القصة فيها إقامات؟
فى مقطع من مقاطع المسرحية الكوميدية ذائعة الصيت (شاهد ما شافش حاجة) وبينما كان بهجت الأباصيرى (عادل إمام) يجلس أمام قفص (الأرانب) يوزع لهم (الجزر والخس) حانت منه إلتفاته ليفاجأ بأن (الأسد) يجلس على مقربة منه .. فأخذ يشيح بوجهه عنه ناحية الأرانب برهة ثم يعود للنظر إلى الأسد من جديد وهو غير مصدق قائلاً :- فعلا هو … أسد !!
قبل أيام قلائل كنت أقرأ فى الصحف ففوجئت بمانشيت يقول (السودان يستقبل مليون سائح صيني) .. وضعت (الصحيفة) جانباً و(طلعتا النضارة) وأديتا (مسحة) بى طرف الجلابية .. وكمان أديت عينيا ذاااتم مسحة ولبست النضارة تااانى ومسكت الصحيفة لأقرأ المانشيت مرة أخرى قائلا بعد قراءته (على طريقة ) عادل إمام – فعلا والله .. مليون صيني .. !! كما أن جلوس الأسد بالقرب من (بهجت الأباصيرى) قد كان مفاجأة له أدركها بعد فترة من الوقت فقد كانت قراءتى لذلك المانشيت مفاجاة حتى لحظة كتابة هذه السطور جعلتني أقوم بتركيب (الفهامة) عل وعسى أن تساعدني على فهم الحاصل ، الخبر يقول :
(شرع وفد صيني يزور الخرطوم حاليا في تحديد المقاصد والأماكن والإجراءات السياحية في السودان، تمهيدا لإحضار نحو مليون سائح صيني، تم الاتفاق على تفويجهم بداية العام المقبل، ضمن اتفاقيات وشراكات اقتصادية وقعت بين البلدين مؤخرًا) !
من الواضح أن هنالك خطأ ما (في الرقم) أو في (حاجة تانية) فلم تعرف السياحة (الجماعية) منذ أن خلق الله الأرض تفويج (مليون سائح) حتة واحدة للذهاب مسافرين إلى قطر آخر فالسياحة تعتمد على التسويق والتسويق يعتمد على الإقناع ليبرز السؤال عن الكيفية التي قامت بها الصين لتقنع مليون من مواطنيها بالذهاب سائحين إلى السودان) ..يعني زي ما بيقولو أولادنا (حنكتم كيف؟)
نخلي (حنك) الحكومة الصينية مع رعاياها (المليون) العاوزين يجونا ونشوف (حنك حكومتنا) التي تحاول إقناعنا به وهو أن القصة (سياحة) .. يقول علاء الخواض مدير عام السياحة بوزارة السياحة والحياة البرية لـ«الشرق الأوسط» وهو يعدد المزايا السياحبة لدينا بأن ولاية الخرطوم وحدها يطلق عليها اسم المدن الطبيعية غير المصنوعة (كان مصنوعة كانت ح تكون كيف؟) ولها قيمة تاريخية منذ العصور الحجرية (دي ما أدونا ليها) ، وهي غنية بالآثار، مثل منطقة سوبا وحضارة الشهيناب بجانب الطوابي وبوابة عبد القيوم (بوابة مين ديل عندهم سور الصين العظيم) إضافة إلى مراكز الخدمات والنزل والمتنزهات الخضراء (يعمينا ويطرشنا) ، ومواعين النقل النهري المختلفة (تكونو داسنهم لليوم الأسود؟) !!
