مصطفى عثمان ( شحادين )،،العود ما ببقى ماشة . و العربي ما ببقا باشا

شوقي بدري

السيد مصطفى عثمان الذي وصفنا بالشحادين ، أين انت ؟ قلت اخاليك شوية يا مصطفى . ياخي بالرغم من شتيمتنا و وصف الشعب السوداني بالشحادين ، و الكلام الاخير السمعناه بتاع الما عاوزنا ما يولع بكهربتنا و ما يمشي في شارعنا و لا يشرب مويتنا . و دا و الله كلام ما يقولوه شافع في دافوري قدام طاحونة . لكن برضو عندنا احساس انت ممكن تودي و تجيب ، تاخد و تدي . عليك الله بالله اسي انت لمن تختلي بنفسك كدا و لا لمن تكون بتحلق عاين لي روحك في المراية ، ما بتقول و الله نحن البلد سطناها بي كنش . زمان سمعناك بتقول انكم عملتو غلطات لأن تلك كانت أول عهدكم بالسلطة .

طيب بعد 23 سنة الفاولات دي لسة مستمرة ليه ؟ الرد يا مصطفى بكل بساطة هو المثل السوداني البقول : العود ما ببقى ماشة و العربي ما ببقى باشا . الماشة انت بتعرفها يا ابو الدرش . و لكن للناس التانين ، هي ملقط بشيلوا بيهو الجمر في المطبخ . و قديماً الجيران كانوا بتسلفوا النار و بيقولوا ادونا جمرة . و طبعاً لا يمكن استعمال العود لأنه سيتحترق . العربي مقصود بيها الانسان الذي يعيش في البادية ( زول الضهاري ) ، بعيداً عن المدنية . و هذا لا يمكن ان ينزل من جمله ، و يصير حاكماً . مشكلة السودان انه لقطوكم و جابوكم ، و كان قديماً و لا يزال الولاء للجبهة و الأخوان المسلمين يأتي قبل الخبرة و الدراية .

انت يا مصطفى دحين ما قلت أنه الترابي قال ليك بعد ما رسلوك بعثة في انجلترا انه عاوزك تجي السودان . و عملوك وزير خارجية . امانة ً في زمتك أسي انت لو جاك شاب عمره 30 سنة و كان مثلاً مهندس طيران و قال ليك عاوز يبقى سفير خلي وزير خارجية ، هل بتقبل ؟ و رئيسك زاته مش جابوه معاينة للترابي بعد موت محمدين و المرشحين الآخرين للأنقلاب . و الترابي عمل نفس غلطة ناس مايو الرفضوا محمد شريف الحبيب لأنه عنده طموح و مزمل غندور لانه انسان ذكي و كان مدرسهم في الكلية الحربية . و قالوا النميري بليد و غفلة يمكن السيطرة عليه . و الترابي اختار البشير . خليه يخم و يصر .

و الله يا مصطفى حنيت عليك بالرغم من عداوتنا لسياستكم و حكومتكم . شتمت الناس بالشحدة . و الله انت ذكرتني بأحد سكان فريق عمايا في امدرمان والذي عرف بـ (حق العشا يا رب ). كان كسيحاً و أعمى . و كان ينادي كل المساء حق العشاء يا رب . و أشهر شحاد في امدرمان . دفناه في المساء سنة 1963 . أحد المساطيل تضايق من مناداته و قال له : ( اديك فريني تقوم تمشي ؟ ) فلم يرد عليه . شايفك و رئيسك و كل الناس شايلين قرعكم و حايمين في المطارات .
لمن اشوفك بتذكر محمد مداعي كان يغطى منطقة حيّ السيد المكي . و يكون لافي و حايم . يبلغ عن السمايات ، الحرارات ، المناسبات ، و في بعض الاحيان يعمل دعاية لستات العرقي و المريسة و يعصروا ليه .

أهم شئ يا مصطفى كانت عند السوداني كرامته . ياخي النميري بالرغم من غلطات كتيرة إلّا انه لم يكن يفرط ابداً في كرامته خارج السودان . و لكن داخل السودان كان يتصرف كسوداني . و عندما طرده شيخ كركوج عندما ذهب لزيارته بطائرة كان يريد ان يصلى الجمعة مع شيخ الخاتم و فاحت منه رائحة الخمر ، قال له شيخ الخاتم نحن ما بنصلي مع زول يتعاطى المنكر . و رجع النميري . و عندما أراد ان يفتتح مسجد النيلين قال له الأمام : أن المساجد يفتتحها الخيرون . و عندما سأل النميري عن المقصود . قال له الشيخ : يفتتحها من لم يزني او يشرب الخمر او يلعب الميسر . فتراجع النميري . و لكن عندما تطاول هيكل أمام السادات و آخرين ، لطمه النميري و كان ان يواصل لولا أن ناشده السادات قائلاً لا يا جعفر لا يا جعفر ) .

