الخايفين منووو
قالت لي طبيبة تعمل بمستشفى الولادة (الدايات) بام درمان في إنزعاج واضح :
? تتخيل يا أستاذ عندنا مريضة عاوزة (دم) جونا 30 زول متبرع رفضنا نشيل منهم دم عشان دمهم ضعيف وما بتحمل نشيل منو؟
قلت لها :
? ده الخايفين منوووو؟
قبل أن تسألني إسترسلت في الإجابة قائلاً :
بعد هذه الموجة الكاسحة لغلاء أسعار السلع الضرورية التي شملت عناصر الغذاء من لحوم بأنواعها وخضروات وبقول وزيوت وألبان وأجبان وفاكهة وغيره مع بقاء الدخول والمرتبات في (حتتا) لم يجد المواطن غير أن يأكل أنواعا محددة من الأطعمة (ويمد جيوبو على قدر معدتو) ، فصار الغذاء الرئيس لسواد الشعب السوداني الفضل هو (سندوتس طعمية) أو (فول الحاجات مع كباية شاي) أو (البوش) لمن إستطاع إليه سبيلا .. وإتجهت معظم الأسر إلى نظام (الطقة الواحدة) وهي وجبة يتناولونها بعد العصر وغالباً ما تكون (فتة عدس) أو (فتة شوربة ماجي) تقطع عليها (حبات) الرغيف!
لم يعد المواطن قادراً على الأكل (المغذي) فإتجه إلى الأكل الذي يقيم (أوده) إلى حين ، حتى لا يموت من (الجوع)، لكنه لا يعلم انه سوف يموت بسوء التعذية عندما يفتقد جسده المنهك الغذاء المتكامل الذي يحتوي على العناصر الغذائية المتعددة ويصبح دمه (موية فول ساااكت) !
وللعلم فإن الغذاء الصحي المتكامل و الذي يجب على كل فرد تناوله يومياً يتكون من سته اقسام رئيسية القسم الأول هو (البروتينات) ودي بتكون موجودة في (اللحمة) أم كم وكمين دي و(الكربوهيدرات) ودي بتكون موجودة في الأرز والخبز و المكرونة و السكر والمربى و الحلويات بأنواعها (الباسطات والكنافات والبسبوسات) ، والقسم الثاني هو (الدهنيات) ودي معروفة (الباغة حصلت 98 ألف) أما القسم الثالث فهو (الفايتمينات) وهي متوفرة في البرتقال (الدستة 45 ألف) و سائر الحمضيات مثل الليمون الحليب (الرطل بي ستة ألف) و البيض (البيضة الواحدة بي األفين) والزبدة والخضروات (ربطة الجرجير بألفين) وأخر هذه العناصر هي الأملاح المعدنية ثم الماء (الما فيهو طحالب) !
هذه يا سادتي عناصر الغذاء المكتمل فأنظروا ماذا تأكلون وتشربون ولماذا صار معظم الشعب الفضل غير مؤهل للتبرع بالدم ومعرض لأي فيروس أن يفتك به ويلحقو (أمات طه) !
وتكتمل المأساة حينما (يمرض) المواطن كشيء (حتمي) ويذهب إلى مستشفيات (الحكومة) التي أوصلته بسياساتها إلى هذا (الدرك الأسفل) فيجدها خالية من أبسط الأجهزة والمعدات
والدواء مع إنعدام بيئتها الصحية وقلة كوادرها الطبية التي لا تمتلك (مصباح علاء الدين) لتنظر طبياً في أمر كل هذه الأفواج من المرضى فيمضي المواطن إلى ربه ولسان حاله يقول :
? بالله الجماعة ديل ما بيبالغو .. أكل ما يأكلونا .. علاج ما يعالجونا .. والواحد فيهم (تلاجاتو مستفة) وكان جاهو صداع ساااي يسافر ألمانيا ؟
كسرة :
ما أجمل المثل الصيني الذي يقول : شينغ فان شو فونغ شان ويو .. وترجمته :
إذا لم توفر الغذاء للمواطن فأقل حاجة عالجو !!!