حديث مدير عام السياحة (الفوق ده) لا يعدو أن يكون (ضق حنك ساكت) فكلنا يعلم بأن (سياحتنا تعبانة) وأنها تفتقر إلى أبسط أنواع (البنى التحتية) وأنه حتى ما تبقى من أثارنا السياحية قد تم التعدي عليها وقد ملت من الإهمال وعدم المبالاة ، كما إننا لا نملك أي مقومات ومعينات للسياحة تكفي ألف شخص ناهيك عن مليون شخص ؟
أين الفنادق والموتيلات ؟ أين الشوارع النظيفة المسفلتة؟ أين عربات الليموزين الفارهة وشبكات المواصلات المريحة ؟ أين المطاعم التي تقدم المأكولات العالمية؟ أين الملاعب الرياضية وصالات الجمنازيوم ؟ أين المرشدين السياحيين الذين يتكلمون العربية ذاااتا بطلاقة (خليك من باقي اللغات) ؟
وبما أن الوفد الصيني يزور البلاد حالياً من أجل الوقوف ميدانياً على الإجراءآت والتجهيزات السياحية تمهيدا لإحضار نحو مليون سائح صيني (ذي ما بيقولو)، وبما إنو نحنا (كسودانيين) عارفين البير وغطاها وإنو ده شعراً ما عندنا ليهو رقبة فالعبدلله مندهش ويتساءل : طيب الصينيين ناس الوفد ديل وريتوهم شنووووو عشان يقتنعو؟ أوعا الحكاية تكون زي (خيمة كسلا) !!!
كسرة :
المليون ديل كان سواح (مرحب بيهم) بس أوعا القصة تكون فيها (إقامات) !!
? كسرة ثابتة (قديمة) :أخبار ملف خط هيثرو العند النائب العام شنو؟ 56 واو – (يعني ليها سبعة سنوات وشهرين) ؟
? كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 45 واو (يعني ليها ثلاث سنوات وتسعة شهور)
الجريدة
يا ود جبرا ما اظنك تتغابى ابدا يااخوي
الحكاية واضحة جدا انو بعد إستيلاء جمهورية الصين الشعبية لمساحات واسعة وهائلة من باقي البلد بحجة الديون المتراكمة طويلة الاجل الما قادرين نرجعها بفوائدها لهم ، فالناس ديل جايبيين ناسهم للتوطين بالسودان واستخراج ثروات زراعية كامنة نحن ما قدرنا نستخرجها ثم شحنها تصديريا تاني لبلادهم والبلاد المحتاجة لها والبتدفع ثمنها دولار احمر !!! والله نسيت برضه كيف انو الصينيين ديل زاحموا الصناعات الوطنية وبقوا يجوا براااهم يصنعوا عندنا من زمااان ? وهسي انت قائل المناطق الصناعية والوروش في العاصمة المثلثة دي الشغال فيها منو ؟؟؟ يااخي ديل بقوا يتاجروا في خرفان الضحية على عينك يا تاجر
وبرضه تقول لي خط هيثرو وينووووو !
ياخي قووول انحنا ووووينا زاتناااا
أهم حاجة .أين الحمامات. المشكلة لو راحوا مرة
واحدة لمستشفيات حميدة لزيارة مريض.
دى بيعة بت كلب يا جبرة والله الرقاص وعصابته لو خليناهم فى البرطعة دى على حل شعرهم كما يقول اولاد بمبة نجى يوم نلقى البلد البطفى النور ذاتو يكون كسح خوفا من البيع فى سوق نخاسة الرقاص والشغلة دى واضحة العصابة اتعصرت من الصين فى موضوع الديون التى حان اجلها والموضوع ياجبرة ما تاشيرات واقامات الموضوع تراب البلد تم بيعه وهذه هى الماساة الكبرى
تصحيح يا جبرة سرحان عبد البصير مش بهجت الاباصيرى ويبدو ان الشعب سرحان وسارح ومشغول فى المعايش والعلاج والتعليم والبلد تتناقص من اعماقها مش اطرافها لان الاطراف كحلايب والفشقة وشلاتين من زمان لحقو امات طه والله يغطس حجر الكيزان احياء واموات شعبى ووطنى
البلد دي فيها ناس اشراف هنود. ما سمعتو ب( الشريف الهندي ) ؟ . المشكله شنو اذا جو ناس صينيين اشراف ونظمو نفسهم وعينو واحد منهم سموه (الشريف الصيني). يمكن يجيب لينا بند تشغيل خريجين يحل مشكلتهم العويصه . تفائلو خيرا تجدوه. البلد دي كبيره و واسعه شايفنها ضيقه لانو براكم ضيقتوها علي نفسكم باذدحاكم وتكدسكم في العاصمه المدوره المقلوزه دي. شتو ارض الله واسعه ..
