اقلبو الهوبة …
والبلد دميرة .. والخضار مافي … والحالة صعبة شديد …
قريبنا الرباطابي سافر الخرطوم … من أجل التغيير.. وشوية راحة .. وعلاج …
ووصل بفضل الله .. والخبار والونسة..
أها ناس البلد انشاء الله كويسين …
أها خليتتن كيف وراك ..
قال ليهم والله طيبين … بس ..
الفطور … قراصة بي بصل ..
والغداء … قراصة بي بصل …
والعشاء … قراصة بي بصل ..
غايتو لي هسع … يكونو اتقلبو فيراااان …
وده زمااان … زمن في قمح .. وفي بصل .. يعني في شوية زراعة .. أها هسع لافي زراعة ولا قمح ولا بصل … ما عارف الناس … تتقلب شنو ..
والله غايتو إلا … يقلبو الهوبة …
والإمتحانات … وكراسات الطلبة … والأستاذ يصحيح فيهن …
ومسك كراس طالب ..
الصفحة الأولى .. مكتوب بي خط عريض ..
أقلب الصفحة ..
والاستاذ قلب الصفحة ..
الصفحة التانية … ومكتوب بي خط عريض ..
اقلب الصفحة …
والأستاذ قلب الصفحة …
الصفحة التالتة … ومكتوب بي خط عريض ..
اقلب الصفحة …
والأستاذ قلب الصفحة …
لامن وصل الصفحة الأخير .. لقاهو كاتب …
أقلب هوبة …