و عندما اخرج النميري ياسر عرفات بطائرته في ايلول الاسود من الاردن متخفيا ، بعد ان قتلوا أعداد هائلة من الفلسطينين ، و الملك حسين يبحث عنه لأغتياله . اسمع النميري الملك حسين في اجتماع الجامعة العربية ما لم يسمعه من انسان آخر . دلوقت البشير يمشي الدوحة يقابلوه بنجاركوك . انت يا مصطفى البشير دا بقا فنان و لا نحات و نحن ما عارفين ، يقابلوه بوزير الثقافة . يعني مشى يقدم فاصل ؟ . و لا يعرض لوحات ؟ . زمان القطريين ديل كان بيجيبوا السودانيين عشان يعلموهم الدبلماسية . يلبسوا كيف ، و يقعدوا كيف ، و يتكلموا كيف ، و ينزلوا من العربية كيف . زمن وزراء الخارجية كانوا ناس مبارك زروق و جمال محمد أحمد . و بعدين يا مصطفى ياخي كترت الطلة بتمسخ خلايق الله . البشير دا بمشي قطر اكتر من حوش بانقة ، الحكاية شنو ؟ و بعد كدا البشير يمشي السعودية يجيبوا ليهو مسئول من الليق . ياخي كان ما احترمتونا نحن كشعب سوداني ، احترموا نفسكم ياخي .
سمعت انه البشير في مسجد ابوه يصلي و معزول بدرابزين . و بالرغم من كل الأمن دا خايف . . يا مصطفى ياخي في أمة في العالم 25 في المئة من سكانها عندهم حصانة ؟ ياخي انتوا بتاخفوا حتى من الحقيقة و من العدالة . و تتكلموا عن العدل و تبحثوا عنه ، و أخيراً جبتوا ابو قناية عشان يحارب الفساد . دي ينطبق عليها المثل السوداني ( عينو في الاسد قال وروني دربو ) . شوف عيني الحاياكلها الدود دي ، الحاكم العام كان بجي بيتنا في حي الملازمين راكب عربية روزرويس لونين دهبي و اسود ما معاه غير سكرتيره و سواق . و كنّا نتحلق حول العربة و معي زين العابدين محمد احمد عبد القادر ، و شقيقه النور، و الفاتح محمود حمد نصر ، و ميرغني الطيب الفكي ، و عبد الرحمن و عبد الفتاح قلندر و آخرين . و كان السائق يتبسط معنا . و عندما يخرج الحاكم العام يبتسم و يركب سيارته و يذهب . زي كأنه جاي عقد .
يا مصطفى ياخي في ايام الاستعمار كانت بتتطلع مظاهرات ، و البوليس بتعامل معاها بكل معقولية . أول مرة في الدنيا نسمع لينا بمظاهرة بتاعت عيانين . ياخي قبل ايام كان في عيانين اتظاهروا . ياخي زمان الحكومة بتعزم الناس على العلاج و بحفزوهم و العلاج مجاني . وفي الزائرات الصحيات بسكو الناس للعلاج في بيوتهم و بيوعوهم . شفنا حملات البيطري في السودان على ظهور الجمال و على العربات لتحصين الحيوانات من مرض النيني و ابو دميعة … الخ . بدون فلوس . و حتى في اقصى الجنوب و في البادية .و كلو مجاني .
عليك الله بكرة لمن تحلق و تعاين في روحك في المراية . اتذكر انه في مرضانين بتظاهروا في وسط الخرطوم . و انت لازم بتكون بتحلق . لأنه ما شايفين لا فرشة لا مقشاشة لا زعافة . ما عارف اخو مسلم كيف . أنا صغير في نادي الاخوان المسلمين المواجه منزل عمنا عوض عمر الامام في الهجرة كانت هنالك امام زائر ابيض اللون ، يتكلم و يقول أن حلق الشارب و اللحية و العنفقة حرام . و العنفقة زي ما عارف هي زعرورة تحت الشفاه السفلى . و تعرف بالانجليزية بـ ( قوتي ) . انت و رئيسك و ناسك ديل ، تحلقوا ليه ما قلتوا لينا حرام زمان . هو بقت ياخي على الصوف ديّه . ياخي البشير دا ما قال بخشموا البياكل الكسرة دا ، أنه كذب على الشعب السوداني . و تذهب الى السجن حبيساً و اذهب الى القصر رئيساً . ياخي قبضّوا اولاد الناس زي ما سيد القلوبية يقبض القبور عشان يكج الطير . و رسلتوهم الجنوب . و غنيتم . و لتسل منهم دماء و لتسل منّا دما فلتسل كل الدماء . و قال شيخكم الترابي من ماتوا في الجنوب ليسوا بشهداء ، بل فطايس . و جيتوا تاني دورتوا الفلم دا . لكن تاني المجاهدين ديل إلَا تعلقوا ليهم محلب ، عشان يمشوا يحاربوا ليكم .

