جنس حرفنة
جنس حرفنة
الفاتح جبرا
[email][email protected][/email]
من الكلمات التي كانت متداولة بكثرة في الماضي قبل أن يقل إستخدامها هذه الايام كلمة (حريف) و (حرفنة) يقال لاعب (حريف) أي انه موهوب ويجيد التحكم بالكرة بشكل متميز ويجهجه إن كان مهاجماً (باكات الخصم) كما يقال (نشال حريف) أي بإستطاعته أن يدخل يده في جيبك ويخرجها و(كانو ما حصلت حاجة) ودون أن تحس باي شئ والحرفنة عزيزي القارئ انواع لعل أخطرها هو موضوع هذا المقال وهو الحرفنة في أكل أموال الناس بالباطل وهي (جنس حرفنة) !
ما أن تبدا في إجراءىت معاملتك بعد وصولك إلى الشباك بعد معاناة الوقوف في صف طويل وتقدم أوراقك إلى الموظف حتي يبادرك قائلاً :
– الملف وينو؟
– ملف شنو؟
أمشي للزول القاعد هناك داك وجيب ليك ملف خت فيهو أوراقك دي –
وتذهب إلى (الزول بتاع الملفات) تأخذ منه ملفاً عبارة عن قطعة من الورق المقوى وتضع أوراقك داخلة لتكتشف بأنه يطالبك بمبلغ (عشرة جنيهات) بالتمام والكمال ثمناً له مع انه لا يكلف جنيهاً واحداً .. وبالطبع لا يمكنك ان ترفض لأن (التعليمات واضحة) .. لا يمكن النظر إلى معاملتك بدون ملف ومش اي ملف بس الملف ده) ولأن هذه الخدمة (أم ملف) يحتاج إليها آلاف المواطنين على مدار ايام السنة فانظر عزيزي القارئ (النقاطة دى) شغالة كيف ؟
أرسل لي احدهم يقول بان لديه رخصة قيادة منذ سنوات طويلة وهو يقوم بتجديدها كل عام إلا أنه عندما اراد تجديدها هذا العام طلبت منه الجهات المعنية أن (يدخل كورس) في (أكاديمية المرور) عبارة عن ثلاث محاضرات نظرية (بالشئ الفلاني) وإلا فلن يتم التجديد
– وقلتا ليهم شنو؟
– قلتا ليهم وكت أنا بحتاج محاضرات وما مؤهل إنتو من الأول أديتوني رخصة ليه ؟
.. وبالطبع لا يمكن لهذا المواطن أن يرفض لأن (التعليمات واضحة) .. لا يمكن النظر إلى معاملته بدون ما يدخل الكورس ولأن هذه الخدمة (أم كورس) يحتاج إليها آلاف المواطنين على مدار أيام السنة فانظر عزيزي القارئ (النقاطة دى) شغالة كيف ؟
والوضع هكذا يمكنك وأنت تود أن تقوم بتجديد جواز سفرك أن يسالك الموظف المسئول وهو يقوم بفحص أوراقك :
– وين الشهادة بتاعت الدورة؟
– دورة شنو؟
– الدورة التأهيلية للتعامل مع الطيران والمطارات !
– ما فاهم ..
– دي دورة بيدوا فيها الزول محاضرات .. مما يدخل المطار ويوزن عفشو .. لحدت ما يدخل الطيارة .. يربط الحزام كيف؟ يطلب المضيفة كيف؟ يستخدم وسائل السلامة كيف يملأ الفورم بتاع الدخول كيف .. ولحدت كمان ما ينزل في المطار الماشي ليهو ..
– لكن الحاجات دي كوووولها عارفنها .. أنا بسافر ليا أربعين سنة !
– أربعين خمسين والله دي التعليمات يا استاذ
وبالطبع لا يمكنك ان ترفض لأن (التعليمات واضحة) .. لا يمكن النظر إلى معاملتك بدون ما تدخل (الدورة) ولأن هذه الخدمة (أم دورة) يحتاج إليها آلاف المواطنين على مدار ايام السنة فانظر عزيزي القارئ (النقاطة دى) شغالة كيف ؟
والوضع هكذا يمكنك وأنت في (مستشفيى الولادة) تود أن تقوم بإستخراج (شهادة ميلاد) لمولودك الجديد يسالك موظف (الإخصاء) المسئول :
– دفعتو رسوم الآذان؟
– (في دهشة) : رسوم شنوووووو
– رسوم الآذااااااان
– ما فاهم
– أفهمك .. إنت مش مسلم؟
– أيوه
– وولدك ده ح يكون بإذن الله مسلم
– أكيد
– طيب مش لازم زول ياذن ليهو في اضانو؟
– أيوه أنا اذنتا ليهو في اضانو مما طلعوهو
– لا .. لا ما ينفع .. التعليمات واضحة .. لازم يأذن ليهو مؤذن الحكومة .. أمشي المكتب داااك المكتوب عليهو (مؤذن مواليد) خلي الموظف الهناك داك يأذن ليهو في اضانو وبعد ما تدفع الرسوم جيب ليا الإيصال عشان اطلع ليك شهادة الميلاد !!
