الشكية لى الله
تعد أنظمة الدفع المقدم من أحدث الأنظمة ذات التقنية التي إستفادت من التطور الهائل في تكنولوجيا الحاسوب والإتصالات ولكن هذه الأنظمة يجب أن يصاحبها كفاءة في الإداء فيقتضي على الجهات التي تستخدمها أن تكون عالمة تماما بأن (القروش المدفوعة مقدماً دي) تعني إستمرارية الخدمة وعدم إنقطاعها ..
لا أدري إلى أي أنواع البيع تندرج مسألة الدفع المقدم في فقه البيوع لكن العبدلله يعتقد جازماً أن إنقطاع خدمة مدفوعة مقدماً يعد مخالفة يفترض معاقبة مرتكبها إن كانت شركة أو هيئة أو خلافه .
فهذه الشركات والهيئات تستثمر هذه المبالغ المدفوعة مقدماً ثم هي بعد ذلك لا تلتزم بوصول لخدمة للزبون .. وكلو كوم والخدمات المرتبطة بزمن معين كوم تاني … يعني شركات الإتصال تقول ليك الإشتراك في خدمة الإنترنت ليوم بجنيه واحد مثلاً .. تقوم إنتا يا مصدق ترسل الجنيه وتجي تدخل الإنترنت تلاقي الشبكة ضعيفة والخدمة تخش وتمرق … تخش وتمرق .. اليوم كلو على الحالة دي لحدت ما (جنيهك يكمل) لأنو اليوم إنتهي !
تشتكي لى منو؟ مفيش غيرو … الواحد الأحد الفرد الصمد الذي لم يلد ولم يولد .. هسه باقي ليكم في البلد دي فيها زول يشتكوا ليهو؟
رغم أن شركات الإتصال (تلغف) معظم دخول الشعب السوداني إلا أن معظمها ضعيف الأداء وتشترك في في ميزة أن خدمة الإنترنت بها متذبذبة وغير ثابتة وضعيفة في معظم الأحوال . وبحكم أنها تعد مورداً (سميناً) للصحف بإعلاناتها التي لا تنتهي (صفحة ونص صفحة) نجد أن جميع الصحف تتعامل بحذر مع أي مقال ينتقد أداء هذه الشركات مما جعلها (تسرح وتمرح) لدرجة أن أحدي هذه الشركات لا يمكن الوصول إلى خدمة عملائها إلا بعد عشرات المحاولات ! (يعني تقنع ليك من كم ساعة كده) !
الؤال الذي يفرض نفسه هو : من يحاسب مثل هذه الشركات حال إخفاقها في تقديم الخدمة المتفق عليها مع الزبون؟ للأسف الأسيف يكتنف هذه المسالة غموض شديد من الناحية القانونية فالمواطن المغلوب علي امره كخادم الفكي المجبورة على الصلاة تماما فهو مجبور على الإذعان لكل ما تفعله هذه الشركات حتى لو كان عديم القانونية ولعل أوضح مثال على ذلك هو ربط فاتورة المياه مع فاتورة الكهرباء مع أن هذه هيئة وتلك شركة ولا يوجد أي رابط بينهما؟ ولو أن هذا قد حدث في (جمهورية الموز) لأقام الدنيا ولم يقعدها ولصدر خكم قضائي ببطلان هذه (الشغلانية) ولكن لدينا كل شئ جائز وممكن ولا يمكن الإعتراض عليه ويمكن أن تذهب لشراء الكهرباء غداً وبعد أن تعطي البائع رقم العداد ويدخله إلى الكمبيوتر يسألك :
– إنتا مش الحاج عباس محمد علي
– أيوه
– وعربيتك 17567 خ ت
– أيوة
– عربيتك دي يا حاج ليها سنتين ما مرخصة؟
– (في إستغراب) وشنو يعني؟
– لو ما رخصتها ما بنديك كهرباء .. عشان ربطو الكهرباء بالترخيص !!
كسرة :
الشكية لى الله !
كسرةة ثابتة (قديمة) :
– أخبار ملف خط هيثرو العند النائب العام شنو(وووو وووو وووو وووو)+(و)
–
– كسرة ثابتة (جديدة) :
– أخبار تنفيذ توجيهات السيد الرئيس بخصوص ملف خط هيثرو شنو(و)؟
(أن إنقطاع خدمة مدفوعة مقدماً يعد مخالفة يفترض معاقبة مرتكبها إن كانت شركة أو هيئة أو خلافه .)