انت يا مصطفى كاشا شق عصا الطاعة على امير المؤمنين عمر البشير . و كرم الله بتاع القضارف . ليه ما رسلوا ليهم الجيوش و المتحركات و الطائرات زي ما عملوا مع الحلو و عقار . و لا عشان في شرعكم ديل عبيد و ما بستحقوا الحياة . و ما بلفقوا مع المشروع العروبي الاسلامي . انت يا مصطفى قلبك كدا ما بأنبك و لا ما بتخجل ، أو تتوقف و تفكر مع نفسك انه القتل البحصل دا في جبال النوبة و في النيل الأزرق . شئ خطأ . جريمة ياخي . انت ما بتتحرك لما تشوف اجساد النساء و الاجساد الممزقة بطائرة الانتينوف . و لا أنا غلطان . ما انت زمان القلت كل الماتوا في دارفور ديل 12 الف .

تعرف ليه الناس ما حا تتغشى ليكم تاني . في قصة كان بدرسوها لينا في الوسطى . و هي أن الناس عبدوا شجرة . فذهب الناسك حاملاً فأسه ليقطعها . فبرز له الشيطان و تصارعا لمدة طويلة ، و أنتصر الناسك . إلّا انه كان تعباً فقرر ان يعود لقطع الشجرة في اليوم التالي . و تكررت العملية عدة ايام . و أقترح الشيطان ان يضع ديناراً من الذهب تحت وسادة الناسك كل صباح . حتى يطعم الناسك المساكين و يتصدق على الفقراء . و لكن بعد فترة توقف الدينار فأخذ الناس فأسه لقطع الشجرة . و لكن الشيطان تغلب عليه بسهولة . قال له الشيطان : ( انت كنت تحارب لوجه الله و لكنك الآن تحارب للدينار ). الشعب دا بعد ما شافكم ، و شاف السف و القرش دا و الضياع و القصور و النساء مثنى و مثلث و رباع ، و العلى الجنب . و مال المايقوما دي كان بتتملئ من قطع الجمار ؟ هل معقولة تكونوا لسة فاكرين انه الشباب و حتى بروفيسرات الجامعات و الدكاترة و المهندسين سيركضون للتجنيد ؟ و روسيا و أمريكا قد دنا عذابها ؟ . ياخي جبتوا لينا الأخوان المسلمين كل الموديلات و الماركات التجارية و الأشكال و الألوان . لأنهم ديل اخوانكم قبل الشعب السوداني المسكين . طيب يا ابو الدرش ربنا فتح عليكم و الأخوان المسلمين في مصر معاكم قضيم و قراصة نبق ، تمام التمام . طيب ياخي ما تخليهم يرجعوا لينا حلايب ما الحالة واحدة . و لا اقول ليك انا غلطان . ياخي المصريين ديل شحدتوهم غاز . و قالوا ليكم الطلب سكو . نميري زمان غير علم السودان عشان خاطر العرب . و كان يجعر بالبكاء عندما مات ناصر . و بالرغم من كل هذا رفضوا ان يعطوه خطين بنزين . و في نفس الوقت كانوا يتفاوضون مع اسرائيل ، مليون واحد و لا اتنين مليون برميل . ما الما بتضوقو ايدك ما ببقى نجيدك . و نفس البلطجة دي بمارسوها المصريين معاكم .

