جبرا في لندن (2)

عند كاونتر البلاغات كان هنالك صول ضخم الجثة متورد الجضوم يجلس على كرسي جلدي دوار ويضع أمامه دفتر البلاغات، وقفت أمامه وألقيت عليه التحية:
– صباح الخير
– صباح النور.. هل من خدمة أؤديها لك!
– بالحيل يا خواجة
– أنا عاوز أفتح بلاغ
– عن ماذا تود التبليغ
– اتسرق لينا خط
– What do you mean? A line?….. هل تعني (لاين)؟
– لا لا يا خواجة ما (لاين).. ما لاين
– إذا لم يكن (لاين) فما هو إذن؟
وأسقط في يدي، إذ يبدو أن حضرة الصول الخواجة يحتاج إلى أن أشرح له القصة برمتها، ليته كان يفهم اللغة العربية كان طوالي فتحتا ليهو مداخلتي مع الشريف (بدر) رئيس مجلس إدارة سودانير عند بيع الخط، ففيها حكينا كل الحكاية وهي موجودة في عدد من مواقع الإنترنت.
قطع حبل تفكيري حضرة الصول وهو يقول لي:
– دعنا نقوم بفتح البلاغ وسوف نعلم لاحقاً القضيىة،
ثم قام بفتح الدفتر الضخم بعد أن أخذ رشفة من كوب الشاي الذي أمامه وخاطبني:
– الاسم؟
– الفاتح جبرا
– ما أن سمع حضرة الصول الاسم حتى أخذ في الضحك حتى اهتزت كرشه الضخمة وخاطبني قائلاً:
– أخبار خط هيثرو شنووووووووو؟
– الله لا كسبك يا خواجه برضو إنتا متابع الحكاية دي وعارف؟
– كيف لا أعلم يا ساخر سبيل؟
– وبرضك عارف اسم العمود؟
– وهل هنالك أحد في العالم لا يعرف واوات هيثرو؟ (مواصلاً) كم بلغ عدد الواوات الآن؟
– والله يا خواجة أنا لمن جيت خليت الكسرة الأصلية (واواتا) ذي سبعين كده وكسرة (توجيهات الرئيس) زي أربعين شهر يعني (واو) كده!
– كم عمرك مستر جبرا؟
– 58 سنة لكن لمن الخط اتسرق كان عمري 49!
– ومنذ ذلك الزمن لم تعثروا عليه؟ وما عارفين الشالو منو؟
– ما ده الجابنا ليكم ذااااتو… أي مسؤول تسألوا يقول ليك… التحقيق لسه ما اكتمل والملف حولوهو وين… والشنو ما عارف
– هل لديكم نائب عام ورئيس قضاء ووزير عدل وبرلمان؟
– كوووولهم قاعدين يقروا في الواوات دي.. بس ناس البرلمان ديل أنحنا خاتنهم (للصفقة)!
– لماذا يا سيد جبرا اخترت قسم الشرطة هذا تحديداً؟
– شوف يا خواجة نحنا علمونا في السودان لمن تمشي تفتح بلاغ يقولو ليك إلا في (دائرة الاختصاص) محل السرقة حصلت.. يعني كان إتسرقتا في (بيت المال) إنتا تابع للقسم الشمالي وكان اتسرقتا في (الملازمين) إنتا تابع للقسم (الأوسط) مع إنو بيفرقهم شارع واحد.. أها أنا قلتا أجي القسم ده عشان أقرب حاجة لمطار هيثرو محل (السرقة) حصلت!
– تمام… تمام (يمسك بالقلم): ما هي مهنتك مستر جبرا؟
– والله في الحقيقة أنا محاضر بتاع IT وكاتب صحفي لكن هسه (محقق متفرغ)!
– العنوان؟
– هنا وللا هناك؟ كان هنا قول (بيت السودان) عشان عاوزين بعد ما نخلص من قصة الخط دي نشوف حكايتو كمان هي شنووووو بالمرة!
بعد أن قام حضرة الصول بكتابة البيانات على دفتر البلاغات الذي أمامه، طلب مني أن أعطيه جواز السفر لتسجيل بياناته… وما أن نظر إلى ختم الدخول حتى عقد حاجبيه مندهشاً:
– مستر جبرا أنت لم يمضِ على وصولك ساعتان!
– أيوة يا حضرة الصول… ما عاوزين نضيع أي دقيقة… القصة دي طولت يااااخ وعايزين نحسما
أعاد لي حضرة الصول جواز السفر ومعه ورقة عليها رقم البلاغ وبياناته، وأشار إليّ بالذهاب إلى مكتب الضابط المناوب لتصديقه!!
– ما أن دلفت إلى مكتب الضابط المناوب وقمت بإعطائه ورقة البلاغ حتى وقف يصافحني قائلاً:
– أخبار خط هيثرو شنووووو (بالإنجليزي طبعن)
– بالله هي القصة دي أتاري أي زول في الدنيا عارفا إلا المسؤولين عندنا.. والله حكمتو بالغة!
– (وهو يمسك بالقلم الأحمر ويوقع): شوف مستر جبرا خلاس البلاغ بتاعك اتصدق تجينا بكرة الساعة عشرة صباحاً عشان نديك (الشاويش حسنين) يحقق في القضية دي..
– لكن يا سعادتك تدوني شاويش وكمان حسنين!
– مستر جبرا القضية ده مش محتاج ضابط وما عاوز خواجة ذاااتو… ده قضية بسيطة.. وكيل عريف ممكن يشتغلو!

– كسرة:
في حلقة غدٍ نشوف الحصل شنوووووو… أبقوا معنا… الفاتح جبرا .. من داخل مبنى القسم الأوسط… شرطة لندن غرب… العاصمة البريطانية).
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و
صحيفة أول النهار