? كسرة ثابتة (قديمة) :أخبار ملف خط هيثرو العند النائب العام شنو؟ 82 واو – (يعني ليها سبعة سنوات بالتمام والكمال) ؟
? كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 40 واو (يعني ليها ثلاث سنوات وسبع شهور)
الجريدة
الناس خايفين من الموت بالرصاص
لكن الكيزان حيقتلوكم بالموت البطئ
وخليكم ساكتين كدة ما ملاحظين زيادة الوفيات وامتلاء المقابر
لا تسقني كأس الحياة بذلة بل اسقني بالعز كأس الحنظل
منتظرين شنو الناس يا تعيشوا عيشة كريمة يا تموتوا موتة شرف
يا جبرا الكتابة في الواقع ممله خلك في الخيال الواسع افضل وامتع
لما المسئول ما يكون عنده دم من وين الشعب حيكون عنده دم يا جبرة ؟؟
لعن الله مصاصي الدماء ..
أخواني أبناء البلد الشرفاء .. أقترح أن كل شخص قادم من الخارج ..يعني مغترب أو مهاجر أو حتي مشي شهر عسل يتيرع بالدم للمحتاجين في المستشفيات وتكون سنه حميده نضرب بها المشروع الدماري في مقتل ومها نعيد سيرتنا الأولي.
يا أخوانا قالوا ليكم سته أشخاص ما قدروا يطلعوا منهم كباية شاي.
الأستاذ الفاتح جبرا حياك الله . ان الله يمهل ولا يهمل . ان قرار مجلس الامن الأخير بإجراء تحقيق دولي بشأن استخدام الحكومة السودانية أسلحة كيمائية في دارفور لهو بمثابة ضع القلم في الامتحانات . لو جاءت اللجنة وأثبتت التهمة الناس ديل قطرهم صفر ، ولو رفضوا مجيء اللجنة أيضا قطرهم صفر ، فخليهم يبلوا راسهم ويرجوا الجاياهم .
ناس دارفور الاستخدموا ضدهم الأسلحة الكيميائية هم حفظة القرءان ودعوة المظلوم ليس بينها وبين الله حجاب فما بالك اذا كان هذا المظلوم حافظا لكتاب الله !!!!
والله قصة 30 شخص جاءوا عشان يتبرعوا بالدم ورفضت الطبيبة لان دمهم ضعيف لهي ماساة لم يمر بها الشعب السوداني على مر التاريخ .
ان شرارة الثورة قد بدأها الأطباء كعادتهم فلهم كل التحية والتقدير وانشاء الله هذه الشرارة سوف لن تنطفي ابدا وذلك لان الشعب قد كره النظام ولان النظام اصبح معزولا عن شعبه فهو في وادي والشعب في وادي .
الناس اكلت الحرام وقلبها مات . والله العامله الحكومة دي في السودان لو في بلد شعبها كلو خمسماية نفر ما كان رضوا بالمهزلة دي.
ياخي انت بتتكلم صيني ولا ماو, رسل لي رفم جوازك في شركة صينية عاوزة مترجم هنا.عجل يا جبرة لا تتأخر.
معليش استاذ جبرة اصلح معاك الحتة دى الواحد يمد معدتو قدر جيوبو لان الجيب يتحكم فى حجم الكرش فتجد الكيزان كروشهم كبيرة لكبر الجيب و اما الغلابة فعندهم انعدام كرش لانو اصلا مافى جيب
عندي تعليق يا أستاذ جبرا أخرته فترة.
وهو ( بنقرا ليك على تاريخك )
الاستاذ الفاتح جبرة لك التحية والاحترام
والله البلد دي فيها حاجات غريبة تقولو الناس جعانين كدي عليكم الله امشو محلات السمك تقيف لمن تزهج عشان تاخد طلبك امشي محلات الشية مش حي العرب محل الرخيص امشي شارع النيل محل تقعد ما تلقي ديل كلهم حكومة ووزراء خافو ربكم واحمدوه علي النعمة قبل ان تزول منكم فاتحين لينا برنامج الناس جعانين جعانين انت عارف منو الجعان الراقد في بيتو وعاوز الله يفتح ليهو السماء وينزل ليهو قروش نحن شعب اتعود علي الكسل والعطالة وبقو مستنين الحسنات من المغتربين امشو ازرعو اشتغلو في مليون مهنة شريفة تاكل منها الشهد بس مين يسمع قاعدين الحكومه عملت الحكومة سوت سبحان الله
الناس خايفين من الموت بالرصاص
لكن الكيزان حيقتلوكم بالموت البطئ
وخليكم ساكتين كدة ما ملاحظين زيادة الوفيات وامتلاء المقابر
لا تسقني كأس الحياة بذلة بل اسقني بالعز كأس الحنظل
منتظرين شنو الناس يا تعيشوا عيشة كريمة يا تموتوا موتة شرف
يا جبرا الكتابة في الواقع ممله خلك في الخيال الواسع افضل وامتع
لما المسئول ما يكون عنده دم من وين الشعب حيكون عنده دم يا جبرة ؟؟
لعن الله مصاصي الدماء ..