يا جبرا خليك واقعي وافتح ليك مطعم صيني دا لو الجماعة ادوك فرصة ؟؟؟
الحكاية وما فيها :
الحكومة إستفزتكم وقالت
انتو جعانين
انتو فقرانين
انتو عرايا
انتو هملة
انتو شذاذ افاق
انتو وسخانين
الحسو كوعكم
نطلع زيتكم
كان رجال اطلعوا الشارع
راجل فيكم ما قال بغم
قالوا نجيب مليون صيني احساسهم عالي يطلعوا لينا الشارع
دي كل الحكاية
والله يا ود جبرا الموضوع مخيف شديييييد الناس الشمارات بتقول انهم جايين يتملكو اراضى بدل الديون بتاعتهم الماقدروا اسددوها ليهم والله بعد دا علا نشوفلنا شوفة تانيه يا هجينا يلا اشتغلنا عندهم باليومية
ياجبرا حصل افتح ليك مطعم صبنى قبل ما الجماعه يسبقوك . ولا اقول ليك احسن حاجه تشارك واحد فيهم . انا بكتفى بعشرة فى المئه لانى صاحب الفكره . مليون سائح قال.
المليون سائح بالنسبة للصينيين يماثل 10 اشخاص ماشين من السودان لاديس اباب
المليون سائح بالنسبة للصينيين يماثل 10 اشخاص ماشين من السودان لاديس اباب
سلام يا عمنا الفاتح جبرا وربنا يديك العافية ..
عايزين منك تكتب لينا عن الاستعمار الصيني القادم للسودان وحكاية المليون صيني الجايين السنة دي ..
وشكراً كتير ليك
ودى ياجبرا عايزه فهامة قالوا ليك الصين طالبانا قروض بمليارات الدولارات ونحن عجزنا عن السداد وطبعا كان هناك رهن (انت فاكر الصينيين ديل عندهم رياله ذى جماعتنا ديل ياحبيب فايتين التفتيحة بهناك)
والرهن واضح انه اراضى وعقارات يلا ياجبرا جهز شنطك من هسه وشوف ليك حته واتخارج قبل الطامة ماتع فى الراس ونقعد نندب ونسوط ذى الحريم
سوف نبكى يوما كالنساء—- على وطن لم نحافظ عليه كالرجال
هههههههههأوعا الحكاية تكون زي (خيمة كسلا) !!!
مليون سائح؟؟!! ياخي دي مبالغات وفبركات أو تغطية وإلهاء الرأي العام بالكلام الفارغ…ياخي مليون صحن ساي كتير!! تقول لي مليون سائح.. عناقريب زاتووو مافي
ابوناجى .. ياخ بطل الحساده حقتك دى وخليهم يصلوا يمكن يحصل تزاوج وتحسين نسل صينى- سودانى ..
يا الفاتح جبره السودان دوله حباها الله بالطبيعه و الجميله و لكن هذه فرصه للسواح ليروا السودان كدوله تعيش فى القرون الوسطى و انو كيف يد البشر تدمر بلد كان لحد 1966 تغسل شوارعه يوميا و ببلد يعيش اهله بدون تعليم و صحه و بنيه تحتيه كانت قبل الانقاذ فخر لدول الجوار
سرحان عبد البصير
اكيد ديل من العاطلين ومالهم فايده داخل المجتمع الصيني المنتج واخاف ان يكونو من ارباب السوابق ومرتادي السجون من عتاة المجرمين ؛ فارادة الحكومه الصينيه ان تطهر المجتمع الصيني منهم فنفتهم ورمتهم علينا كما فعل فيديل كاسترو عقب ازمة خليج الخنازير حينما طالبه الامريكان بتفعيل الخريات والحقوق المدنيه فاتهزها فرصه فافرغ السجون من عتاة المجرمين وارسلهم لامريكا كما رغبت !
