بي شفافية
ساخر سبيل
الفاتح جبرا
بي شفافية
لو كنت أعرف مؤلف الأغنية التى ينتقد شاعرها بعض أحوالنا المتدهوره مثل درامتنا .. .. مستشفياتنا .. جامعاتنا .. والتى تقول فى أحد مقاطعها )شوفو كورتنا ( منتقدا وضع الكورة عندنا لطالبته بمقطع آخر يقول )شوفو جرائدنا( فالصحيفة السودانية (عندنا أكتر من 50 صحيفة) هى الصحيفة الوحيده التى تستطيع قراءتها فى جزء من الدقيقه ومع ذلك تجدنا تقوم يومياً بشراء الجرائد خصما على ميزانية البيت (اللى مش ناقصه) .
والصحيفه السودانية تذكرنى دائما بالخروف الإسترالى الذى كان يظهر فى الصورة مع صديقنا (مش عارف مين كده) فى كتاب الجغرافيا ذاك الذى درسناه فى المرحلة الأوليه (أيام كانت هنالك مرحلة أوليه) وقد نسيت إسمه ولكنى لا زلت أتذكر صديقنا ذاك الذى فى الصين والذى على ما أعتقد أن إسمه آفو !!
فذلك الخروف الإسترالى (المبغبغ) ذو الصوف الكثيف يشبه إلى حد كبير الصحيفة السودانية حيث يمكن أن يزيد وزنه عند شرائه عن الثلاثين كيلو ولكن بعد ضبحو وتوضيبو يمكن أن ترسى المسأله على ستة كيلو لحمة فقط .. فجميع الصحف السودانية إذا قمت بحذف المساحات الإعلانية التى أصبحت تحتل فى بعض الأحيان دون خجل أو و(ازع مهنى) الصفحة الأولى من الصحيفة بكاملها إضافة إلى إفتتاحيات الصحف التى لا يقرأها معظم القراء وصفحات النعى الأليم و الشكر الجزيل والمناصب التى صادفت أهلها وتبريكات الزواج والخطوبه وتهانى الحصول على الماجستير والدكتوراة التى أصبح الحصول عليها أسهل من شرب جرعه ماء ومباركة الترقيات وإعلانات القبض على متهم هارب بفلوس البنوك التى لم تطالبه بوضع ضمانات وغطاء لما (لغفه) من فلوس علاوة على مناشدات المواطنين من (مرضى المسلمين) لأهل الخير للتبرع لهم بنفقات العلاج ،أضف لكل ذلك إعلانات بيع المنازل التى لم يستطع أصحابها الإيفاء بدفع شيكات البنوك التى حان أجلها (مع أجل صاحبها) الذى وقع فى فخ ما يسمى بالمرابحات تلك البنوك التى بطلت شغلها فى تحريك ودفع عجلة الإقتصاد وصار همها الأوحد المتاجرة فى عربات الدفع الأمامى الكوريه ومنحها للمواطنين (بالأقساط المتعبه) !!
بعد أن تقوم برصد كل هذا (الهباب) الذى لا يستفيد منه معظم القراء تجدأن المسألة رست ليها على 10% من حجم الصحيفه من نوعية إستقبل وغادر وأفتتح وقص وصرح وخاطب .. وإذا قدر الله أن تكون ممن لا يحبون قراءة الأخبار الرياضية ولا يتابعون شئون الرياضه فهذه كارثه إذ أن المساحه التى تهمك من حجم الصحيفه سوف تتقلص لتصبح حوالى 3% فالرياضة التى لم نستطع أن نحرز فيها (علبة صلصة) عالمية هى أحدة إهتمامات صحفنا الرئيسية التى تفرد لها صفحات وتحليلات ومقالات عن اللاعب الأسطورة (عوض كورنر) والحارس العملاق (حسن كمونية) والمدرب الفذ (صلاح فيفا) الذى تلقى كورسات عليا فى التدريب لمدة تلاته يوم وخمسطاشر ساعه فى أحدى مدارس التدريب بالزقازيق !! أليس عجيباً ن يكون لدينا هذا العدد المهول من الصحف الرياضية بينما ليس لدينا (محترف) وااااحد يلعب خارجياً حتى لو فى (حلايب) القريبه دى !
