ياريس الواقف غلط أفضل من الماشى غلط لبك على جنب

الرئيس يتعهد بإصلاح ما فسد فى سنوات حكمه
الخبر الثانى
التربية والتعليم تقرر بدء العام الدراسى فى سبتمبر بدلا من مارس
يعنى يا العندكم اولاد فى الأساس والثانوى راجياكم اجازة ستة شهور
فى زماننا كان هناك مايعرف بديوان شئون الخدمة يتسلم الخريج ويعينه على الدرجة Q
اليوم سمعنا خبر فى التلفزيون السودانى عن هيئة يراسها واحد اسمه محمد أحمد مسئوليتها تعيين الشباب
وكل يوم نصحى فى شىء جديد يسوه وقديم كله يرموه
عارفين ليه ؟ الجديد عنده ميزانية وفيه لهط ودى جماعة لهط
طبعا محمد أحمد دا مش محمد أحمد بتاعنا دافع الضريبة
دا محمد أحمد آكل الضريبة ولازم يكون كوز متمكن عشان يعين الكيزان ويرسل اولادنا للإغتراب
يا البشير أنت تتعهد بإصلاح ما فسد فى سنوات حكمك الخمس والعشرين
نحن بنقول ليك كلام مهم
خليوه إصلاح الفساد دا نحن قلنا ليك تحتاج لعصى موسى ومصباح علاء الدين ومالية ميركل وشعب كوريا الجنوبية وسلوك وأخلاقيات الرئيس الأرجوانى ( بالمناسبة سيارته الفلوكسواجن أمس جابت مليون دولار تبرع بها لدور الأيتام وأنا شايف السيارات الفارهة الواقفة فى بيتك فى كافورى غير سيارات القصر القديم والقصر الجديد التى أجرتها لحزبك – بالمناسبة ياريس حق الأيجار ما نابنه منه شىء – بعدين مسئول من الخير – اليخت وديته وين – ما تدينا ليهو نشغله بنطون فى الرباطاب اهلك الجعليين شلت قروشنا وعملت ليهم جسر وسميته البشير
شوف رئيس زيك لن يصلح شىء
دى نحن متأكدين منها بس لينا طلب واحد عندك وعافيين منك دنيا واخرة
عليك الله بس وقف القطار اللى أنت سايقه ربع قرن وهو خارج القضبان – القطارالماشى فينا غلط دا – مر على مشروع الجزيرة دمره ومرا على سودانير دمرها ومرا على سودالاين دمرها وما خلى شىء وأنت سايق والجماعة يقولوا ليك سير سير يابشير وأنت ساير – لى وين لآ أنت عارف لا نحن عارفين – نحن وين ؟ ماعارفين – العام دا عام كم ؟ ماعارفين – الشىء الوحيد العارفنه أننا يا الطيش يا تانى الطيش فى كل شىء من يوم تم طرد سائقى القطارات وعينت نفسك سواق لقطار السودان
ياريت لو بقت على سواقتك انت براك
جماعتك ديل كل يوم يظهروا لينا بفكرة جديدة
وشغالين بالمثل بتاع ( لو غلبك سدها وسع قدها ) خلاص بقت لهطة وقف جماعتك وأحسن شىء تحيلهم كلهم فى إجازات مفتوحة بدون راتب
والله غيابهم لن يحدث أى مشكلة ووجودهم زى عدمهم
معقول زول يستلم التعليم لربع قرن ثم يأتى عن تغيير بداية العام
عارف ياريس أنتم كنتم ساطلين بدولارات بترول الجنوب ويا دوب السطلة فكت
قبلتوا علينا وبديتوا تعدلوا وتبدلوا عشان تشعرونا أنكم مهمومين بالشعب ومشاكلة وبتخططوا
اقول لك قوله
شغلنى مستشار ليك بالمراسلة من بعد على الراكوبة بدون راتب ولا مخصصات
بس الكلام البقوله ليك لازم تنفذه
أوع يكون الجماعة ديل بيحجبوا عنك مايكتب على الراكوبة
شوف فخامتك ( ما خلاص أنا شغال معاك لازم من فخامتك )
هى ماشه غلط ليها ربع قرن ولمان تمشى الجماعة ديل الخضر وجماعته والوليد بتاع البرلمان وجماعته ومجلس الوزراء ونوابك ومساعدينك ومستشارينك خاصة مصطفى وغندور – انت ما تفصلهم كدى جرب اديهم اجازة جماعية مفتوحة بدون مرتب وكل وكيل وزارة يدير شئون وزارته فى أضيق نطاق – عارف اللى حيصل شنو – كل شىء حيمشى بنفس السوء الحالى ومن يخلص بنزين حيشوف اقرب باركنج ويقيف
هو قد يقيف غلط
بس الواقف غلط أفضل من الماشى غلط
الماشى غلط ممكن يصدم زول ويقتله وممكن يقع من الكوبرى ويغرق فى النيل
خلينا كده واقفين غلط
شكرا يا ريس سعيكم مشكور
والله ماقصرت
لكن دى مو المحرية فيك لمان سمعنا بيانك الأول فى 30 يونيو 1989م أكثر واحد متشائم قال نحن خلال 5 سنوات حنكون نمر افريقيا هسي بنفتش لى أب ضربان ما لامين فيها

[email][email protected][/email]