ماتستعجل ياأستاذ جبرا . ربنا يوم القيامة حيحاسبم ويدخلم النار . بس كده.
أهلآ بالمستشار الأقليمى للأفكار المهببة(يعنى ما دايرة ليها هبابة براها بتولع)هسع لو سمعوا بحكاية ربط الترخيص بالكهرباء حيدخلو الروشتة بتاعة الضغط برسوم أعلانات التلفزيون ولو ما دفعت العتب ماحيوروك الشهادة بتاعت ولدك الما نجح فى أمتحانات القدرات بتاعة الهايكو ،و بتك العندها رسوب فى البولينا حيطالبوها بدفع متأخرات ترعة كنانة والرهد وجنقولى بأثر رجعى بالله ماتنكت لينا المصائب كفاية أمراض النفاية!!!!
واخبارك انت شنو ياحبيبنا وعملت شنو مع ناس النفايات والمحكمة .. معليش ماتابعت الموضوع
مالك علينا يااستاذ عاوز تفتح لينا طاقه جديده..اسه فكرتك دي عقاب السنه دي يعملوها
هذا الشاعر المصری ا?تشف خبث الاخوان المسلمین خلال سنتین فقط و فشل السودانیون فی معرفتهم فی 24 سنه: وصفهم بقوله:
یا مصر یا ارض الطییبین
الی ح?موا فی الزمان دا یبقوا مین
دین ابوهم اسمو مین
حدی یعرف فی?و دین
?ل اتباعوا لصوص او قوادین؟
فی المعاصی مولدین فی ال?راسی موبدین
فی التفاهه معدودین فی السفاهه مفردین
فی البلاهه مسنودین للشراهه مجندین
ع القرف متعودین ع الشرف متمردین
ع الوطن متنرمدین فی الخیانه موحدین
اللی یعرف دین ?دا
یقولی علیه دین ابوهم اسمو مین؟
ود جبرا خليك من المواضيع البترفع الضغط وورينا عملت شنو في موضوعك العند المحكمة
يا اخي موضوع ال….. البت الجابت ليك فاتورة بي تمنية جنية وابيت تدفع؟؟؟
نسيت وللا شنو
يا اخي المحامية دييك لمن جات تدافع عنك في المحكمة بتعت عدم سداد الجبايات
ورينا القضية وصلت ليي وين
وأنا أقول الحكومة دى بتجيب الافكار دى من وين..!!!..أتاريهو إنت..!!..شكيناكا لابو إيدًا قوية..!!
ونحن ربطوا جبارتنا
الشكية للواحد الاحد الفرد الصمد الذي لم يلد ولم يولد
يا استاذ ماتشتكي للطرطور عمر البشير .. مالوا ماكويس وقام علي اللعلعه تاني
ولا اقول ليك اشتكي عند الحرامي الذي لايظلم عنده احد عبدالرحمن الخضر
انت عارف ليه شكوتنا مابتستجاب ؟
لانه الناس شايفه الظلم والفساد والقهر والنهب والاختلاس الحاصل من قبل الحكومه وساكته
وربنا مابغير مابقوم الا بعد مايغيروا هم مابهم
الناس كان ماغيرت حكومة السجم والرماد دي مافي شي حايتغير .. وشكيتنا لي الله لن تستجاب
لييييييييييييييه يالفاتح جبرا تديهم فكرة جهنمية زى دى يربطو الكهربا بالترخيص؟؟؟ طيب ماواطاتنا اصبحت انا شخصيا مامرخص لى سنتين بالضبط زى ماقلت ولما نويت ارخص زادوهو ضريبة وبقى غير محتمل..يعنى انتا قايل مابعملوها؟الله يستر ..
الشكيه لأب ايدا قوية انت ذاتك يا فاتح يا جبره نشكيك لى الله أكان كل مره تطلع بفكره يقوموا ناس حكومة السودان على طول ينفذوها – أسع في داعي تقول للناس الدايرين أي سبب ديل فكرة ربط فاتورة الموية والكهرباء مع ترخيص العربات خلاص رحنا فيها .
كسره : انت تعرف انا يا دوب صدقت ان شعب السودان مربوط من كرعينوا مع الشيطان .
