المنحة التي تبخرت
الفساد المالى أشكال وأنواع .. منه الإختلاس وهو أن تهبر من الخزنة أو الحساب البنكي وتحول المبالغ لصالحك .. ومنه التزوير كان تقوم بوضع أسماء وهمية للعاملين في قائمة المرتبات وتقوم بالإستلام إنابة عنهم .. أو (البرشته) كأن يوكل لك الصرف على أحد الأعياد أو المناسبات فتصرف (النص) وتضرب (النص) التاني .. ,ولو سألوك القروش دي مشت وين (ده يعني لو سألوك) تقول ليهم (التلج براااهو جبناهو بي عشرة مليون) ومن أنواع الفساد المالي (الكومشنات) وهذه معروفه للجميع ! وهنالك الكثير من أنواع (السف) الذي لا تسع المساحة لذكره غير أن (القصة الجاية دي) توضح لنا نوع من الفساد الذي يعجز (الشيطان ذات نفسو) القيام به …
– قال لي صديقي هل أتاك حديث (المنحة التي تبخرت) ؟
– قلت له كلا يا أخا العرب !
– قال لي طيب أقول ليك : قامت إحدي الدول العربية الشقيقة بتقديم منحة إلى وزارة التعاون الدولي (قبل تفكيكها) .. الوزارة إستلمت المنحة .. والقروش إتبخرت وما معروف مشت وين؟
– ثكلتك أمك .. قل حديثاً يدخل العقل .. إتبخرت كيف يعني ؟
– إتبخرت عديل كده وإختفت
– أتريد أن تقول أن هذه المنحة لم تظهر في الأوراق الرسمية؟
– وللا الما رسمية ذاااتا يا استاذ
– ومن أين أتيت بهذا الحديث الخطير يا هذا ؟
– يا أستاذي إنتا قايلني (ناجرو من راسي)؟ هذا ما جاء في تقرير المراجع العام لسنة 2012 م !
– وماذا يقول هذا التقرير ؟
– يقول التقرير يا أستاذ إنو في «721» مليون جنيه مجهولة الجهة دخلت حسابات حكومة السودان عبر وزارة التعاون الدولي السابقة قبل تفكيكها، ولم تتبين اوجه صرفها في الاضابير الرسمية !
– هل أنت متأكد من أن المراجع العام (ذات نفسو) قال في تقريره أنها (مجهولة المصدر) !
– بلى .. قد قال
– طيب إذا لم يعلم النائب العام من أين أتت هذه المنحة أيصعب عليه أن يعلم إلى أين ذهبت أموالها؟
– والله الظاهر قدر ما (حفت) ما قدر يعرف
– ولماذا لم تظهر في الأضابير أليس بهذه الوزارة (دورة مستندية؟) .. إلا يوجد بها مسؤول يتحري معه ؟
– والله ده الحصل
– ثم أليس هنالك لجنة بالبرلمان تسمىا (لجنة الحسبة) وهي مسؤولة عن مراقبة الاداء المالي ويقدم لها تقرير المراجع العام لإجازته والتوجيه باتخاذ الإجراءات اللازمة في مثل هذه الحالة؟
– والله الظاهر اللجنة عملت نايمة !
– هل تعني أنهم لم يقوموا بعمل التحريات اللازمة لإستعادة ÷ذه الأموال المنهوبة في هذه البلد المنكوبة ؟ لماذا لم يتوصلو للفاعل هل هذه المهمة صعبة وتحتاج إلى المحقق (كونان) !
– هي يا أستاذ ما صعبة .. لكن نعمل شنو مع فقه (السترة)
– إيتستر القوم في مال عام والبلاد تئن من شدة الفقر والمرض والجوع ؟ هل يعقل أن يقوم شخص بتحويل (منحة) لمصلحتة الشخصية بينما والنائب العام (يعلم) .. ووزارة العدل (تعلم).. ولجنة الحسبة بالبرلمان (تعلم) ؟ أليس هذا غريب مريب
– والله يا استاذ من ناحية غريب فهو غريب ومن ناحية مريب فهو مريب شديد !