بالمناسبة يا مصطفى يا اخوي . ياخي وزير الخارجية دا بحسس الناس بأنه عنده شخصية ، مهابة ، كازما و حزم . ما شفت وزراء زمان . شوف صورة أيوب خان وزير خارجية باكستان في الخمسينات . كان مظهره بخوف الهنود . و انت تتكشم زي نار القصب ، و زي الشافع الجابو ليه العجلة ، ياخي اركز . و بالرغم من انه كرتي هو وزير الخارجية الرسمي إلّا انه انت وزير الخارجية الحقيقي . فياخي ارسى شوية . الفرعون الكان بخوفكم و تمشوا انت و البشير تقعدوا قدام الخرطة الكبيرة الفيها حلايب مقطوعة راح . و الناس قالوا : ( انفخ و لو حملك ريش ) . ياخي احترام الناس للسودان بنعكس في احترامكم لنفسكم . و بعد شحادين كمان وصفتوا الشعب السوداني بأنه كسلانين . بالله دي مش محنة يا مصطفى . زول يصف شعبه بأنه كسلان . و الله الدليل الوحيد على كسل السودانيين انه ما طردوكم .

السوداني ما يبقى كسلان ليه ؟ اذا كان انتوا كرهتوه الدنيا . كدي بالله فسر لي عليك الله تدفعوا للمصريين حيوانات حية . يعني شية و كمونية و مرارة و تقبلوا بالصدقة ، عشرة ألف من خرفان الهدي ترسلها ليكم السعودية . و يجبوها ليكم مصدرة . بالله عليك الله يا مصطفى دي مش محنة . و رئيسكم يقول مستعدين للحرب مع الجنوب . البحرينيون عندهم مثل بيقول : ( قالوله عندك تاكل قال لأ . قالوله عندك تغرم قال ايي ) . ياخي شعب عايش على الصدقات عاوز يحارب . و مال لو كنتوا بتاكلوا كافيار كنتوا حا تعملوا شنو ؟ . ياخي انتوا شدة ما جوعتوا الناس سمعنا انه محلية الكاملين عشان تجد دخل فرضت رسوم على الازيار . الازيار دي بعملوها صدقة جارية . زول مات في قبره بعملوا ليه سبيل . أول مرة اسمع بدمغة و ضريبة على صدقة . يعني المرة الجاية مافي زول يمعمل رحماتات لأنه حا تتطالبوه بقيمة مضافة و اقرار ضريبي . و كمان عملتوا مجسم للحج مدفوع الاجر . ذكرتوني ابرهه صاحب الفيل الذي بنى كنيسة في اليمن صنعاء لكي يوقف العرب من الحج للكعبة . محن محن يا ابو الدرش .

يا مصطفى ياخي العالم كلوا قايم في الاسبيستوتس الذي استخدمته تارف التي بنت بيوت حلفا الجديدة لأنه يسبب السرطان . انت يا مصطفى لمن مشيت وديت المساعدات و المستشفيات المتحركة للبنان ، ما فكرت في أهلك النوبيين و انت نوبي ياخي . حاجة تانية ياخي محيراني انت من القولد ياخ العروبة و العرب و الاستعراب و الاعراب دخلك بيهم شنو ؟ . ياخي النوبيون يتمتعون بأحسن الأخلاق و اشتهروا بالامانة و الصدق و الأخلاص . الحاجات الجديدة دي الجابتها الانقاذ ما بتشبة السودان . ياخ دي اخلاق كريهة . قبل اسبوعين كنت اتكلم مع الدكتور و الرجل السودان الاصيل سيد المقبول و الذي قضى خمسة عقود في ألمانيا كطبيب و استمتع فيها بالاحترام و المعقولية و الفهم . و كان يتكلم بكثير من المرارة و الألم و طبعاً اسمه دكتور عبد الرحمن المقبول و لكن قديماً في السودان كل من يسمى بعبد الرحمن كان يطلق عليه لقب السيد ( السيد عبد الرحمن ) . و تحدث عن قلة الأدب و بجاحة و اللؤم الذي صار سمة كل من تقلد السلطة حتى الغفير . و كيف أن ضابط صغير يكون بمثابة حفيده قال له عندما ابرز له الجنسية السودانية : ( تعرف يا عبد الرحمن انت عندك مووووشكلة . جنستك دي ما نافعة لأنه الجنسية اربعة اسماء و جنستك تلاتة اسماء ) . ما كان يؤلم سيد المقبول الرجل لا يطالب حتى بأن ينادى بدكتور و لا يهتم بلقب دكتور انه كما قال انه كان يتوقع كلمة يا حاج يا عم او أي مخاطبة بأحترام . انه لم يكتب الجنسية بنفسه في الستينات و لم يخطئ و لم يسبب المووووشكلة .
اليوم عندما كنت اتحدث مع المفكر السوداني حيدر ابراهيم ذكرته هذه الحادثة . فقال لي انها قد صارت سمة من سمات التعامل بواسطة كودار الجبهة الاسلامية ، حتى يميزوا نفسهم للآخرين . بمعنى نحن الواصلون و لا يهمنا اي شئ . و لا نحترم كبير و لا نرحم صغير . و لسوء الحظ انتقل هذا السلوك الى بقية خلق الله في السودان إلا من رحم ربي . و صارت القندفة و الازدراء و التعالي سمة الناس . و ليس بغريب ان تقتل حفيدة السلطان عجبنا في دارها و وسط اهلها و في حيّها . و الله لم يكن هنالك رجل واحد يستطيع ان يرفع يده على امرأة في السودان و إلا انتقم منه الشارع في وقتها . لقد كان احد المجانين يجوب الطرقات في الخرطوم و يجلد النساء بخرطوش اذا لم يعجبه شكلهم او لبسهم . و لقد سمعت في التلفون و لقد شاهدت في التلفزيون ان مجذوب الخليفة رحمة الله عليه قد اعطاه تصريحاً بذلك .