يا أستاذ جبرة … موضوع شركات الاتصاﻻت وخدمتهم الانترنت بجنيه …ديل مطففين. لكن علماء السلطان ما فاضيين من القضايا الهامشية وخدمة السلطان
والله يااستاذ جبرة ضحكت كما لم اضحك من قبل عندما قرأت ( الناحية القانونية ) في مقالك الذي لامس كبد الحقيقة … ولكن من ناحية قانونية فيها مسألة قانونية ولكن المشكلة ليست في القانونية دي
المشكلة من وراء القانونية هم المشكلة .. اتوقع اذا كان من يرد عليك من اصحاب الحلاقيم الشحمانة من ذوي الصوت الجهوري الكورالي اتوقع رده بالاتي ( انتم تعلم ان شركات الاتصالات هذه ترفد خزينة الدولة بضرائب كبيره جدا ومع ذلك سنشكل لجنة في التحقيق في تظلمات الاستاذ القامة الفاتح جبرا ونحن هنا لاعطاء كل ذي حق حقه ) .. وشوية الجماعة الانت عارفهم من ورائه .. الله اكبر .. الله اكبر .. هي لله وليست …
انت قايل عشان ربنا كتب على يدك انتصارا محدودا في موضوع هيثرو .. وانتصارا مبتورا في موضوع النفايات خارج اورنيك 15 .. عايز تخش على الانترنت
كسرة
اخبار محكمة النفايات شنو لسه مادورت جلساتها ولا الجماعة عملوا تح
هل تعلم..؟؟.. المواسير الصغيرة صغيرة دي… كووولها موصلة، مع بعض، بماسورة كبييييرة..؟؟.. وكووولها.. بتكُب، في (ترعة كافوري)..؟؟.. البتروي وتسقي، المشاريع والحواشات الصغيرة..؟؟
من المفترض ان تكون هناك هيئة لتنظيم الاتصالات وتكون بمثابة القاضى والحكم فيما بين الشركات المنافسة وتعاقب من تخالف قوانين الاتصالات او من تحاول النصب على المشتركين الغلابة وتكون لديها قنوات سهلة للاتصال وتقديم الشكاوى والبحث عن الحلول online
التطفيف هو أن تأخذ حقك كاملاً وتنقص من حق الآخرين (ويل للمطففين)
عرض جنن العالم !!! ايه يا ابالسة
يا جبرا الله يهدينا ويهديك ديل مقصرين في الجبايات كمان تديهم افكار جديده هسي مش ربطو المويه با لكهرباء كمان دايرهم يربطوا الترخيص با لكهرباء؟ قريت في احدي الاخبار في شركة طيران عملت اسعار التذاكر بوزن الراكب وقلت ليهم لازم ديل قروا عمود جبرا عن زيارة جماعتنا لي دولة(جبايستان)
خدمة انترنت للشهر فقط 16 جنية لما تحاول الاشتراك فيها تلقاهم خصموا 21 جنيه من رصيدك يعني مافي داعي يقولوا 16 جنيه مفروض تكون 21 زائدا الضريبة والواضح ما فاضح
تحية طيبة ،،
والله يا اخوانا بخصوص ربط الموية بالكهرباء ما اعتقد ان دى مشكلة لان وبكل صراحة الشعب السودانى اتعود على ان لازم يعمل الحاجة ورجلو فوق رقبتو ، واى قرار كان ( اي قراااااااار) بمشى لان البرود قد اصاب القلوب السودانية ( المواطنين ) والله يسهل ….