كسرة :
توجد أفكار مبتكرة جاهزة للتطبيق … عشان باقي زيتكم يطلع .. الوسطاء يمتنعون !
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)
ههههههههههههههههه الفاتح جبرا شكلك داير تحصل الكورة قبل ما تنتهي وتجيب ليك قووون …. بقيت عميل وتعمل في خطط الجباية للحرامية ديل … لكن افكارك حلوه وعجبتني
ياخى العزيز حقو تعمل لستة بالرسوم وهى كتيره , مثلا رسوم المغادرة(بدون ايصال), ……………وانتهء برسوم العدة بتاعت عادل امام(هى مافى عدة)…..كان الله فى رسومنا
الغريبة ان هذه (الحرفنة) أو (الحرمنة) ان شئت قد طالت حتى الاطباء الذين يطلق عليهم مجازا(ملائكة الرحمة) فانقلبوا الى ( ملاك الكنجالات) فما ان تذهب لاحدهم وانت تعاني من (فكك في رجلك) من اثر لعبة كرة القدم حتى يقول لك امشي اعمل فحص سكري وضغط في المعمل المقابل لعيادتي ، وماتمشي لي واحد تاني ، وطبعا بالرغم عدم وجود علاقة بين الفكك والسكري والضغط ، فيا ويلك ان اخطات الذهاب الى معمل اخر ن طوالي بجيك ضغط وسكري بالاضافة الى الفكك ، ويكفهر ويزمجر دكتورك المعالج ، طبعا الموضوع كله من اجل (قسمة السلطة والثروة) ودي ما ياها زاتها الجننت بوبي
والوضع هكذا يمكنك وأنت تود أن تقوم بتجديد جواز سفرك أن يسالك الموظف المسئول وهو يقوم بفحص أوراقك :
– وين الشهادة بتاعت الدورة؟
– دورة شنو؟
– الدورة التأهيلية للتعامل مع الطيران والمطارات !
يا جبرة يا أخي ما توريهم ديل تلقاهم الليلة دي طلعوا ليها أمر إداري بعد ما قروها في عمودك ,
,وازيدك من الشعر بيت !,
عند مدخل السفارة بالرياض والقنصلية بجدة كذلك جالس موظف ومجهز (ملف) (ورقي) ويطالبك بإن تدفع (1 ريال) ومعاملتك لن تمشي ما لم تأتي بهذاالملف و(طبعن) بدون إيصال ..ولاحظ كم مغترب يوميا بيدفع هذا (الريال) مدريد ….الي يومنا هذا …..
((فعلا جنس حرفنه))
بس!!! البلد ح تتقدم كيف طالما أكل أموال الناس بالباطل يسير بهذة (الحرفنات)!
والله انك مبدع طيب لواشتريت الملف من اقرب مكتبة وجيتو جاااااااهز اها تانى بسالنى من شنو
استاذنا الفاتح جبرة …. فى ورقة فى جهاز المغتربين ب 15 الف جنية علشان تكتب فيها فقط الجهة المسافر لها … خلاف رسوم التاشيرة …. عشت يا سودان
ود جبرا…هو لسة فيها زيت؟؟؟؟
والله اضحكتني وابكيتني يا اخي لكن اطمئن انهم لا يحتاجون لخبير في طلعين الزيت وزيتنا زاتو انتهي من زمان ما خلو لينا حاجة عليهم لعنة الله
مناشير ماكلين شاربين
مناشييييييييييييييير
انت نسيت شهادة اثبات حياة لناس المعاشات .
يااخي انت كل ابداع وفهم ياراجل يالماح .. لك كل الود.. لكن بصراحة البتاعة دي بيجوبوها ليك من وين
كل شي متوقع في ظل هذه الحكومة التي يسطر عليها مجموعة من المجرمين وشذاذ الافاق
إنت ما بتعرف الدقنية يا أستاذ ؟
Fool me once , shame on you..fool me twice , shame on me
ياخى انت مباااااااااااااالغة يا جبرا …… اهههههههههههههههههههههه ربنا يديك الصحة والعافية
يا ود جبرة زمان ما قلنا ليك خلي الافكار المبتكرة دي وبلاش نشرها بالطريقة دي، وشايفك فعلا تركتها ليك زمن، تاااااااااااني تقوم تتحفهم بيها عشان يوروك بيها نجوم الضهر.. انت يظهر ما بتتوب وغاوي بلاوي.