مرة تانية اقول ليك يا مصطفى العود ما ببقى ماشة و العربي ما ببقى باشا . ياخي البشير قال ما حا يترشح تاني . عليك الله يا مصطفى هل انتوا و لا البشير مصدقين عن جد انه هو اترشح و فاز ؟ . ياخي انتوا مجموعة من الناس اتى بهم حسن الترابي . بعد مؤامرات و خيانات . و سلمكم السلطة لم يكن فيكم من يستحقها أو يعرف ما هي السلطة . و تعلمتم الحجامة في رأس اليتاما . و لكن تعليمكم برضو كان غلط . هل يصح يا مصطفى زول كان حاشر يدينو و نخرينو في قدوم زول شغال قلع و نخر و سمكرة يقولوا ليه خلي المدقاب و المدربيتة و كجامة الاسنان دي و تعال عليك الله اشتغل لينا وزير ؟ و وزير شنو ؟ وزير خارجية يا ابو الدرش . تتذكر يا ابو الدرش هيق الكان وزير خارجية ريقن ؟ و لمن ريقن طقوه طلقة سلاخية و نائب الرئيس بوش كان مافي ، قام مشا طوالي البيت الابيض و قال انا المسئول الآن . ياخي بس عشان نبرته العسكرية و تسلطه طرطشوه . تتذكر يا مصطفى ؟. و كما متذكر اسأل ياخي ما عيب . جملة واحدة الراجل طرطشوة و انتوا مدورين في البلد طفي و شلاليت . و قدام القون كورتكم طاشة زي حبو . عليك الله يا مصطفى لمن تمش تحلق فكر في الكلام دا . كلها دقيقتين ياخي . يمكن ربنا يفتح عليك و تقول و الله ياخي الحاصل دا مافي ليه لزوم . ياخي مافي زول سألكم بدون اي مناسبة قلتوا نحن كنّا بنهرب السلاح لي ليبيا . يعني زي الزول البقبضوه سايق بدون نور و يجي قدام القاضي يقول انا امبارح كنت كاسر لي خزنة . بعدين العنتريات و التشنجات بمناسبة و بدون مناسبة لزومة شنو ياخ . تمنعوا المنظمات الجات تساعد أهلكم و تهددوا بمنعهم . حتى الصليب الاحمر و الامم المتحدة الانتو عضو فيها منعتوهم . تتذكر كلام ود دكين الشكري لمن طلب ريا بت اب كبس للعرس و قالوا ليهو ريا مخطوبة لود عمها طه ، لكن نديك اي بطحانية . قال ليهم : ( ليه يا اهلنا للبيناتنا ما بتراعوا . البقول راسه بيوجعوا تربطولو كراعو ).

قبل مدة سمعت انه الاستاذ عيسى الرشيد الناطق الرسمي بأسم وزراة الزراعة قد صرح . و عندما عرفت أن وزارة الزراعة عندها ناطق رسمي اتذكرت كلام ود دكين ” البقول راسه بيوجعوا تربطولو كراعو ” . وزارة الزراعة دي وزارة بتزرع . ما محتاجة لناطق رسمي . معنى كدا الخمسين وزارة ديل كل وزارة عندها ناطق رسمي و مساعد و احتياطي لمن يكون الناطق الرسمي ماشي يشيل فاتحة . يا ابو الدرش يا خوي دي مسخرة . و عوضية تموت سنبلة . و ما حا تحصل حاجة . ايه رأيك ؟ . لأنه انتوا ما ناس كويسين يا مصطفى .
ع . س . شوقي بدري
[email][email protected][/email]