.. رايك شنو يا استاذ في الزول الضرب المنحة دي؟
– والله إني أرى أن نقوم بقليده وسام السرقة الذكية .. وأن تقوم (جينيس) بإدراجه ضمن من قاموا بتحطيم الأرقام القياسية ..!
– هل يمكن يا أستاذ لبلد أن يستباح (مالها العام) بهذه الصورة (العجيبة) وأن يتم التعامل مع (اللصوص) بهذه الشكل (المريب) .. يعني عرفنا الزول (يسرق) لكن يقوم يسرق ليهو منحة مقدمة لي (بلد كاااملة) ؟
– والله يا بني دي ما أدونا ليها ! ولا أظنها قد حدثت لأمة من الأمم .. إلا في عهد أمثال هؤلاء المسؤولين (الرمم) الذين لا يتورعون عن أكل الحرام ولا يفتأوون يتحدثون عن الإسلام .
– وإنتا يا أستاذ في الحالة دي دورك شنو؟
– دوري هو أن أتقدم بهذا المقال للدكتور/ الفاتح عزالدين رئيس لجنة الحسبة بالبرلمان ليوضح لنا ما حدث بهذا الشان ! ولو كمان (القضية) ماتت وشبعت موت يبقى اخير لينا السكوت !!
– كسرة :
(مسؤول) يضرب (منحة بلد) .. لا حولة ولا قوة إلا بالله .. الفااااتحة
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟
والله المسؤولون رمم وفادين للذمم لكن برضو الشعب جبان وخائر.
هى لله لا للسلطة ولا للجاه بعد دا كل صابرين لا يغير الله ما بقوم حتى يغيروا ما بانفسهم
بالجد في ناس بالطريقه دي ياجماعه الناس ديل حدهم بتين دايرن نرجع السودان وخايفين
وانا دوري ان اتقدم الى العليم القوي العزيز الذي حرم الظلم على نفسة ، ان ينقذنا من أهـل ” الانقاذ ” وان يفضحهــم في الدنيا والاخرة، وان يجعــل كيدهم في نحرهم. امــــــــــــــين.
اللهــم ان كنا نحـن عبيدك وابناء عبيدك وحرمت الظلم ان تنقذنا من هؤلاء
انت مالك دار تفقع باقي مرارتنا ؟؟؟؟؟؟؟؟؟؟؟؟؟؟؟؟؟
والله يا استاذ اعمل حسابك بعد كدة وممكن تكون هنالك عده احتمالات اذا حاولت أن تنبش الموضوع
يا أخوي الناس ديل اعمل حسابك منهم ديل ناس شر وربنا يحفظك اذا كان واحد سرق مليارات يعني ممكن يسوي اي حاجة لانو زول ما عيندوا ايمان ولا دين بالعربي ممكن اي شي تتوقها منه
ولك السلام والتحية ونحن معاك
أحد الشوايقة أراد أن يدخل المستشفي في غير مواعيد الزيارة منعه القفير المفتول العضلات من الدخول ؟؟؟ تطاول الشايقي عليه وقال ليه كمان يا عبد تمنعني أنا ؟؟؟ فما كان من القفير الغاضب غير يشيله فوق ويضرب بيه الأرض ؟؟؟ أفاق الشايقي من الدوخة وقال ليه دحين أنا ماني داخل لكن بطريقتك دي يوم بتقضالك زول ؟؟؟ وأخينا الفنان اللهط المبلغ المهول دا يوم بيشيل ميزانية السودان كلها تحت عين الأسد النتر وما جايب خبر ورقص لمن فتر وبقي يمشي مكلوج ؟؟؟ وأخبار مشروع الجزيرة شنوووو أقصد خط هيثروووو ؟؟؟
غفل الناس عن الحلال والحرام، ولا يدري هذا الفاعل ان هذه الدنيا سويعات معدودة ويصبح بعدها من اصحاب القبور وساعتئذ يا ليتني مت قبل ان اسرق يا ليتني عشت بما قسم الله لي
اللهم لا علينا ولا حوالينا
اتذكروا الله والموت بالطائرات وحوادث السيارات قبل التوبة؟؟؟؟؟ حسبنا الله ونعم الوكيل…..
