليك تجيبه لي انت .؟
رجع البيت …
الوزير: اها خير صلحتها
الولد : لا تصليح مؤقت طلب مني اغير الاسبير الفلاني .
الوزير : هممممممممممممم اسبير يعني العربية دي ماسورة طلعت
همممممممممممممم همممم قرار سيصدر ودراسة الموضوع من البيت .
عمك الوزير قشر السفاري بتاع الكيزان ويدور في راسه موضوع خطير ..
قادة الجمارك ، والحدود ، وتجار العربات ، والمغتربين الغلابة .
قرار من الوزير بإيقاف استيراد العربات ذات الموديلات القديمة اربع سنوات من العام الحال ……… واي عربية في الحوش وصلت او اتعاقد التجار لاحضارها ممنوعة وتدلل فورا الموجوده ويوقف الاستيراد خلي المواطنين يركبوا الماسورة اقصد بصات الوالي ينفعوه .
ولا نقاش … ده استهتار عايزين تركبوا الوزير ماسورة وتبيعوا ليه عربية عطلانه ..
وهكذا القرار الذي صدر بسبب الولد صاحب الطبلة المقدوده …
والله يكون في عون الشعب الغلبان
يالفاتح كسرة / ماشفتا الناس الرفعو العلم يوم الانفصال وقالو وطنين ناس ايمان لندن وفرفور وزاكر ندى القلعة وشوية شفع ( صيص ) قالو عشان العلم مايقع ديل هم شباب الجمهورية الثانية الناس الداسو العلم في نجيريا عند الشريف قالو دايرين يرفعو الليلة
يعنى بعد الراتب والامتيازات وبدل السفريات دى كلها ماقدريعالج ابنه يعنى ال
ياود جبره ماتقعد فى علبك ,, كمان عايز تخت ولدك ناجى مع عمر فى سرج واحد والادرج واحد ؟ اول حاجة شوف الفرق فى التسمية انت ولدك ناجى يعنى تسمية حناكيش ,, وداك عمر ماعارفين نرجعه لى منو ,, عمر البشير والا الفاروق عمر رضى الله عنه ,, وفى الآخر هى لله لا لدنيا ولا لجاه ,, وسلمت ويسلم ناجى من الرماية .;) ;) ;) :lool: ;) ;) ;)
عزيزي الفاتح جبرا
خلينا من علاج ود الوزير الكلف 33000 الف دولار ما تشوف لينا الوزير الاشتري فندق قصر الصداقة ب 85000000 دولار ودفع 50000000 كاش وطلب تقسيط الباقي من وين جاب القروش دي؟ ويارب حيدفع الباقي ولا حيكون قرض حسن
القصة قصة ضمير يا أستاذ
على طريقة (ده ما مهندس ده فني ساااكت)
أقول لك يا أستاذ/الفاتح أن كلمة (هكذا) التي مرت بالمقال في موضعين دي ما حقتنا ولا فصيحة …معليش خاطبنا إما بدارجيتنا السودانية أو بالفصحى العربية لكن لبناني لا وألف لا والأفضل أن تستخدم مكانها كلمة (مثل)
أتمنى أن يجد إعتراضي العناية من جنابكم ودمتم سالمين