رقم المليون هذا اصبح موضة . كل مسؤول يستعمله . قبل مدة صرح معتمد الخرطوم بأنه سوف يغرسون مليون شجرة والسنة الماضية ايضا صرح بنفس الرقم والسنة التى قبلها . المفروض الآن الخرطوم تكون مثل غابات الأمازون فى قارة اميركا الجنوبية. والكارثة انه لا يوجد متابع لهؤلاء المسؤلين ومحاسبتهم ولا حتى فى الصحف التى تنشر مثل هذه الأخبار .
تعرف يا جبرة ديل حايكسروا كرونة عندنا وياخدو الجنسية كمان—كحال السوريين–و-كل شئ معروض في السوق
عموما نقولها بالدغري كده وبدون دغمسة والداير يفهم بيفهم والما داير يفهم يكون بطئ الفهم وما عنده سرعة بديهة
ياجماعة حكومتنا الموقرة قلت ( اتسلفت) ليها 17 مليار دولار امريكي من حكومة الصين وجاء موعد سدادها والحكومة التكتح ما عندها عشان تسدد بعدين قالت للصين نظرة الى ميسرة ..قامت الصين اجلت الدفع وابت تدي الحكومة قروض جديدة تب ..اها .. موعد السداد الجديد حل .. والخزنة ما فيها التكتح والمغتربين ابو يدوها دولاراتهم بالاوانطة .. قاموا رسلوا كم افندي كده للصين لزوم الحنك .. الصين سمعت كلامهم باضان وطلعتوا بالاضان التانية .. ما شيوعيين وبخيلين شديد .. لامن الحكومة لقت نفسها محصورة في خانة اليك ..قامت قالت ليها خلاص انا بديكي اراضي في مشروع الجزيرة بدل قروشك .. طبعا اراضي زي دي الصين تكون بليدة لو ما قبلتها مقابل حفنة من الدولارات لانها بتحل ليها ازمة سكانية ومشاكل اقتصادية فالصينيين لقوا الصفقة ربحانة معاهم 100000000000000000% … اها .. قاموا طلعوا مليون مسجون من السجن وقالوا ليهم نوديكم تمشوا السودان نملكم اراضي وتبقوا مزارعين واصحاب مزارع بدل السجن .. قاموا المساجين الصينيين رفعوا سباباتهم مكبرين ومهللين وفرحانين … اها .. الجماعة جايين يستلموا اراضيهم طوالي ولا جايين معاينة لمواقعهم الجديدة في شكل سواح في البداية وبعد داك تقوم الحكومة بالنزعيات والتعويضات والابتزازات والترهيبات .. وينوم اهل الجزيرة ويقوموا الصباح يلقوا الجزيرة انقلبت كلها صينيين ومحروسين كمان ..والعصا لمن عصا …ويا حليلك يامشروع الجزيرة وياحليلكم ياناس الجزيرة .. وعلى المتضرر ان يرفع اكف الضراعة لله طلبا للتحرير … فلسطين 2
والله يكذب الشينة
وهذا حديث المجالس للشعب السوداني
الاستاذ جبرة لك التحية … في مقال الاخ الاستاذ عثمان ميرغني بعنوان “ارفضوا وارفعوا ثمنكم” ويخاطب فيه الشعب السوداني .. كان تعليقي هكذا
التعليق ( يا استاذ عثمان ياتو عزة ويايتو غلاء دا كلو هين… نحن بقينا اجانب في بلدنا الصين بسبع مليار دولار دين علينا( من قيمة كلية للديون 13 مليار ) شالت اراضي مشروع الجزيرة وكمان لاستيطان مليون صيني , مش كان ممكن نأجر ليهم الواطة لمدة معينة نحسبها ليهم بالشهور ولا السنوات والشهر بالدولار ناهيك عن البيع لهم فقط تأجير الارض ولكن بلد فيها مثل د.