جديده لنج
ساخر سبيل
جديدة لنج !
الفاتح يوسف جبرا
(ما حأرد عليهو، وما حأشتغل بيهو كتير، وما حأفتح فيهو بلاغات زي ما قاعد يعمل معاي، أنا أصلاً ما عندي وقت للكلام الفارغ دا) .. عندما قرأت هذه العبارات كنت أعتقد أنها للمطربة (عوضية عضلات) تقصد بها شاعر أغنياتها (حسن كلتشات) الذي ظللنا نتابع قصته معها عبر الصفحات الفنية وملاحقته لها مطالباً بحقوقه (الفكريه) عن أغنيته التي طالبها بالتوقف عن ترديدها والتى يقول مطلعها :
يا حبيبي طالعني في الخلا … أنا مما شفتك جبتا ليا الجلا !
لكن بعد إكمال القراءة إتضح للعبدلله بأن المسالة ليست بين (عضلات وكلتشات) ولكنها بين مسئولين حكوميين على قمة الجهاز التنفيذي ، فالكلام (الفوق ده) قائله هو وزير الإرشاد والأوقاف د خليل عبدالله والزول القاعد يفتح فيهو بلاغات (كما قال) بالطبع ليس الشاعر (حسن كلتشات) بل هو الأمين العام السابق للوزارة د. الطيب مختار !
جاءت تلك الجزئية خلال حوار اجرته صحيفة الإنتباهة الصادرة يوم 16 مايو الجاري مع الدكتور خليل عبد الله وزير الإرشاد والأوقاف حول تقريره الذي أدلى به أمام البرلمان والذي كشف فيه عن تجاوزات خطيرة قام بها الأمين العام السابق لديوان الأوقاف .
وعلى الرغم أن تقرير الدكتور خليل عبد الله وزير الإرشاد والأوقاف قد إمتلأ بالتجاوزات الإدارية والمالية (ملايين الريالات وكده) والتي أفاد بأن الأمين العام السابق قد قام بإرتكابها إلا أن هنالك شيئاً واحداً في التقرير قد إستوقفني ألا وهو عقد الأمين العام السابق للأوقاف والذي بموجبه كان يتقاضى مبلغ (60) ألف ريال سعودي(بالخارج) و(40) ألف جنيه (بالداخل) وقد تضمن العقد المزايا التالية: أربع تذاكر سفر للخارج بدرجة رجال الأعمال نقدًا (لم تحدد محطة الوصول) ، إضافة لتكلفة الإنترنت للاستعمال (الشخصي) والرسمي، وإعفاء من ضريبة الدخل الشخصي و(الزكاة)، عربة أو بدل عربة (3) آلاف جنيه شهرياً !
لم تستوقفنى حكاية 60 (بره) و40 (جوه) ولا بقية المخصصات فالراجل برضو يستاهل (المية وشوية مليون في الشهر) المعفية من الضرائب وكمان معفية من الزكاة (يطرشنا ما سمعنا بالزكاة المعفية دي) فهو مؤتمن على ملايين المليارات الموقوفة لله تعالى والإنترنت الشخصي !
طيب أيه إستوقفك يا جبرا ؟ أقول ليكم .. بس (كالعادة) أي زول يخلي بالو من (مرارتو) وكمان لو عندو الأمراض الكلو مرة بنقول عليها ديك يقوم ياخد حبوبو وكده !
طيب بعدما إطمأنينا عزيزي القارئ إنو مش ح تجيك حاجة نقول ليك ماذا إستوقفنا؟ لقد إستوقفنا أن هذا العقد الموقع بين السيد وزير الإرشاد والأوقاف السابق (أزهري التجاني) وبين الطيب مختار الأمين العام السابق ينص على أنه لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين (أيه الحلاوة دي؟) !
العبد لله يعتقد بأن هذا )البند( من شانه أن يدخل وثيقة هذا )العقد( إلى موسوعة جينيس للعقود )الكتامية( إذ لم وكن وصن وبن وهن وكف ولن يحدث في تاريخ الحكومات البشرية أو حتى (الشيطانية) منذ أن خلق الله الدنيا وحتى يرث الله الأرض أن إحتوي عقد عمل بين (موظف) و(حكومة) علي بند ينص على أنه لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين !
معليش عقد يخص (جرسون) وسيد (مطبخ) .. ممكن ، فران وسيد (طابونة) .. ممكن ، فنان و(عريس) .. ممكن ، سواق وسيد (أمجاد) برضو ممكن .. اهو كووولها عقود (شخصية بحتة) والإتنين مخيرين يكتبوا العاوزنو فيها ، لكن حكاية موظف (حكومي) وعقدو (سر) بين إتنين (دي ما أدونا ليها ) وجديده لنج !
كسرة :
يوجد خطأ في صياغة البند إذ يقول : لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين ! والصحيح (أن يطلع طرفاً رابعاً) عشان الله موجود وشايف العمايل المهببة دي !
كسرة ثابتة :
أخبار خط هيثرو شنو(ووووو)؟
أصح ماقال الترابي بعد خرفه أن الفساد فى النظام دا سرطان لا يمكن علاجه والحكومة لا تشعر بأي حرج من كشف الفساد بس وقف النشر وتشكيل لجان السؤال أين علماء السودان الشغالين بالفارغة وعينهم فى الفيل؟والله النظام دا محظوظ لان الحركات المسلحة الهمجية وتحالف كاودا وباقان هي من تحميه من غضبة الجماهير التى يئست من إصلاحه ولك البديل أسوأ
لاتعليق ياأج جبرة أكتر من أقول :ربنا يخليك لينا يا أخى الفاتح وتورينا نحنا الغلابة المساكين عن البيحصل من وراناونحناماجايبين خبر….حسبنا الله ونعم الوكيل فيك يابشبش
اخبار ابوقناية شنو ما سمع بالحاجات دى .
ما وداها لبشبش مالو.
عليك الله ياجبرا الكلام دا جد ولا هزار ز
دكتور خليل و دكتور الطيب……. دكاترة … حكومة متخلفة زي الانغاز دي مليانة كترة دكاترة و بروفيسورات.. الله يرحمك دكتور محمد احمد محجوب الله يرحمك دكتور مبارك المغربي الله يرحم السودان والسودانين من الانغاز والانغازيين وحسبنا الله ونعم الوكيل
الزويل ده راجعو ملفه منذ ان كان فى ديوان الخدمه والاصلاح الادارى و فجاة اتحول لشركة سوداتل كموظف فى ادارة الموارد البشريه ويوم ورا يوم بقى اسم ورا امور كتيره وطلع بشوية عمارات فى الفتيحاب وقصاد حمد النيل ……..واتحول ل مو بيتل الاتباعت بتراب وشها وبقت عالم جميل وبدا رحلة التراجع حيث تم تخفيضه الى وكيل للعمل وانتهى به المقام مديرا للاوقاف السودانيه عمل دكتوراه فى الغسل ومنح بيت فى حى جاكسون قبل الكسير بيعزم فىه الخيريين كتير من التعينات كانت بتعبر عن خبرته فى ادارة الموارد البشريه و ما فى زول يغلط يقوم يشبه باحمد غز المصرى خاصة ناس الجبهة الثوريه الحاقدين على الكوادر الانقاذيه الرفيعه
هوووووووووووووووى يا الرائع روعة النيل يا القاعد فى ضفاف النيل مالك ما عارف فى الانقاذ شفنا العجب والصيام فى رجب والله جماعتك ديل ورونا الما كان على بال دحين الناس ديل ما قالوا ماشين بشرع الله والزكاة من المصارف الثمانية كيفن عفوه منها سترك يا رب العالمين اللهم نسألك الرحمة والصبر اللهم لاتؤخذنا بما يقوله السفهاء منا
عليك الله نقول شنو؟؟؟ الله يعوضنا ويصبرنا
انت البتاع البتشربو دا قاعد تجيبو من وين؟؟؟
المطلوب مننا نحن الشعب الفضل هدم هذا الوثن بأعجل ما يمكن ، الخروج على هذا الفساد واجبنا جميعاً ً..
عاااااااااادي يا سعادتك!!!!!!!!! زواج عرفي و كده؛ إحنا ناس الحكومه و ريتنا في بيتنا و الماعاجبو يشرب من البحر
كســـــــــــــــرة
ده كــــــــــان لقى البحر زااااااااااتو!!!