أخواني أبناء البلد الشرفاء .. أقترح أن كل شخص قادم من الخارج ..يعني مغترب أو مهاجر أو حتي مشي شهر عسل يتيرع بالدم للمحتاجين في المستشفيات وتكون سنه حميده نضرب بها المشروع الدماري في مقتل ومها نعيد سيرتنا الأولي.
يا أخوانا قالوا ليكم سته أشخاص ما قدروا يطلعوا منهم كباية شاي.
الأستاذ الفاتح جبرا حياك الله . ان الله يمهل ولا يهمل . ان قرار مجلس الامن الأخير بإجراء تحقيق دولي بشأن استخدام الحكومة السودانية أسلحة كيمائية في دارفور لهو بمثابة ضع القلم في الامتحانات . لو جاءت اللجنة وأثبتت التهمة الناس ديل قطرهم صفر ، ولو رفضوا مجيء اللجنة أيضا قطرهم صفر ، فخليهم يبلوا راسهم ويرجوا الجاياهم .
ناس دارفور الاستخدموا ضدهم الأسلحة الكيميائية هم حفظة القرءان ودعوة المظلوم ليس بينها وبين الله حجاب فما بالك اذا كان هذا المظلوم حافظا لكتاب الله !!!!
والله قصة 30 شخص جاءوا عشان يتبرعوا بالدم ورفضت الطبيبة لان دمهم ضعيف لهي ماساة لم يمر بها الشعب السوداني على مر التاريخ .
ان شرارة الثورة قد بدأها الأطباء كعادتهم فلهم كل التحية والتقدير وانشاء الله هذه الشرارة سوف لن تنطفي ابدا وذلك لان الشعب قد كره النظام ولان النظام اصبح معزولا عن شعبه فهو في وادي والشعب في وادي .
الناس اكلت الحرام وقلبها مات . والله العامله الحكومة دي في السودان لو في بلد شعبها كلو خمسماية نفر ما كان رضوا بالمهزلة دي.
ياخي انت بتتكلم صيني ولا ماو, رسل لي رفم جوازك في شركة صينية عاوزة مترجم هنا.عجل يا جبرة لا تتأخر.
معليش استاذ جبرة اصلح معاك الحتة دى الواحد يمد معدتو قدر جيوبو لان الجيب يتحكم فى حجم الكرش فتجد الكيزان كروشهم كبيرة لكبر الجيب و اما الغلابة فعندهم انعدام كرش لانو اصلا مافى جيب
عندي تعليق يا أستاذ جبرا أخرته فترة.
وهو ( بنقرا ليك على تاريخك )
الاستاذ الفاتح جبرة لك التحية والاحترام
والله البلد دي فيها حاجات غريبة تقولو الناس جعانين كدي عليكم الله امشو محلات السمك تقيف لمن تزهج عشان تاخد طلبك امشي محلات الشية مش حي العرب محل الرخيص امشي شارع النيل محل تقعد ما تلقي ديل كلهم حكومة ووزراء خافو ربكم واحمدوه علي النعمة قبل ان تزول منكم فاتحين لينا برنامج الناس جعانين جعانين انت عارف منو الجعان الراقد في بيتو وعاوز الله يفتح ليهو السماء وينزل ليهو قروش نحن شعب اتعود علي الكسل والعطالة وبقو مستنين الحسنات من المغتربين امشو ازرعو اشتغلو في مليون مهنة شريفة تاكل منها الشهد بس مين يسمع قاعدين الحكومه عملت الحكومة سوت سبحان الله