امك …. ما قلت ليكم ؟

قبل سنة وتسعة شهور كتبت موضوع يالترابي اركب اول وبعدين لولح كريعاتك . لانني كنت متأكدا من ان الترابي حيركب في السلطة . وهذا النوع مسم . ولقد سعي لشنق الاستاذ محمود محمد طه بسبب حادثة حدثت في رفاعة في شباب الترابي تعرفها كل رفاعة . وهو انسان حقود وموتور علي كل السودان . بسبب ماضيه الاسود . واستغل خبثه وما حباه الله به من ذكاء في تحطيم كل ما هو جميل ونظيف في السودان . وها هو يعود مرة خامسة .
ولقد قلت ان الترابي يريد ان يقرش كبدة مصطفي عثمان شحادين . ولقد طوح بعلي عثمان . ونافع الآن يواجه هو واخوته ما لم يكن ممكنا . وعاد سانتانا الذي لا يرحم .
المؤلم ان قضية دارفور سيتم بيعها والدلال هو الترابي . والصادق المهدي حيجي في القاطر . وهذا الكلام ، كالعادة لن تصدقوه . لانكم لاتريدون ان تصدقوا . والضيع البلد شنوا غير ادخال الرؤوس في الرمال . لقد كتبت في موضوع حزب الامة الملوص والتلاتة ورقات .
اقتباس
قلت في موضوع حزب الامة الملوص والتلات ورقات ,, يقولون ان اقوي سلسلة هي بقوة الحلقة الاضعف . بمعني اننا اذا صنعنا اقوي سلسلة من الصلب والتيتينيوم والالمنيوم والحبال الغليظة وحلقة واحدة من الدبارة فتلك السلسلة هي بقوة الدبارة . وهذه الجبهة الجديدة هي بقوة الصادق لانه الحلقة الضعيفة .,, والآن بدا التملص . وعن قريب سيتملص الصادق من اتفاق باريس وصوفيا وفراكفورت والقدمبلية . وسيجد التفسير والكلام ما بيغلب سيدو . والصادق بعد خدعة اتفاق جيبوتي والملازمين وموقعة ذات النياشين لم يقنع او يقتنع . السودانيين يحيرو . لانهم يثقون في الصادق والاغرب من الصادق ، الفريق صديق .
وسيتحلل الصادق ومن يتبع الصادق . وسيفاوض الانقاد كما يقول الانجليز ,, باي بروكسي ,, باللفة . ما هو اولادو في الحكومة . يفلق ويداوي . غازي الكتل الناس في دار الهاتف ، مش قنع من خيرا فيها وادي الانقاذ عنقرتو . وقال الانقاذ بتفاوض نفسها . شباب حزب الامة مش زفوا غتدور في دارهم ذي ابو السرة في السوق ؟؟ ودلوكت الصادق بيحاورو . محن سودانية .
اقتباس

يا الترابي اركب اول وبعدين لولح كريعاتك
02-22-2014 07:23 AM

الترابي بدا في التصريحات . حقد الترابي علي علي عثمان جعله يتنازل عن كل شي لكي يتشفي باهانته . انه مثل الراقصة سالومي التي رقصت للحاكم الروماني اعلانا لتسليمها نفسها له . والثمن كان رأس النبي يحيي المعمدان الذي عمد سيدنا المسيح . وسالومي حقدت علي سيدنا يحيي لانه وصف والدتها زوجة الحاكم بانها عاهرة . ولقد فاق حقد الترابي علي علي عثمان حقده القديم علي كل الشعب السوداني . ولقد قال الترابي علي رؤوس الاشهاد عن علي عثمان ,, انحنا علمناه كل حاجة . بس ما علمناه الوفاء . لانه اتربي بي موز القرود ولحم الاسود ,, وهذه تهمة موجهة الي سوداني بسيط كان يعمل في حديقة الحيوان في الخرطوم . وتعني ان والد علي عثمان يسرق موز القرود واللحم المخصص لاطعام الاسود . ولماذا لم يتطرق الترابي لتلك السرقات من قبل ؟؟ وكل ما كوز ينطرد يبدا في الردحي وكشف الفساد والسرقات . طيب انت زمان شلوفتك مدقوقة جديد . ولماذا صار السودانيون يعيرون بعضهم بالفقركلنا احفاد الترابلة والرعاة والجياع . ومن سكن منا المدن سكن في بيوت الجالوص . لانه لم يكن هنالك غيرها في امدرمان مثلا .
القائمة التي يريد الترابي ان يأكل كبدتها ، طويلة . احدهم عثمان مصطفي شحادين . وطال الزمن ام قصر ………. الخ ولن يكتفي الترابي بطردهم فقط ولكن حيكون فندكه وغربال . وحيشبع فيهم سف وقرش . وستكون هنالك تصفيات نفوس وحسابات .
الترابي بدا يتصرف وكانه الحاكم الفعلي للسودان . والحقيقة انه العن واخبث سوداني . وهو لاعب في مجموعة عالية البراعة مكونة من شخص واحد هو الترابي . لكن مش كان يصبر لحد ما يركب بعدين يلولح كريعاتو . السياسة ما مضمونة ، بالرغم من ان الصادق دائما في جيب الترابي . ولقد رسمت هذه الخطة في اجتماع جنيف بين الصادق والترابي الذي نظمه الفاتح احمد حسن الموجود في الخرطوم والدولة استخرجت شهادة وفاته بسبب مطاردة البوليس الدولي .
ولا تزال هنالك مطبات . الترابي ولع دارفور . ذي المرة القطيتا حرقت وقالت عجبني للمرقوت . الجنجويد قاعدين وديل كل الوكت فهموهم انو الترابي هو العمل كل المشاكل وهو عدوهم الاول . والجنجويد اولاد علي عثمان . فبل كم يوم ادوهم حق الفطور . وبعد ما يخلص ؟؟؟. وثأر بولاد لم يحسم . والعدل والمساواة محاربي دارفور والجبهة الثورية لن يغفروا دماء اهلهم ولن يفتحوا ازرعهم للجنجويد . ولن ننسي قتل 2 مليون من اهلنا في الجنوب . ولن ننسي مذابح جنوب النيل الازرق واهلنا النوبة والنوبيين وشرق السودان.
ولا يكفي الاعتزار . وحتي الشريعة المجغمسة التي اتي بها الترابي مع نميري او مع الانقاذ لاتسقط الدماء المسفوكة . والمرة دي مش ذي اكتوبر غش وخداع ن لعدم التوثيق . كل شئ مسجل الآن . من الشهداء الذين صاروا فطائسا الي حديث الغرباوية . واتهام وزراء البشير بالسرقة والنهب .
اهم حاجة عند السوداني هي كرامتو . وضح بدون اي شك بأن الصادق والبشير والترابي نفسهم ساقطة ذي ما بقولوا في السودان لمن يلقوا السلطة ما بيقدروا يقاوموا . ابو سلمون او المحامي احمد سليمان رجمة الله عليه . كان شيوعيا وصار انقاذيا . قالوا له بانه انسان محبوب خفيف الروح ومحامي ناجح لماذا يشقي نفسه بالجري خلف السلطة ؟؟ رده كان ,, انتو ما عشان ما جربتوها ساكت . السلطة حلوة البضوقا ما بقدر يخليها ,,. ولم اذكر الميرغني لان موضوعه واضح من زمان . ما بحب التعب ولا الاكل الكعب . لقد ظهرت الالوان واضحة . وانتهت الضبابية . اي انسان في خندق الانقاذ تحت اي مسميات هو خائن لدماء الشهدا والمهمشين وللشعب السوداني .
ع . س . شوقي