صح كلامك اكل اموال الناس بالباطل واكل اموال السحت وما ستستبعد الحكومة دي ترجع بيوت الدعارة زي زمان وتنظم الشغلة وتعمل لها ايصالات وصفوف زي زمان وكمان تخت عسكري يمنع المشاكل ويمسك القروش والعسكري اكيد حيكون عنده دفترين دفتر ليهو ودفتر للحكومة يمشي ورقتين ثلاثة من حقة الحكومة ويشغل دفاتره كما هو سائد منذ قدوم هذه العصابة اللئيمة التي لا تمت بالدين بصلة سوى المسميات
قاتلهم الله
الاختشو ماتووووووووووووو
السودان السودان السودان
الكل بقى يضرب في السودان الكل بقى يخلص حقو أول بأول عشان كده ما في مشكلة الجميع عايشين والحمدلله .
إذن متى ستتأزم المشكلة لما التماسيح الكبار ما يصلها شيء من حرفة الصغار وتجوع ، عندها ستقوم التماسيح الكبار بذرف الدموع على ظلم الرعية وسيتم إعادة الضبط وسجن البعض ، وسيتم إعادة فتح أبواب للنهب المصلح لتلك التماسيح ،،،
شوية هطرقات وفرطقات وزفتتات وما عارفين نسوي جنو
لو عايز تحج لازم تعمل دورة حج في المجسم بتاع الكعبة الموجود في الساحة الخضراء
عندما كنت ارتب للزواج و شهر العسل و كدا ذهبت الى احد الفنادق (في ذاك الزمان ) و بعد حق الله بق الله قال لي موظف الاستقبال: تذهب الى ادارة شرطة السياحة تدفع رسوم و تاخذ ايصال تقدموا عند دخولك للفندق انت و المدام! قلت: طيب ما هي الخدمة التي ستقدمها لى شرطة الفنادق؟! قال:ما عارف! قلت: طيب لو ما جبت ايصال معاي؟ قال: لن تدخلوا الفندق!! قلت: حتى لو جينا الساعة 1 صباحا؟! قال: لو جيتوا الساعة 100 زاتو!! الحصل اني اتفقت مع احد اصدقائي و فضا لينا بيتوكم يوم و قضيناعسلنا لا قرش لا ايصال. تمر السنوات و اذهب انا و ولدي (6 سنوات) لترخيص السيارة ندخل هنا ندفع نخرج من هنا ندفع يمكن حوالى 6 نقاط دفع و كله بدون اورنيك 15 للمعلومية اها ان عصبت شوية و قالت: ندفع ندفع ندفع اصلو نحن عاوزين نرخص شنو؟! ولدي قال: تقول عاوزين نرخص قطر!!!!!!
سلام ياأستاذ جبرة لكن بيني وبينك كدة بديت أحس بأنك عميل متعدد الوجوه. أول حاجة أفكارك دي بنات فيل! وليس أي فيل هذا لفيل سايسو من الجبهة دي.وعشان كدة كل بنات أفكارك الأبوها الفيل دي نتصب في مصلحة جهة معينة. لكن قسم بالله يجي يوم يقولوا حيبو ملف لدفن المتوفى دة وضريبة (فات) للعنقريب والبرش إلا ننزل أنا وانت في قبر واحد!!!!!أو الفيل على أبو الكلب.
لامؤاخذة: إتزنق من السكر فأتجه لأقرب حمام
المزنوق دفع 500
المتحصل: عايزين 500 تاني
المزنوق: في شنو؟
المتحصل: رسوم دعاء
المزنوق: دعا شنو؟
المتحصل: دعاء دخول الحمام
المزنوق: دا كلام شنو؟
المتحصل: ماقريت الدعا الفي الحيطة وراك دا؟
المزنوق: طيب خليني بعد أخرج
المتحصل: مابينفع
المزنوق: ليه؟
المتحصل: لأن رسوم دعاء الدخول بتدفع عند الدخول ورسوم دعاء الخروج ديك وكتا برا عند الخروج
(ولأن المزنوقين كتيرين شوف النقاطة دي كاربة كيف؟)
يا جبرة كلو عرفناهو لكن موظف الأخصاء دا شنو؟ اخصاء ودورة الله يجازى محنك
حوار بين مريض سكري ومتحصل الحمامات
المتحصل: عايزين500 تاني
المزنوق: في شنو؟
المتحصل: رسوم دعاء
المزنوق: دعاء شنو؟
المتحصل: أقرا الورقة الوراك دي
يلتفت المزنوق ليجد ورقة على الجدار مكتوب عليها دعاء دخول الحمام… يلتفت مخاطباً المتحصل: ياخ دا قاعد أقولو براي
المتحصل: تقولو ماتقولو غايتو ما بعرف مش قريتو في الورقة ولا تدفع ولا ما بتدخل
المزنوق: طيب أنا عندي سكري ومتضايق خليني بعد أخرج
المتحصل: لا رسوم دعاء الخروج 1000 جنيه ديك براها
( ولأن المزنوقين كتيرين شوف النقاطة دي كاربة كيف؟)
يا جبرا دي فاتت عليك كيف أديتم أفكار مجانية بدون مقابل ما كان تبيع الافكار تحت عنوان كيف تصبح مليارديرا( بالقديم)أرسل الشيك و سنرسل لك ال DVD بالله أنا نفسي فاتت علي كيف؟ كان أبيعها ليك بدل المجان اللهطته مني دا!!
