بيفرحوا ليه؟
إمتلأت الصحف والأسافير بأسماء و ( صور) تشكيلة حكومة ولاية الخرطوم الجديدة ، وقد لفت نظر العبد لله أن من تم أختيارهم لهذا الأمر (فرحون) بتحمل المسؤولية على عكس الصحابة والتابعين الذين كانوا يهربون منها ويتخوفون من تسنمها ، وأن علامات السرور قد علت وجوههم بل أن بعض أهاليهم قد قاموا بذبح الذبائح وتبادل التهاني ، العبد لله طفق يبحث عن سر هذا السرور فوجد الحاجات التحت دي !
? ح يكون عندو حاشية وهيلمانة ? عندو مكتب ومدير مكتب وسكرتيرة وعربية تودي الأولاد المدارس و(بوكس) يجيب الخضار من السوق وعربية تاني تودي المدام الكوافير والأعراس و(الحنانة) ده غير (البرادو) بتاعت سعادتو
? ح يرتاح من قصة كل دقيقة يمشي يعاين للجمرة ويشوف الفضل فيها كام وهل ح تقضي ولا ح تقوم تقطع نص الليل وتجهجه باكاتو .
? أهم حاجة في الموضوع ح يرتاح من (حكايت) يوم خمسة دي وهو اليوم الذي ينتهي فيهو مصروف البيت ويبدأ في عمليات الإستلاف و (الجرورة) وح تختفي من حياتو عبارات مثل (بالله ألاقي عندك سلفة) .. (هسه الشهر ده يتموهو كيف؟) لأنو مخصصاتو الشهرية مع (البدلات) و (السفريات) والشنو ما بعرف ح تكون كفيلة بأنها تقعدو مليون شهر تاني .
? وح تتاح ليهو فرصة يسافر .. طبعن قبلما يكون مسؤول (التذكرة بس كانت بتجهجهو) .. لاااا هسه الوضع ح يختلف .. كل يومين تلاته شنطتو والمطار ..طبعن قبل ما يكون وزير كان بيتبهدل في التفتيش تطلع الحزام الجهاز يقول ليك تيت تيت .. يقوم يطلع النضارة وبرضو الجهاز يقول ليك تيت تيت .. يقوم تطلع الما عارف شنو داك ? الكلام ده تاني مش ح يحصل بس يسلم جوازو قبل السفرية لبتوعين العلاقات العامة وورقو وتأشيرتو وتذكرتك كووولها تكون جاهزة ومن صالة كبار الزوار وعلي الطيارة طوااالي
? الأكل بتاع سعادتو أكيد ح يتغير .. معقولة ح يفطرتاني (بوش) ويتغدى (عدس) ويتعشى (فول)؟ .. الحاجات دي بياكلا (الشعب) ، تاني ح ياكل حاجات تانيه خالص .. حاجات طازجة ودسمة وطرية حاجات ذات سعرات حرارية مرتفعة وقيمة غذائية عالية ومش كده وبس القصة ح تكون فيها تحلية ؟ يعني بعد ما يتتغدي ح تجيهو صينية فيها (فواكه مشكلة) وممكن كمان (حلويات) ويااا حليل الموز !
? سعادتو تاني مش ح يمشي (الجزارة) كل يوم جمعة عشان يشتري (نص الكيلو) البقري المجلفط .. لا تاني ح ياكل (بتلو) و(فلتو) و(عجالي لبن) ويوم الجمعة ده بالذات (الخروف) ح يكون الصباح معلق في باب الشارع !
? وح يمشي (الحج) بدون ما يدفع مليم واااحد .. ويجيب معاهو هدايا و(جلاكسيهات) للعيال وأمهم كمان .
? ما ح يكون عندو علاقة برسوم الجامعات والمدارس والأقساط و (فلقة الدماغ) ومافيش تاني واحد من الأولاد ح يطردوهو عشان ما (دفع الرسوم) وأكيد الأولاد مش ح يتعلمو تاني في المدارس الحكومية .. مدارس أجنبية وبس !