أما ما يسمى بالصحف الإجتماعية )كمان ده موضوع تانى( فهى تعتمد على المانشيتات الرئيسية المثيرة فى جذب القارئ المسكين تلك المانشيتات من شاكلة رجل يضع مولودا والذى لا تلبث أن تجد أن تفاصيل الخبر تقع فى نص سطر ومفاده أن الرجل قد قام )بوضع المولود( على السرير بعد أن قامت الأم بولادته !!
أما المضحك المبكى فهو تلك التعابير المستحدثه التى ما أن تنزل إل سوق الكلام حتى تصبح مقررة على القارئ وتقوم جميع الصحف بإستخدامها عمال على بطال مثل تعبير) يثمن عالياً( وتعبير شفافية والتى يتم إستخدامهما حاليا بصورة مزعجة ولا تكاد صحيفه تخلو منهما !
كسرة :
سألتنى زوجتى وأنا أقوم بكتابه هذا المقال :
– مقالك البتكتب فيهو ده عن شنو؟
– فأجبتها أنه عن تثمين الصحف السودانية، فأجابتنى:-
عليك الله إتكلم عن الموضوع ده بى شفافية !!
لكن يا جبرة ما اتكلمت بشفافشة عن الصحف
استاذ جبرة
ادام لك المولى العافية
اضحكتنا بهذه السخرية الرائعة
طيب ما كان تسمع النصيحة الغالية دي وتكنب بشفافية عن اغفال الصحف معظمها ان لم يكن كلها ما يحدث في الوطن من تكزيق وتضييع للوطن والمواطن واهمالها ايضا بتنوير المواطن في الشمال والجنوب من خطورة الانفصال ومالات المستقبل والادهي من ذلك كانت الصحافة السودانية معول هدم مساعد بغض الطرف المتعمد عما يدور وان فعل البعض منهم فنما يستخدم الكثير من التورية خوفا ناسيا بانه يسطر اسمه في سجل التاريخ الاسود للسودان الحضاري وقلبي عي وطني
متعك الله بالصحه والعافيه يا أستاذي وانت رائع كالعاده..
بعد الكلام القلتو ده كلووووووووووووو عن الصحف يا أستاذ تجد بعض رؤساء تحرير هذه الصحف يظهرون في برنامج تلفزيوني لابس أحدث البدل والكرفتات ونافش ريشو باعتباره متخصص ( في أي حاجة ) .
رحم الله جعفر نميرى فيحكى فيما يحكى عن عهده أن رجلا ساخطا كان يأتى يوميا إلى كشك جرايد ويتناول الصحيفه ويقرأ المانشيت الأول ويرميها وينصرف .. صاحب الكشك إحتار مع هذا الرجل الغريب ونوى أن يسأله .. فى اليوم التالى أتى الرجل الساخط وتناول الصحيفه وقرأ المانشيت ورمى بالصحيفه .. لكن قبل أن ينصرف سأله صاحب الكشك عن فعله اليومى هذا .. فأجابه الساخط أنه يبحث عن خبر وفاة .. فقال له صاحب الكشك طيب ماتفتح صفحة الوفيات .. فقال الساخط .. لا .. أنا زولى البفتش ليهو بجيبوه فى المانشيت الكبير ده .. وأشار إلى أعلى الصفحة الأولى وتحتها صورة أبعاج ….
كسره :
اقل صحيفه قرأتها وأنا فى غربتى تحتوى على أكثر من 50 صفحه يعنى الصحيفتين 100 صفحه فى إجازتى بالسودان أشترى 20 صحيفه تحتوى كلها على 80 صفحه!!