يا جبرا بصراحه كده أنا واحد من الناس القلبوا طوبة الجماعه ديل وتفرقت تماما لمتابعة آخبار أخوانا المصريين وما هم فاعلون (بريا المصرية شقيقة سكينه السودانيه) وأنا أردد فى سرى كلما أشاهد قنواتهم (ياحسره..عليهم..يا حسره..عليهم)ولا سيما بعد أن تمكن الاخوان هناك وآخذوا برقبة الشقيقه مصر والجماعه ما فتئت تذبح مقدرات الشعب المصرى الطيب وتحولها لصالح (مشروعهم الحضارى) بس ديك على الطريقه المصريه (بلع..بلع) يعنى مافى (مضغ)والجماعه هناك جاءوا مشمرين عن سواعدهم و(لقف بالجمله والمفرق)يازووووول ديل عايزين يبلعوا قناة السويس حته واحده… يا جبرا سمعت ليك بقوة عين ذى دى ؟!!وكلو بالقانون يا جبرا.. و(هى لله)بتاعتنا هناك شغاله (تش)!!لكن فى صمت قبور.. وما فى يمه أرحمينى!!وسبب آخر وجوهرى يجعلنى أتابع جماعة الاخوان فى مصر،وكما يقال إنك تستطيع أن تشاهد الصوره كامله كل ما إبتعدت من الكادر وأنا عايز إتأكد إن كان الحاصل لينا ده (حلم) أم (حقيقه)وهل هناك إناس يسرقون وينهبون ويلطشون عينى عينك دون أن يهتز لهم جفن او ترمش لهم عين او بالبلدى (بلا خجله)والمصيبه كلو بإسم الدين الحنيف كان عندنا وألا عند اولاد (بمبه)!! وبالمناسبه ضيف لاجندتك يا جبرا أن الجماعه ديل يعلنوا زيادة آسعار فى سلعه معينه وخاصة إذا كانت مستهلكه (كالبنزين والجازولين والسكر على سبيل المثال وليس الحصر) وبعد أسبوع من التطبيق الفورى يتم التراجع..وهنا يكون قد نشاء فرق سعر بالملايين إن لم تكن بالمليارات ولا يعلم مخلوق أين ذهب الفرق الذى إكتسبوه خلال الاسبوع..لا تقولى لجنة حسبه ولا مراجع عام وكلو…بالقانون..يا (سياتك)والاخيره دى على طريقة النظاميون الافراد عندما يخاطبون رتبه أعلى منهم فيسقطون حرف الدال عمدا ربما لان (سيادتك كثيره عليهم)وما بيستاهلوها وأنا معهم قلبا وقالبا طالما إرتضوا ان يهينوا أنفسهم و قبلوا يحراسة هكذا نظام زعما منهم إنهم يحسنون صنعا..ولله فى خلقه شئون!!.
زي ده سمعتو بيهو؟2.ماتتعب نفسك ياأستاذنا,وماتفقع مرارة القراء(ناس أبوالهول)وأعمل العنوان بالارقام.زي ده سمعتو بيهو(2 و3 و4…… الخ
الزول ذي دا يا الفاتح يبدو واثــق من نفســه وإمكانياتــه عالية وواصـل، ذلك ان لم يكمــن معــه واحــد كبير ، فنيصــحتى لك ان تشيف رزق اولادك ، فلكل ظالــم يـوم ، اللهم اخــذهم كما كأخذك لابراهـيم شمس الدين والزبير والمجــذوب وكل ظالم منهم.