? ح تنطلق وراء عربته (المظللة) عدد من عربات الحراسة والتأمين و(موتر) يفسح له الطريق ويييو ويييو ويييو !
? ما ح يكون في أسرتو أي زول (طائر) وما لاقي وظيفة .. كل العاطلين ح يشتغلو ? القصة كوولها كارت من سعادتو و (حامله يهمني أمره)
? ما ح يشيل هم للعلاج لأنو تاني مش ح يمشي لمستشفى حكومي يقول ليهو جيب القطن والشاش واللصقات وصبغة يود والحقن الفاضية والحقن المليانة لا الحاجات دي للمواطنين أما سعادتو فلو شعر بأي حاجه (ألمانيا) طوااالي !
كسرة :
وأنا أقول (بيفرحوا ليه) ؟
? كسرة ثابتة (قديمة) :
? ? أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و
والله يا الفاتح انت فعلا زول طيب خلاص
و نسيت انو حاينزل المعاش ( و لو بعد سنة ) بكامل مرتبه و امتيازاته الي أن يتوفاه الله .
عزيزى جبرا لقد جانبك الصواب وانت تنضح حسدا وغيرة وكمدا!! فهؤلاء الذين تحدثت عنهم من أمهات جيل الإنقاذ ولم يهبطوا بالبرشوت من قضائات خاليه من الدعه والتعيم و لم ينبتوا من باطن الأرض خالى الوفاض، هؤلاء من سندو النظام طوال ربع القرن التي مضت و(طبعن) ليس بالمجان وبالبلدى (بلوشى) وبكل تآكيد راجع الوظائف التي كانوا يشغلونها قبل التصعيد!! وانا هنا إستثنى وزراء منتسبى الأحزاب المواليه فهؤلا جلبوا ليقفوا بأنفسهم على فوائد أن يكون (متواليا) وسوف يمهدون لهم الطريق ويغضون عنهم الطرف مخصوص ليستووا علي نار هاديه ومتى ما بدت منهم اى (فرفره) مستقبلا فيقال لهم (هاكم اقرآوا كتابكم) وعثمان ميرغنى يشتغل والهندى يشتغل وما عارف مين يشتغل وبى كده يطمئنوا الى إنهم قدروا يحيدوا الحزب بكامله إكمن اللص القادم جاء من تحت رأسهم ويجب أن لا ننسى اسنوزار واحد من الحزب المتوالى وإنتفاعه كفرد لن يتقاطع مع حنمية إنتفاع بقية أعضاء الحزب المتوالى والإنقاذ له طرائقه في تلويث أجعص جعيص سوى أقبلوا فراده او أسراب ،، دى خبرة سنين يابا !! ثم ليه ما يفرحوا؟ هل ساعة الحظ بتتعوض ؟!!.
انا ما عارف ليه ما جبتا سيرة مليزيا ؟ — مع انها محطة مهمة جدا لكل مسؤل حكومي —
يا جبره لو الجماعه ديل عملوا إقرار ذمه وكتبوا فيهو كل الحاجات القلتها دى تودى وشك وين….قووووووول ما كتبوا قانون التحلل لسع سارى.
أنا بديك طريقه تغير حالك ياستاذ جبره
أمشي السفارات الغربيه وشيل معاك كشف
توضح فيهو ماهيتك ومنصرفاتك الشهريه
ومعاها جعيره زي بتاعت الوزير.
كان ما،،،أخذته لجوء إقتصادي ذوق منهم ساكت الخواجات
بجعروا معاك.
نسيت برضو نكاح الحسان الملاح ولا عزاء للشباب العاطل.. مغص مغص يا العزابة وكده..
لا وكمان عشان تستمر حياة النعيم لازم تزيد الجبايات والكشات والرسوم والدمغات على التعساء..
