حلم ليلة صيف سودانية

بعد قرارات الرباعية (ضربت لخمة) واحترت وسألت نفسي. هل دول الزباعية الأربعة التي أعرفها (حق المعرفة) ستقودنا لدولة مدنية تكون لنا سجدة سهو تكمل وترقع لنا مانقص (سهوا) من ثورتنا، ثورة ديسمبر العظيمة؟؟؟ ولم اجد الإجابة وعافت نفسي الكتابة لما اعرفه سلفا من من كثرة ما عاصرت من رباعيات منذ رباعيات الخيام في الثانوي حتى سداسيات الكورة. قد تكون سقوف احلامنا تضاءلت ونزلت ومازالت تهبط منذ أن أسقطنا عبود في اكتوبر 64 وكانت اطهر وافضل حكومة مرت بالسودان ، ذاك لأن سقف احلامنا كان حده السماء وتداعى الحلم وما زال يتداعى ويهبط كلما مرت علينا حكومة ديموقراطية أو عسكرية، فأسقطنا نميري وهو بالمقارنة بمن حكمونا بعده في طهارة الأنبياء وحزم الملوك وهيبتهم وشجاعة الأسود. ثم تداعى سقف احلامنا حتى لمسناه بأيدينا فوق رؤوسنا، ثم جاءت الانقاذ فجلسنا القرفصاء حتى لا يحطم سقف احلامنا رؤوسنا، ثم نهضنا في ديسمبر واعتدلت وقفتنا ومالبث أن جاءنا انقلاب البرهان في 25 أكتوبر فكفانا على وشنا مرة واحدة وقبل أن ننهض بشباب وشابات ثورتنا الذين وقغوا في وجه الانقلاب تجيئ الطامة الكبرى في 15 أبريل 2023 ، يومها سقط سقف احلامنا كمن ضربته صاعقة ، وتفرقنا في الأرض. وضاع الحلم وبقينا في تولا ولقمة العيش وايجار الاوض والرواكيب والشقق، وبقينا نقيف في صفوف البنادول والدربات من ضنك الضنك وسكن ديارنا البعوض يضربنا الانوفليس بالملاريا والزاعجة المصرية بحمى الضنك والدعم يضربنا بالمسيرات والديش والمليشيات بالميج والسوخوي والكيميائي.
فهل بعد كل هذا الضرب سيتبقى لنا حلم وهل سيتبقى لنا (حيل) لنرفض قرارات الرباعية..
ائتونا بالرباعية وبما دونها فنحن لم يعد فينا حيل وصار يحكمنا من لم يكن في قائمة احلامنا، نحن باختصار لم نعد نعرف انفسنا ولم تتبقى بالخرطوم ولا ربوع السودان (منضرة) نشوف فيها وشنا. نحن منو. نحن شنو. جيبوا الرباعية وللا الاستعمار ذاتو، فسقف أحلامنا اصبح تحت ارجلنا، داسه البوت وبال عليه السفلة الذين تسلطوا علينا.
فكيف نحلم في ليلة صيف لا فيها موية ولا كهربا والباعوض
:يغني فيها طربا كذباب عنترة.
وَخَلا الذُبابُ بِها فَلَيسَ بِبارِحٍ
غَرِداً كَفِعلِ الشارِبِ المُتَرَنِّمِ
هَزِجاً يَحُكُّ ذِراعَهُ بِذِراعِهِ
قَدحَ المُكِبِّ عَلى الزِنادِ الأَجذَمِ
الضبان عندنا ياعنتر أخوي بقى مليشيات وحركات وجماعات واخوان واخوات ، ضبانك ياعنترة ما مفارقك (ليس ببارح) وضباننا نحن اجارك الله تقل دم ومص دم ما بياكل فضلاتكم يا عنتر اخوي ضباننا بمص دمنا عديل وما بقدر اوصف ليك في هذه العجالة. ضبانك يا عنترة (غردا او هزجا يحك ذراعه بذراعه،) وضباننا عليك أمان يحك لينا في شنبو، وكمان جابلو قلك أدب اكان قلتها ليك بمسخ عليك رقدتك التحت التراب، واحدين يقولوا لينا اركبوا هنا وواحدين كلامهم لا يصلح للنشر وعيييييك..
شكسبير يحلم في ليلة صيف انجليزية نسائمها تتلافح شمالا وجنوبا، نحن المودينا نحلم في الصيف شنو لو ما شلاقة مننا.
رباعية رباعية ما حنتبطر علي النعمة..
عثمان يس ود السيمت
26 سبتمبر 2025
والقابلة بعد شهر 25 اكتوبر تكون مرت 4 سنوات وقد يعود حلمنا سقفه السماء