عادى ما شايفة حاجة جديدة فى فساد افسد الفاسدين خليهم يتمتعوا قليلا ويوم الجق يوم لا ينفع مال ولا بنون خلى اموالهم التى اكتنزوها بالحرام تنفعهم
اخى الفاتح السلام عليكم
والله الموضع عجيب لكن لو عملت ليه كسره ثالثه ممكن الواوات ما تلقى حته تكتبها على وعلى البلاد السلام
أستاذ/ جبرة والله لو أبليس بيتصور بكاميرا لوجدته واضعا كفى يديه على خديه(متمحن) ومقطب الجبين وفاغرا فاهه من فعل هؤلاء القوم الذين قالوا أن الأسلام لهم وحدهم وأن الدين قد فوضهم فى فعل كل حرام وأليس قال شيطانهم(على عثمان) بأنها أرزاق ساقها الله لهم.غايتو الفى رأسنا كملوه نقول مافيا فالمافيا لم تسحت أموال دولة أرسلت منحة لأيطاليا.نقول حرامية فالحرامى فى أحيان كثيرة الظروف تركته يلجأ للسرقة ليقتات هو وأسرته وبعد يشبع يوقف السرقة .مافى شىء يشبه هؤلاء ألا الماسونيين الذين هدفهم الأول تدمير الأسلام ولهط الحرام فى كل الأتجاهات من غير وجل.لو ما خافوا مننا نحن الشعب فليخافوا المنتقم الجبار الذى يذل الجبابرة,حسبى الله عليهم والله فى.
رجعت تانى ليك ياود جبرة لأنه الكلام ده حقرنى ووجعنى شديد فتذكرت الوزارة الأدوها المعاش دى ماكان ماسكها صاحبك بتاع خط هيثرو(الشريف ودبدر) وطبعا الشرف بعيد عنه وهو شريك أصيل فى اللهط مع صاحبه (على عثمان) عشان كده لا نائب عام ولا نائب خاص ولا مجلس وطنى ولا غير وطنى لأن اللعب ده لعب دوليين ومحترفين وكل سرقة لو أردت معرفة خيوطها فتجد نهاية الخيط ممسوك بيد هذين الشخصين وقصاص الأثر فجأة يجد نفسه أمام هذين اللصين(أمك أمسك حرامى).
هل هناك علاقة بين الفاتح جبرا و روبن هود.؟
الفاتح جبرا (كسرة(مسؤول) يضرب (منحة بلد) .. لا حولة ولا قوة إلا بالله .. الفااااتحة ) . يا فتح جبرا بلله عليك . هي بلادنا بتاخد منح أنت ما سمعت وزير خارجيتنا على كرتي في لندن تبرع بمليون يورو للصومال وكشف عن ألف منحة دراسية جامعية للطلاب الصوماليين يا جبرا حرام عليك تسئ لبلادنا وتقول ( مسؤول ) يضرب (منحة بلد) يا زول ما تهظر منحة شنو البضربها مسئول !!!!. وبلادنا بتتبرع بمليون يورو لفقراء الصومال
ههههههههههههههههههههههههههههههاي والله يا جبره من الضحك ماقادر اكتب وفعلا شر البلية ما يضحك انتا عارف يا جبره ابليس زاتو بكون بضحك اللهم اخسف بهم الارض
صحيت بالمؤذن وحالتك تحزن
مرقت وسرقت الوبال
معكز ملكز بسيخة ونعال
مكتف ملتف بأغلظ حبال
وغيرك بخزن جميع الغلال
يسرق ويهرب جمال
باسمه اللواري تهد الكباري تباري الجبال
سيادته يدبر شئونه الأماسي
يرش الحديقة ويرص الكراسي
ما بين الغواني ورنين الخماسي
تعاين تشوفه تقول دبلوماسي
يمضي ويرضي ويهدي المحال
كمان لو تلاحظ صديقه المحافظ
وقالوا الملاحظ عيونه الجواحظ تباري الريال
حليلك بتسرق سفنجة وملاية
وغيرك بيسرق خروف السماية
تصدق في واحد بيسرق ولاية
ودا أصل الحكاية وضروري النضال
ضروري النضال
البلع المنحة معروف لدي الجميع لكن ما في زول يقدر يجيب اسمه – هو شقيق الراس الكبيرة و اسمه يبدا ب ع و ب و د كان طبيب و كان لواء في الجيش و تفرغ للبزنس و يملك حوالي 22 شركة — كان ما عرفتوا بعد كدا الا تتعاقدوا مع المحقق كونان شخصيا .