ياخي اسمع كلام مرتك واكتب بشفافية
الوجع لزومه شنو الحكومة ما عارفة تقول لشعبها شنو في الجنوب انت تلخمها بحلايب
اكيد حلايب في دولة اجنبية والله انا خايف المتمة تمشي لدولة تانية
لم تتطرق لآفة اخرى وهى الصحافة الفنية التى كلها شفافية تكشف للكل عن كلب ندى القلعة وعن دلوكة مين كدا مدنى وعن طول عمة ترباس وعن الجل الذى يستخدمه فرفور وعن نوعية سيجاير وكيل اعمال شريف نيجيريا وعن وعن
والله انت ياستاذ شكلك بتكتب بشفافية لانك بتتكلم عن زملائك بهذه الطريقة بس ارجى الراجيك فى الصحف فى الايام الجاية دى لانوا ما حايسيبوك فى حالك بعد كده كلامك دخل الحوش …
كسرة نسيت تتكلم عن لقاءات رؤساء التحرير فى التلفزيون البقت موضه الايام دى قال شنو بحللوا الاخبار ولا عندك امل يستضيفوك ما عاوز تبدر بالشينه
استاذ جبره
ان مجنانني حاجه واحده…..الناس دي كوووووووووووووولها معارضه وكتاب اعمده وكولو البكتبو وينتقدو الحاصل يقولو ليك الحكومه…الحكومه..وهم عارفين انو زول واحد في يدو كل الامور وهو السبب في الحال الانحنا فيهو ..المجنني اكتر انو الزول ده لا بودي لا بجيب..وده المطير نافوخي..قال شفافيه قال
السلام عليكم جبوره الملاحظ ان المادة المتناولة فى كل الصحف واحدة يبدو ان الصحف تستقى معلوماتها من مصادر واحدة , ليس هناك تنوع للمعلومة , واذا قرات صحيفة واحدة تكفيك عن كل الصحف ,يبدو ان الغرض الاساسى من الصحف اضحى العائئد المادى ليس الا , والله ليهم حق اذا كان جالون البنزين اصبح بتسعه الف بالقديم الناس دى تعيش كيف مع تماسيح الانقاذ ديل
ياخوى جبرا خلينا فى حالنا نقوم نكتب بشفافية ماتنسى (السيف و الجلاد ينتظران) والعيشة بقت قاسية لو كان فى شفافية كان القطعو السودان قاعدين لاهسع فى كراسيهم ما كان استقالوا من سلفاكير أعلن انحيازه للانفصال بقينا نفتش للذهب والزراعة وكمان الصمغ كأنه أكتشف حديثا فى بلاد السبعمائة ألف ميل مربع…… خلينامن الشفافية والكلمات البجاوية دى واتكلم عربى واستشهد بى حديث
استاذ جبرا
عليك الله البيت الساكن فيهو
بتاعك والله بتاع ام الاولاد
شكلك كدا مفلس ومكنب
لا اسكت الله صوتك ويارب
ما تحرمنا من كتاباتك
آفو في الصين وأعتقد قريتشن في استراليا .
ياجبره كسرة حلايب خطيررررره
واعمل حسابك (ود عطا) جارى عكازو ومشمر البنطلون اليومين دى انت ابو عيال
وتانى نسيت الكلمة اللنج الطالعه فى الكفر اليومين دى (دغمسة ) بعد ان طاحت
ب ( لحسة كوع ) من التوب تين
الشفافية يا جبر الله من شوفتك ……….. وشوفتك شفا ودي جاية من شفاف يعني زي الاستفتاء النزيه ( نزيه حبوبتي ) اسمها فاطمة وكان اسمه السودان …. عليك الله يا جبر الدار وبشفافية كده السودان بعد الاستفتاء يسموه شنو ….؟ اوع تقول لي بدون شفافية ( شايف الشايفو انا ياابو الشباب )
http://www.youtube.com/watch?v=g6K9zVvCyhA&feature=player_detailpage
انا عادة ما بعلق بضحك بس لكن لمساعدتك و القراء عشان المقال بتاعك يكون شفاف اكتر بهديكم الرابط دة
خلطتك دي حيرتنا عدييييل كده يا جبرا
ما عرفنا نعلق على الممغصنا ولا على البضحكنا ولا على الببكينا ولا على كلو.. طبعا مستحيل.