لكن ياجبرا فكرة العقود الكتاميه دى اكيد وزير الاوقاف ده مستمدها من وزير وزاره تانيه ووزير الوزاره التانيه برضو حيكون مستمدها من وزير بوزراه أخرى ,لانو بتعاملوا بفقه المعامله على مفسدة المال العام
لك التحية الاستاذ / الفاتح على هذا المقال وكثر من الكسرات عشان يكون المقال
هادف وجميل وساخر وووووووو( وماطنشونا وكدة ) ووووو
وحتي لو عرف طرف رابع حيعمل إيييييه يا جبرا ؟؟؟؟؟
تسمع كتير وتشوف كتير في البطيخ
ابليس الكبير زاتو
برضو لابد من زيادة سعر المحروقات ( رفع الدعم)
ومال دول يصرفوهم من وين
وماخفي اعظم
وماهذا الا مولانا بتاع اوقاف
والخطير لي قدام وماخفي اعظم
بكرة حيكونوا ليه لجنة بموجب فقه السترة
ويكتوي بها المواطن
ياجماعة الموضوع زاد عن حده ولاشنو
هل ترون ضرورة ان يتدخل المواطن
ولا نديهم فرصة اخيرة
المصيبه نحنا ما فضل فينا لا مراره لا كلاوى ولا غيون ولا عقول ولا غيره,الجماعه ديل يا اخوى بقونا نضيفين لكن الله فى ويمهل ولا يهمل ,ويما تعيش يا جبرا ياما تشوف جديد
كسره
اخبار خط هيثرو شنووووو؟؟؟
حبيبنا جبرا البلد والله سائبة عديل و ما عندها وجيع و الجماعة ديل طبقوا فينا نظريات السرقة على المكشوف و كل واحد قبض ليهوا مكان يلحس و يلحس و لمن يلهث من كترة اللحس و يصل العظم يدوهو فخده سمينة تانية و عيييييييييك … فى الأول كنت بغضب لمن اسمع واحد سارق لكن اتضح النظام كلووووو سياسته ، لحس الكوع للزينا كده و لحس الثروات و خيرات البلد للزيهم كده ، و ما الــ60 الف البرا و الــ 40 الجووووه و الحتحات المعاه من سفر و لبس و سيارات ، المصيبة اكبر من كده ملايين الريالات شالوها عدييل قوة عين ، وذكرت قبل كده فى الموقع ده البحث عن عمارة وقف بمكة و بتدخل مسئول كبيييييييييير قدمت مستندات بملكيتها لبنك التنمية الأسلامى بجده لقرض بمبلغ 20 مليون ريال وووين رااااااح الله يعلم و دخل فى فقه السرية ..القصة طوييييلة حبيبنا جبرا و يحلنا منهم الحلا بله .
مبلغ الستين والاربيعين يعنى بالقديم والا بالجديد؟؟ خدنى على قد عقلى .. يعنى تقصد 40 مليون جنيه؟؟ اذا كان نعم طيب رئيس الجمهورية راتبه كم؟؟
أهاهاههههههااههااههه والله ظابط لكن يعنى نحن لاعندنا أفندية لا مشايخ دين كلو فى الهوا سوى ياكافى البلا وياحايد المحن طيب نثق فى منو كان ديل هم بإعتبارهم غدوة واهل دين وريسوهم على أهم وزارة وحساسة جدا لمكانتها الدينية ؟؟!!! أعوذ بالله !!
وبعدين لمتين انتو تكتبو ونحن نقرأما خلاص نتوحد نحن الشعب الفضل عشان نشوف مخارجه يا ليهم يا لينا
” وإعفاء من ضريبة الدخل الشخصي و(الزكاة) ”
س: هل الزكاة حق الله أم حق البشير ؟ و باي حق يعفى الرجل من الزكاة اذا كان القائمون عليها يعتقدون أنها حق الله و هل يصرفونها كما حكم الله سبحانه و تعالى في سورة التوبة؟
و لماذا يأخذ ديوان الزكاة زكاة على الراتب حتى لو كان صاحبه مطالبا بديون ثقيلة؟
اخوي الفاتح أنا ح ارفع عليك قضية لانك حذرت الناس المريضة قبل قراءة المقال ولم احذر الاصحاء انهم معرضون للمرض بعد قراءة المقال وحيث انني بعد المقال شعرت بارتفاع في الضغط والسكر وفقع في المرارة فسأقوم بارسال فاتورة العلاج لك ولن اقبل الدفع بالجنيه المعوم والا فالمحاكم بيننا
الفساد – الظلم – المحسوبية – العنصرية = نظام البشير …!!