حمدي الوزير الاهبل الذي يقول جيبوا قروض وارهنوا الارض أصلهم حيشيلوها معاهم والله هذا التصريح الغبي كان يمكن ضرب عنقه في زمن الرجالة .. “قال د. حمدي قال” والله بلدنا في مأسأة حقيقية والقهر ينهش في أحشائنا ونحن نرى هذه الفوضى… يا عثمان الحاصل علينا كلوا سااااااااااهل .. بنوا مدرسة ما بنوها ..اكلنا ما أكلنا… سيحوا دمائنا وموتونا … سامحناهم واستقبلناهم بالكرم والجود وهتفنا لهم وبسطناهم ورقصناهم وهم مسرورين .. بس كل شيء ولا بيع الوطن … ولا بيع الأرض والعرض.تاني فضل شنو يا عثمان بعد اعتماد قوات الجنجويد قوات دعم سريع وفرع ينمو لاحلال مكان القوات المسلحة السودانية … اكتبوا في مثل هذه المواضيع تشليع القوات المسلحة وتدميرها تنصيب القيادات الجديدة موسى هلال وحميدتي ووداعا لقوات الشعب المسلحة السودانية … ليس هناك من سينحاذ للشعب في ثورته وانتفاضته فلا نامت أعين الجبناء. )
والله دا كمان جديد يا جبرة!!!!
السياح الصينين ديل جايين تبع برنامج الترفيه عن المساجين وللسجين فيهم مطلق الحرية ان يتم باقي عقوبته بالسودان
مقال مهم! قد يكون هذا إعادة توطين لمسلمي الصين وهذه هي الدفعة الأولى. منها نحصل على مقابل من الصين ونستفيد منهم في الجهاد وتثبيت الحكم الراشد.
أين المرشدين السياحيين الذين يتكلمون العربية ذاااتا بطلاقة (خليك من باقي اللغات) ؟
ها ها ها ها….والله يا استاذ دى جبتها ظط
والله يا جبرا الكيزان يوم تلقوا السودان دا تم بيعه وجاء هؤلاء الصينيون لاستلامه والله العظيم هؤلاء الكيزان لايهمهم الا انفسهم عليهم لعنة الله و الناس اجمعين
بهجت الأباصيري يا أستاذ جبرا كان هو اسم عادل إمام في مدرسةالمشاغبين ..أما دوره في شاهدما شافش حاجة فكان يتسمى فيه بسرحان عبد البصير .. وجل من لا يسهو..
ما بعيد كل ( سائح) يكون شايل معاه واحد كيلو نفايات لا غير !!!
يعني ألف طن من المصائب …!!
احدهم صرح بأن البلد بتشيل 3 أمثال الفيها هسى
الظاهر انه (الاخوان) تضامنو مع الشيوعيين السودانيين وحبو يدعموهم بمليون شيوعي صيني
يا ود جبرا ما اظنك تتغابى ابدا يااخوي
الحكاية واضحة جدا انو بعد إستيلاء جمهورية الصين الشعبية لمساحات واسعة وهائلة من باقي البلد بحجة الديون المتراكمة طويلة الاجل الما قادرين نرجعها بفوائدها لهم ، فالناس ديل جايبيين ناسهم للتوطين بالسودان واستخراج ثروات زراعية كامنة نحن ما قدرنا نستخرجها ثم شحنها تصديريا تاني لبلادهم والبلاد المحتاجة لها والبتدفع ثمنها دولار احمر !!! والله نسيت برضه كيف انو الصينيين ديل زاحموا الصناعات الوطنية وبقوا يجوا براااهم يصنعوا عندنا من زمااان ? وهسي انت قائل المناطق الصناعية والوروش في العاصمة المثلثة دي الشغال فيها منو ؟؟؟ يااخي ديل بقوا يتاجروا في خرفان الضحية على عينك يا تاجر
وبرضه تقول لي خط هيثرو وينووووو !
ياخي قووول انحنا ووووينا زاتناااا
أهم حاجة .أين الحمامات. المشكلة لو راحوا مرة
واحدة لمستشفيات حميدة لزيارة مريض.