زمان كان في شنطة تمكنا
حسي ما في واحد قاعد يجيب سيرتا ، هل لأنها كانت فترة تخلف
اشهد انك صادق في ما تقول
نسيت القصور والعمارات والشركات البنزنس والنهب المصلح والبنات الملح موز شنو وهو الموز كان لامي فيه زي الغلابة وزي ما قال المداح يا الله الفوز بالجنة ام موز
واها لو شالوه فى تعديل وزارىىىىىىىىىىىىىى بعد 6 شهور بس ؟
طيب المشهد القالو اللمبى بتاع ناس جوهو وبكوا عشان يعفيهم من تحمل المسؤلية دى عبارة عن شنو .
الفرح اسبابوا كتييييييرة ليه ما يفرح والناس كوووولها جارية وراهو وتمدحوا وانو ذيو ما حصل وان عهدو هو احسن العهود وكل الناس مبسوطين منو و
ما تضيف ليها اخبار حلايب شنووووووووووو؟؟؟؟؟
كسرة: وانت قايل يا جبرا كل النغنغة والحاجات دى جايبنها من اموال الشعب؟؟ابدا دى من اموالهم الخاصة مش كتر خيرهم انه بيدوا الناس مواهى ويعملوا طرق وكبارى من حر مالهم؟؟؟؟ ويجى بعد كل ده الناس يعارضوهم وينادوا ياسقاطهم حقيقة شعب ناكر للجميل!!!!!!!!!!!!!!!
ليه ما إفرحو؟!
والله يا أستاذ الفاتح انا ما ضحكت من قلبي بالجد زي ما ضحكت الليله وأنا بقرا في كلامك دا . يا اخي إنت عندك مشكله مع الناس ديل ما تخليهم إبرطعو ماهي القصه عايره وادوها صوت وبلدنا بلد غنيانه وما عارف تودي القروش وين.
بس نسيت حاجه مهمه في موضوع السفر قبل وبعد التعيين لأن قبل الاستوزار يا سيدي القصه فبها سفر عبر عدة مطارات للحصول علي أرخص الأسعار يعني لو في طائره توديهو دبي عن طريق موريتانيا مافي مشكله طالما التذكره رخيص لكن بعد الإستوزار القصه فيها درجه أولي ومضيفه للخدمه وجرايد وخلافو وعلاقه للبدله وسيارة سفاره مش الواحد يضرب لي قريبو عشان إجيهو من آخر الدنيا عشان يوصلو لي نص البلد أو لي أرخص فندق في جهة الوصول ولا أنا غلطان أصلو الجماعه بحبو الملح والميري ةما أدراك ما الميري وتراب الميري والتمرغ فيهو ودار ابوك كان خربت شيل مش شليه شيل أي حاجه وبعد داك ….. ولا ما في داعي وبرضو تقول لي ما إفرحو.
والله يا أستاذ الفاتح انا ما ضحكت من قلبي بالجد زي ما ضحكت الليله وأنا بقرا في كلامك دا . يا اخي إنت عندك مشكله مع الناس ديل ما تخليهم إبرطعو ماهي القصه عايره وادوها صوت وبلدنا بلد غنيانه وما عارف تودي القروش وين.
بس نسيت حاجه مهمه في موضوع السفر قبل وبعد التعيين لأن قبل الاستوزار يا سيدي القصه فبها سفر عبر عدة مطارات للحصول علي أرخص الأسعار يعني لو في طائره توديهو دبي عن طريق موريتانيا مافي مشكله طالما التذكره رخيص لكن بعد الإستوزار القصه فيها درجه أولي ومضيفه للخدمه وجرايد وخلافو وعلاقه للبدله وسيارة سفاره مش الواحد يضرب لي قريبو عشان إجيهو من آخر الدنيا عشان يوصلو لي نص البلد أو لي أرخص فندق في جهة الوصول ولا أنا غلطان أصلو الجماعه بحبو الملح والميري ةما أدراك ما الميري وتراب الميري والتمرغ فيهو ودار ابوك كان خربت شيل مش شليه شيل أي حاجه وبعد داك ….. ولا ما في داعي .
بفرح عشان بعدين النار مضمونة ( نار مضمونة ولا جنة مجهجهة )
بفرح عشان بعدين النار مضمونة ( نار مضمونة ولا جنة مجهجهة )
السلام عليكم ورحمة الله وبركاته ….كلام عجيب والله !!!