الصحافة وما ادراك ما الصحافة … اين الخلل؟؟؟ فتش عن الحكومة
التعليم وما ادراك ما التعليم عالي او واطي اين الخلل؟؟؟ فتش عن الحكومة
البنوك وما ادراك ما البنوك …. اين الخلل ؟؟؟ فتش عن الحكومة
المرضى والمحتاجين والميتين والحيين المنتظرين …. اين الخلل ؟؟؟ فتش عن الحكومة
الرياضة وما ادراك ما الرياضة .. اين الخلل ؟؟؟ فتش عن الحكومة
نعم دون مبالغة . وكل قضية من هذه القضايا دايره ليها مؤتمر دستوري خاص يناقش بشفافية عالية المشاكل والحلول , بعد حل ام المشاكل.. وفتش عن الحكومة
ياعم جبرة ياربى مابنشوفك الاسبوع ده فى احد القنوات العربية والاجنبيه ايام الاستفتاء ده شايف اى سودانى بقى خبير ومتخصص فى الشان السودانى واى فنطوط لبس بدله والغريب كلهم نفس الكلام ذى المسلسلات المصريه وياعم جبره لو ظهرته الاسبوع دع حدثنا بشفافيه واكثر من كلمة حيث انه وينبغى وافتكر وح واكتب لنا المره الجايه عن التسمين الكيزانى كيف هم بقو كده الواحد كان ذى قلم الحواجب بقدرة قادر بقى ذى بقجة الهدوم المنتظره الغسال وياريت تثمن لنا حالنا المايل ده كلو
كيف لا تكون الصحافة السودانية (كما وصفت) ، و شخص مثل (الطيب مصطفى) يمتلك (صحيفة) و (منبر سياسي) كمان ، ليس لشئ .. الاّ لانه (خال رئاسي) ، يحتمي بالقصر .. وهو الذي لم نسمع عنه قبل ( انقلابهم) .. لا صحفياً او لا سياسياً او حتى مطرباً ..
لكين تقول شنو يا جبرا ..
كلّو من الشفافيه دي .. كرّهتنا ، بقت كتيره الايام دي .. المفروض الناس تحارب الموضوع ده عشان ماتودّي البلد لموارد لا يحمد عقباها !!!!
الاستاذ جبرة
تحية واحتراما
ياتري المقطع (وليس لدينا لاعب واحد يلعب خارجياولو في حلايب القريبة دي ) مقصود ام انه جاء من باب الفكاهه
عموما اذا جاء مصادفة فلا باس وارجو ان تضعه في الحسبان المرات القادمة لان حلايب منطقة متنازع عليها وليس خارج الوطن الماناقص علي الاقل حتييتم الفصل فيها
وشكرا حزينا
والله يا أستاذ الأسبوع الفات قريت مانشيت بقول ( ميلاان فى برج دبى ) قلت الله إمارة دبى شربت مقلب فى البرج ده والمكتب الهندسى النفذ المشروع حا يقيف حالو وربما يعلن إفلاسة.لأنو فهمت على طول إنو البرج فيهو ميلان يعن (مائئئئئئئل) لكن لما دخلت فى التفاصيل قريت إنو فريق (ميلان الإيطالى ) أجرى تمرين فى ملعب كرة القدم الذى هو فى أعلى البرج.
