النهر الثالث محمد وردي في ذمة الله

بنيت في الموج قصور امال ، وشديت سرجي فوق الريح، وقلت ارحل… واسافر بالسلامة .. واهاجر في بلاد الله ، مع الطير الطائر ..ومع الطير المهاجر ..ومع عصافير الخريف في موسم الشوق الحلو… واطوي المسافات طي ، وكان تعب مني جناح في السرعة ازيد ..
وامشي قدم قدم زي قدلة جنى الوزين بتاتي….
وامشي لباحات الخلود عيوني مفتوحة ….في دروب الالفة والوحشة . واسال عشان القاك ، اسال عنك الاجداد واسال في عيون طفلة في احزانها متكية ، واسال الناس القيافة،واسال الحنين فؤادي عن احوالي واساله،ودموع الحسرة في عيني اخفيها…. ..
حبيبي فكر وقدر ! خليتني في حيرة ، الله ياخد ليك حقوقك ويجازي الظلموك ، وتلقى مرادك والفي نيتك..
ولي زمن افتش ليك واهوم ليل واساهر ليل ، واناديك في زمن ماشي وزمن جايي وزمن لسة،وشوقي ليك طول ولسة معايي ..ولبكرة لسة معايي ،لانك حبيب القلب واغلى الحبايب .
وبصدفة ومن غير ميعاد اقابلك …. وحققت احلامي ، ويومي الشفتك انت حسيت بالهناء ، واسعد يوم يومي الحيتك، وصحيت في نفسي الوجود ورجعت لعيوني النهار ،واديتني مشاعر حية ،عوضني الزمن الماضي زمن الفرح الخلا الجية ،.. وخليني في شجوني ، وارقص رش عبيرك فينا يا قمر عشرة الفي سماك….
فتعالى تعالى يا امير الحسن ، فغصبا عني وغصبا عنك الارادة اجبرتني في هواك من زمان و انت حبيتني وهويتك ..
وبقى بيني وبينك والايام قصة حب طويلة، والعمر زادت غلاوته معاك وصالحني الزمان، ما انت اصلك اول غرام واجمل هدية ونور العين والعين ما بتعلى على الحاجب ، وعزيز الروح ما بتعالى ، بشوف في شخصك احلامي ودنيا تفيض بانغامي ،وكل كلمة من شفايفك احلى غنوة …..
فتعالى تعالى افرش ليك قلبي وسادة واديك من غرامي سعادة.!! وانقل ليك حبي الاكيد …
ولو بالصد ابيتني ولو بالنار صليتني ،انا ما بنساك لو طلعت القمرة وجيت ولو حلفت بربي البيت ما بسيبك مهما بقيت ..!!واي مكان تمشيه مكاني واي زمان تلقاه زماني !!!
يا سمح يا زين حبينا فيك العفة والدم الشربات وحبيت هواك قبل الفطام وشبيت على نهج الكرام ،..
ومين غيرك يعطي لهذا الشعب معنى ان يعيش وينتصر ، في حضرة جلالك يطيب الجلوس ، لانك محنك عميق، الدروس ،شديد المهابة ،مديد القوام ، والهبت اسماع الملأ بنداء عاطر تعدو به الريح وتختال الهوينا وتحلق حول نافورة وتداعب شفع الروضة وتدي النخلة طولها والغابات طبولها والايام فصولها والبذرة الغمام، وتشعل التاريخ نار واشتعل بعزم ترهاقا وايمان العروبة ، بشموخ النساء وكبرياءالرجال تبقى ملامح في ذريتك !!
فانت يا معنى الشموخ اصبحت للاحرار وطن ..!
فوا اسفايي … يا وطني …. حبيبك بي وراك جارت عليه وخانته ظروفه ، وشرد نومه ولهيب الشوق حرق جوفه !! والليالي بدونك ما الليالي !!.وياما الغربة بتتحداني وانا بتحدى الزمن الجاير لو في حبك يتحداني .!! ومرة اضحك ومرة ابكي ومرة تغلبني القراية لمان اكتب لك وداعا …. وداعا… قلبي ينزف في الدواية .. والريح ورايى .. خلي من حضنك ضرايى .. وقبضت الريح !!!! وبقيت احلم بلحظة من وسني تغسل عني حزني تحملني ترجعني الى عيون وطني …. الى عيون وردي .!!!
وانتو… شن بتقولوا..؟؟؟!!!