دى بيعة بت كلب يا جبرة والله الرقاص وعصابته لو خليناهم فى البرطعة دى على حل شعرهم كما يقول اولاد بمبة نجى يوم نلقى البلد البطفى النور ذاتو يكون كسح خوفا من البيع فى سوق نخاسة الرقاص والشغلة دى واضحة العصابة اتعصرت من الصين فى موضوع الديون التى حان اجلها والموضوع ياجبرة ما تاشيرات واقامات الموضوع تراب البلد تم بيعه وهذه هى الماساة الكبرى
تصحيح يا جبرة سرحان عبد البصير مش بهجت الاباصيرى ويبدو ان الشعب سرحان وسارح ومشغول فى المعايش والعلاج والتعليم والبلد تتناقص من اعماقها مش اطرافها لان الاطراف كحلايب والفشقة وشلاتين من زمان لحقو امات طه والله يغطس حجر الكيزان احياء واموات شعبى ووطنى
البلد دي فيها ناس اشراف هنود. ما سمعتو ب( الشريف الهندي ) ؟ . المشكله شنو اذا جو ناس صينيين اشراف ونظمو نفسهم وعينو واحد منهم سموه (الشريف الصيني). يمكن يجيب لينا بند تشغيل خريجين يحل مشكلتهم العويصه . تفائلو خيرا تجدوه. البلد دي كبيره و واسعه شايفنها ضيقه لانو براكم ضيقتوها علي نفسكم باذدحاكم وتكدسكم في العاصمه المدوره المقلوزه دي. شتو ارض الله واسعه ..
يا جبرا خليك واقعي وافتح ليك مطعم صيني دا لو الجماعة ادوك فرصة ؟؟؟
الحكاية وما فيها :
الحكومة إستفزتكم وقالت
انتو جعانين
انتو فقرانين
انتو عرايا
انتو هملة
انتو شذاذ افاق
انتو وسخانين
الحسو كوعكم
نطلع زيتكم
كان رجال اطلعوا الشارع
راجل فيكم ما قال بغم
قالوا نجيب مليون صيني احساسهم عالي يطلعوا لينا الشارع
دي كل الحكاية
والله يا ود جبرا الموضوع مخيف شديييييد الناس الشمارات بتقول انهم جايين يتملكو اراضى بدل الديون بتاعتهم الماقدروا اسددوها ليهم والله بعد دا علا نشوفلنا شوفة تانيه يا هجينا يلا اشتغلنا عندهم باليومية
ياجبرا حصل افتح ليك مطعم صبنى قبل ما الجماعه يسبقوك . ولا اقول ليك احسن حاجه تشارك واحد فيهم . انا بكتفى بعشرة فى المئه لانى صاحب الفكره . مليون سائح قال.
المليون سائح بالنسبة للصينيين يماثل 10 اشخاص ماشين من السودان لاديس اباب
المليون سائح بالنسبة للصينيين يماثل 10 اشخاص ماشين من السودان لاديس اباب
سلام يا عمنا الفاتح جبرا وربنا يديك العافية ..
عايزين منك تكتب لينا عن الاستعمار الصيني القادم للسودان وحكاية المليون صيني الجايين السنة دي ..
وشكراً كتير ليك
ودى ياجبرا عايزه فهامة قالوا ليك الصين طالبانا قروض بمليارات الدولارات ونحن عجزنا عن السداد وطبعا كان هناك رهن (انت فاكر الصينيين ديل عندهم رياله ذى جماعتنا ديل ياحبيب فايتين التفتيحة بهناك)
والرهن واضح انه اراضى وعقارات يلا ياجبرا جهز شنطك من هسه وشوف ليك حته واتخارج قبل الطامة ماتع فى الراس ونقعد نندب ونسوط ذى الحريم
سوف نبكى يوما كالنساء—- على وطن لم نحافظ عليه كالرجال
هههههههههأوعا الحكاية تكون زي (خيمة كسلا) !!!