يا استاذ جبرا انت ما سمعت بالنافذه الموحدة والحكومة الالكترونية، مهناه بلدنا دى مواكبا التطور
الأستاذ الفاتح جبره …سلامات….. كلامك تمام … ورغم أنه يعنى مش بس إستهانة الدوله بالمواطن و تمريغه على أرض المهانة و المذلة مدفوع الأجر( المبالغ العاليه مقابل الخدمات الغير مضمونه هذه) و الذى يدفعه المواطن بنفسه صاغرا للمذل بأريحية و بالتمام و الكمال …هناك أمر أرى كيف تتعمد الجهات التى تدعى بخدمة المواطن وهى تذله … و القصة وقد إقتنعت مضطرا بفكرة أن أدفع قيمة إستهلاكى للمياه ضمن فاتورة الكهرباء … ولكن صادفتنى مشكلة دفع رسم زائد على فاتورة الماء لأنى عامل عدادين كهرباء و عداد ماء واحد فى المنزل ولكنهم ألزمونى بدفع فاتورتين للماء … و ما كان علىّ إلا أن تقدمت بالإحتجاج فتفهموا مشكلتى بعد أن اضطررت دفع الفاتورة لشهرين متتاليين لكى أحصل على الكهرباء …فإعتبرت ذلك خطوة حضاريه فى التعامل مع الزبائن ما كنّا نعهده و تقدمت للمسئول و لسانى يلهج بشكر مؤسسة المياه لكى أسترد المبالغ التى دفعتها إضافيه أو إدراجها كرصيد دفع مقدم لشهرين و لكنى تفاجأت بأنهم يشيرون على بالذهاب الى رئاسة هيئة المياه فى المقرن لتسوية الموضوع و المكتب الذى دفعت فيه الفواتير فى سوبا…… يعنى أن أدفع أجر تاكسى ماشى جاى لكى أمشى الى هناك و هذا مبلغ يساوى 4 أضعاف ما سأسترده لو حصل !!!! ورحم الله إبن جلدتنا عنترة بن الشداد القائل :
حكّمْ سيُوفَكَ في رقابِ العُذَّل
واذا نزلتْ بدار ذلَّ فارحل
وإذا بُليتَ بظالمٍ كُنْ ظالماً
واذا لقيت ذوي الجهالة ِ فاجهل
وإذا الجبانُ نهاكَ يوْمَ كريهة ٍ
خوفاً عليكَ من ازدحام الجحفل
فاعْصِ مقالَتهُ ولا تَحْفلْ بها
واقْدِمْ إذا حَقَّ اللِّقا في الأَوَّل
واختَرْ لِنَفْسِكَ منْزلاً تعْلو به
أَوْ مُتْ كريماً تَحْتَ ظلِّ القَسْطَل
فالموتُ لا يُنْجيكَ منْ آفاتِهِ
حصنٌ ولو شيدتهُ بالجندل
موتُ الفتى في عزهِ خيرٌ له
منْ أنْ يبيتَ أسير طرفٍ أكحل
إنْ كُنْتُ في عددِ العبيدِ فَهمَّتي
فوق الثريا والسماكِ الأعزل
أو أنكرتْ فرسانُ عبس نسبتي
فسنان رمحي والحسام يقرُّ لي
وبذابلي ومهندي نلتُ العلاَ
لا بالقرابة ِ والعديدِ الأَجزل
ورميتُ مهري في العجاجِ فخاضهُ
والنَّارُ تقْدحُ منْ شفار الأَنْصُل
خاضَ العجاجَ محجلاً حتى إذا
شهدَ الوقعية َ عاد غير محجل
ولقد نكبت بني حريقة َ نكبة ً
لما طعنتُ صميم قلب الأخيل
وقتلْتُ فارسَهُمْ ربيعة َ عَنْوَة ً
والهيْذُبانَ وجابرَ بْنَ مُهلهل
وابنى ربيعة َ والحريسَ ومالكا
والزّبْرِقانُ غدا طريحَ الجَنْدل
وأَنا ابْنُ سوْداءِ الجبين كأَنَّها
ضَبُعٌ تَرعْرَع في رُسومِ المنْزل
الساق منها مثلُ ساق نعامة ٍ
والشَّعرُ منها مثْلُ حَبِّ الفُلْفُل
والثغر من تحتِ اللثام كأنه
برْقٌ تلأْلأْ في الظّلامَ المُسدَل
يا نازلين على الحِمَى ودِيارِهِ
هَلاَّ رأيتُمْ في الدِّيار تَقَلْقُلي
قد طال عزُّكُم وذُلِّي في الهوَى
ومن العَجائبِ عزُّكم وتذَلُّلي
لا تسقيني ماءَ الحياة ِ بذلة ٍ
بل فاسقني بالعزَّ كاس الحنظل
ماءُ الحياة ِ بذلة ٍ كجهنم
وجهنم بالعزَّ أطيبُ منزل
التحية ليك يا استاذ جبرا . ما مهم يربطوها باي شي بس اوعي يربطوها لينا بطلب الفول
يا عمنا الفاتح جبرا انا من المتابعين لكمقالاتك الرايعة ولكن من الملاحظ انو الجماعة ديل خيالهم للجباية انتهت وبقو يترصدو افاكرك العجيبة على شاكلة يربطو فاتورة الكهرباء بترخيص السيارات رسوم المقابر والمواقع المميزة وخدمات مابعد الموت لذلك ارجوك ان تفرمل حبة فى خيالك الخصب حتى لا يستفيد هؤلاء الاوباش وشكرا
المسؤوليه يا أستاذ جبره تكمن في حمايه سلوك المستهلك إذا أصلا في جمعيه لذلك
سلام يا خال
تحياتي
تعرف يا خال ده بالضبط الحيحصل زي ما بدا في بعض الدول بس تعرف ده كلو عن طريق الرقم الوطني، يعني تمشي تعمل اي معاملة او شغلانية يقول ليك جوازك ما مجدد او تامينك منتهي او بطاقتك منتهية او عليك فاتورة تلفون او عليك رادار او ما دافع العوائد ، تعرف ناسنا بيشيلو الافكار النيرة دايما من الشعوب المتقدمة بس الفرق هناك في مقابل لكن هنا تبكي بس.
