طبق اليوم

سيداتى آنساتى سادتى قراء ومشاهدى برنامج أقصد عمود( ساخر سبيل ) : حقيقى أنا آسف جداً لأنو الأيامات الفاتت دي البرنامج والجريدة ذاااتا مرات بتختفى وده سببو وما أدس عليكم إنو مرات الواحد قاعد يفشل فى مسألة تشفير البرنامج، أصلو مسألة التشفير دي بقت موضة وأى واحد عاوز يشفر أي حاجه لأى زول فى أى حتة وإنتو عارفين إنو العمود بدون تشفير زى الشرا فى القندول أو كما قال الحبشى وهو يردد المثل العامى المأثور ! المهم حلقات البرنامج التى لم تشاهدونها على الهواء نسبة لعمليات بيع الجريدة (بالجملة) عقب الطباعة مباشرة يمكنكم مشاهدتها والحصول على نسخة منها على موقعنا على الشبكة العنكبوتية والذى يظهر لكم أسفل الشاشة أقصد العمود .
حلقة اليوم سيداتى آنساتى سادتى ونسبة لبداية البث التجريبى المشفر فسوف تكون عن طبق اليوم وقد أخترت لكم مادتها من كتاب (أبلة نظيرة) في فن الطبخ وسوف يكون طبق اليوم هو المكرونة بالباشميل ، أنا شخصيا بعرف المكرونة لأنها من النشويات وأنا زول سكرى وممنوع منها وكده ، لكن الباشميل ده كدى تعالو نشوفو سوا ونحنا مع بعض كده نقوم بتحضير طبق اليوم اللى هو المكرونة بالباشميل وتعالو نشوف المقادير:
المقادير : ? كيس مكرونة (تأكد من تاريخ الصلاحية فلا توجد جهه تتأكد بالإنابه عنك) ? ماء إذا كنت في الأماكن التى لا تصلها المياة جوار النيل ? زينا في بيت المال ? فيمكنك شراء زجاجه مياة معدنية (لو لقيت دكان فاتح طبعن) ? شويت ملح الحاجه الوحيده الما فيها مشكلة
الحشوة: ? ربع كيلو لحم مفروم أطلب من الجزار إزالة (طبقة الذباب) الموجوده على اللحم حتى تتأكد من عدم وجود ختم السلخانه ? بصلة ، فلفل، كمون ، ثوم ، زيت لا تبتئس إتجه لمحلات قدر ظروفك حيث يباع الكمون والفلفل بالدستة والتوم بالفص .. بس حاسب عند شراء الزيت (أحسن المكنة تصلب) فقد تم مؤخرأً إكتشاف عصابه تقودها إمرأة تقوم بخلط زيت العربات الراجع ووضعه في جركانات .البشاميل: كوب زيت (أوع من الراجع) ، نصف كوب طحين (حاول تشوف ليهم دبارة ) ، أكواب حليب (أحذر حليب الإغاثات) ، يستحسن أن تتحصل على جهاز فحص مواد مشعه ، ملح , فلفل قدر ظروفك ، بيضة واحده كفاية (عشان ما نكتر عليك)
الطريقة: ? تسلق المكرونة (وتسلق مقالنا ده ذاااتو) وتضيف اليها ملعقة طعام زيت حتى لا تلتصق المكرونة. ? نحمر البصلة مع الثوم واللحم المفروم والبهارات (لو لقيت غاز طبعن) ? نضع الطحينة والزيت على النار حتى يصبح لونها ذهبي ثم نضيف الحليب والبيضة بعد أن نخلطها مع الحليب والبهارات على الطحين والزيت ونقلبه جيدا. ? بعد استواء المكرونة وتصفيتها من الماء نضيف قليلا من البشاميل ونقلبه ونضع نصفه في الصينية في شكل طبقة غير سميكة، ثم نضيف اللحم ثم نغطيها بالمكرونة وندخلها الفرن حتى تتحمر وبالهناء والعافية.
أعزائى القراء المشاهدين المتابعين : طبعا أنا كنت ذيكم كده مفتكر الباشميل ده حاجه كده ذي جوز الهند أو البناتى أو الزيتون لكن البركة في كتاب أبله نظيرة و( الرقابة) وكدة عشان لولاهما ما كان الزول عرف إنو الباشميل ده هو خلطة بتاعت طحين وزيت وبيض وحليب ومش عارف شنو داااك !!
والمهم لو ما لقيتو طريقه تعملو الباشميل ده والأمور ما تيسرت أعملوها مكرونة ساااكت والسلام المهم هي أكلة جميلة لا توسخ إيدينا ولا تغلط علينا ولا على (إيدين الخلفونا) !
أعزائى القراء والمشاهدين لو عندكم أي وجبات يا جماعت الخير عاوزين تعرفو بيعملوها كيف لا تترددوا بالإتصال برقم البرنامج الظاهر على الشاشة وهو صفرين تلاته أصفار زيرو وذلك قبل إنتهاء الدورة البرامجية الحالية وبداية الدورة الجديدة (لأنو الدورة الجديدة مش ح يكون فيها طبق اليوم) ?. وبالهناء والشفاء مع تحيات الشيف ?. الفاتح جبرا
كسرة :
بعد شوية إلا نكتب ليكم (حظك هذا الأسبوع ) …. !!
تنبيه :
توجد (واو) جديدة !
? كسرة ثابتة (قديمة) :أخبار ملف خط هيثرو العند النائب العام شنو؟ 86 واو – (يعني ليها سبعة سنوات وشهرين) ؟
? كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 45 واو (يعني ليها ثلاث سنوات وتسعة شهور)

الجريدة