تعرف يا استاذ الفقع مرارتى اكتر مش موضوع السرية فى حد زاتو لكن طريقة و صيغة بند السرية.يعنى لو قالو (هذا العقد يعتبر من اسرار الدولة و لا يحق لاحد افشاءه) كان تكون حلوة شوية ( هم ديل خلو فيها حاجة حلوة؟؟) لكن موضوع (لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين) دى الهوبة القلبوها فيها مهند الطاهر زاتو ما بقدر يعملها.لاحظ معاى كلمة (الطرفين), يعنى الوزارة دى حقتنا برااااانا و نعمل فيها الدايرنو حتى من غير علم باقى الحكومة ( ابو الاقطاعية زاتو).
فتحة( وكبيرة كمان):-
موضوع اعفاء الزكاة ما بينفع معاهو الكسرة عشان كدة كتبنا فتحة كبيرة.الناس ديل وصلو مرحلة انو يعفوا الدايرنو من عبادة من عبادات الله و احد اركان الاسلام الخمسة (( و فى اموالهم حق للسائل و المحروم)). يا ربى بعد كدة حيعفو الناس من الصلاة والصوم وووو ((استغفر الله العظيم))
100( مليون غير الحوافز البدلات وتذاكر السفر النقدا ده الراتب ولا بلاش ) وبعدين الطرف الأول ده عرفناه ياهو الوكيل الطرف الثاني ده منو ؟ طبعا مفروض تكون الوزارة وليس شخصا آخر وطبعا الوزارة ما ممكن تقدر تتكلم بتفاصيل العقد لأنها من غير الناطقين وطبعا الوكيل مستحيل يتكلم بي عقد زي دا ولا في الأحلام وانا داير اعرف الشي الميز الوكيل ده بالذات دون الوكلاء كلهم في العالمين العربي والاسلامي انو يكون عقدو سر من الاسرار الكونية حاجة تمخول وحكاية الاعفاء من الضريبة دي عرفناها لكن الزكاة ذاااتها ولي مسئول في وزارة الشئون الدينية والأوقاف والحج والعمرة مسئول زي دا يقابل ربنا كيف وهو يأخذ من اصحاب الرواتب والأكشاك وسواقين التاكسي بالله عليكم ديل يقولوا عليهم شنو؟ حسبنا الله ونعم الوكيل
صلت «الإنتباهة» على تقرير المراجع العام ووثائق خاصة بقضية الفساد في وزارة الأوقاف وبتفاصيل عقد وزير الأوقاف السابق أزهري التجاني والأمين العام للأوقاف الطيب مختار.. والذي بموجبه:-
1- كان يتقاضى راتب شهري قدره 60 ألف ريال بالسعودية و40 ألف جنيه بالسودان ..
2- قام بإعفاء نفسه من ضريبة الدخل الشخصي والزكاة ..
3- قام بتغيير الأوراق المروّسة للأوقاف والختم وإلغاء اسم الوزارة من ترويسة الأوراق الرسمية للأوقاف ..
4- تقاضي 633 ألف ريال سعودي من إيجارات الأوقاف السودانية بالمدينة المنورة ..
5- استدان مبلغ 6.4 مليون ريال سعودي من الحج والعمرة لتجميع أوقاف الخارج، وبدأ في استلام المبلغ بتوريده 1.3 مليون ريال لحسابه الشخصي ..
6- أظهر المراجع العام في تقريره أن الوزير بدد ما قيمته 2.229.705 ريال سعودي واختلس ما قيمته 1.408.000 ريال سعودي ..
7- اختلس 65 ألف جنيه حولت من أوقاف الخرطوم لأوقاف الخارج ولم تدخل في الحسابات..