يا سيد الفاتح الجبرا.. يا اخى انت لسّا فى الدفع والمدفوع والدافع والمدفوع له وبه وفيهو ولأجلو
حليلك .. يا النايم على حيلك ..اصحى وخلّيك معانا ..البرير موش زى حمال عبد الناصر استجاب للجماهير وسحب استقالتو .. ومجلس ادارة المريخ يرضو فى انتظار ألأجاويد وتدخل وزير الشباب قبل ما واحد يطلع برج أنارة ألأستاد ويحلف ما ينزل الا بعد ما يرجع المجلس عن قرار الأستقاله ..
الشعب السودانى اعيدت صياغتو خلاس .. بقى كفر ووتر…واشك انو الناس بيقرو كلامك واذا قروهو بيقروهو بدون تركيز.. حروف وكلمات مرسومه قدامن .. الشعب السودانى فى مدنى موش سبق وهتف “نحن نموت ليحيا الحوت ” .. والمسرح فى مدنى والدكاكين الجنبو قربو يلحقو امات طه .. لكن طبعن ألأعمار بيد الله .. ياخساره .. الحوت .. رحمة الله عليه.. انتقل الى رحاب ربه…
اعادة الصياغه ماشه على قدم وساق “بسيستن” واستراتيجيه نافذه انبثقت عنها خطط “طموح” تمت ترجمتها فى مصفوفة برامج عمل “غير مسبوقه” فيها ما لاعين رأت ولا اذن سمعت ولا خطر على قلب بشر .و يجرى انزالها على ارض الواقع ويتلقاها الشعب فى جرعات حسب السن والفئات العمريه (بضم العين وسكون الميم) يا سيد الفاتح : يافع فى سن اربع سنوات على “الفضاة القنائيه” يشدو باناشيد الحماسة الأنقاذيه. ويقول” …..”والبدور الدواس بنلحّقو امّات طه.. بنلحقو امّات طه” طه دا منو؟ طه القرشى! ام طه جد القمرين النيرين :على والزبير
لك التحية استاذ جبرا.انتا عارف انو عند اجراء اتصال من السعودية على رقم تابع لشركة زين او 09 يتم خصم من الرصيد قبل حتى بدأ المكالمة .تحس المسالة دي مبرمجة (عملية لحس الرصيد قبل بدأ المكالمة).المسالة دي حاصلة منذ زمن.فلا تستغرب ان يربطو اي حاجة بي اي حاجة
(الشكية لى الله).. كما قال حتى أنت يا… الشكية لله و ليس كما كتبت .. برضو خطألغوي فاااااااااااااااااادح .. ياخ أرحمونا !!!
فكرة برضو وماتنسا تخليهم يعملوا ضريبة علي عدد الخطوات البمشيهاالمواطن يعني لو جاي من التي للخرطوم احسب كم كيلوا وححد قيمة ثابتة للكيلو لزوم احتياجات الامن وسلامتك وكل يوم تعيش تشوف عجايب وغرايب
اقتراح للاستاذ الفاتح بعدم الكتابة عن اى اقتراحات لناس الحكومة لانهم ما يصدقوا ويعملوا بيها على طول , ديل لو اديتهم اقتراح ببيع الهواء لفعلوها بس تكون بى اخراج من اخراجات يا استاذ جبرا