الفاتح جبرا والطاهر ساتى وغيرهم من الصحفيين كل يوم بتكتبوا نفس الشئ عن الفساد ونحنا نعلق نفس التعليقات.. اللصوص والحرامية معروفين وبيسرقوا بى عين قوية ومن امن العقاب اساء الادب.. تقرير المراجع العام فى كل سنة لا يختلف عن السنة القبليهو.. الحاية بتتكرر كل مرة والحرامية طول ما هم طلقاء ما حنعرف المال الضائع مشى وين مش لو استعنا بالمحقق كونان، لو جبنا معاه المفتش كلومبو ورجل المستحيل والمغامرون الخمسة والشياطين التلطاشر.. لو ما قامت انتفاضة وقبضنا افراد العصابة الحاكمة اصلاً ما حنعرف القروش وين وترجع كيف..
استاذ جبرا احيك علي هذا المقال الرائع واتمني منك ان تكتب لنا عن الطبيبة التي قتلت غدرا وخسة واغتيلت سمعتها وشرفها وعفتها بعد مقتلها والمولم في هذه القضية ان اسرة الطبيبة قد ذهبت للسفارة قبل مقتلها لتشكو لهم ولكن سفارة السجم الرماد لم يتكرم الله عليها بشئ غير انهم قد نصحو من اتاهم بفتح بلاغ في القسم وكانهم كانو لايرون القسم ابتداءا وهذه معهودة في سفاراتنا في واقسم بالله العظيم ان الموظفين في كل سفاراتنا لايهمهم ما يجري لرعاياهم ولايهمهم شئ غير مخصصاتهم وامتيازاتهم وفي راي الشخصي من الافضل ان نكون بدون سفارات اذا كانت بهكذا شكل وبعد قتل الطبيبة مع سبق الاصرار والترصد جاء الاعلام المصري صحافة واذاعة وكل القنوات الفضائية لتقرر ان الطبيبة السودانية كانت تدير شبكة دعارة ؟ وفي هذه ايضا لم تحرك سفارتنا ساكنا بل علي العكس من ذلك قامت بتكريم الممثل يحب الفخراني في البيت السوداني والذي كان قد اعتذر عن الحضور للسودان لتكريمه ؟؟؟؟فانظر الي اين اوصلنا هؤلاء المتاسلمين واكثر ما اوجعني في هذه الفاجعة سكوت الاعلام السوداني عن الخوض في هذه القضية زهير اما قنواتنا الفضائية فهي سادرة في غي الاغاني والاغاني والبرامج التي تذكرني ببرنامج طابور الصباح المدرسي اعداد فطير تقديم سمج ووووووووووو
721 ميلون!!!!؟؟؟ميلون ينطح ميلون!!!؟؟؟
واللهى راجل
أستاذنا وعمنا الفاتح . سؤال ليه المعارضة ما تتبنا مثل هذه القضايا كقضايا رأي عام وليه ماتحشد لها مجموعه من المحامين ولا الشغله كلها دلاقين
كسراتك كترت ومع تقدم العمر العظام ما بتتحمل الكسرات الكتيرة ربنا يديك الصحة والعافية .