طالما في كلمة تثمين معناها في بيع
وطالما في كلمة شفافية معناها في شئ يطبخ خلف الكواليس
ولكن الخطورة في بيع الوطن بالتجزئة الحاصل اليومين ديل
كسرة :
شوف حكومتنا الديمة مرضتنا
السياسة غلبتنا والبلد طردتنا
كلام في في كلام …… ياود جــــــــبرة
زمن والي الدين الله يرحمه رحمة واسعة ….صدر مانشيت جريدة رياضية بعنوان والي القضارف يسجل في الهلال …و اتضح ان لاعب آخر اسمه والي الدين من القضارف هو الذي يسجل في الهلال.. !
والله يا استاذ جبرة ما قلت الا الحقيقة والمشكلة في جرايد بتتبجح وبتقول ليك نسبة توزيعنا فاقت الخمسين والستين الف نسخة لكن المشكلة في المضمون فارغ والجريدة كاااااااان بالغتا بتقراها في خمسة دقايق بعد ما تكون مريت مرور الكرام على المانشيتات والعناوين الجانبية البتقفل نفسك من انك تكمل باقي الخبر
والبغيظك ويفقع مرارتك البقول انو ما بيبدا يومو الا يقرا واحدة من الجرايد الاجتماعية المليانة كلها كضب:mad: 😡 😡 😡 😡
زمان كنا بنكتب جرايد حائيطيه في الثانوي ادسم من اي جريده بتصدر الان في ما كان يعرف بالسودان
"أيام كانت هناك مرحلة إبتدائية"
عزيزيّ د.الفاتح يوسف جبرا وعبد الحي محمود الحاج
قصدت بتعليقي إنعاش ذاكرتيكما وإزالة ماران بهما من وهن ،وتطمين نفسي وقد
فعلت بنا السنون ما فعلت وبلغنا من العمر عتيا.( طبعا بافتراض نحن دفعة ).
( صــــــور من الخارج)هو كتاب الجغرافيالرابع إبتدائي يدّرسه لنا أساتذة كرام
الله أسأل الرحمة لمن قضى نحبه وطول العمر والسلامةللمنتظرين.وهاكم أصدقائى
في الخارج – وعليّ الطلاق من الذاكرةوقولوا ماشاء الله –
1- أحمد في مصر (ممثل أفريقيا)
2- فرانك في انجلترا. 3- ولم في هولندا. 4- قريتشن في سويسرا-وفاتت عليك ياعبد الحى – وهي بنية حليوة تأكل ليها في جبنه،وثلاثتهم من أوربا.
5- آفــــــــــــــــــــــــو في الصين. 6- رشــك في الهند.( عن قارة آســيا)
7- جـــــــــــــــــــــــــــــــــــــــــــون في استراليا( فاهمين يا شباب)
8- هري في الولايات المتحدة الامريكية ( أمريكا الشمالية).
9- سانشو في الأرجنتين(امريكا الجنوبية) وفي نهاية الحصة خرجنا نردد:
البمباس والكمباس
أما عن أصدقائىفي الداخل ( ثالث إبتدائى) . فبدايتهم من صديق عبد الرحيم في
القولد وينتهون بمنقو زمبيري في يامبيو ( والذي فرز عيشته عنا). وخوفي أن
يفعلهاأن يفعلها ود القرشي في ريره وأحمد محمد صالح في ود سلفاب،
وأسفي يشتد إن خامرت الفكرة محمد سليمان في الجفيل ذات الهشاب الناضر
الجميل وجرحي لن يندمل إن بلغ الأمر محمد طاهر في محمد قول .
وأنا كفبل بابراهيم عبد الحميد (من عندنا)بأن يظل ممسكا بمقود قاطرته بين
عطبره/ بورتسودان . شكرا يافاتح يارائع وسوف أعــود بكم إلى ثالث إبتدائى
في مادة التاريخ وأذكركم بوليم تل ………… والفرد ورجال الشمال ودمتم.
تـــــــــتــــــــمــــــــة(ملحق)
د. الفاتحيوسف جبرا
أنا آسف جدا فقد ندّ علي ذكره ،فتذكرته ياإخوان:
إنه ود الفضل في بابنوسة
آه يازمان من "سبل كسب العيش في السودان"