مليون سائح؟؟!! ياخي دي مبالغات وفبركات أو تغطية وإلهاء الرأي العام بالكلام الفارغ…ياخي مليون صحن ساي كتير!! تقول لي مليون سائح.. عناقريب زاتووو مافي
ابوناجى .. ياخ بطل الحساده حقتك دى وخليهم يصلوا يمكن يحصل تزاوج وتحسين نسل صينى- سودانى ..
يا الفاتح جبره السودان دوله حباها الله بالطبيعه و الجميله و لكن هذه فرصه للسواح ليروا السودان كدوله تعيش فى القرون الوسطى و انو كيف يد البشر تدمر بلد كان لحد 1966 تغسل شوارعه يوميا و ببلد يعيش اهله بدون تعليم و صحه و بنيه تحتيه كانت قبل الانقاذ فخر لدول الجوار
سرحان عبد البصير
اكيد ديل من العاطلين ومالهم فايده داخل المجتمع الصيني المنتج واخاف ان يكونو من ارباب السوابق ومرتادي السجون من عتاة المجرمين ؛ فارادة الحكومه الصينيه ان تطهر المجتمع الصيني منهم فنفتهم ورمتهم علينا كما فعل فيديل كاسترو عقب ازمة خليج الخنازير حينما طالبه الامريكان بتفعيل الخريات والحقوق المدنيه فاتهزها فرصه فافرغ السجون من عتاة المجرمين وارسلهم لامريكا كما رغبت !
رقم المليون هذا اصبح موضة . كل مسؤول يستعمله . قبل مدة صرح معتمد الخرطوم بأنه سوف يغرسون مليون شجرة والسنة الماضية ايضا صرح بنفس الرقم والسنة التى قبلها . المفروض الآن الخرطوم تكون مثل غابات الأمازون فى قارة اميركا الجنوبية. والكارثة انه لا يوجد متابع لهؤلاء المسؤلين ومحاسبتهم ولا حتى فى الصحف التى تنشر مثل هذه الأخبار .
تعرف يا جبرة ديل حايكسروا كرونة عندنا وياخدو الجنسية كمان—كحال السوريين–و-كل شئ معروض في السوق
عموما نقولها بالدغري كده وبدون دغمسة والداير يفهم بيفهم والما داير يفهم يكون بطئ الفهم وما عنده سرعة بديهة
ياجماعة حكومتنا الموقرة قلت ( اتسلفت) ليها 17 مليار دولار امريكي من حكومة الصين وجاء موعد سدادها والحكومة التكتح ما عندها عشان تسدد بعدين قالت للصين نظرة الى ميسرة ..قامت الصين اجلت الدفع وابت تدي الحكومة قروض جديدة تب ..اها .. موعد السداد الجديد حل .. والخزنة ما فيها التكتح والمغتربين ابو يدوها دولاراتهم بالاوانطة .. قاموا رسلوا كم افندي كده للصين لزوم الحنك .. الصين سمعت كلامهم باضان وطلعتوا بالاضان التانية .. ما شيوعيين وبخيلين شديد .. لامن الحكومة لقت نفسها محصورة في خانة اليك ..قامت قالت ليها خلاص انا بديكي اراضي في مشروع الجزيرة بدل قروشك .. طبعا اراضي زي دي الصين تكون بليدة لو ما قبلتها مقابل حفنة من الدولارات لانها بتحل ليها ازمة سكانية ومشاكل اقتصادية فالصينيين لقوا الصفقة ربحانة معاهم 100000000000000000% … اها .. قاموا طلعوا مليون مسجون من السجن وقالوا ليهم نوديكم تمشوا السودان نملكم اراضي وتبقوا مزارعين واصحاب مزارع بدل السجن .. قاموا المساجين الصينيين رفعوا سباباتهم مكبرين ومهللين وفرحانين … اها .. الجماعة جايين يستلموا اراضيهم طوالي ولا جايين معاينة لمواقعهم الجديدة في شكل سواح في البداية وبعد داك تقوم الحكومة بالنزعيات والتعويضات والابتزازات والترهيبات .. وينوم اهل الجزيرة ويقوموا الصباح يلقوا الجزيرة انقلبت كلها صينيين ومحروسين كمان ..والعصا لمن عصا …ويا حليلك يامشروع الجزيرة وياحليلكم ياناس الجزيرة .. وعلى المتضرر ان يرفع اكف الضراعة لله طلبا للتحرير … فلسطين 2
