الكهرباء.. (نصوص الأحد)..!!

هى حصلت!! جامعات .. وكمان جامعات ما جامعه واحده .. جامعه بكل ما تحمل الكلمه من معانى وما تحمله من مقومات وما تحتاجه من مرتكزات ..هل من المعقول ان تمارس هذه الجامعات عملها بدون ترخيص .. كيف تقبل طلابها حتى ان كان طالبا واحدا وما “ناقش”؟ ومين بيحاضرو فيها و فى اى مجال علمى بيحاضرو فيهو .. طيب أذا دا داس مشاعر كووول الناس وحصل .. واصبح حقيقه واقعه (وبرضو ورغم ذلك لا يمكن تصديقو) وزارة التعليم العالى بعد اكتشافها الخطير هذا عملت شنو ؟ وليه ما ابلغت الدارسين واهليهم واعلنت على رؤوس ألأشهاد اسماء هذه الجامعات فى حينو .. وكمان على استحياء تقول انها “س ..تمارس الحسم مع هذه الجامعات ومع مؤسسات التعليم غير المرخصه.. يعنى لسّا ما مارستو؟ .. يعنى كمان فى مؤسسات تانيه..اذا دا التعليم العالى ايش حال التعليم اللى عام .. دا اكيد يكون سابح فى بحار ومحيطات الهرجله الترخيصيه (على غرار السياحه العلاجيه)
* سمعنا قبل ايام قلائل انو وزارة المعارف الولائيه فى الخرطوم بصدد عمل قانون للتعليم الخاص ..(كم سيكون حافز الوزير عند اكتمال وضع القانون) ليه قانون فى ولاية الخرطوم وبس!! الولايات التانيه ما فيها تعليم خاص ودايرلو قانون .. ليه ما يكون القانون شامل كووول السودان وعلى الولايات مراعاة فروق الجغرافيا والتاريخ …
يا ناس وزارة المعارف العموميه القدامى منكم ان ما كووولكم لحقتو امات طه .. كيف تكونو ما عارفين او نسيتو انو الوزاره فى عام 1985 ايام الوزير الدكتور بشير حاج التوم عملت قانون للتعليم الخاص اشاد به اصحاب المدارس الخاصة ايما اشاده بلسان المرحوم “فراج الطيب” فى حضور الوزير وكبار اهل الوزاره واصحاب المدارس الخاصه.. ثم دار الزمان دورته وغادر الوزير بشير الوزاره بعد ألأنتخابات وحل محله السيد بكرى عديل ..
لو تذكرون المفاجاة.. كانت انه عندما حان موعد بداية العمل بموجب القانون ظن من اشاد بذلك القانون فى وجود اعضاء مجلس الوزير الجديد اللى كانو هم نفس اعضاء مجلس الوزير السابق ولم يتبدل اى منهم (الا الوزير السابق) ان هؤلاء ألأعضاء الجالسين معه فى حضرة الوزير الجديد لا بد انهم فقدوا ذاكرتهم اوسلموها الوزير المغادر وحملها معه ..فما كان من الفقيد الراحل “فراج” الله يرحمو ويغفرلو (قبل الن يرحل طبعا الى رحاب ربه طيعا)الا ان ينبرى بين دهشة الحاضرين ودون ان يطرف له جفن وشن هجوما عنيفا على كووول بنود ذلك القانون الذى اشاد به من قبل ايما اشاده..(و ما خلّى ليهو صفحه ير قد عليها) ..جنس دا بيحصل وين غير فى السودان !! فتاملواّّّ !!!