8- قام الأمين العام المقال بتعطيل وبمقاومة شديدة لعمل فريق المراجع العام، وجمع أوقافاً بـ 2.762.295 ريال سعودي..
9- قام بتأجير وقف أبي ذر لمدة 20 عاماً واستلم مبلغ 3 ملايين ريال، (تم التأجير عبر الانترنت بعد إعفائه)
أرجوكم .. أقرأوا بقية التفاصيل بجريدة الانتباهة في الرابط التالي ..
http://alintibaha.net/portal/index.php?option=com_content&view=article&id=15385:2012-05-16-03-58-07&catid=135:-3
العم الفاتح المشكلة مافي المكتوب المشكلة في عنوان المقال (جديدة لنج) الصاح يكون( قديمة لنج)لانو الكلام ده من قبل 23سنة ديل حالتهم ناس الدين (كدي فتشو ادراج ناس الزراعة والصناعة والمعادن والله لتشيب زوؤس الولدان خلوها مستورة .
إنت البوديك تقراء (الانتباهه) شنو؟ الانتباهه دى أحسن ورق توليت من حيث السعر وليس الجوده!! وصدقنى يا جبرا انا كنت بتناول فطورى المكون من البوش المرشوش بموية الجبنه وهى اكلتى المفضله رغما عن انفى وانا مثل جميع الخلائق اتشهى واتطلع احيانا الى الفول المظبط (يعنى فول مكسر بقعر زجاجة بارد وعليه شوية سلطه وجبنه مكسره وطعميه حبه حبتين وبيضه لا بأس وأخيرا زيت سمسم فرز اول إذا تيسر ورغيفه مواصفتها مطابقه او غير مطابقه غير مهم)00 المهم00 واثناء ذلك وقع نظرى على المقاله ومما جبت سيرة الانتباهه(رجعت كل الذى طفحته) على طول وعلى كل حال ذنبى معلق فى رقبتك وخاصة ان الشغله لم تتوفر بالساهل!!وبالنسبه للمقاله ككل00 نحن فى إنتظار (الباب العالى) لكى يفرد لتسأولاتك وإندهاشك والاهم من ذلك لسانك الذى انعقد من فرط الاستغراب والاندهاش(مفوضيه) كاربه تبداء اعمالها وتنتهى بعد ان (يتليم) رئيس واعضاء المفوضيه على (المعلوم) أى (الكنجالات)!!واخشى ما أخشاه ان ينفض سامرهم قبل ان يحلوا العقده التى بلسانك ويذكرونا بالاطباء الذين ينسون عدة الشغل داخل احشاء مرضاهم ولا سبيل لارجاع العهده لطاقم العمليه إلآ بعد ان يتحلل جثمان المريض الذى يتذكر آخر شىء إنه كان مجرد مريض قابل لان يتعافى!! ولم يك فى حساباته هذا المصير المحزن!! و(خسوسا إذا جاءت المقاله من تلقاء جبرا بالذات القارشين ملحو!!)والمقطع الاخير من تعليقى لكى انبهك والقراء الكرام من مغبة التفأئل بأن ثمة جديد قد يطراء كرد فعل للمقاله واعلم ان الجماعه يمسون ويصبحون على المعوزتين ظنا منهم اننا نحسدهم على نعيمهم المقيم مش هم برضو جماعة هى لله هى لله لا للسلطه ولا للجاه وعمرهم (ما عملوا لدنيا) وربما والله اعلم يقصدون الدار الاخره فزلة السنتهم00 والله على المفترى00ياشيخ0
هذه شيمة عهد الافساد .. فالنهب المصلح لكبار التنفيذيين يتم من خلال المخصصات والبدلات الغيرمرئية حتى للمراجع العام.. وان كانت تعود للعمرة او الاوقاف او الزكاة ..
هى للجاه .. هى للجاه .. نعم للسلطة وليست لله .