شنو يا عم جبرا ؟؟؟
أنت معانا ولا معاهم ؟؟؟
طيب موريهم مالك ومفتح عيونهم.. خليها في بطنك ياخي وخذ ثوابنا..
هو بقى لسة فيها زيت؟؟؟؟؟؟
مافى زول ياْذن ليهو لانو حيكون مسيحى ولا حيدفعونى حق الجرس .
بالمناسبة حتي مكتب العمل أصدر منشور للسفارات لايمنح التأشيرة للشخص الذي يود العمل خارج السودان الا بخطاب موافقة منهم بعد دفع رسوم 420ج ….ونحيا ونشوف أكثر!!!!!!!!!!!!
الله يجازي محنك ياجبره..والله كتلتني بالضحك.مع احتلافي معاك في حاجات كتييييييييييره.كدي خلي لي واحده من الابتكاراتدي بالجنب ،هسي مامحتاج ليها لكن يمكن الظروف تجيبني ليها.
حرام عليك يا(الفاتح جبرة) وأنت القلنا عليك حريف وابو المفهومية تفوت عليك أنه ما فضل فينا زيت ذاتوووووو.وزى ماقلت قد يجيبوا أيصالات تحصيل جديده بخصوص هواء ربك البنتنفسوا.
بس ياود جبره ماشفت الحرفنه الجديده والتى جاءت عند سداد الكهرباء وربطها بالمياه ودى نقاطه عجيبه لانو ممكن تكون عماره فيها عدت مكاتب تجاريه وبها جميعا عدادات كهرباء وعداد مويه واحد ايه رايك مش في الحراميه دي.
مساء الخير يبدوا يااستاذ ناس شركة زين استفادوا من المقال بتاعك رسلوا لى رسالة فحواه الاتى:
( عزيزنا مشترك زين : طبعنا لاعزيزهم ولايحزنون بس عايزين يحنكوا العبدلله بموجب قانون رسوم الدمغة على
الاتصالات بس اولا انا عايز اعرف البخت القوانبن الختيرة دامنو لانى محتار طيب ماعلينا تم مبلغ واحد جنية كضريبة رسوم دمغة سنوى ) طيب شوف فى كم مشترك داخل الشبكة وكم واحد جنية اتخصمة اخيرا دى النقاطة الماخمج
انت يا ود جبر ما عارف شيخ الحرفاء منو.هو الفلس قديما قالو لعن الله الفلس محل ما جلس
الواحد ما عارف يضحك وللا يبكى من الكوميديا الحزينة دى
واحد بنته وضعت في مستشفى شندي وعند الخروج من المستشفى طلبوا منه رسوم خروج من المستشفى قلت له رسوم دخول أم خروج قال لي رسوم الدخول دفعناها وحق الولاده دفعناه وحق الداية دفعناه وحق الدواء والحقن دفعناه ولكن برضوا قالوا دايرين ( 100 جنيه ) رسوم خروج قلت له خليها عندهم ما تخرجها
ياود جبرا في حرفنة أكتر من ده منشار ساكت طالع ماكل نازل ماكل لينا الله
والله يا خال جنس الدفع الحاصل في السودان ده لا حصل ولا بحصل في اي بلد في العالم
بمناسبة المرور يابو الجعافر عندهم واحد اطرش ماسك مكنة تصوير وحياتك ياغالى دخلو من شغل المسا للصباح بتجاوز راتب كوندليزا رايس يعنى لو بالميت كده بصورليهو 10000 ورقه وكده جرو تعبان واطرش سبحان الله انتو دقستو واغتربتو ساى
جبرا انت معانا ولا معاهم
مافي زيت باقي لسع ما طلع ،،، باقي الرويحه بس يا جبره
انا بقترح انو نحنا كأقباط يجيبو لينا قسيس حكومي عشان موضوع الاذان وكدة طبعا عشان ما ننفد من البند دة و نعمل فيها مسيحين