هو الانضرب شوية البلد كلها منهوبة بقت محمية انقاذية وانحنا لينا الله والهجرة عشان نعرف نستر حالنا بس وين علماء الغفلة ولا مافاضين لانه في قضايا كبيرة تمس الدين كالختان ولعب البنات للكورة مصيبتنا في هولاء الذين دمرو الدين علماء السلطان حسبنا الله ونعم الوكيل فيهم
الاستاذ / جبرا – الموقر
لك التحية
يا استاذ الكسرات حقتك كترت بس حاسب تكبر اللفة حتروح في الرجلين . بعدين لم تقل لنا ال 721 مليون دي بالقديم ولا بالجديد لانو لو بقت بالقديم تعتبر حمي خفيفة وانا كمواطن حقيقة مسامح فيها واعتبرها حافز لانو الجماعة قدرو ظروفنا وحنو علي حالنا لانو بلعة زي دي تعتبر عندهم تسالي ولعب وليدات ساكت وبلعة للهضم اما اذا كانت بالجديد فتعتبر عندهم فرشة للبلعات القادمة طبعاً هذا وفق ما هو متعارف بينهم في فقه السف حسب معايير ناس الحسبة . ( تهليل تكبير ارمي قدام هي لله لا للجاه والسلطان ) . وابكيك ياوطني العزيز ( cry the beloved country )
ولكن يا ابا جبرا اما سمعت عن(المتنورين )؟
والله ان امرهم لعجبا وحكايتهم قلة ادبا
المتنورين صبية ينتمون لرجل الان فى غيابة القبر
قالوا اذكروا محاسن موتاكم
فهل يجوز لنا ذكر محاسن فرعون مثلا ؟
لانه لم يتم التحديد ( اذكروا محاسن موتاكم المسلمين )
شيخ المتنورين ابتلى بداء عضال والعياذ بالله
يتصيد تلاميذ الثانويات بسيارته الجخ
ومن يرضيه فقد اصبح من المتنورين
وتفتح له ابواب النعيم يدخلها من اي باب شاء
احد المتنورين كان شابا فقيرا نادرا ما يوقد فى دارهم نار للطعام
اصبح من اصحاب الحظوة والخطوة
ابتدأ مع صلاح قوش فى بيوت الاشباح
الفتى الارعن المنكسر اصبح مصاص دماء
واليوم عيون من عذبهم تراه يشد الرحال مع وفود التفاوض
من بلد الى آخر فيغمى عليهم من شدة المفجأة ؟
جزار البشر يظهر فى اجهزة الاعلام انتفخ مثل قطة المطاعم السمينة
بعد ان عانى من جوع وقحط
استبدل السخينة بالبوفيهات المفتوحة
استبدل الكدارة بالطيارة (اشارة للذهاب كداريا ) لانه لا يملك كدارة حقيقية فيما مضى
اصابعه تقطر دما واليوم يصافح الرؤساء
انت يا سيدى تتكلم عن سبعمائة واحد وعشرون مليون تبخرت ؟
ولكن هذا المبلغ عند هذا المتنور لا يساوى شروى نقير امام ما يلهطه
من الاموال المتبخرة كتلك المتبخرة من وزارة التعاون الدولى
هذا متنور واحد يلهط مليارات الشعب الذى يموت جوعا
فما بالك ببقية المتنورين اشباح الظلام ؟؟؟؟؟
والله والله لو جمعنا ما فى ايدى المتنورين وحدهم لما نام احد جائع فى هذه البلاد
المنهوب خيرها بأيدى تجار الدين والمتنورين
أسأل كل شخص يسير فى الشارع هل تعرف متنورا
او متلمبيا او متنفعا او متغزيا او متأشرقا او متوددا
سيحكى لك غرائب المتنورين الذين جاءوا من الجوع والعدم
لتحصى اياديهم الجافة المتعرقة مليارات من حق الشعب
بعد ان اكل الفقر جلودهم ولاكها اصبحوا
كبقرات سمان اكلن غلة اربعين مليون مساكين عجاف
جنا عليهم زمان بقحط وثنى جثم على صدورهم عقدين ونيف من الزمان
فأكل الاخضر واليابس وباعوا اراضينا لنخاسة الحمير
وما ذال المزاد مفتوحا على مصراعيه
الشعب ياكل تبن ويلتحف الارض ويتدثر بالسماء
وعبدة المؤتمرالوثنى يفترشون الدمقس والحراير
ابا جبرا سر بنا الى ارض غير هذه الارض
نخاف سخط الجبار ان يصيبنا لكثرة ما انتشر المتنورين
الذين يهتز عند فعلهم عرش الرحمن