انا شخصيا اصبت بدهشة – كنت لما ارى الارباب الطيب مختار اظن انه ولى صالح وانه شبه الانبياء والاتقياء – ولكن ماذا بعد -الان انا فاغرا فاهى ولن اعود لطبيعتى حتى ياتى شخص يفهمنى ماهذا ماهذا ماهذا – معقول يا جماعة- افففففففففففففففففف – خسارة خسارة – وهذا هو الامين العام للاوقاف – يعنى الرجل المؤتمن على اموال المساكين والايتام –
الاخ جبره حرك لنا كسرة باسم 60 بره و40 جوه افيدونا عنها – لو ثبت ذلك وجب تجريده ورفع المشانق فى ساحة عامة
ما ملاحظ يا جبرة . . انو الأيام دى ما بطلع الا فساد المؤسسات الدينية بس ؟
مرة الزكاة . . و مرة الحج و العمرة و حسى الأوقاف . الجماعة ديل دايرين يكروهونا الدين دا و لا شنو ؟ ما كفاية خلينا ليهم السوق ؟
بس الحمد لله مافى ديوان صلاة و لا ديوان صوم كان تموا الناقصة و هدموا باقى الأركان
ديل يستحلوا مال النبى وليس العمرة والاوقاف والزكاة فقط ..
اختلف اللصوص و ظهر المسروق .. ويارب تكون دى آخر اشراط وعلامات نهاية عهد الافساد(اللا انقاذى) ..
الناس العفو الزكاة ديل
يبدو انهم متمكنيين خالص
لو يشوفوا لينا طريقة لرمضان ألسنة دي
انشالله يعفوا كم ساعة
وجزاهم الله بقدر ما عملوا
INGHAZ MAFIA!! WHAT WE NEED IS A BIG TRASH TO THROW THEM INTO,IF WE WILL FIND ONE SUITABLE!!1
تقروا وتتمغسوا بس
شغل كلو بالقانون
يسرق .. ينهب .. يسوي اي حاجة
ما بين الخزانة العامة والجيب الخاص .. الحالة واااااااااااااااااااااااااحدة
بعد دا كلو مافي زول حايسوي ليهو شي
يعني شنو مسئول حرامي؟؟؟؟
ما الحكومة كلها حرامية !!!!
ناس الصحف ديل خلي بالكم على العليها مدينها جردل مش كوز قول لي كيفن ؟
يمشوا يبعبشوا و يفتشوا في فضائح الجماعة اياهم ويطرحوها في صحفهم – بعدين الحيكومة تخاف المسألة تبقى مسالة راي عام و وجع راس فتامر مباشرة بتكوين لجنة لتقصى الحقائق ورفع تقرير لاتخاذ اللازم وتتكون اللجنة واول ما تتكون تنبزق ( تنبثق ) منها لجنة تانية عشان تذكر الاولى بالميضوع الكونوها من اجلو كذلك اللجنة المنبزقة التانية – مافيش لجنة احسن من لجنة – عايزة تنبزق منها لجنة عشان تذكرها حفلة لازم تحضرها .
باختسار كدة لجنة في لجنة ومصاريف ولجان تنبزق من لجان واجتماعات لى جسم مترهل ضخم يصرف عربات وبنزين وكهرباء وغيرو وغيرو وغيراتو وفي النهاية ما يقدموا اي حاجة وبعدين الشعب الفضل ينسى الميضوع ويقعد لغاية من الصحفيين يلقوا ليه مصيبة تانية .
ولو واحد عايز يعترض على كلامي اليقول لاستاذ جبرا الحصل في خط هيثرو شنوووووووووووووووو
وإعفاء من ضريبة الدخل الشخصي و(الزكاة)،
رحم الله خليفة رسول الله ابوبكر الصديق رضي الله عنه القائل ,, والله لو منعوني عقال بعير لحاربتهم عليه ,, عندما كان الاسلام يحكم حقيقه قامت الحروب بسبب الزكاة لاُن الله سبحانه وتعالي فرضها علي كل مسلم قادر والان في اخر الزمان نري العجب اناس يتظاهرون بالتقوي ويرفعون عقيرتهم بالتكبير والتهليل يراؤون الناس ويرفعون اصابعهم بمناسبه وغير مناسبه اشارة لتوحيدهم ولكن لمن لاندري فحسب ما نراه من فعل فهو بالتاُكيد ليس لله فالله لم ياٌمر بالذي يمارسونه قي كل المجالات ويرتكبون ماحرم الله عامدين نسبة لاطلاعهم علي كتاب الله وذلك عاقبته حرب من الله لان المغفره تجوز علي مرتكب الذنب بجهاله وهؤلاء ليسو بجاهلين فمنهم من هو حافظ للقراَن او جله ولكن قلوبهم غلف .