والله يكذب الشينة
وهذا حديث المجالس للشعب السوداني
الاستاذ جبرة لك التحية … في مقال الاخ الاستاذ عثمان ميرغني بعنوان “ارفضوا وارفعوا ثمنكم” ويخاطب فيه الشعب السوداني .. كان تعليقي هكذا
التعليق ( يا استاذ عثمان ياتو عزة ويايتو غلاء دا كلو هين… نحن بقينا اجانب في بلدنا الصين بسبع مليار دولار دين علينا( من قيمة كلية للديون 13 مليار ) شالت اراضي مشروع الجزيرة وكمان لاستيطان مليون صيني , مش كان ممكن نأجر ليهم الواطة لمدة معينة نحسبها ليهم بالشهور ولا السنوات والشهر بالدولار ناهيك عن البيع لهم فقط تأجير الارض ولكن بلد فيها مثل د.حمدي الوزير الاهبل الذي يقول جيبوا قروض وارهنوا الارض أصلهم حيشيلوها معاهم والله هذا التصريح الغبي كان يمكن ضرب عنقه في زمن الرجالة .. “قال د. حمدي قال” والله بلدنا في مأسأة حقيقية والقهر ينهش في أحشائنا ونحن نرى هذه الفوضى… يا عثمان الحاصل علينا كلوا سااااااااااهل .. بنوا مدرسة ما بنوها ..اكلنا ما أكلنا… سيحوا دمائنا وموتونا … سامحناهم واستقبلناهم بالكرم والجود وهتفنا لهم وبسطناهم ورقصناهم وهم مسرورين .. بس كل شيء ولا بيع الوطن … ولا بيع الأرض والعرض.تاني فضل شنو يا عثمان بعد اعتماد قوات الجنجويد قوات دعم سريع وفرع ينمو لاحلال مكان القوات المسلحة السودانية … اكتبوا في مثل هذه المواضيع تشليع القوات المسلحة وتدميرها تنصيب القيادات الجديدة موسى هلال وحميدتي ووداعا لقوات الشعب المسلحة السودانية … ليس هناك من سينحاذ للشعب في ثورته وانتفاضته فلا نامت أعين الجبناء. )
والله دا كمان جديد يا جبرة!!!!
السياح الصينين ديل جايين تبع برنامج الترفيه عن المساجين وللسجين فيهم مطلق الحرية ان يتم باقي عقوبته بالسودان
مقال مهم! قد يكون هذا إعادة توطين لمسلمي الصين وهذه هي الدفعة الأولى. منها نحصل على مقابل من الصين ونستفيد منهم في الجهاد وتثبيت الحكم الراشد.
أين المرشدين السياحيين الذين يتكلمون العربية ذاااتا بطلاقة (خليك من باقي اللغات) ؟
ها ها ها ها….والله يا استاذ دى جبتها ظط
والله يا جبرا الكيزان يوم تلقوا السودان دا تم بيعه وجاء هؤلاء الصينيون لاستلامه والله العظيم هؤلاء الكيزان لايهمهم الا انفسهم عليهم لعنة الله و الناس اجمعين
بهجت الأباصيري يا أستاذ جبرا كان هو اسم عادل إمام في مدرسةالمشاغبين ..أما دوره في شاهدما شافش حاجة فكان يتسمى فيه بسرحان عبد البصير .. وجل من لا يسهو..
ما بعيد كل ( سائح) يكون شايل معاه واحد كيلو نفايات لا غير !!!
يعني ألف طن من المصائب …!!
احدهم صرح بأن البلد بتشيل 3 أمثال الفيها هسى
الظاهر انه (الاخوان) تضامنو مع الشيوعيين السودانيين وحبو يدعموهم بمليون شيوعي صيني