(يمكرون ويمكر الله والله خير الماكرين)
اتى مكر الله والمستخبى بان.. عالم ما تختشيش.. شابكننا هى لله هى لله..وبيلعبوا فى مال اليتامى والاوقاف ..
تسلم جبرا ولاعدمناك
الشيئ الذي يحيرني ما دام هذا العقد سري لدرجة ألا يطلع عليه طرف ثالث فكيف يستطيع هذا الموظف صرف راتبه ..ومن أي بند في الميزانية ؟
أربعة تزاكر بدون وجهة محددة ؟؟
وأللة جديده لنج
ده حالته بتاع اوقاف …………………………لا تعليق
لنج
قال أحد الحكماء هنا لود العوض : والله انت ظريف يا ود العوض لو الموظف بيعملوا ليهو عقد سري يعني حق الريس دا بيكون كيف خليك تفتيحة وركز شوية…. و قال آخر : بما أنهم قادرين على الإعفاء من الزكاة اليشوفو لينا طريق في رمضان !! و كتب بعضهم في مكان آخر : أخي الكوز اكتفاءك بسرقة الأموال المحلية يدل على وطنيتك فلا تسرق بالعملة الصعبة من الخارج و تورطنا في ديون الله يرضى عليك … الناس دي بتنسى و للا شنو ، ما قالو ليكم هي لله هي لله … كلو لله انتو ما بتفهمو ، نشرح ليكم : المال مال الله و الجماعة وكلاء الله ، يقوموا يوزعوا المال بينهم و يتزوجوا الصبايا أربع أو زيادة بنظرية عرّس طلّق و يجيبو كيزان كتاااار و بالطريقة دي يحدث تمكين و يشتغل أبناء الكيزان وزراء و وكلاء وزارات و سفراء و أمناء في دواوين الأوقاف و الزكاة و كده … أها أولادكم يشتغلوا في الدرداقات أو أمجاد و كده و يدفعوا ضرائب و زكاة عشان المشروع الحضاري يستمر …افهموها … الكاية كلها لله .
Still you are asking about Heathraw Line, you do not think that what you wrote now is more dangerous than Heathraw line. For how many years didvMokhtar working in this position with this miserable contract, and how much he generated during this period, definately by whate enerated Sudanair can by uy
Khartoum – Tokyo Line.
الاستاذ / الفاتح جبرا
لك التحية على هذا المقال الرائع الذي يكشف جزء يسير من الاعيب ما تسمى بحكومة الانقاذ ولكن انا لا استغرب لهذا العقد الخرافي لان هذا هو ديدن دهاقنة واناطين المؤتمر الوطني ودونك العقد الذي ابرم مع المدير السابق للاوراق المالية ولكن يد الله فوق كل جبار
يا استاذ الفاتح بعد السرية الشديدة دي عاوزين نعرف الزول ده كان بيقيض راتبو كيف ومن اي بند من بنود الصرف …..اكيد في جانب خفي في الحكاية
بند السرية دا سببو خجلة سااااي افتكر من باب (إذا ابُتليتم فاستتروا) ..الجماعة عارفين روحم حرامية وجابوها كبيرة عشان كدا قال احسن يموتو بيها براهم..مع انو ديل مااظن عندهم حياءاو بخجلو بس حسبي الله ونعم الوكيل فيهم.
السؤوال يا ناس ومن أين للإنتباهة هذا؟؟؟؟؟؟
فاذا لم تكشفه الانتباهة هل كنا عرفنا؟؟؟؟ وبالتالى كل الجرايد كالتيار والسودانى كانها هى الجرائد الوحية التى يمكن ان تكشف الفساد-
كل هذا غسيل وتصفية حسابات يا ناس..واذا لم يختلفوا كان لايمكن ان تكشفوا هذا العقد الكتيمى.. فما خفى اعظم….
الغايظنا ما سرقة الناس ديل
اصلا الحرامي شغلو شنو؟ ما السرقة
الغايظنا استغفالهم لينا والكضب الكتر لامن بقينا نصدقه
وهسع الحرامي اول ما تهبشو يكورك: الله اكبر، هي لله هي لله
شاحد الله ينتقم منكم ويجعلكم عبرة في الدنيا قبل الاخرة زي ما ضيعتونا
سؤالي …..وين أسد المفازة ….الجعلي الحر ؟؟؟
الشئ المؤلم …لا تصريح بالنفي … أو التبرير ….
الرجالة…. أنك تأكل أموال الناس بالباطل بقوة العين
س: من أين أتى هؤلاء …؟؟؟ ج : من بقاياقوم لوط …( فقه الستره والتستر) لا حياء لا دين لا أخلاق …..لا لا لا
اللهم أهلك الظالمين بالظالمين وأخرجنامنهم سالمين … بقدرتك يا قهار …
السرية والعقود السرية سياسة من سياسات التمكين فى الدولة الرسالية ..والدولة وما فيها (غنيمة)..وانت شفت حاجة يا جبره!!!كتر خير دكتور خليل
ياخ فيها شنو دى وزير الحج والاوقاف هذا عقد فيه مخافة الله قبل كل شى لانه وزير خدمى وليس جهوى وهو من أول يوم وهب عمله لله وقال للجماعة ديل اعطونى من الاجر أقله ما يستر الحال بس وانا انسان زاهذ فى الدنيا ولااريد جاها ولاسيطا ولست كلوزراء الاخرين المجاهدين جزاءهم الله خير 0 عشان كدى لوشفت مخصصات مصطفى عثمان او المتعافى او وزير الدفاع او كرتى ح تعرف أن هذه الحكومه متعففه والجماعة دول كلهم متبرعين برواتبهم للمجهود الحربى وعلى عثمان محمد طه النائي الاول الغى مخصصات العائله للرحله الصيفيه لمليزيا وقرر لاولاده يسافروا مع العامه الخطوط الاماراتيه وبالله عليك ما تجيب لينا الكفوه وانزه من الحكومة دى ما ح نلقى 0
يا جبرا فقعت مرارتنا الكلام ده إنت بتجيبوا من وين ولو كلامك صاح القيامة حتقوم من السودان لأنوا الكفار ما بعملوا كدة . غايتو نسأل الله حسن الخاتمة .
نفرين والتالت برة ههههههههههه واللة فقعت مرارتناااااااا يا جبرة ؟
تقول لي اخوانا المسلمين -الجبهة الاسلامية الكيزان المؤتمر الوطني مسميات ضلالية سادت وجهجة الشعب وفتت البلاد وارهقت العباد وزرعت الفتن وتعالت باسم الدين وهم ابعد مايكون والعرق وهم يجهرون بالاساءة حتي رئيسهم وكمال عبيد شتم الصحفي عثمان ميرغني وبكلمة يا حيوان .
عموما سارقين ظالمين مصاصين للدماء واكلي اموال الحج العمرةالذكاة اليتامي
هناك فقرة فى العقد المنشور فى الصحف تشير الى استحقاق السيد الطيب مختار عند انهاء خدمته كامل قيمة مدة العقد بمعن ان تم انهاء خدمته بعد ثلاث سنوات يتم اعطاء حقوق فوائد مابعد الخدمة المنصوص عليه فى العقد كاملة غير منقوصة عن كامل مدة العقد مثلا مدة العقد 10 سنوات
هم عارفين انه الزكاة البشيلوها من المرتبات دى ما زكاة، بس دايرين يخموا الناس بإطلاق المسميات الدينية، عشان كدة ما خصموا منه ( الزكاة). والله ديل ما بعيد يكونوا بيطلعوا لنفسهم أعذار شرعية لعدم الصلاة أو الصوم أو لزيادة عدد الزوجات لأكثر من أربعة،لمن استطاع اليه سبيلا، و هم ماشاء الله كلهم مستطيعين
ستكون عليه خزياً وندامة يوم القيامة وما هو ببعيد عنه
هل سيعيش اكثر مما عاش ؟
فليجهزوا انفسهم لملائكة القبر ولعذاب القبر ان كانوا مؤمنين !!
لعنة الله على القوم الظالمين
وأسال الله ان يحرم عليهم الجنة لانه غشاشون